1, 2. (1) Saikoray a mitolon ci Yis ato tarokos, o maanan ko micangacangan hani? (2) Hano ciharatengay ci Yis to tarokos, mamitafo to makelec hakiya?

TIYA malacafay ci Yis to tarokos a komaen to saikoray a lafi i, ciharatengayto wa ngaˈay cangra mitafo to makelecay hakiya. Malacafayay ci Yis cangranan a mitolon, sowal sa nanay malacecay ko nisawawaan, matiya o nika lacecay ningra ato Wama. (ˈOsien ko Yohani 17:20, 21.) Makelec a malacecay ko nisawawaan wa ngaˈay misawacay, o na miocoran ni Yihofa ci Yis tayni i hekal. O tahapinangan no soˈlinay Krisciyang ko olah, ano ira ko matiniay capeling no nisawawaan, wa ngaˈay matafo ko makelecay.​—Yohani 13:34, 35.

² Pasowalay ci Yis to kalimelaan ko makelecay. Mahapinangay ni Yis i kalalaˈed no tarokos, cangoˈotay ko makelecay a harateng. Tinakoen tiya saikoray a lafi i, miliyaway ko tarokos malacongis to “o cima no mita ko mamalasatadamaanay.” (Luka 22:24-27; Marko 9:33, 34) O roma, ci Yakop aci Yohani micangacangay ci Yisan, pafeli cangranan to kalimelaan a saaroˈan i Hongti Kitakit.​—Marko 10:35-40.

3. (1) Iraay ko maanan a lalangian mifekad ko saka eca ka makelec no nisawawaan hani? (2) Oni lalakaw, wa milengo to manan a salicay?

³ Kawraan, o saka eca ka makelec ko nisawawaan, cowa ko sapitaˈlifaw  aca nangra to tao, iraayho ko roma lalangian. O lekakawa itiya, pakayni pisaˈada ato misakakinihay a maliwasak, o laliyasen no Krisciyang ko hatiniay nanaman. Toni lalakaw, wa milengo kita to laenoay salicay: Samaanay ci Yis misiˈayaw to misakakinihay harateng? Samaanay cingra padama to nisawawaan, minanam tano masadafdafay micada to tamdaw ato mitafo to makelecay? O sapasifanaˈ ni Yis a kimad samaanay mikelec kitanan a malacecay hani?

4. Micadaay ci Yis to manan a pisakahemaw hani?

⁴ Na misakahemawan no tamdaw ci Yis. Tinakoen, pasowalen ni Filip ci Natanail to mahelaay ningra ci Misiya i, sanay ko sowal ni Natanail: “Ira ko maan to ngaˈayay a demak i Nacali a niyaroˈ saw?” (Yohani 1:46) Nao mamafanaˈ ci Natanail, mihaen o sapairasol i Mika 5:2, wa itini Piclihim a hofocen ci Misiya, hanaca harateng ningra o mimingay a niyaroˈ ko Nacali, mana o niyaroˈ ni Misiya sanay. Roma i, iraay ko saaroˈan a Yutiya tamdaw, mafanaˈ to o Kalili a tamdaw ci Yis malikafay cingranan, samanen ˈalomanay a Yutiya tamdaw, cowa pakatoor tamiyanan sanay. (Yohani 7:52) O roma Yutaya tamdaw padetengay pasowal to o Samariya tamdaw ci Yis, mihaen a pakangodo cingranan. (Yohani 8:48) O finawlan no Samariya ato Yutaya, itini finacadan ato pihakelongan o taˈangayay ko kasasiroma, mihaenay o Yutiya ato Kalili a tamdaw, cowa ka ngodo cangranan, cowa ka picawmaˈ cangranan.​—Yohani 4:9.

5. Micadaay ko nisawawaan ni Yis to maanan a pisakahemaw hani?

⁵ Tada misakahemaway ko ˈaˈideman no Yutaya to nisawawaan ni Yis, sowal no Farisay tamdaw to mikotoday ci Yisan a tamdaw “o mamaˈkak no Kawas!” (Yohani 7:47-49) O pinengneng nangra to cowa tayra i lapi picudadan ato cowa pidofdof to nanaman nangra o kalo a tamdaw sanay, hanaca mapiliˈay to hatiniay tamdaw. (Dmak 4:13) O macadaay ni Yis ato nisawawaan a masakakinihay, milingatay to pihakelongan, siyakay, kasasiroma no finacadan. Mafiyoray no hatiniay harateng ko nisawawaan, hato iraay ko misakakinihay harateng to tamdaw. Ano sakakelecaw cangra, kalimelaan ko pifalic to harateng no niyah.

6. Tinakoen, mitadtad samaanay ko tamdaw mafiyor no masakakinihay a harateng.

⁶ Anini, matomesay koniya hekal to masakakinihay harateng. Masakahemaway no tamdaw kita halatek, kawra misakakinihay ko harateng ita to tao halatek. O cecay itiniay i Australia misakafahay a fafahiyan salikaka sanay: “Isalakat ciharatengay kako to macadaay a cowa ka sadafdaf no Yincumin, mihaenay tada mapiliˈay kako to kohecalay tamdaw. Na masamsamay kako, matongalay ko ˈinteh ako to kohecalay a tamdaw.” O cecay Kanataay faˈinayan salikaka, masakakinihay ko harateng to cowa ka hecad ko sowal a tamdaw, mihayay cingra: “Ikakaay ko kaidahi no somowalay tono Frans ko sowal tamdaw, ikorto mangalefay ko pisaˈada ako to somowalay tono Padaka a sowal a tamdaw.”

7. Samaanay ci Yis misiˈayaw to misakakinihay?

⁷ Anini, o misakakinihay harateng no ˈalomanay tamdaw pasangarayto a salofen, mahecaday i romiˈaday ni Yis. Samanay ci Yis a misiˈayaw to masakakinihay harateng hani? Saka cecay, cowa pisakakinih ko falocoˈ ni Yis to tamdaw. Ano cihafayayto manikawayto, o Farisay tamdaw anca o Samariya tamdaw, halo milisataay tamdaw ato mararaway a tamdaw, pahecadan ni Yis ko pinengneng mitosil cangranan. Saka tosa, tano sowalan ato waywayan ko pasifanaˈ ni Yis, padama to nisawawaan cowa ka ngaˈay cisasa to tao ato, ira ko misakakinihay a harateng to tamdaw.

8. O manan a safalod padamaay to Krisciyang pararid a makelec hani? Tadtaden hena.

⁸ O sapasifanaˈ ni Yis to nisawawaan a kalimelaan safalod, wa ngaˈay padama kitaanan pararid  to makelecay, oniya safalod i: “O malikakaay kamo a maemin.” (ˈOsien ko Matay 23:8, 9.) Manaokaniw, o teloteloc ni Atam kita, sahetoay o malikakaay. (Dmak 17:26) O roma, sowal ni Yis, o Wama hananay no nisawawaan ci Yihofa, mihaenay sahetoay o malikakaay cangra. (Matay 12:50) Cowa ka hatini aca, o kahacecay Krisciyang masalalomaˈay noˈadingoan a paro no lomaˈ, pakayni i olah ato pasoˈlinay falocoˈ makelecay malacecay. Mansa, itini tikami marariday ko tarokos, o salikaka saan a pangangan to Krisciyang.​—Loma 1:13; 1 Pitiro 2:17; 1 Yohani 3:13. *

9, 10. (1) Hano awaay ko lalangian no Yutaya tamdaw, pakayni finacadan a misatakalaw ko harateng hani? (2) Samaanay ci Yis padama to tamdaw milowid to misakakinihay a harateng? (Nengnengen ko satapangan coka.)

⁹ Ihekalay ci Yis mitadtad, itini kalalaˈed no mita o malikakaay han ko pinengneng, dotoc misaˈicelay cingra to kalimelaan ko misapoeneray falocoˈ. (ˈOsien ko Matay 23:11, 12.) Na misatakalaway ko tarokos hato cowa ka makelec. Misatakalaw ko tamdaw to finacadan no niyah, wa mifekad ko pasangaray. ˈAlomanay a Yutaya tamdaw misatakalaway to, o teloteloc ni Apraham ko niyah, kawra iraay ko lalangian nangra mihaen ko harateng han? Pasowalan no Painoˈay a Yohani cangra: “Maedeng ko Kawas a misangaˈ to maloteloc ni Apraham” tonini a fakelokeloh.​—Luka 3:8.

¹⁰ Mirikecay ci Yis to saidahiay ko finacadan no niyah a harateng, mihaenay, o cecay pasifanaˈay to Rikec a tamdaw milicay ci Yisan, o cima ko kaolahen a tamdaw hani, sanay a pasowal ci Yis to cecay tinakoan. Iraay ko cecay Yutaya tamdaw mapekpekay no mariˈangay a tamdaw i lalan, mitaˈlif ko finacadan ningra, cowa pisikosikol toniya tahapadesay a tamdaw, ikorto maˈaraway no Samariya tamdaw cingra, siniˈadaay ko falocoˈ, songilaˈay a midimokos cingranan. Maherek ci Yis pasowal toni sapatinako, papinanaman koya pasifanaˈay to Rikec to Samariya tamdaw. (Luka 10:25-37) Paihekalay ko sowal ni Yis, wa ngaˈay ko Yutaya tamdaw mikitini taˈarawan no Samariya tamdaw minanam to, sasamaan samatiyaen o nika olah iso to niyah ko nika olah iso to tao.

11. (1) Hano cowa ka ngaˈay misakakinih to ˈalafang a tamdaw ko nisawawaan hani? (2) Samaanan ni Yis pasifanaˈ cangra cipinang tonini hani?

¹¹ Iˈayaw no papatikol ci Yis tayra i kakarayan, palimoˈotay to nisawawaan ‘i polong no Yutiya, ato Samariya tangasa i tolas no hekal’ a misawacay, sanay. (Dmak 1:8) Sapilaheciaw cangra toniya demak, o lalowiden ko misatakalaway ato misakakinihay a harateng no niyah ngaˈ ngaˈay. Sapadamaaw cangranan milaheci toniya kakahaday a demak, papisinanotan ni Yis ko nisawawaan to makapahay capeling no ˈalafang tamdaw. Tinakoen, pakahemekan ni Yis ko paihekalan no tapang no sofitay a pasoˈlinay falocoˈ. (Matay 8:5-10) Roma i, itini ci Yis i Nacali i, pasowalay to samanay ci Yihofa padama to ˈalafang a tamdaw. Tinakoen padamaan ni Yihofa ko maponengay fafahiyan i Carifat a Foinikiya ato malonoˈay ko adada a Siriya tamdaw ci Naman. (Luka 4:25-27) Cowa ka cecay aca ko Samariya fafahiyan mitosilan ni Yis, materekayho i niyaroˈ no Samariya to tosa romiˈad cingra, samanen saka cipinangaw ko itiraay tamdaw to mitenakan ni Yis a lihaf.​—Yohani 4:21-24, 40.

12, 13. (1) Makahi ci Yis pasifanaˈ to Samariya fafahiyan, samaanay ko pinengneng no tarokos hani? (2) Samaan mafanaˈ kita to cowaho ka fanaˈ ci Yakop aci Yohani masadafdaf ko picada to tamdaw hani?

¹² Sapisalofaw ko tarokos to misakakinihay harateng, cowa ko madoloay. Maˈaraw nangra makahi ci Yis pasifanaˈ to Samariya fafahiyan, fahekaˈan nanay. (Yohani 4:9, 27) O ˈaˈideman no Yutayakiyo, cowa ka caciyaw to fafahiyan i kaˈalomanay  a kitiraan, oraho tatiihay ko waywayan a Samariya fafahiyan hakiya. Tiya pasowalen no tarokos ci Yis pakakomaen, o caˈof ni Yis paihekalay to misamacayay ko harateng ningra, milengo to soˈlinay kimad i tamdaw, hato cowa ko kalimelaan ko kakaenen. Papitosilan no Kawas i tamdaw ci Yis, mahaopay koniya Samariya fafahiyan. Pakaynien ci Yisan, o mitosilay a demak mahecaday o kakaenen ningra.​—Yohani 4:31-34.

¹³ Kawrira, ci Yakop aci Yohani cowaho ka fanaˈ masadafdaf ko picada to tamdaw. Tiya malacafay cangra ci Yisan, mitaˈlif to Samariya i, sapikilimaw to pilafinan itira. Cowa ka kahi ko itiraay tamdaw micada cangranan, mangolaway ci Yakop aci Yohani, somowal to papatefaden ko namal palaˈafo toya niyaroˈ, kawra mirikecan ni Yis cangra. (Luka 9:51-56) Ora cowa ka kahi micada to papotalay a tamdaw ano itiniay i Kalili niyaroˈ nangra, maedeng eca ka hatira ko kangolaw nangra halatek, ono ka pisaˈada nangra to tao, o pakayniay misakakinihay harateng. Ikor, itini Samariya ci Yohani mitosil, iraay ko ngaˈayay minaroˈan, ano tikolen ningra miharateng tada mararawayto isaˈayaw ko waywayan no niyah.​—Dmak 8:14, 25.

14. Samanay ko salikaka misaysay to kasasiroma nosaowal a mifekaday a pasangar hani?

¹⁴ Ikor no Kocinsic i saka 33 miheca, mifekaday ko cecay cowa ka sadafdaf a demak. Itini pipalilam to kakaenen i maponengay fafahiyan i, malawaay ko somowalay to Kirisiya a maponengay. (Dmak 6:1) O kasasiroma no sowal ko lalangian noniya pasangaray demak. Kalikiay ko tarokos misalof, minilnil to citatodongay a faˈinayan salikaka misaysay toniya demak, oniya salikaka iraay kono Kirisiya a ngangan, mihaen oha mamadolo a micada koya mapakararaway a maponengay.

15. Samanay ci Pitiro minanam ecato ka pisakakinih to tamdaw? (Nengnengen ko satapangan coka.)

¹⁵ Itini saka 36 miheca, misatapangay ko nisawawaan pasayra i roma finacadan a mitosil. Tarokos ci Pitiro na mitooray tono litengan a nanaman, o Yutaya aca tamdaw ko micawmaˈan, kawra ikor no paihekal ko Kawas to cowa ka ngaˈay ko Krisciyang misakakinih to tamdaw i, misawacayan ni Pitiro ko tapang no sofitay ci Kornilius. (ˈOsien ko Dmak 10:28, 34, 35.) Misatapangayto ci Pitiro lipahak kalacafay to ˈalafang tamdaw komaen ato micawmaˈ. Kawra ikor no pina miheca, itini ci Pitiro i Antiok i, cowa ka kahi kalacafay to ˈalafang a Krisciyang mitaheka. (Kalatiya 2:11-14) Pakayni toniya demak mirikecan ni Pawlo ci Pitiro, makahiay ci Pitiro micada to salimoˈot, mihaenay mitilid ci Pitiro to saka cecay tikami to Aciyaay a Yutaya ato ˈalafang a Krisciyang i, somowalay to kalimelaan ko olahen to polong kasacefang no salikaka.​—1 Pitiro 1:1; 2:17.

16. Malifokay no salakatay a Krisciyang ko maanan a ngaˈayay ngangan hani?

¹⁶ Soˈlinay o tarokos mikitini taˈarawan ni Yis, minanam to mamaolah to “masakenaay tamdaw.” (Yohani 12:32; 1 Timoti 4:10) Soˈlin misaaliay to toki konini, kawra malaˈosiay ko pifalic nangra minengneng to tamdaw. Malifokay no salakatay a Krisciyang ko masasiolaolahay a ngaˈayay ngangan. Itini saka tosa hahekalan mitatiliday a tamdaw ci Tetulian, misaka dademakay to sowal no roma tamdaw pakayni pinengneng to Krisciyang, sanay: “Makakaolahay cangra . . . makahiay kinafalah to ˈorip i kalalaˈed.” Salakatay a Krisciyang micaˈedongay to “faelohay capeling,” sanay. Hato ngaˈayay tano pinengneng no Kawas a pinengneng to tamdaw, masadafdaf minengneng to polong a tamdaw.—Kolosay 3:10,11.

17. Tinakoen mitadtad sasamaan mikilamit a mifaˈnot to misakakinihay a falocoˈ.

¹⁷ Anini, misaaliay kita to toki mikilamit a mifaˈnot to misakakinihay harateng. O cecay Frans fafahiyan salikaka sanay milengo to lalood no falocoˈ, sowal ningra: “Pasifanaˈayto ci Yihofa takowanan to o maanan ko olah, o maanan ko paladaˈay, o maanan ko maolah to masakenaay tamdaw, kawraan wa padotocho kako miremo to misakakinihay to tamdaw, tada pasangaray konini, mihaenay wa padotoc kako pakayni toniya demak a mitolon.” O cecay nai Sipanyaay a fafahiyan  salikaka, milifetay to mahecaday a demak, sanay cingra: “Wa raremoen ako ko misaˈadaay to roma finacadan a harateng, hato malaˈosiay ko pihaen ako, kawra mafanaˈay kako papadotoc ko niyah a misaˈicel ngaˈ ngaˈay. Mahemekay kako pasalalomaˈen ni Yihofa kako i makelecay a taˈangayay paro no lomaˈ.” Kita o kahacecay tamdaw sasoˈlinen a mikinsa ko niyah, miharateng to mamahecad oniya tatosaay fafahiyan salikaka, mamiremo to misakakinihay a falocoˈ.

18, 19. (1) Hano micada kita to polong a tamdaw hani? (2) Samaan ko demak ita, o micadaay to polong a tamdaw hani?

¹⁸ Haratengen, kita i salakat sahetoay ‘o potalay tamdaw’, miraayay to Kawas. (Ifiso 2:12) Kawraan, tano ‘olah a sasoˈot’ ni Yihofa ko pisolot kitaanan a miingid Cingranan. (Hosiya 11:4; Yohani 6:44) Micadaan ni Kristo kita, ngaˈay kita malo taˈangayay paro no lomaˈ no Kawas. (ˈOsien ko Loma 15:7.) Soˈlin cowa ko malefotay kita, kawra makahiay ci Yihofa aci Yis micada kitaanan, mihaenay, cowa ko ngangaˈay kita mapiliˈ to tao.

¹⁹ Pakayni kangata to noka hererekan noniya ciraraway a hekal, matongalay ko liwasak no siyakay, misakakinihay, misaˈadaay a pakayraan. (Kalatiya 5:19-21; 2 Timoti 3:13) Kawraan, malo sikawdan ni Yihofa, micangacangay kita to ‘nai fafekangay a taneng’, o hatiniay taneng padamaay kitaanan eca ka pisakakinih ko falocoˈ, ngaˈayay micowat to rihadayay. (Yakop 3:17, 18) Misaˈicel kita patireng to kalawidang to roma kitakit a tamdaw, micada to cowa ka hecad a serangawan, minanamho to faelohay a sowal, pairaay to lipahak no mita. Mihaen ko demak ita, ‘samatiya sa o nanom no ˈalo a cowa ka citolas ko rihaday, samatiya sa o tapelik no riyar ko moecelay a demak.’​—Isaya 48:17, 18.

20. Papifalicen ita ko olah to falocoˈ ato harateng no niyah, wa ira ko masamaanay minaroˈan hani?

²⁰ Masowalay noni lalakaw a Australia fafahiyan salikaka sanay milengo, minanam to Fangcalay Cudad taˈangayay ko pifiyor cingranan, sanay: “O fawahan no matatodongay sifanaˈ mafohatayto, mifalicay to falocoˈ ato harateng ako, misongilaˈay palahedaw to misakakinihay ato misaˈadaay a harateng no mako.” O masowalay iˈayaw a Kanataay salikaka sanay: “Mahapinangay ako o misakakinihay harateng mikitiniay kafokil ko sakaira, hanaca wa samaan ko capeling no tamdaw, cowa pilingat to kahofocan ningra.” Ikor oniya faˈinayan salikaka cifafahiyay to somowalay tono Padaka ko sowal a salikaka! O kafalic nangra misawacayay, o olah no Krisciyang wa pakalowid to masakakinihay. O hatiniay a olah mikelecay palacecay kitaanan, mikelec a misoˈot kitaanan.​—Kolosay 3:14.