JESU tarọ jovwo nẹ idibo rọyen che vun orhọ rode vwẹ ọke oba na. (Mat. 9:37; 24:14) E ja mrẹ oborẹ eta rọyen na rugba vwẹ idjerhe oghẹresan vwẹ ubrakpọ rẹ Transcarpathia vwẹ Ukraine. Ikoko 50 ri vwo ighwoghwota re vrẹ 5,400 yehẹ irere erha rehẹ ubrakpọ yena. * Vwẹ irere erha yena, asan rẹ ihwo 4 hepha, ohwo 1 usun rayen Oseri rẹ Jihova!

Mavọ yen ẹkuotọ rẹ ayen de ghwoghwo na hepha? Oniọvo ọvo re se Vasile tare nẹ, “ihwo na vwẹ ẹro ọghanghanre vwo ni Baibol na kugbe orhiẹn-esiri; ayen chọn ohwohwo uko, orua ọvuọvo ji yerẹn kuẹgbe.” Vwọba, ọ da ta: “Ọ dia ọkieje yen ayen vwọ rhọnvwa phiyọ iyono rẹ avwanre-e. Dedena, ayen nabọ kerhọ siẹrẹ e de dje orọnvwọn kẹ ayen vwẹ Baibol na.”

Vwọrẹ uyota, ighwoghwota re wian ubrakpọ nana hirharoku egbabọse oghẹresan, kidie ayen bunrun mamọ. Kerẹ udje, ukoko ọvo vwo ighwoghwota 134, ẹkẹvuọvo iwevwin 50 ọvo yehẹ ekogho rẹ ayen de ghwoghwo! Mavọ yen ighwoghwota na vwo phi egbabọse nana kparobọ?

Buebun rẹ iniọvo na vrẹn nẹ ekogho na ra ga vwẹ asan ra da ma guọnọ ukẹcha. Oniọvo ọshare ọvo re se Ionash rọhẹ ẹgbukpe 90 da ta: “A da ghare iwevwin rehẹ ẹkuotọ rẹ avwanre wian na vwẹ uvwre rẹ iniọvo na, iwevwin ivẹ yen oghwoghwota ọvuọvo de se ghwoghwo. Mi ghwoghwo vwevunrẹ ọko ọvo. Dẹvure mi vwo vwo omakpokpọ, nẹ ọke ra ruọke yen mi ji vwo kpo ẹkuotọ ọvo rẹ ukoko vuọvo hepha-a, rọ vwẹ omarẹ iroko 160 vwo sheri kẹ asan me dia. Oboyin kọyen mi de ghwoghwo ota kẹ ihwo re jẹ ephẹrẹ rẹ Hungary.” Ighwoghwota na nabọ vwẹ ukẹcha phia vwẹ ẹkuotọ efa. Oniọvo Ionash da je ta: “Ughọjọ 4 rẹ edegburhiọke yen mi vwo vrẹn rere me sa vwọ mrẹ itreni ro. Mi de te oboyin, ki mi ghwoghwo ota te ughọjọ 6 rẹ ovwọnvwọn rẹ itreni na vwo rhivwin kpo. Eriyin mi ghwe ruẹ, abọ ivẹ yẹrẹ erha kudughwrẹn kudughwrẹn.” Oniọvo Ionash mrẹ erere vwo nẹ ẹgbaẹdavwọn rọyen na? Ọ da ta: “Me riavwerhen rẹ ọke me ghwọrọ vwo ghwoghwo ota vwẹ oboyin. Oma vwerhen ovwẹ nẹ me sa chọn orua ọvo uko vwọ mrẹ uyota na vughe.”

Vwọrẹ uyota, ọ dia ihwo eje yen se kpo asan oshesheri tiọye-en. Ẹkẹvuọvo, ihwo eje ji te ighwoghwota re kpakore, nabọ davwẹngba vwọ wian ẹkuotọ na eje ra ghare kẹ ukoko rayen. Ẹgbaẹdavwọn rayen yen nẹrhẹ ihwo ri joma te ọhwọhwọ ivẹ rẹ uchunu rẹ ighwoghwota na yẹrẹ ri te ubro rẹ uchunu rẹ ihwo re dia irere erha yena, se kpo Ẹkarophiyọ rẹ Ughwu rẹ Jesu re ruru vwẹ oboyin vwẹ 2017. Aphro herọ-ọ, uphẹn herọ re vwo “dje ebuo-ebuo phihọ vwẹ iruo rẹ Ọrovwohwo” na, o toro asan rẹ avwanre da ga-a.​—1 Kọr. 15:58.