1, 2. 1) ¿Tuku skilh Jesús kxʼoración akxni awatiya xkatawi xʼapóstoles? 2) ¿Tuku xlakata Jesús xlilakgaputsama xlakata makxtum xtawilakgolh x’apóstoles?

AKXNI xaʼawatiya katawayalh x’apóstoles, Jesús xlilakgaputsama xlakata tlan akxtum xtawilakgolh. Akxni xkatatlawama oración x’apóstoles, lichuwinalh pi putum kstalaninanin akxtum xtawilakgolh, chuna la xla chu xTlat akxtum wilakgolh (kalikgalhtawakga Juan 17:20, 21). Komo makxtum xtawilakgolh kstalaninanin anta xlitasiyalh pi wa Jehová tiku xmalakgachanit Jesús kKatiyatni. Tapaxkit x’ama litalakgapaskgo xaxlikana kstalaninanin Jesús chu uma xtlawalh pi akxtum xtawilakgolh (Juan 13:34, 35).

² Ama katsisni Jesús liwana lichuwinalh pi xlakaskinka akxtum xtawilakgolh xlakata xʼakxilhnit pi x’apóstoles xkitsankganikgo nalalimasiyanikgo tapaxkit. Xlakan xlitaʼakglhuwikgonit «xati nchatum xlakan xapuxku nawan» chu ni xlipulanajku chuna xtlawakgonit (Luc. 22:24-27; Mar. 9:33, 34). Atanu kilhtamaku, Santiago chu Juan kskinikgonit Jesús pi xkamaxkilh tlakg xlakaskinka putawilh kxpaxtun anta kxTamapakgsin (Mar. 10:35-40).

3. 1) ¿Tuku max xtlawalh pi kstalaninanin Cristo ni makxtum xtawilakgolh? 2) ¿Tuku takgalhskinin nakgalhtiyaw k’uma artículo?

³ Pero ni kajwatiya uma katuwa xwili kstalaninanin xlakata tlan  makxtum xtawilakgolh. Latamanin nachuna xtapapitsikgonit xlakata xlasitsini chu xlalaksakpaxkikgo. Wa xlakata xtalakaskin xlakgmakgankgolh uma nitlan tapuwan. K’uma artículo nakgalhtiyaw umakgolh takgalhskinin: ¿La talatlawalh Jesús talaksakpaxkit? ¿La kamasiyanilh kstalaninanin xlakata ni nalaksakpaxkinankgo chu makxtum natawilakgo? Chu ¿la kinkamakgtayayan xtamasiy xlakata makxtum natawilayaw?

4. Kalichuwinanti makgapitsi tuku xlakata laksakpaxkika Jesús.

⁴ Nachuna Jesús laksakpaxkika. Akxni Felipe wanilh Natanael pi xtekgsnit Mesías, xla kgalhtilh: «¿Lantla [...] nataxtuyacha chatum talipaw chixku [...] kachikin Nazaret?» (Juan 1:46). ¿Tuku xlakata chuna wa Natanael? Chuna la akxilhaw, xlakgapasa tuku xlichuwinankanit kMiqueas 5:2 chu xkatsi pi Mesías x’ama lakachin kBelén. Wa xlakata max xlakpuwa pi Nazaret ni lu xlakaskinka xwanit xlakata anta nalakachin Mesías. Nachuna lhuwa latamanin xalak Judea xlakgmakgankgo Jesús xlakata xalak Galilea xwanit (Juan 7:52). Lhuwa latamanin xalak Judea tlakg xlakaskinka xmakgkatsikgokan nixawa tiku galileos. Amakgapitsi judíos maklakaskinkgolh tachuwin samaritano xlakata namamaxanikgo Jesús (Juan 8:48). Samaritanos chu judíos xalak tanu tanu kachikin xwankgonit chu tanu xtakanajlakan. Chuna la kJudea chu kʼGalilea, judíos xkalakgmakgankgo samaritanos (Juan 4:9).

5. ¿Tuku talaksakpaxkit titaxtukgolh kstalaninanin Jesús?

⁵ Judíos tiku xpulalinkgo takanajla nachuna xkalakgmakgankgo kstalaninanin Jesús. Fariseos nitlan xkaʼakxilhkgo (Juan 7:47-49). Chu na nitu xkaliʼakxilhkgo putum tiku ni xkgalhtawakgakgonit k’escuelas rabínicas judías o ni xtlawakgo xtalismaninkan (Hech. 4:13). Talaksakpaxkit nema tayanikgolh Jesús chu kstalaninanin wa xlakata takanajla, tanu la xtasiyakgo o tanu xtachuwinkan. Kstalaninanin na xlaksakpaxkinankgo. Wa xlakata komo tlan makxtum xtawilakgolh xtalakaskin xlakgpalikgolh xtapuwankan.

6. Kalichuwinanti makgpitsi li’akxilhtit nema masiya la kinkalaktlawayan talaksakpaxkit.

⁶ La uku, kakilhtamaku niku lamaw lhuwa anan talaksapaxkit. Max wi tiku kinkalakgmakganan o max akinin chuna tlawayaw. Chatum precursora xalak Australia lichuwinan: «Akxni ktsukulh lilakpuwan talaksakpaxkit tuku patikgonit chu chuntiya patimakgolh, uma tlawalh pi ni xakka’akxilhputun tiku lakglhmumokgon. Chu chuna la akit nitlan kilikatsinika tlakg taliwakalh kintasitsi nema xakkgalhi». Anta kCanadá niku chuwinankan francés chu inglés, chatum tala lichuwinan pi xlaksakpaxkinan. Lichuwinan: «Xaklakpuwan pi latamanin tiku xchuwinankgo francés tlakg xlakaskinka xlitaxtukgo chu ni xakka’akxilhputun tiku xchuwinankgo inglés».

7. ¿La talatlawalh Jesús talaksakpaxkit?

⁷ Chuna la kxkilhtamaku Jesús, la uku talaksakpaxkit chuntiya tuwa natalakgpali. ¿La talatlawalh Jesús uma nitlan tapuwan? Pulana, xla nikxni chuna lakpuwa chu xla nikxni laksakpaxkinalh. Kalitachuwinalh Dios tiku xkgalhikgo tumin, tiku limaxkgenin, fariseos, samaritanos, nachuna xpukinanin tumin chu makglakgalhinanin. Chu xlipulaktiy, tuku xmasiya chu xliʼakxilhtit kamasiyanilh kstalaninanin pi xtalakaskin ni nakalakgmakgankgo amakgapitsi latamanin.

8. Kalichuwinanti niku takilhtinit tastakyaw xlakata makxtum natawilakgo kstalaninanin Cristo.

⁸ Jesús masiyalh akgtum xlakaskinka tastakyaw niku lichuwinan xlakata makxtum  natawilakgo kstalaninanin Cristo. Lichuwinalh: «Wixin, paks natalanin» (kalikgalhtawakga Mateo 23:8, 9). ¿Tuku xlakata akinin natalan litaxtuyaw? Xlakata putum akinin anta minachaw kxkilhtsukut Adán (Hech. 17:26). Nachuna la lichuwinalh Jesús, tiku kstalaninanin natalan litaxtukgo xlakata xTlatkan limaxtukgo Jehová (Mat. 12:50). Nachuna, makgtapakgsikgo k’akgtum lanka familia xaʼespiritual nema makxtum wilakgo xlakata anan tapaxkit chu takanajla. Wa xlakata, kxtatsokgnikan apóstoles ankgalhin natalan xkalimapakuwikgo tiku na kstalaninanin Cristo xlitaxtukgo (Rom. 1:13; 1 Ped. 2:17; 1 Juan 3:13). *

9, 10. 1) ¿Tuku xlakata judíos ni xtalakaskin pi tlanka xkamakgkatsika? 2) ¿La masiyalh Jesús pi nitlan nalaksakpaxkinana? (Kaʼakxilhti xapulana dibujo).

⁹ Akxni xlichuwinanita pi xlakaskinka natalan nalaliʼakxilhaw, Jesús na lichuwinalh pi xlakaskinka nataktujuyaw (kalikgalhtawakga Mateo 23:11, 12). Chuna la akxilhnitaw, tatlankit lakgachunin kamapitsilh x’apóstoles Jesús. Nachuna, kxkilhtamaku Jesús tlanka xkamakgkatsikan xlakata xkilhtsukutkan. Lhuwa judíos tlanka xkamakgkatsikan xlakata xminkgonitancha kxkilhtsukut Abrahán. Pero ni xtalakaskin chuna xlakpuwankgolh, Juan tiku xmununan kawanilh: «Dios, tlan xla namatlaniy, yuma nchiwix, xkaman Abrahán natlawaniy» (Luc. 3:8).

¹⁰ Jesús lakgmakgalh tiku xlitlankajlakgo xkilhtsukutkan. Chuna lichuwinalh akxni chatum escriba kgalhskilh: «¿Tiku kilipaxkit?». Jesús kgalhtilh akxni lichuwinalh akgtum parábola xlakata chatum samaritano, chatum chixku lakgalhamalh chatum judío tiku xmakgkgalhanankanit chu xwilinikgonit. Pulana, xtitaxtukgonit makgapitsi judíos pero ni makgtayakgolh. Pero samaritano makgtayalh. Akxni Jesús masputulh uma parábola wanilh ama escriba pi xtalakaskin nalikatsi chuna la ama samaritano (Luc. 10:25-37). Chuna Jesús limasiyalh pi chatum samaritano tlan xkamasiyanilh judíos tuku xkilhchanima xlikana napaxkinanaw.

11. 1) ¿Tuku xlakata kstalaninanin Cristo ni xlilaksakpaxkinatkan xwanit? 2) ¿La kamakgtayalh Jesús kstalaninanin xlakata ni nalaksakpaxkinankgo?

¹¹ Akxni Jesús nina xʼan kʼakgapun, kawanilh kstalaninanin pi xlichuwinankgolh Dios «kJudea, chu kSamaria, chu asta awatiya kxtankgana tiyat» (Hech. 1:8). Xlakata tlan chuna xtlawakgolh, xtalakaskin pi ni xlaksakpaxkinankgolh chu ni xtlankajwanankgolh. Jesús xkalitachuwinanit kstalaninanin pi tiku ni judíos xkgalhikgo tlan tayat, chuna kamakgtayalh xlakata tlan xkalitachuwinankgolh Dios putum latamanin. Akgtum liʼakxilhtit, malankilh xtakanajla nema xkgalhi chatum soldado tiku tanu kachikin xmakgtapakgsi (Mat. 8:5-10). Chu anta kNazaret lichuwinalh pi Jehová xkamakgtayanit tiku ni judíos, la puskat tiku xninit xchixku xalak Sarepta, akgtum kachikin nema xtapakgsini Fenicia chu nachuna Naamán tiku xkgalhi lepra (Luc. 4:25-27). Chu Jesús ni kajwatiya litachuwinalh xlakata Dios chatum samaritana, wata tamakgxtakgli kSamaria akgtiy kilhtamaku xlakata latamanin lakgatikgolh tamakatsinin nema kalitachuwinalh (Juan 4:21-24, 40).

12, 13. 1) ¿La akxilhkgolh kstalaninanin Jesús akxni xtachuwinama chatum samaritana? (Kaʼakxilhti xapulana dibujo). 2) ¿La likatsiyaw pi Santiago chu Juan ni akgatekgskgolh tuku Jesús xkamasiyaniputun?

¹² Pero xʼapóstoles Jesús tuwa makgkatsikgolh nalakgmakgankgo talaksakpaxkit. Akgtum liʼakxilhtit, kaks lilakawankgolh akxni akxilhkgolh pi Jesús xtachuwinama chatum samaritana (Juan 4:9, 27). Xpulalinanin takanajla ni xkatachuwinankgo lakpuskatin niku lhuwa  xtsamakan, liwaka komo ama samaritana nitlan xlin xlatamat. Akxni xʼapóstoles Jesús akxilhkgolh pi lhuwata la xtachuwinanita ama puskat, wanikgolh pi wi tuku xwalh. Pero komo xla lu xtachuwinama ama puskat ni wa xlakaskinka akxilhli komo nawayan o ni. Xla xtaway xliʼakxilha natlawa xtalakaskin xTlat chu nalichuwinan, maski chatum samaritana tiku xtachuwinama (Juan 4:31-34).

¹³ Santiago chu Juan ni akgatekgskgolh tuku Jesús xkamasiyaniputun. Akxni taʼankgolh Jesús kSamaria, kstalaninanin xputsamakgolh niku nalhtatakgo. Pero samaritanos ni kamakgamakglhtinankgolh, wa xlakata Santiago chu Juan wanikgolh Jesús pi kskilh xtaktalh lhkuyat kʼakgapun xlakata xmasputulh ama kachikin. Pero xla tliwakga kastakyawalh (Luc. 9:51-56). ¿Xlisitsikgolh Santiago chu Juan komo chuna xlalh anta k’Galilea, niku xkachikinkan xwanit? Max chuna lakpuwankgolh xlakata talaksakpaxkit. Alistalh, apóstol Juan kalitachuwinalh xlakata Dios samaritanos, chu lhuwa kgaxmatnikgolh. Max lu maxanalh akxni lakapastakli tuku xwanit makgasata (Hech. 8:14, 25).

14. ¿La lakkaxtlawaka akgtum taʼakglhuwit nema xʼanan kʼakgtiy grupos xlakata tanu tanu xchuwinankgo?

¹⁴ Nina makgas kPentecostés kata 33, tawi akgtum taʼakglhuwit xlakata xlaksakpaxkinankan kcongregación. Akxni xkamaxkimaka taway lakpuskatin tiku xninita xchixkukan, ni kuenta katlawanika tiku xchuwinankgo griego (Hech. 6:1). Max chuna xtlawakan kaj xlakata xtachuwinkan. Apóstoles lakapala putsakgolh lakchixkuwin tiku liwana xmakgpitsikgolh taway. Xputumkan xkgalhikgo tukuwani xagriego, chu uma tlawalh pi lakpuskatin tiku nitlan kalikatsinika tlan xmakgkatsikgolh.

15. ¿La katsinitilhalh Pedro pi ni xlilaksakpaxkinat? (Kaʼakxilhti xapulana dibujo).

¹⁵ Kkata 36 tlakg tsukulh talakgatumi la xlichuwinankan Dios. Apóstol Pedro xlismaninit pi kajwatiya akxtum xkatala tiku judíos. Pero akxni Dios lichuwinalh pi kstalaninanin Cristo ni xlilaksakpaxkinatkan, Pedro litachuwinalh xlakata Dios chatum soldado tiku romano xwanit, xwanikan Cornelio (kalikgalhtawakga Hechos 10:28, 34, 35). Wa xlakata, lata ama kilhtamaku tsukulh katawayan chu akxtum xkatala tiku ni judíos xwankgonit. Pero titaxtulh makgapitsi kata nialh akxtum katawayalh tiku ni judíos xalak Antioquía (Gál. 2:11-14). Ama kilhtamaku, Pablo stakyawalh, chu Pedro makgamakglhtinalh ama tastakyaw. ¿Tuku xlakata likatsiyaw? Xlakata akxni katsokgnanilh xapulana carta kstalaninanin Cristo tiku judíos chu tiku ni judíos xalak Asia Menor, xatapaxuwan katachuwinalh «[putum] natalan» (1 Ped. 1:1; 2:17).

16. ¿Tuku kalilakgapaska kstalaninanin Cristo?

¹⁶ Liwana tasiya pi liʼakxilhtit nema kawilinilh Jesús kstalaninanin nachuna katsinikgolh nakapaxkikgo «xlipaks nchixkuwin» (Juan 12:32; 1 Tim. 4:10). Maski titaxtulh tsinu kilhtamaku, lakgpalikgolh xtapuwankan. Wa xlakata xapulana kstalaninanin Cristo kalilakgapaska pi xlapaxkikgo. Tertuliano chatum tsokgna tiku lichuwinalh tuku xwankgo tiku ni kstalaninanin Cristo: «Kaʼakxilhti la lapaxki chu asta mastakgo xlatamatkan xpalakata achatum». Akxni lilhakganankgolh «xasasti [latamat]», xapulana kstalaninanin Cristo kaʼakxilhkgolh latamanin chuna la kaʼakxilha Dios (Col. 3:10, 11).

17. Kalichuwinanti makgapitsi liʼakxilhtit xlakata la nalakgmakganaw talaksakpaxkit.

¹⁷ La uku, max akinin na lakaskinaw kilhtamaku xlakata nalakgmakganaw talaksakpaxkit. Chatum tala xalak Francia lichuwinan la tlawa: «Jehová kimasiyaninit la nakpaxkinan, la nakkamakgtaya amakgapitsin chu tuku kilhchanima nakapaxkiya putum latamanin. Pero chuntiyaku kkatsinima la naklakgmakgan uma nitlan tapuwan chu min kilhtamaku tuwa kmakgkatsi. Wa xlakata chuntiya ktlawa oración xlakata uma nitlan tapuwan». Chatum tala  xalak España nachuna titaxtuma. Lichuwinan: «Kliskuja xlakata naklakgmakgan tuku nitlan kalakpuwani tiku tanu tasiyakgo chu tanu tachuwin chuwinankgo. Ankgalhin kliskuja xlakata ni chuna naklakpuwan. Lu kpaxtikatsini Jehová pi kmakgtapakgsi kʼakgtum familia nema makxtum wilakgo». Kinchatunukan kakinkatlawanikan uma takgalhskinin: ¿Chuntiyaku talakaskin naklakgmakgan talaksakpaxkit chuna la umakgolh natalan?

18, 19. 1) ¿Tuku xlakata akinin tlan xatapaxuwan nakamakgamakglhtinanaw putum latamanin? 2) ¿La tlan chuna natlawayaw?

¹⁸ Tlan nalilakpuwanaw pi makgasata kilhtamaku akinin makgat xwilaniw Dios (Efes. 2:12). Pero Jehová xatapaxuwan kinkalimin kxkachikin (Os. 11:4; Juan 6:44). Chu Jesús xatapaxuwan kinkamakgamakglhtinan. Kinkamaxkin talakaskin tlan namakgtapakgsiyaw kxfamilia Dios (kalikgalhtawakga Romanos 15:7). Komo Jesús kinkamakgamakglhtinanitan maski makglakgalhinanin akinin, ¿la nakamakgamakglhtinanaw akinin latamanin?

¹⁹ Xlakata talakatsuwima xlisputni uma kakilhtamaku, tlakg talhuwima tapapitsit, talaksakpaxkit chu tasitsi (Gál. 5:19-21; 2 Tim. 3:13). Pero akinin kskujnin Jehová putsayaw «ntastakat [o liskgalala] xala talhman» nema ni laksakpaxkinan chu tlawa pi kaʼanalh takaksni (Sant. 3:17, 18). Lu lipaxuwayaw pi kiʼamigoskan katlawayaw latamanin tiku xalak atanu kachikinin, kamakgamakglhtinanaw maski tanu xtalismaninkan chu asta tlan nakatsiniyaw xtachuwinkan. Komo chuna natlawayaw, nalipaxuwayaw takaksni «xtachuna akgtum kgalhtuchokgo» chu tuku xaʼakgstitum «xtachuna la takgayawana xalak pupunu» (Is. 48:17, 18).

20. ¿Tuku la akxni tapaxkit makgtaya kintalakapastaknikan chu kinakujkan?

²⁰ Tala xalak Australia tiku lichuwinaw kpárrafo akgchaxan lichuwinan la makgtayalh takgalhtawakga xalak Biblia. Lichuwinan: «Ktsukulh katsi tuku xaxlikana takatsin. Xtachuna la komo kkgalhilh akgtum xasasti naku chu xasasti talakapastakni. Kakxilhli la tsukulh tapanu tasitsi chu talaksakpaxkit nema xakkgalhi». Chu tala xalak Canadá wan pi la uku akxilha «komo tanu nakalakpuwaniya latamanin tlawa pi nakalakgmakgana» chu «xtayatkan nema kgalhikgo latamanin ni wa xlakata niku lakachinkgolh». Chu asta tatamakgaxtokgli chatum tala tiku chuwinan inglés. Umakgolh talakgpalit masiya pi tapaxkit nema kgalhikgo kstalaninanin Cristo tlawa pi makxtum natawilayaw chu ni nalalaksakpaxkiyaw.