1, 2. 1) Jmé xi kitso Jesús nga tokʼoatjínsa tsakʼétsʼoantjai chjotale. 2) Ánni nga koankjáojinsínile Jesús josʼin tjío je chjotale.

JE XI kisikjáojin Jesús kʼianga tokʼoatjínni tsakjenkao je chjotale kuinga jtín katabatio. Kʼianga tsakʼétsʼoa, kʼoakitso nga kui xi mele nga tojngo katama chjotale, xi tsonile nga jtín sʼin katabatio josʼin tjío je Jesús kao Nʼaile (tʼexkiai Juan 17:20, 21). * Tsa jtín sʼin tjío je chjotale Jesús kao kui jchanile nga je Jeobá kisikasén je Jesús i̱ Sonʼnde. Tsa tsjoake xínkjín kʼoasʼin jchanile nga ñaki chjotale Jesús ma, kʼoa kʼoati kui xi jtín sʼin sikatío (Juan 13:34, 35).

² Nga kui nitje̱n, je Jesús nʼio kʼoakitsole chjotale nga jtín sʼin katabatio nga̱ tsabee nga tsín kʼoasʼin tjío. Kui tsakjáotiyani “ʼyá xi koasenjna títjon” kʼoa jekjoan nkjín kʼa nga kui fáotiyani (Luc. 22:24-27; Mar. 9:33, 34). Ñandia nga je Santiago kao Juan kʼoakitsole  Jesús nga jngo xá xi ngʼa tíjna katatsjoále kʼianga koatexoma (Mar. 10:35-40).

3. 1) Jméni xokisikao je chjotale Cristo nga tsín jtín sʼin tsakationi. 2) Jmé kjoachjonangi xi chótʼayajiaan i̱ kjoaʼmiya jebi.

³ Nga mele nga ngʼa koatio chjotale Jesús, ali tsa tokuijin xi tsakʼéchjoale nga jtín sʼin koatio. Je chjota xi tjín nga kui nichxin xkoa̱ya sʼin tjío nga̱ jtike koan xínkjín kʼoa tsakʼasjengi xínkjín. Kuinga tjínnenile tsakʼénele yaole chjotale Jesús nga tsín kʼoakatamakjoan tsanda je. I̱ kjoaʼmiya jebi kui jchaa jmé xi kisʼin Jesús nga tsín katabʼasjengi xínkjín je chjota. Jósʼin tsakakóyale je chjotale nga tsín ʼya xi kʼoasjengi kʼoa nga jtín sʼin koatio. Kʼoa jósʼin binyakaoná jme xi kitsoya nga tosi tonda jtín sʼin kuiyoaa.

4. Tikʼaxki̱ kʼai jósʼin kichʼasjengi je Jesús.

⁴ Je Jesús kʼoati kichʼasjengi. Kʼianga kʼoakitsole Felipe je Natanael nga jekoansjaile je Mesías, i kitso: “A tjín xi nda xi Nazaret faʼaini” (Juan 1:46). Ánni nga kʼoakitsosíni. Bejin nga kʼoatso én xi tongini kinokjoa ya Miqueas 5:2 nga ya Belén jtsín je Mesías. Tsakui nichxin kʼoasʼin kisikjaʼaitsjen nga tsín jme chjíle naxinandá Nazaret kʼoa nga tsín jokoa̱nnile nga ya kjoaʼaíni je Mesías. Je chjota judío xi xángʼa tjínle kʼoati tsakʼasjengi Jesús nga Galilea tsʼe (Juan 7:52). Je chjota xi ya tsʼe Judea kʼoasʼin kisikjaʼaitsjen nga ngisa nangi tjío chjota xi Galilea tsʼe. Kʼoa tjínkʼa chjota judío xi samaritano kitsole Jesús kʼianga tsakʼasjengi (Juan 8:48). Je chjota samaritano kao chjota judío xinxin naxinandále kʼoa kjaʼaí kjaʼaí relijión kisʼele. Je chjota judío xi ya tsʼe Judea kao Galilea tsakʼasjengi je chjota samaritano kʼoa tsín ya kisichrianle (Juan 4:9).

5. Jósʼin kichʼasjengi je chjotale Jesús.

⁵ Je naʼmitítjonle chjota judío kʼoati nʼio tsakʼasjengi je chjotale Jesús. Je chjota fariseo saʼnda i kitsole: “Na̱i katafikao” (Juan 7:47-49). Chjotayomaa kitsole kʼoa tsakʼasjengi toʼyani xi tsín ya kiskotʼaya skuelale chjota judío kʼoa xi tsín kitjenngi kostumbrele (Hech. 4:13). Kuinga kichʼasjengini Jesús kao chjotale nga̱ je chjota xi kisʼe nga kui nichxin nʼio ngʼa tsakʼasje yaole tʼatsʼe relijión xi tsakatiojin, nga ngʼa xá kisʼele kao tʼatsʼe ʼndele. Nga jtín sʼin koatio je chjotale Jesús, tjínnele kisikʼantjaiya josʼin kisikjaʼaitsjen.

6. Kʼoasi kʼai je choa̱ xi bakó josʼin bʼetʼaná nga xíngiaa chʼasjengiaa.

⁶ Nichxin xi tiyoaa ndʼai nʼio bʼasjengi xínkjín je chjota. Tsakui nichxin ñá xokoa̱ntʼeen kʼoa tsa ñá xosʼiaanje̱. Jngo tichjaa xi Australia tsʼe, xi precursora ma, itso: “Ngisaa jtike̱ koan je chjota xi chxoa sʼin tsen yaole kʼianga kui kisikjaʼaitsjen nga totaon tjíoʼya je chjota aborígen. Kʼoa nga totaon tsaʼyana an ngisaa tijtike̱ koanngáña”. Ya Canadá én francés kʼoa én inglés nokjoa, kʼoa jngo ndsʼee xi i̱ tso: “Kʼoasʼin kisikjaʼaitsjen nga ngisa ngʼa tjío je chjota xi én francés nchja̱ kʼoa ni i̱jin natjín tsjoake̱ koan je chjota xi én inglés nchja̱”.

7. Jmé xi kisʼin Jesús nga tsín katabʼasjengi xínkjín je chjota.

⁷ Tojo koan nichxinle Jesús, kʼoati nʼio bʼasjengi xínkjín chjota ndʼaibi kʼoa nʼio ñʼai male nga síkʼantjaiya yaole. Jmé xi kisʼin Jesús nga tsín katabʼasjengi xínkjín je chjota. Xi títjon, je Jesús aliʼya xi tsakʼasjengi, tongóson sʼin tsabekon ngatsʼi. Kitsoyale xi nyiná kao xi ma̱ tjío, chjota fariseo kao chjota samaritano kʼoa saʼnda kitsoyale je xi tao̱nbasen bʼéxkó kao xi chjotajée. Xi majaoni, josʼin tsakakóya kʼoa kao jme xi kisʼin kao kui tsakakónile chjotale nga tsín chʼaosʼin katasíkjaʼaitsjen tʼatsʼe xi kjaʼaí kʼoa nga tsín katabʼasjengi.

8. Kʼoasi jmé kjoafaʼaitsjen xi nʼio chjíle tsakakóya Jesús xi basenkaoná nga jtín sʼin biyoaa.

⁸ Je Jesús jngo kjoafaʼaitsjen xi nʼio chjíle tsakakóya xi basenkaoná nga jtín sʼin biyoaa. Kitso: “Ngatsʼio nga jon ndsʼe manio” (tʼexkiai Mateo 23:8, 9). * Ánni nga ndsʼee masíñá ngatsʼiaa. Jngo koya kuinga ntje̱le Adán kitjenñá (Hech. 17:26). Kʼoa xi ijngosani, nga chjotale Cristo maa, Nʼai ʼmilee ngatsʼiaa je Jeobá (Mat. 12:50). Kʼoa kʼoati tojngo familia maa ngatsʼiaa nga̱ tojngoo kjoamakjain tjínná kʼoa tsjoachañá xíngiaa. Kuinga “ʼndíndsʼe” kitsoni je pastrole Jesús kʼianga kiskile karta je chjotale Cristo xi ngikʼa (Rom. 1:13; 1 Ped. 2:17; 1 Juan 3:13).

9, 10. 1) Ánni nga tsín tjínnenile ngʼa koanle tsakai je chjota judío jña kitjenni. 2) Jmé xi kitso Jesús tʼatsʼe nga tsín ndatjín nga chʼasjengiaa chjota xi xin ʼndele (chótsenlai sén xi fitsʼiani kjoaʼmiya jebi).

⁹ Kʼianga jekʼoakitsole Jesús je chjotale nga tjínnele jo ndsʼe̱ kʼoa jo ndichja sʼin skoe̱kon xínkjín, kʼoakitsole nga nʼio chjíle nga nangitokon katama (tʼexkiai Mateo 23:11, 12). * Tojonásʼin jesa kaʼyaa, kʼoati kui kjoangʼakon xi xkoa̱ya sʼin kisikatío je chjotale Jesús. Kʼoa chjota xi tjín nga kʼia, nʼio ngʼa koanle jña kitjenni. Nʼio nkjín chjota judío xi nʼio ngʼa koanle nga ntje̱le Abrahán kitjenni. Tonga alikui tjínnele kʼoakisʼin tsakai, je Juan Bautista i kitso: “Niná koa̱nle nda tsa kao je la̱jao̱bi, skómitjen ʼndí xi tʼatsʼe Abraham” (Luc. 3:8).

¹⁰ Je Jesús kʼoakitso nga chʼaotjín kʼianga ngʼa male chjota jña kitjenni. Jngo chjota skribano xi i̱ kitsole: “ʼYáni xi xíngiaa”. Je Jesús jngoo choa̱ kisikʼéjnale tʼatsʼe jngo chjota judío xi ché tsakjáʼale tsojmile kʼoa kisikiʼaon. Nkjín chjota judío jaʼatʼale kʼoa likui tsakinyakao. Tonga jngo chjota samaritano jaʼa kʼoa tsakasenkao. Je Jesús kʼoakitsole chjota skribano nga kʼoati katasʼín tsanda je jokisʼin je chjota samaritano (Luc. 10:25-37). Je Jesús kui xi kitsole chjota judío nga jngo chjota samaritano koaan koakoyale nga tsjoake katama ngatsʼi chjota.

11. 1) Ánni tsín tjínnenile xínkjín kʼoasjengi je chjotale Jesús. 2) Jósʼin tsakasenkao Jesús je chjotale nga tsín chjota katabʼasjengi.

¹¹ Nga toje tífini Jesús ya ngʼajmi, kʼoakitsole chjotale nga katatsoyason “ngakijnda nangi Judea, kao ya Samaria, kao jña saʼnda nga fetʼa sonʼnde” (Hech. 1:8). Kʼoa nga kuitjosonle jme xi tsakʼinle tjínnele nga tsín kʼoasjengi chjota kʼoa nga tsín ngʼakon koa̱n. Je Jesús kjitʼaa nga nda kinchja̱ni tʼatsʼe chjota xi tsín judío, kʼoa kʼoasʼin kisikatíonda je chjotale nga kuitsoya ngakjijnda naxinandá. Tobʼelañá, nda kisikʼaxki̱ je kjoamakjain xi kisʼele jngo ngʼajko̱le sondado xi xin naxinandále (Mat. 8:5-10). Kʼoa nga tíjna ya Nazaret kʼoakitso nga nichxin kjoatse tsakakóle kjoanda Jeobá je chjota xi tsín judío, jolani je ʼndíchjoónkʼan xi ya tsʼe Sarepta kʼoa kao Naamán xi Siria tsʼe (Luc. 4:25-27). Kʼoa je Jesús ali tsa tojejin chjoón samaritana xi kitsoyale, saʼnda jao nichxin tsakʼejna ya Samaria nga̱ je chjota xi ya tsʼe nʼio koanndosinle én xi kitsoya (Juan 4:21-24, 40).

12, 13. 1) Jósʼin kisikjaʼaitsjen je pastro kʼianga tsabe je Jesús nga jngo chjoón samaritana títsoyale (chótsenlai sén xi fitsʼiani kjoaʼmiya jebi). 2) Jósʼin ʼyañá nga tsín koanjinle Santiago kao Juan jme xi kisʼin Jesús.

¹² Alikui choa ñʼai koanle je pastrole Jesús nga tsín xínkjín tsakʼasjengi. Tobʼelañá, tokʼoakoanle kʼianga tsabe nga jngo chjoón  samaritana títsoyale je Jesús (Juan 4:9, 27). Je naʼmitítjonle chjota judío alikui yánchjín tsakjákaonajmí nga jinle chjota, kʼoa ngisaa jngo chjoón samaritana xi tsín nda tísʼín. Kʼianga jetse tífákaonajmí Jesús je chjoón jebi, je pastrole kʼoakitsole nga katakjen. Tonga je Jesús ngisaa kui koanndosinle nga kitsoyale je chjoón samaritana tikʼoajinni nga koakjen. Je xi niole koan kuinga kʼoakisʼin josʼin mele Nʼaile kʼoa nga kitsoyason (Juan 4:31-34).

¹³ Je Santiago kao Juan alikui koanjinle jmeni xi kisʼin Jesús. Kʼianga jaʼa ya Samaria tsakásjaiʼnde jña koationi, tonga je chjota samaritano alikui kitsjoaʼndele. Kʼoa je Santiago kao Juan kʼoakitsole Jesús nga katasíjé nga lʼí katanroajenni ngʼajmi kʼoa katasíkjeson je ʼnde xi ya tíjna. Tonga je Jesús tsakatekjáyale (Luc. 9:51-56). A kʼoasikji koanjtile tsa yalani Galilea, jñani tsʼe Santiago kao Juan, jñani tsín kitjoʼndele. Maijin, kuijin kʼoakitsoni nga tsakʼasjengi chjota samaritano. Nga koanskanni, je pastro Juan kitsoyasonle chjota samaritano kʼoa nʼio nkjín xi kinrʼoéle. Tochajinle soa koanle nga jaʼaitsjenle jme xi kitso nga títjon (Hech. 8:14, 25).

14. Jósʼin kisʼendajin je kjoa xi kisʼele chjotale Cristo xi kjaʼaí kjaʼaí én nchja̱.

¹⁴ Nga jejaʼato sʼuí Pentecostés nga nó 33, jngo kjoa kisʼe ya jtín xi tsʼe chjotale Cristo. Kʼianga tsʼabíle tsojmi xi ma chine, alikui tsakʼaile je ʼndíyáchjínkʼan xi én griego nchja̱ (Hech. 6:1). Tochale kuinga tsakʼasjengini nga kjaʼaí én nchja̱. Je pastro kjitʼanangi tsakʼéndajin kjoa jebi kʼoa nkjín chjota tsakinyánda xi tsakánele nga katasíkʼabí tsojmi xi ma chine. Ngatsʼi chjota xi kixinyanda jaʼaín griego tjínle, tsakui nichxin kuinga ngisa nda sa̱tío kon je ʼndíyánchjín jebi.

15. Jókoanni nga chan tongóson sʼin tsabekonni ngatsʼi chjota je Pedro (chótsenlai sén xi fitsʼiani kjoaʼmiya jebi).

¹⁵ Kʼianga nó 36, kʼiaa kitsʼiani nga tsakʼinyasonle chjota xi xin naxinandále. Je pastro Pedro kʼoasʼin ngale nga toje xi chjota judío fákaonajmí. Tonga nga tsabe nga kui xi mele Niná nga tsín ʼya xi kjoaʼajin je xi chjotale Cristo ma, je Pedro jngo sondado romano xi Cornelio tsakʼin kitsoyale (tʼexkiai Hechos 10:34, 35). * Saʼnda nga kʼia, je Pedro tsakjenkao kʼoa kikonle je chjota xi tsín judío. Tonga nga jejaʼato nó alikui tikʼoakisʼinni, alikui titsakjenkaoni je chjota xi tsín judío xi tjío ya Antioquía (Gál. 2:11-14). Nga kʼoakisʼin, je Pablo kiskankao kʼoa je Pedro kinrʼoé jme xi tsakʼinle. Jósʼin ʼyañá. Kʼianga kiskile Pedro je chjotale Cristo xi chjota judío kitjenni kao xi mai xi tjío ya Asia Menor i kitsole: “Tsjoacha katamao ngatsʼi ndsʼee” (1 Ped. 1:1; 2:17, TNM).

16. Jmé xi kitso chjota tʼatsʼe chjotale Cristo xi títjon tsakatio.

¹⁶ Tojosʼin kaʼyaa, je choa̱le Jesús tsakinyakao je pastrole nga tsjoake koan “ngatsʼi chjota” (Juan 12:32; 1 Tim. 4:10). Ninga tse kichomani, tonga kisikʼantjaiyaa kjoafaʼaitsjenle. Kʼoa je chjotale Cristo xi títjon tsakatio saʼnda kʼoasʼin tsaʼyale nga nʼio tsjoake koan xínkjín. Je chjota xi tsakʼejna nga siglo 2, xi Tertuliano tsakʼin, tsakʼéyanajmí jme xi kitso chjota tʼatsʼe chjotale Cristo. Kitso: “Nʼio tsjoake xínkjín kʼoa tjíondaa nga kuiyántjai xínkjín”. Je chjotale Cristo xi títjon tsakatio jngoo “ni̱ma̱ xi chjotse” kiskoé kʼoa tongóson sʼin tsabekon je chjota, tojosʼin bekon je Niná (Col. 3:10, 11).

17. Kʼoasi jmé xi koa̱n sʼiaan nga si̱ndayasaa yaoná tsa xíngiaa chʼasjengiaa.

¹⁷ Nichxin xi tiyoaa ndʼaibi, tsakui nichxin kʼoati ñʼai koa̱nná nga si̱ndayaa yaoná nga tsín xíngiaa chʼa̱sjengiaa. Jngo tichjaa xi Francia tsʼe kʼoatso jmeni xi sʼín  nga katatjoxinle jebi. Itso: “Je Jeobá títsoyana josʼin nga sʼe̱na kjoatsjoacha, nga tsjoanganʼiole xi kjaʼaí kʼoa nga tsjoake̱ koa̱n toʼya chjotani. Tonga tojo tibʼenele yaona nga tsín ʼya xi kʼoasjengia kʼoa alikui choa ñʼai mana. Kuinga tojo kui sijénile Jeobá nga bʼetsʼoale”. Jngo tichjaa xi España tsʼe itso: “Jngo jtín mani chjota xi jtike̱ tonga tibʼenele yaona nga tsín kʼoasʼe̱ tokoan. Jetítjoxinna kjoajticha jebi tonga tojo tibʼenesale yaona. Nʼio tsjoa tjínna nga jngo familia xi jtín tíjna tijnajinle, tsjoale kjoanda Jeobá”. Ngatsʼiaa tjínnele nda si̱kjaʼaitsjenjiaan jótjío tokoán. A kʼoati machjénná tsanda ñá nga kʼoati sʼiaan jotjíosʼín je tichjaa, nga si̱ndayasaa yaoná.

18, 19. 1) Ánni nga chjoéyasíñá toʼya chjotani. 2) Jósʼin koa̱n chjoéyaa xíngiaa.

¹⁸ Machjén nga si̱kjaʼaitsjeen nga nichxin kjoatse kjin tiyolee Niná ngatsʼiaa (Efes. 2:12). Tonga je Jeobá kao kjoatsjoacha kiskoebʼakjániná (Os. 11:4; Juan 6:44). Kʼoa je Jesús kao kjoatsjoa kiskoetjaoná. Jé kiskoxʼáʼndená nga koa̱n ya kuiyojiaan familiale Niná (tʼexkiai Romanos 15:7). * Tsa kiskoetjaoná ñá je Jesús, ánni nga chʼa̱sjengisíñá je xíngiaa.

¹⁹ Nga toje tífikjetʼa sonʼnde tsʼen jebi, tosi tondajin xkoa̱ya koatio chjota, sa nʼio sa nʼiojin kʼoasjengi xínkjín kʼoa sa jtike sa jtikejin koa̱n xínkjín (Gál. 5:19-21; 2 Tim. 3:13). Tonga ñá xi choʼndale Jeobá maa mená nga katasʼená “kjoaʼisentakon xi ngʼá nroani”, xi basenkaoná nga nyʼán sʼin biyoaa kʼoa nga tsín xíngiaa chʼasjengiaa (Sant. 3:17, 18). Tsjoa tjíoná nga nimiyoaa xi xin naxinandále, nga ʼyaa kostumbre xi tjínle kʼoa nga saʼnda chotʼayá je én xi nchja̱. Kʼianga kʼoanʼia, sʼená kjoanyʼán “joni tsa jngo xo̱ngáje” kʼoa kixi maa joni xóle ndáchikon (Is. 48:17, 18).

20. Jméni xi ma kʼianga kui kjoatsjoacha bándiaale je kjoafaʼaitsjenná kao ni̱ma̱ná.

²⁰ Je tichjaa xi Australia tsʼe, xi kanikʼaxkiaa ya párrafo 6, kʼoatso nga tsakasenkao kʼianga kiskotʼaya je Biblia. Tobijbi koanndaya, alikui tijtike koanni je chjota xi chxoa sʼin tsen yaole. Nga kisʼele kjoatsjoacha tsʼantjaiyaa kjoafaʼaitsjenle. Kʼoa je ndsʼee xi Canadá tsʼe kʼoatso nga sʼani majinle nga kuinga jtikeni xínkjín chjota nga tsín bexkon. Je ndsʼee kʼoatso nga tsín je ʼnde xi tsoni nga nda sʼín jngo chjota. Kʼoa saʼnda jéni chixankao jngo tichjaa xi én inglés nchja̱. Jebi kui xi bakóyaná nga je kjoatsjoacha jtín síkatíoná, ñaki síndayaa kjoafaʼaitsjenná kʼiatsa xíngiaa chʼasjengiaa (Col. 3:14).