1, 2. (a) Ke’ng seo Jesu a ilego a se kgopelela baapostola ba gagwe thapelong ya gagwe ya mafelelo ge a be a na le bona? (b) Ke ka baka la’ng Jesu a ka ba a ile a bolela kudu ka go ba le botee?

SELALELONG sa gagwe sa mafelelo, Jesu o be a tshwenyegile ka gore baapostola ba gagwe ba be le botee. Ge a be a rapela a na le bona, o ile a bolela gore o be a nyaka gore barutiwa ba gagwe e be batee go etša ge yena le Tatagwe e le batee. (Bala Johane 17:20, 21.) Botee bja bona bo be bo tla nea bohlatse bjo matla le bjo bo lego molaleng bja gore Jehofa o be a romile Jesu lefaseng go tlo dira thato ya Gagwe. Batho ba be ba tla tseba bjang barutiwa ba kgonthe ba Jesu? Ba be ba tla ba bona ka ge ba ratana e bile ba na le botee.​—Joh. 13:34, 35.

² Bošegong bjoo, Jesu o ile a bolela kudu ka go ba le botee ka gobane o be a lemogile gore baapostola ba gagwe ga ba na botee. Ka mohlala, baapostola ba ile ba ngangišana mabapi le gore “ke ofe yo a bego a bonala e le yo mogolo go bona ka moka.” (Luka 22:24-27; Mar. 9:33, 34) Nakong e nngwe, Jakobo le Johane ba ile ba kgopela Jesu gore a ba nee madulo a bohlokwa Mmušong wa gagwe wa legodimong, yo mongwe a dule ka go le letona gomme yo mongwe a dule ka go le letshadi.​—Mar. 10:35-40.

3. Ke dilo dife tšeo di ka bago di ile tša dira gore barutiwa ba Kriste ba se be le botee, gona sehlogong se re tlo hwetša dikarabo tša dipotšišo dife?

 ³ Go nyaka maemo a bohlokwa e be e se selo se nnoši seo se ka dirago gore barutiwa ba Kriste ba se be le botee. Batho ba mehleng ya Jesu ba be ba arogane ka gobane ba be ba sa ratane e bile ba kgethollana. Barutiwa ba Jesu ba be ba swanetše go fenya mokgwa o bjalo. Sehlogong se, re tlo hwetša dikarabo tša dipotšišo tše di latelago: Jesu o ile a lebeletšana bjang le kgethollo? O ile a thuša barutiwa ba gagwe bjang gore ba se kgetholle batho ba bangwe le gore e dule e le batee? Le gona dithuto tša gagwe di ka re thuša bjang gore re dule re na le botee?

4. Hlalosa kamoo Jesu a ilego a kgethollwa ka gona.

⁴ Jesu ka boyena o ile a kgethollwa. Ge Filipi a be a botša Nathaniele gore o be a hweditše Mesia, Nathaniele o ile a re: “Na go na le selo se sebotse se se ka tšwago Natsaretha?” (Joh. 1:46) Go bonagala Nathaniele a be a tseba ka boporofeta bjo bo lego go Mika 5:2, eupša o be a nagana gore Natsaretha e be e nyatšega kudu gore Mesia a ka tšwa moo. Ka mo go swanago, Bajuda bao ba bego ba na le maemo ba be ba nyatša Jesu ka gobane e be e le Mogalilea. (Joh. 7:52) Bajuda ba bantši ba be ba lebelela batho ba Galilea e se selo. Bajuda ba bangwe ba ile ba leka go nyatša Jesu ka go mmitša Mosamaria. (Joh. 8:48) Setšo le bodumedi bja Basamaria di be di fapane le tša Bajuda. Bajuda le Bagalilea ba be ba sa hlomphe Basamaria e bile ba be ba sa nyake go dirišana le bona.​—Joh. 4:9.

5. Balatedi ba Jesu ba ile ba kgethollwa bjang?

⁵ Baetapele ba bodumedi ba Bajuda le bona ba be ba sa hlomphe balatedi ba Jesu. Bafarisei ba be ba ba bitša “batho ba rogakilwego.” (Joh. 7:47-49) Ba be ba lebelela motho yo mongwe le yo mongwe yo a sego a tsena sekolo sa bodumedi sa Bajuda goba yoo a bego a sa latele setšo sa bona e le motho yo a nyatšegago le yo a tlwaelegilego. (Dit. 4:13) Jesu le barutiwa ba gagwe ba be ba kgethollwa ka gobane batho ba be ba ikgantšha ka bodumedi bja bona, maemo a bona setšhabeng le morafo wa bona. Barutiwa ba Jesu le bona ba be ba na le kgethollo. E le gore ba be le botee, ba be ba swanetše go fetoša tsela yeo ba bego ba lebelela dilo ka yona.

6. Nea mehlala yeo e bontšhago kamoo kgethollo e ka re kgomago ka gona.

⁶ Lehono, batho ba bantši ba na le kgethollo. Batho ba bangwe ba ka re kgetholla goba rena ra kgetholla ba bangwe. Kgaetšedi wa mmulamadibogo yo a tšwago Australia o re: “Ke ile ka hloya makgowa le go feta ge ke be ke bona a swara batho bao e bego e le kgale ba dula Australia ka go hloka toka. Lehloyo leo le ile la gola le go feta ka gobane le nna ke ile ka tlaišwa.” Ngwanabo rena yo a tšwago Canada o ile a bolela gore o be a kgetholla ba bangwe ka baka la leleme leo ba le bolelago. O itše: “Ke be ke nagana gore batho ba go bolela Sefora ba be ba le bohlokwa kudu. Ka gona ke ile ka hloya batho ba go bolela Seisemane.”

7. Jesu o ile a lebeletšana bjang le kgethollo?

⁷ Go swana le mehleng ya Jesu, lehono batho ba ka bontšha kgethollo ka mo go tseneletšego. Jesu o ile a lebeletšana bjang le kgethollo? Sa mathomo, o be a hloile kgethollo e bile a swara batho go swana. O be a ruta bahumi le badiidi, Bafarisei le Basamaria gaešita le balekgetho le badiradibe. Sa bobedi, dilo tšeo a bego a di ruta le tsela yeo a bego a swara batho ka yona di ile tša ruta barutiwa ba gagwe gore ba swanetše go phema go belaela batho ba morafo o mongwe goba go ba hloya.

8. Ke molao ofe wa motheo wo o dirago gore Bakriste ba be le botee? Hlalosa.

⁸ Jesu o ile a ruta balatedi ba gagwe molao wa motheo o bohlokwa woo o re rutago go ba le botee. O itše: ‘Ka moka ga rena re bana ba motho.’ (Bala Mateo 23:8, 9.) Lebaka le lengwe leo le dirago  gore re be “bana ba motho” ke gore ka moka ga rena re tšwa go Adama. (Dit. 17:26) Eupša ga go felele moo. Jesu o ile a hlalosa gore barutiwa ba gagwe ke bana ba motho le dikgaetšedi ka gobane Jehofa ke Tatago bona wa legodimong. (Mat. 12:50) Go oketša moo, ke ditho tša lapa le legolo la Modimo leo le kopantšwego ke botee le tumelo. Ke ka baka leo baapostola ka mangwalong a bona gantši ba bego ba bitša barutiwagotee le bona gore ke ‘bana babo bona le dikgaetšedi.’​—Baroma 1:13; 1 Pet. 2:17; 1 Joh. 3:13. *

9, 10. (a) Ke ka baka la’ng Bajuda ba be ba se na lebaka la go ikgantšha ka morafo wa bona? (b) Jesu o ile a diriša seswantšho sefe go ruta Bajuda gore ba se be le kgethollo? (Bona seswantšho 1, seo se lego mathomong a sehlogo.)

⁹ Ka morago ga gore Jesu a hlalose ka mo go kwagalago gore re swanetše go swarana bjalo ka bana ba motho, o ile a bontšha le gore go bohlokwa kudu gore re be le boikokobetšo. (Bala Mateo 23:11, 12.) Bjalo ka ge re šetše re ithutile, boikgogomošo bo ile bja dira gore baapostola ba Jesu ba se be le botee. Le gona mehleng ya Jesu batho ba be ba ikgantšha ka merafo ya bona. Na Bajuda ba be ba na le lebaka la go ikgantšha ka ge e be e le ditlogolwana tša Aborahama? Bajuda ba bantši ba be ba nagana gore ba na le lebaka la go ikgantšha e bile ba ipotša gore ba bohlokwa go feta batho ba bangwe. Eupša Johane Mokolobetši o ile a ba botša gore: “Modimo o na le matla a go tsošetša Aborahama bana maswikeng a.”​—Luka 3:8.

¹⁰ Jesu o ile a ruta batho gore go fošagetše ge ba ikgantšha ka morafo wa bona. O ile a ba ruta seo nakong ya ge yo mongwe wa bamangwalo a be a mmotšiša gore: “Ge e le gabotse, ke mang yo e lego moagišani wa ka?” Jesu o ile a mo araba ka go bolela seswantšho sa Mosamaria yoo ka botho a ilego a hlokomela Mojuda yo a bego a iteilwe ke mahodu. Bajuda bao ba bego ba feta ka tsela ba ile ba se be le taba le monna yo wa batho, mola Mosamaria yena a ile a mo kwela bohloko. Jesu o ile a phetha seswantšho seo ka go botša monna yoo gore o swanetše go swana le Mosamaria yoo. (Luka 10:25-37) Jesu o ile a bontšha gore Bajuda ba be ba ka kgona go ithuta go Mosamaria kamoo ba ka ratago baagišani ba bona e le ka kgonthe.

11. Ke ka baka la’ng barutiwa ba Kriste ba be ba se ba swanela go kgetholla batho bašele, gona Jesu o ile a ba thuša bjang gore ba kwešiše seo?

¹¹ Pele Jesu a ka rotogela legodimong, o ile a laela barutiwa ba gagwe gore ba bolele ditaba tše dibotse “Judea ka moka le Samaria le go fihla karolong ya kgole ya lefase.” (Dit. 1:8) E le gore barutiwa ba Jesu ba kgone go phetha modiro woo, ba be ba swanetše go tlogela go ikgantšha le go kgetholla ba bangwe. Gantši Jesu o be a botša barutiwa ba gagwe gore batho bašele ba na le dika tše dibotse gomme seo se ile sa ba thuša gore ba tle ba kgone go botša batho ba mehuta ka moka ditaba tše dibotse. O ile a reta tona ya madira yeo e bego e se Moisiraele gore e be e na le tumelo e matla. (Mat. 8:5-10) Ge a be a le motseng wa gabo wa Natsaretha, Jesu o ile a bolela kamoo Jehofa a bego a rata batho bašele ka gona. O ile a bolela ka mohlologadi wa Mofenikia yo a tšwago Tsarepata le Naamane wa Siria yo e bego e le molephera. (Luka 4:25-27) Le gona Jesu ga se a no ruta mosadi wa Mosamaria ka Modimo eupša o ile a fetša matšatši a mabedi a le motseng wa Samaria ka gobane batho ba moo ba be ba nyaka go tseba ka Modimo.​—Joh. 4:21-24, 40.

12, 13. (a) Baapostola ba ile ba arabela bjang ge Jesu a be a ruta mosadi wa Mosamaria ka Modimo? (Bona seswantšho 2, seo se lego mathomong a sehlogo.) (b) Ke’ng seo se bontšhago gore Jakobo le Johane ba be ba sa kwešiše thuto yeo Jesu a bego a ba ruta yona?

¹² Go be go se bonolo gore baapostola ba se be le kgethollo. Ba be ba maketše ge ba bona Jesu a  se na bothata bja go ruta mosadi wa Mosamaria ka Modimo. (Joh. 4:9, 27) Ka baka la’ng? Ka gobane baetapele ba bodumedi ba Bajuda ba be sa boledišane le basadi mafelong ao go fetago batho. E bile ba be ka se leke le go bolela le mosadi yola wa Mosamaria yoo a bego a se a tuma gabotse. Baapostola ba ile ba kgopela Jesu gore a je. Eupša Jesu o be a se na taba le dijo ka gobane o be a thabela go boledišana le mosadi yoo ka Modimo. Go ruta batho ka Mmušo wa Modimo, go akaretša le go ruta mosadi wa Mosamaria, e be e le thato ya Tatagwe, ka gona go be go swana le dijo go yena.​—Joh. 4:31-34.

¹³ Jakobo le Johane ga se ba ka ba kwešiša thuto ye ya bohlokwa. Ge barutiwa ba be ba sepela le Jesu nageng ya Samaria, ba ile ba nyaka moo ba bego ba ka robala gona. Basamaria ba ile ba gana go ba amogela, ka gona Jakobo le Johane ba ile ba galefa gomme ba botšiša Jesu gore ba bitše mollo legodimong gore o tle o fediše batho ba moo ka moka. Jesu o ile a ba kgalema. (Luka 9:51-56) Na Jakobo le Johane ba be ba tla botša Jesu gore a bitše mollo legodimong ge nkabe batho bao ba gannego go ba amogela e be e le ba tikologong ya gabo bona ya Galilea? Aowa. Mohlomongwe ba be ba galefile ka gobane ba ile ba kgethollwa. Ka morago, Johane o ile a boela Samaria go yo botša batho ba moo ditaba tše dibotse. Go ka direga gore o ile a itsholela gore mathomong o ile a ba galefela ka gobane mo nakong ye ba bantši ba ile ba theetša molaetša wa gagwe.​—Dit. 8:14, 25.

14. Kgethollo yeo e ilego ya ba gona ka phuthegong e ile ya rarollwa bjang?

¹⁴ Ka moragonyana ga Pentekoste ya 33 C.E., go ile gwa tsoga kgethollo ka phuthegong. Ge bahlologadi ba badiidi ba be ba abelwa dijo, bahlologadi bao ba bolelago Segerika ba ile ba tshedišwa mahlo. (Dit. 6:1) Go ka direga gore ba be ba kgethollwa ka baka la leleme leo ba le bolelago. Baapostola ba ile ba lokiša taba ye kapejana ka go kgetha banna bao ba swanelegago gore ba okamele modiro wa go aba dijo. Banna ba ka moka bao ba bego ba swanelega, ba be ba na le maina a Segerika. Se se ka ba se ile sa kgothatša bahlologadi bao ba bego ba kwele bohloko.

15. Petro o ile a dira’ng go bontšha gore ga a sa kgetholla ba bangwe? (Bona seswantšho 3, seo se lego mathomong a sehlogo.)

¹⁵ Ka 36 C.E., modiro wa go dira barutiwa o ile wa fihla le ditšhabeng tše dingwe. Moapostola Petro o be a tlwaetše go phela le Bajuda feela. Eupša ka morago ga gore Modimo a hlalose ka mo go kwagalago gore Bakriste ga se ba swanela go ba le kgethollo, Petro o ile a ruta Koronelio yo e bego e le lešole la Moroma. (Bala Ditiro 10:28, 34, 35.) Ka morago ga moo, Petro o ile a thabela go ja le go gwerana le Bakriste bao e bego e se Bajuda. Lega go le bjalo, mengwaga e itšego ka morago, Petro o ile a se sa ja le Bakriste bao e bego e se Bajuda kua motseng wa Antiokia. (Bagal. 2:11-14) Ka baka leo, Paulo o ile a phošolla Petro, gomme Petro o ile a amogela tayo yeo. Ge Petro a be a ngwalela Bakriste ba Bajuda le bao e bego e se Bajuda kua Asia Minor lengwalo la gagwe la pele, o ile a bolela ka mokgatlo wohle wa bana babo rena.​—1 Pet. 1:1; 2:17.

16. Bakriste ba lekgolong la pele la mengwaga ba be ba tsebega ka’ng?

¹⁶ Go molaleng gore baapostola ba ile ba ithuta mohlaleng wa Jesu gore ba swanetše go rata “batho ba mehuta ka moka.” (Joh. 12:32; 1 Tim. 4:10) Le ge seo se ile sa ba tšea nako, mafelelong ba ile ba fetoša tsela yeo ba bego ba nagana ka yona. Bakriste ba lekgolong la pele la mengwaga ba be ba tsebega ka go ratana. Ge Tertullian, e lego mongwadi wa lekgolong la bobedi la mengwaga a tsopola batho bao e bego e se Bakriste o itše: “[Bakriste] ba a ratana . . . E bile ba ikemišeditše go hwelana.” Ka baka la ge Bakriste bao ba ile ba ‘apara semelo se sefsa,’ ba ile ba ithuta gore go Modimo batho ka moka ba a lekana.​—Bakol. 3:10, 11.

17. Re ka dira’ng gore re tloše kgethollo ka mo go feletšego ka dipelong tša rena? Nea mehlala.

¹⁷ Le rena lehono re ka swanelwa ke go tloša  kgethollo ka mo go feletšego ka dipelong tša rena. Kgaetšedi wa kua Fora o hlalosa kamoo a lwago le maikwelo a kgethollo ka gona. O re: “Jehofa o nthutile gore lerato ke eng le gore go abelana le ba bangwe dilo gaešita le go rata batho ba mehuta ka moka go bolela eng. Eupša ke sa ithuta go lwantšha maikwelo a go kgetholla ba bangwe, le gona seo ga se bonolo. Ke ka baka leo ke dulago ke rapela ka taba ye.” Kgaetšedi wa kua Sepania le yena o ntweng e swanago. O re: “Ka dinako tše dingwe ke lwa le maikwelo a go hloya morafo o itšego, gomme gantši ke a a fenya. Eupša ke a tseba gore ke swanetše go dula ke elwa. Ke leboga Jehofa gore ke lapeng la gagwe leo le nago le botee.” Yo mongwe le yo mongwe wa rena a ka itlhahloba. Na mohlomongwe le rena re swanetše go lwantšha maikwelo a go kgetholla ba bangwe go swana le dikgaetšedi tše tše pedi?

18, 19. (a) Re na le mabaka afe a go se kgetholle batho ba bangwe? (b) Re ka dira’ng go bontšha gore ga re kgetholle ba bangwe?

¹⁸ Ke mo gobotse go gopola gore le rena re kile ra ba “bašele,” goba bantle, re se na tswalano le Modimo. (Baef. 2:12) Eupša Jehofa o re gogetše go yena a diriša “marala a lerato.” (Hos. 11:4; Joh. 6:44) Le gona Kriste o re amogetše. Go bjalo ka ge eka o re buletše mojako wa gore re be ditho tša lapa la Modimo. (Bala Baroma 15:7.) Ka ge Jehofa le Jesu ba re amogetše le ge re sa phethagala, go re’ng rena re ka kgetholla batho ba bangwe?

¹⁹ Ge bofelo bja lefase le bo dutše bo batamela, ga go pelaelo gore dikarogano, kgethollo le lehloyo di tlo oketšega. (Bagal. 5:19-21; 2 Tim. 3:13) Lega go le bjalo, ka ge re le bahlanka ba Jehofa re nyaka bohlale bja Modimo, bjoo bo re thušago go se be le kgethollo le go ba le khutšo. (Jak. 3:17, 18) Re a thaba ge re gwerana le batho ba dinageng tše dingwe, re amogela batho ba ditšo tše dingwe e bile re ithuta maleme a mangwe. Ge re dira se, khutšo e elela bjalo ka noka, gomme go loka go etša maphoto a lewatle.​—Jes. 48:17, 18.

20. Go direga’ng ge lerato le kgoma dipelo tša rena le menagano ya rena?

²⁰ Kgaetšedi yo a tšwago Australia yo re boletšego ka yena pejana o re: “Ke ile ka hwetša therešo.” Ge a hlalosa kamoo go tseba therešo ya Beibele go ilego gwa mo kgoma ka gona o re: “Pelo ya ka le monagano wa ka di ile tša fetoga. Ke ile ka ikwa ke se sa na kgethollo le lehloyo.” Ngwanabo rena wa Canada yena o re ga bjale o a bona gore “gantši kgethollo e bakwa ke go se šetše, le gore motho ga a be le dika tše dibotse feela ka gobane a etšwa nageng e itšego.” Gona bjale o nyalane le kgaetšedi yo a bolelago Seisemane! Tsela yeo batho ba ba ilego ba fetoga ka yona, e bontšha gore lerato la Bokriste le kgona go fenya kgethollo. Lerato leo le re kopanya ka setlemo seo se ka se kgaogego.​—Bakol. 3:14.