1, 2. (a) Jesuba tae-e ǀuniga ǀgores ǃnâ ge ǂgan ǁîb apostelgu ǃgao? (b) Jesuba ǀnîsi tae-i ǃaroma ǀguiǃnâxasib xa gere ǂâiǂhansen?

JESUB ge ǀguiǃnâxasib xa gere ǂâiǂhansen ǁîb ǀuniga ǃuiǂûs ai ǁîb apostelgu ǀkha. ǁÎb ge ǁîgu ǀkhab gere ǀgore o, o ge mî ǁîb ra ǂgaosa îgu ǁîga ǀgui ǁîb tsî Jehovab tsîn a ǀgui khami. (Khomai re Johaneb 17:20, 21.) Apostelgu di ǀguiǃnâxasib ge ga ǁgau hâ Jehovab ge Jesuba ǃhūbaiba ǃoa a sî ǃkhaisa îb ǁîb ǂâisa hā dī. ǀNammi ge Jesub di ǁkhāǁkhāsaben di saosa hîna ǀguiǃnâxasiba ra aiǃgû kaisa.​—Jhn. 13:34, 35.

² Jesub ge ǀguiǃnâxasiba ge ǁguiǃgâ, mûǂan nî ge o ǁîb apostelgu nēsa ūhâ tama hâsa. Nēsab ge ǀuniga ǂûǀhaos tawa ge mû. ǁÎgu ge ǀnairo gere ǂnoagu ham-i “hoagu xa kaib ase” nî ǃgôahesa. (Luk. 22:24-27; Mrk. 9:33, 34) ǀNî hâ ǁaxasib aib ge Johaneb tsî Jakobub tsîkha ge ǂgan î kha ǂhâǂhâsa ǃharode Jesub Gaosib ǃnâ māhe.​—Mrk. 10:35-40.

3. Taena xūn hîna ge a ǃaromana îgu Jesub ǁkhāǁkhāsabega tā ǁîgu ǁaegu ǀguiǃnâxasiba ūhâ tsî mâ dîde da nî ǃhoaǃgao?

³ ǀGapiǀgapisens ǀguis ge Xristub ǁkhāǁkhāsabegu ǀguiǃnâxasiba ge ǂkhabuǂkhabu tama hâ i. ǁNā ǃhūb ǃnâ ge ǁan hâ i  khoen tsîn ge ǁaib tsî ǀgoras tsîn xa ge ǀoa-e hâ i. Jesub di ǁkhāǁkhāsabegu ge nē tsâsiga nî sîsenǂamse ge î-i. Nē ǁkhāǁkhāǃâs ǃnâ da ge sao ra dîde nî ǃhoaǃgao: Jesuba mati ǃhaoǃnâbe ǀgorasa ge sîsenǂam? Matib ge ǁîb ǁkhāǁkhāsabega hui îgu ǀgora-e ūhâ tamase nau khoena sîsen-ū tsî ǀguiǃnâxa? Tsî Jesub ǁkhāǁkhāde mati nî hui da î da ǀguiǃnâxa?

4. Aiǁgau-e mā re, ǃhaoǃnâbe ǀgoras Jesuba ge a tsâǀkhās xa.

⁴ Jesub ǂûb ge ǃhaoǃnâbe ǀgoras xa gere tsâǀkhāhe. Filipub ge Natanaela a mîba o, ǁîb ge Mesiaba a hōsa, ob ge Natanaela ge dî: “Mâ ǃgâi xū-e kha Nasaretsa xu a ǀkhī ǁkhā?” (Jhn. 1:46) Natanaeli ge Mixab 5:2 ǃnâ a xoasa kēbosa ge ǂan i tsî Nasaretsa ǂhâǂhâsase ge mû tama hâ i, Mesiab di ǁan ǃkhaise. ǁNās ǁkhās khamin ge Jodeǁîna Jesuba gere ǃgôaǁnâ Galileaǁîb ge i amaga. (Jhn. 7:52) ǀNî Jodeǁîn ge Jesuba gere ǃkhāǃkhā ǁîba Samariaǁîb ase ǂgais ǃnâ-ū. (Jhn. 8:48) Samariaǁîn ge ǃhaoǃnâbese tsî ǂgom ǀgaub ǃnâ-ū Jodeǁîna xu gere ǀkhara. Jodeǁîn tsî Galileaǁîn tsîn ge ǂkhari ǃgôasiba Samariaǁîna ge ūba hâ i tsî ǁîn ǀkha hâǀhaosa xu gere ǂgōsen.​—Jhn. 4:9.

5. Jesub saosabena tae-i ǃhaoǃnâbe ǀgorasa gere hōǃâ?

⁵ Jodeǁîn ǂgaeǂgui-aogu ge Jesub saosabena gere ǃgôaǁnâ. Farisegu ge ǁîna “ǀâxarexūhe” hâ khoen ase gere mû. (Jhn. 7:47-49) ǁÎn ge Jodeǁîn skolgu ǁkhāǁkhāsa ge ūhâ tama hâ i khoen hoan tsî ǁîn ǀgauga ge sao tama hâ i khoena xū tamase gere mû. (ǃNǃkh. 4:13) ǃHaoǃnâbe ǀgoras hînab ge Jesub tsî ǁîb ǁkhāǁkhāsabegu tsîna gere hōǃâgu ge ǂgomdi, ǀhûhâsib tsî ǃhao ǀgoras ai ge ǃgaoǃgaosa i. ǁKhāǁkhāsabegu ge kaise nēs xa tsâǀkhāhe. Tsî gu ga ǁkhāǁkhāsabega ga ra ǀguiǃnâxa ǂgao o, o gu ge ǁîga ǁîgu ǂâi ǀgauba nî ǀkharaǀkhara.

6. Aiǁgaude mā re hîna ra ǁgaude ǃhaoǃnâbe ǀgoras mati a tsâǀkhā da ǁkhāsa.

⁶ Nētsē da ge ǃhaoǃnâbe ǀgoras xa ǃnamiǂgā-e hâ. Sida ge ǀnîsi khoen xa ǃhaoǃnâbese ra ǀgorahe tamas ka io da ge sida ǀnîsi ǃhao ǀgorasa ūhâ. “Tita ge ǃurikhoena ge ǃhui hâ i, ǂhanuoǃnâsen ge Aboriginal khoena gere hâ-ū ǀgaub ǃgao” dis ge nēsi aimâba-aose ra sîsen ǃgâsas hîna Australiab ǃnâ ǁan hâsa ra mî. “Nē ǃhuib ge tita ge aitsama a hōǃâ ǁgâiǀāb xas tsîna ge ǀgaiǀgaihe.” Kanadab ǃnâ hâ ǃgâsab ge ǁîb ge gowagu ǃoagu ūhâ i ǃhaoǃnâbe ǀgoras xa ra ǃhoa. “Tita ge Frans gowaba ra ǃhoa khoena gere ǀgapi ǃgôa,” dib ge ra mî. “Tsî ta ge ǀawaǃaogowaba ra ǃhoa khoena gere ǃgôaǁnâ.”

7. Jesuba mati ǃhaoǃnâbe ǀgorasa ge sîsenǂam?

⁷ ǃHaoǃnâbe ǀgoras ge sida ǃnâ a ǃnomaǃkhō ǁkhā Jesub tsēdi ǃnâ î gere ī khami. Jesuba mati ǃhaoǃnâbe ǀgorasa ge sîsenǂam? ǂGuroseb ge ǁîba ǃhaoǃnâbe ǀgoras xa hoase ge ǃgâibahe tama hâ i. ǁÎb ge ǀgâsan, ǃkhū hân, Farisegu, Samariaǁîn, mariǃkhōǃoa-aon tsî ǁore-aon hoan tsîna gere aoǁnâba. ǀGamǁîseb ge Jesuba ǁîb ǁkhāǁkhās tsî aiǁgaus ǃnâ-ū ǁîb ǁkhāǁkhāsabega gere ǁgau mati gu ǃhaoǃnâbe ǀgorasa nî sîsenǂamsa.

8. Tae-e a ǂhâǂhâsa Xristeǁîn ǀguiǃnâxasib ǃgao? ǁGuiǃā re.

⁸ Jesub ge ǁîb saosabena ǂhâǂhâsa xū-e ge mîba hîna ra ǀguiǃnâxa kai da-e.  Tsî du ge hoa do a ‘khoeǃgâgu’ dib ge ge mî. (Khomai re Mateub 23:8, 9.) ǀGui ǀgaub hîna da hoa da a ‘khoeǃgâgub’ ge hoa da ge Adammi suriba xu ra hā. (ǃNǃkh. 17:26) Xawe î ge noxoba ǀnî hâ xūna hâ. Jesub ge ge ǁguiǃā ǁîb ǁkhāǁkhāsaben tae-i ǃaroma a khoeǃgâgusa, ǁîn Jehovaba ǁîn ǀhomsi ǁGûb ase ra mûǂan amaga. (Mat. 12:50) Tsîn ge ge ǀgui omaris gagasi ǁani kai, ǀnammi tsî ǂgoms xa ra ǀguiǃnâxa kaihese. ǁÎgu sîǂkhanidi ǃnâ gu ge apostelga hoaǁae nau ǁkhāǁkhāsabena ǃoa “ǃgâsado” di gere mî.​—Rom. 1:13; 1Pet. 2:17; 1Jhn. 3:13. *

9, 10. (a) Jodeǁîna tae-i ǃaroma ǃhaoǃnâbe ǂnīsasis ǃgomsiba ga ūhâ tama hâ? (b) Jesuba mâ aiǁgausa ge mâ ǃhaoǃnâbe ǀgoras xa? (Tsoatsoas ǃnâ hâ ai-īsiba mû re.)

⁹ Jesub ge khoeǃgâgun ase da ge nî mû gu dib ge mîs khaoǃgâ ǃgamǃgamsens di ǂhâǂhâsasiba ge ǁgau. (Khomai re Mateub 23:11, 12.) ǀGapiǂâixasib ǁîb apostelgu ǁaegu ge hâ îb ge ǁîga ge ǀguiǃnâxa kai tama hâ i. ǃHaoǃnâbe ǂnīsasib tsîn ge ge ǃgomsi i. Jodeǁîna Abrahammi suriba xun ra hā amaga ga ǂnīsa hâ? ǂGui Jodeǁîn ge nē ǂgomǃgâsiba ge ūhâ i. Xaweb ge Johaneb ǁĀǁnâ-aoba ǁîna ge mîba: “Elob a ǁkhā ǃkhaisa, nē ǀuina xu Abrahamma ǀgôana ǀkhī kaibasa.”​—Luk. 3:8.

¹⁰ Jesub ge ǃhaoǃnâbe ǂnīsasiba ge ǂgao tama hâ i. ǁÎb ge nēsa ge ǁgau xoaǂansabeb ge “tari-e kha a ti ǀgūkhoe?” di a dî bi o. Jesub ge nēsa ǃereams ǃgao Samariaǁîb ǂkhōsa ge sîsen-ū, nē Samariaǁîb ge ǃnari-aogu xa ǂnauhe hâ Jodeǁîba a kōǃâ amaga. ǃKharu gere Jodeǁîn ge nē khoeba kōs ǀguisa gere dī xaweb ge Samariaǁî khoeba nē Jodeǁîba ge ǀkhom. Jesub ge xoaǂansabeba ge mîba îb Samariaǁî khoeb khami ī. (Luk. 10:25-37) Jesub ge ge ǁgau Samariaǁî khoeb ge Jodeǁîna a ǁgausa ǀgūkhoena ǀnams a taesa.

11. Tae-i ǃaroma gu ge Jesub ǁkhāǁkhāsabega ǃhaoǃnâbe ǀgorasa xu nî ǂgōsense ge î-i tsî Jesuba ǁîga mati ge hui?

¹¹ ǁÎn ǁgui-aisa dīǀoaǀoas ǃaroman ge Jesub ǁkhāǁkhāsabena ǂnīsasib tsî ǃhaoǃnâbe ǀgoras tsîna ge sîsenǂam. ǀHomǃapab nîs aiǃâb ge ǁîna ge mîba în, “Judeab hoab ǃnâs kas Samariab hoab ǃnâs kasa, tsî ǃhūbaib di ǀams kōse” aoǁnâ. (ǃNǃkh. 1:8) Jesub ge ǁîna nē kai ǁgui-ais ǃgao ge aiǂhomi tsî ǁîna ge ǁgau în ǃgâi ǀgauga ǃhūsaben ǃnâ mû. Toroǃkham-aogu ǂgaeǂgui-aobab ge ge koa ǁîb mâǂoa ra ǂgoms ǃgao. (Mat. 8:5-10) Nasarets ǃnâb ge Jesuba khoena Jehovab ge ǃhūsaben ǃnâ ǃgâiǃgâibasensa ūhâ i ǀgaub xa gere mîba. Nēs ge Kanaanǁî ǃoa taras hîna ge Sarefatsa xu gere hâs tsî Naamanni Siriaǁîb hîna ge ǃomamaxa îb tsîn ǃnaeǃkhaide ǃkhōǂgā hâ. (Luk. 4:25-27) Jesub ge Samariaǁî kaikhoesa aoǁnâbas ǀguisa ge dī tama hâ i. Xawe ǀgam tsē ra Samariaǁîn ǃās ǃnâ ge hâ, khoen ge ǁîb haisi-ams ǃnâ ǃgâiǃgâibasensa ūhâ i amaga.​—Jhn. 4:21-24, 40.

12, 13. (a) Apostelga Jesub ge Samariaǁî kaikhoesa gere aoǁnâba o, o mati gere tanisen? (Tsoatsoas ǃnâ hâ ai-īsiba mû re.) (b) Tae-e ra ǁgau Jakobub tsî Johaneb tsîn ge nēsa ǁnâuǃā tama hâ isa?

¹² Supu tama î ge ge hâ i apostelga ǃhaoǃnâbe ǀgorasa xu ǂgōsensa. ǁÎgu  ge ge buru Jesub ge Samariaǁî kaikhoesa gere ǁkhāǁkhā o. (Jhn. 4:9, 27) Jodeǁî ǂgomdi ǂgaeǂgui-aogu ge tarekhoedi ǀkha khoen ra mû hîna ge ǃhoa tama hâ i, ǁnās ge Samariaǁî kaikhoedi hîna ge ǁgai xūna gere dīde ge ǃkhōǂgā hâ i. Apostelgu ge Jesuba ge ǁgari îb ǂû. Xaweb ge ǁîba a ǃeream ǀgaub ge ge ǁgau gagasi xūn aib ǂgomaiǂnûi hâsa. Aoǁnâs ǃnâ-ūb ge Jesuba ǁîb ǁGûb ǂâisa gere dī tsî Samariaǁî kaikhoesa ge aoǁnâba nēs ge ǁîba ǂû-i khami ge tsâba i.​—Jhn. 4:31-34.

¹³ Jakobub tsî Johaneb tsîn ge nēsa ge ǁnâuǃā tama hâ i. Jesub ǀkha gu ge Samaria ǃhūb ǃnâ hâ io, o gu ge ǁkhāǁkhāsabega ǃuia hâ ǃkhai-e gere ôa. Samariaǁîn ge ǁîga ǃkhōǃoa tama hâ i o, o kha ge Jakobub tsî Johaneb tsîkha Jesuba ge ǂgan î-i ǃāsa ǀaeb ǀkha dīkākāhe. Jesub ge ǁîkha ge ǀâxare. (Luk. 9:51-56) Jakobub tsî Johaneb tsîkha nē tanisen ǀgauba ga ūhâ nēs ga ǁîkha ǃā hâ o Galileab ǃnâ? ǃHaoǃnâbe ǀgoras ge ǁîkha ǃhuiba ge ǀgaiǀgai. Apostel Johaneb ge ǁîb tanisen ǀgaub ǃgao gere tao egab ge Samariaǁîna gere aoǁnâba o.​—ǃNǃkh. 8:14, 25.

14. ǃHaoǃnâbe ǀgorasa mati ge sîsenǂamhe?

¹⁴ Pinkstertsēs 33ǁî kurib dis ai î ge ǂhanuoǃnâ ǀgorasa ge hâ. ǂÛ-e di ge ǂhâb ǃnâ hâ ǃoa tarede gere māhe o, o î ge Grikegowaba ra ǃhoa ǃoa tarede ǂû-e ge māhe tama hâ i. (ǃNǃkh. 6:1) ǃHaoǃnâbe ǀgoras hîna ge gowagu ǃnâ hâ is ge ge ǃgomsi i. Apostelgu ge ǃhaese nē ǃnaeǃkhaisa ge ǂhanuǂhanu tsî aoga ge ǁgaumâi î gu khoena ǂû-e mā. Nē ǁgaumâisa aogu hoagu ge Grikegowab ǃnâ ǀonde ge ūhâ i. Nēs ge ge ǃaroma îgu ǃoa taradi xa ǃkhōǃoa-e.

15. Petruba mati ge aiǃgû ǃhaoǃnâbe ǀgorasa xu ǂgōsens ǀkha? (Tsoatsoas ǃnâ hâ ai-īsiba mû re.)

¹⁵ ǁKhāǁkhāsabe dīs ge 36ǁî kurib ǃnâ ǃhūbaib ǂhawase ge ǂanǂan-e. Apostel Petrub ge Jodeǁî khoen ǀkha ǀgui gere hâ. Elob ge Xristeǁîn ge tā ǃhaoǃnâbe ǀgorasa nî ūhâ di a mîs khaoǃgâb ge Petruba Korneliuba ge aoǁnâba ǁîb ge ge Romeǁî solda i. (Khomai re ǃNaeǃkhaidi 10:28, 34, 35.) ǁNās khaoǃgâb ge Petruba Jodeǁî tama khoen ǀkha gere ǂû tsî ǁgamǀhao. Xaweb ge kurigu khaoǃgâ Jodeǁî tama khoen ǀkha ge hâ ǀû Antioxias ǃnâ. (Gal. 2:11-14) ǁNā-amagab ge Pauluba, Petruba ge ǁnama tsîb ge ǁîba nēsa ge ūǃoa. Petrub ge ǁîb ǂguro sîǂkhanisa Jodeǁîn tsî Jodeǁî tama ǃgâsana ǃoa a xoa o ǂkhariro Asiab ǃnâ, ob ge hoa ǃgâsan xa ǃgâise gere ǃhoa.​—1Pet. 1:1; 2:17.

16. Tae-i ǀgauban ge ǃkharu ge ǁaeb Xristeǁîna omkhâi?

¹⁶ Apostelgu ge Jesub aiǁgausa xu ge ǁkhāǁkhāsen îgu ‘hoa’ khoena ǀnam. (Jhn. 12:32; 1Tim. 4:10) ǁAeba î ge ū xawe gu ge ǁîgu ǂâi ǀgauba ge dawa. ǃKharu ge ǁaeb Xristeǁîn ge ǀnamgun a ǃkhaisa ge ǁgau. Tertullian di ǀon hâ ǃkharu ge ǁaeb xoa-aob ge Xristeǁî tama khoen xa ge mî: “ǁÎn ge a ǀnamgu . . . Tsî nî ǁōba gu di.” ‘ǀAsa khoeba anas’ ǃnâ-ūn ge ǃkharu ge ǁaeb Xristeǁîna hoa khoena ǀguise gere mû.​—Kol. 3:10, 11.

17. Mati da ǃhaoǃnâbe ǀgorasa sida ǂgaoga xu nî ǃhomǂui? Aiǁgaude mā re.

¹⁷ Nētsēs tsîna da ge ǁaeba ǂhâ hâ ǃhaoǃnâbe ǀgorasa sida ǂgaoga xu ǃhomǂuisa. Fransi ǃnâ ǁan hâ ǃgâsas ge ra mî: “Jehovab ge tae-i a ǀnams,  nau khoen ǀkha xūna ǀgoragus tsî hoa khoena ǀnams tsîna ge ǁkhāǁkhā te. Xawe ta ge noxoba ra ǁkhāǁkhāsen ǃhaoǃnâbe ǀgorasa tita xu ǃhomǂuisa, nēs ge hoaǁae supu tama hâ. ǁNā-amaga ta ge ra ǀgore ǀgara.” ǃGâsas hîna Spanjeb ǃnâ ǁan hâs ge ra mî: “Tita ge ǀnî ǁaeb ai ǃhaoǃnâbe ǀgoras tsâsigu ǀkha ǃgomsiba ra hōǃâ tsî nēsa ǀnî ǁaegu ai dansa ra hōba. Xawe ta ge hoaǁae ra ǁgūtsâ nēs ǃoa-ai ǃkhamsa. Jehovaba ta ge kaise ra gangan nē ǀguiǃnâxasib omaris ǁani ta a ǃkhais ǃgao.” Hoa da ge ǃgâise nî ôaǃnâsen. Sida tsîna ǃhaoǃnâbe ǀgoras ǀkha ǃgomsiba ūhâ nē ǀgam ǃgâsa ra khami?

18, 19. (a) Tae-i ǃaroma da khoena nî ǁkhoreǁhare? (b) Nēsa da mati nî dī?

¹⁸ Kaise î ge a ǃgâi ǂâi oasa hoa da ge “ǃhaokhoese” tamas ka io ǃhūsabese īsa Elob aiǃâ. (Efe. 2:12) Xaweb ge Jehovaba sida “ǀnammi di tsurigu ǀkha” ge ǃgae. (Hos. 11:4; Jhn. 6:44) Xristub ge sida ge ǁkhoreǁhare. ǁÎb ge dao-amsa ge ǁkhowa-am î da Elob omaris ǁani kai. (Khomai re Romeǁîn 15:7.) Jesub tsîn ge ǀoasa kurusa da ūhâ tama hâ xawe sada ǀnammi ǃnâ ge ǃkhōǃoa, ǁnās ǁkhās khami da ge khoena tā nî ǂhābē.

¹⁹ ǃHaoǃnâbe ǀgoras tsî ǁaib tsîn ge ǃhūbaib ǃnâ nî ǀoa ǀams ra ǀgū khami. (Gal. 5:19-21; 2Tim. 3:13) Jehovab ǃoaba-aon ase da ge ǀgapiseba xu ra hā gā-aisiba ra ôa tsî ǃhaoǃnâbe ǀgorasa xu ra ǂgōsen. (Jak. 3:17, 18) ǂKhî da ge ra ǀhōsagusisa da ǀnî hâ ǃhūga xu ra hā khoen ǀkha ra omkhâi o tsî ǁîn gowab tsîna ra ǁkhāǁkhāsen o. Nēsa da ga ra dī o, o da ge ǂkhîba ra hōǃâ tsî ǂhanu-aisib hîna hurib ǃgabigu khami īb tsîna.​—Jes. 48:17, 18.

20. Tae-e ra ī sida ǂâi ǀgaub tsî ǂgaob tsîna da ga ra ǀkharaǀkhara o?

²⁰ “Gā-aisib dao-amdi ge tita ge ǁkhowa-ambahe” dis ge Australiab ǃnâ ǁan hâ ǃgâsasa ra mî. ǁÎs ge Elobmîsa ôaǃnâs ge ǁîsa a hui ǀgaub xa ra ǃhoa, ǁîs ge ra mî: “Tita ge ǀasa ǂâi ǀgaub tsî ǂgaob tsîn ǀkha ge ǀkharaǀkharahe. ǁNā-amaga î ge ǃhaoǃnâbe ǀgorasa tita ǃnâ ge bē.” Kanadab ǃnâ hâ ǃgâsab ge ra mî, “khoen ǀgaugu ge ǁîn ge ǃnaehe ǃkhaisa xu hâ tama hâ.” ǁÎb ge ǀapaǃaogowaba ra ǃhoa ǃgâsasa ge ǃgamme. Nē ǀkharaǀkharan ge ra ǁgau Xristeǁîn ǀnammi ge ǃhaoǃnâbe ǀgorasa a mâǃoa ǁkhā di. Tsîs ge nēsa ra ǀguiǃnâxa kai da.​—Kol. 3:14.