1, 2. a) ¿Ambe kurhajkuarhispi Jesusi últimu kómarhikuarhu enga úpka imeri apostulicha jingoni? b) ¿Andisï Jesusi uandanhiani japi nénaksï seguiripirini májku kʼéri jarhani imeri chúxapaticha?

ÚLTIMU senarhu imeri apostulicha jingoni, Jesusi uandanhiaxapti nénaksï úpirini seguirini májku kʼéri jarhani. Enga kómarhini japka, uandaspti eska uékasïrenga eskaksï iámindu imeri chúxapaticha májku kʼéri japiringa, ísï eskaksï na jaka Jesusi ka imeri Táti (arhinta je Juanu 17:20, 21). Engaksï disipuluecha májku kʼéri japiringa, xarhatapirindiksï eska Jeoba axaspka Jesusini Echerirhu. Inde uékperakua, xarhatapirindi eskaksï sési jimbo Jesusiri chúxapatispka ka inde ambe úpirindi eskaksï májku kʼéri japiringa (Juanu 13:34, 35).

² Ima chúri, Jesusi someni uandaspti eska kánikua jukaparhakueska májku kʼéri jarhani, jimboka exespka eskaksï apostulicha kueratanchasïrenga sési pájperani. Arhirperasptiksï “aberi né sánderu kʼéri ambepirini”, ka no ima primeru xanharispti (Luk. 22:24-27; Mar. 9:33, 34). Máteru xanhari, Santiagu ka Juanu arhisptiksï Jesusini eska íntsaapiringa imani lugarichani  engaksï sánderu jukaparhakuepka imeri Reinurhu (Mar. 10:35-40).

3. a) ¿Ambe úpirini úni eskaksï Kristueri chúxapaticha no májku kʼéri japiringa? b) ¿Náki kurhamarhikuechanchi mókuantaua?

³ Peru problema no imajkuespti engaksï ísï uékenga kʼéri ambeni, jarhaspti máteru ambe enga no jurajkuapiringa Kristueri chúxapatichani paraksï májku kʼéri jarhani. Máteru problema jindespti eskaksï kʼuiripuecha no úsïrenga sési pájperani, nóksï xénchperasïrendi ka niksï uékani iámindu jásï kʼuiripuni. Ísï jimbo, jatsisptiksï para kénditani ambe engaksï pʼikuarhinhenga. Ini artikulurhu, mókuantauakachi arini kurhamarhikuechani: ¿Ambe úspi Jesusi enga no sési kánhapka? ¿Néna jorhendaaspi Jesusi imeri chúxapatichani paraksï sési kaani iáminduechani ka paraksï májku kʼéri jarhani? Ka ¿nénajtsïni jarhuatasïni Jesusiri jorhentperakuecha parachi seguirini májku kʼéri jarhani?

4. Uanda je máru ambe enga Jesusi jatsipka para tekaantani engaksï no sési kámapka.

⁴ Jesusi mísmu niáraspti pʼikuarherani néneski no xénchanhani. Enga Felipi arhipka Natanaelini eska exentaspkia Mesiasini, ima arhispti: “¿Andi Nasareti uá uérani ma ambakiti ambe?” (Juanu 1:46). ¿Andisï ísï uandapi Natanaeli? Ima mítitixapti profesiani enga Miqueas 5:2 jaka eska Mesiasi Beleni andajpenupiringa. Jamberi jimbosï eratsipti eska Nasareti no xáni ambakiti lugari máespka komu para Mesiasi jima uératini jurhani. Ka májkuenksï úspti máru Judea anapu kʼuiripuecha engaksï jatsikuarheripka, nóksï jeiapanhintaspti Jesusini jimboka Galilea anapuespka (Juanu 7:52). Uánikua Judea anapuechaksï sánderu kʼéri exekuarhisïrendi ka eska Galilea anapuecha. Ka máteru judiuechaksï úrasïrendi uandakuani samaritanu, nomasi paraksï Jesusini no sési pʼikuastani (Juanu 8:48). Samaritanuecha ka judiuechaksï no májku iretarhu anapuespti ka nóksï májkueni jásï relijioni jatsispti. Judea ka ístu Galilea anapuecha, nóksï xénchaasïrendi samaritanuechani níksï uékeni kúrhiani (Juanu 4:9).

5. ¿Nénaksï kánhaspi Jesusiri chúxapaticha engaksï jatsipka para tekaantani?

⁵ Judiuecha engaksï relijioniri orhejtsïkutipka, nóksï jeiapanhintaasïrendi Jesusiri chúxapatichani. Para fariseuecha, Jesusiri chúxapatichaksï ísïspti eska no ambarhati kʼuiripuecha (Juanu 7:47-49, TNM). Ísïksï exeasïrendi komueska ísku nema ka nóksï xénchaasïrendi imechani engaksï no nípka estudiarini eskuelarhu ma para jorhentpiri máeni o nóksï úni imecheri pʼindekuechani (Uku. 4:13). Jesusi ka imeri chúxapatichaksï no sési kánhaspti jimbokaksï máteru relijioni jatsipka, ménderuenksï irekani ka máteru naniksï anapueni. Asta disipuluechaksï jamberi no úsïrendi sési pájperani. Ísï jimbo, paraksï úni májku kʼéri jarhani, jatsipirindiksï para mójtakuni imecheri eratsikuani.

6. Uanda je máru experiensiechani engaksï xarhatajka na enga xáni no sésika menusi uaani máteruechani.

⁶ Iásïjtu, kʼuiripu no sési kámberasïndi. Úpirindijtsïni juchantsïni no sési kámani ochi jucha no sési kaani máteruechani. Australia anapu prekursora ma uandantasïndi: “Engani jukarini pendienti japka na engaksï xáni no sési kánhapka indijenecha ka na engaksï útasï no sési kánhani jaka, uénaspka sánderu kurhunhini kʼuiripu urapitini. Ka na engani ji mísmu no sési kánhapka, úspti eskani sánderuni kurhunhiapiringa”. Canadá enga francés ka inglés uandanhajka, erachi ma uandasïndi eska antesi menusi uásïrenga máteruechani, uandasïndi: “Ísï exesïrenga enajki kʼuiripu enga francés uandajka sánderu kʼéri ambepi ka no xénchasïrenga kʼuiripuni enga inglés uandajka”.

7. ¿Ambe úspi Jesusi para xarhatani eska iáminduechani uékaasïrenga?

⁷ Iásï, májkueni eska Jesusiri jurhiatikuecha jimbo, menusi uaani máteruechani, uáti kʼéri problema máeni ka úkua jukani para nóteru ísï eratsinia. ¿Ambe úspi Jesusi para orhepani uérakuni imani ambe? Primeru, Jesusi iáminduecha jingoni sési pájperasïrendi ka jukaparharaani. Predikarikuaspti rikuechani ka pobrichani, fariseuechani ka samaritanuechani, asta impuestu kobrarpitichani ka pekadorichani. Ka segundu, ambe enga jorhentpipka ka imeri ejemplu jingoni, xarhatakuaspti imeri disipuluechani eskaksï jatsispka para mintsikaani  máteruechani o eskaksï jánguarhintapiringa sési pájperani iáminduecha jingoni.

8. Explikari je nákiski prinsipiu enga jarhuataajka kristianuechani májku kʼéri jarhani.

⁸ Jesusi ambakiti prinsipiu ma jorhentpespti enga jarhuataajka kristianuechani májku kʼéri jarhani. Uandaspti: “Cha iáminduecha ermanueska” (arhinta je Mateu 23:8, 9). ¿Andichisï iáminduecha ermanue? Orheta, jimbokachi iáminduecha Adaniri desendientiska (Uku. 17:26). Ka eska Jesusi na uandapka, imeri chúxapatichachi ermanueska jimbokachi ísï exesïnga Jeobani eska juchari Táti auandarhu anapu (Mat. 12:50). Ístu, iáminduechachi niáraska Tata Diosïri familia jingoni úkuarhini enga májku kʼéri jaka uékperakua ka jakajkukua jimbo. Ísï jimbo, apostulichaksï someni ermanu arhiasïrendi kristianuechani kartecharhu engaksï kúnguarhikuechani axakuauenga (Rom. 1:13; 1 Ped. 2:17; 1 Juanu 3:13).

9, 10. a) ¿Andiksïsï judiuecha no jatsipi para kʼéramakuarhini imecheri rasa jimbo? b) ¿Néna jorhentpespi Jesusi eska no sési jarhaska kʼéramakuarhini rasa jimbo? (Exe je primeru dibujuni enga uénakuarhu jaka).

⁹ Enga Jesusi na uandapkia eskachi iáminduecha jatsiska para ísï exejperani komu ermanuecha, uandaspti eska kánikua jukaparhakueska kaxumbitiini (arhinta je Mateu 23: 11, 12). Eskachi na exekia, sánderu kʼéri exekuarhini eska máteruecha, ménisï úsïrendi eskaksï apostulicha no úpiringa sési pájperani. Ístu, Jesusiri jurhiatikuecha jimbo, kʼuiripu kʼéramakuarhisïrendi imecheri rasa jimbo. Uánikua judiuechaksï sánderu kʼéri exekuarhisïrendi eska máteruecha jimbokaksï Abraaniri desendientispka. Peru ima ambe no rasoni máespti paraksï ísï jámani, jimboka Juanu el Bautista arhiaspka eska “Diosï úpiringa [...] tsakapuechani jimbo uántani Abraniri uájpechani” (Luk. 3:8).

¹⁰ Jesusi no jaiapanhintasïrendi eska nema kʼéri exekuarhipiringa imeri rasa jimbo. Ka jorhentpespti inderi ambe jiáni enga karari ma kurhamarhipka: “¿Néski juchiti besinu o prójimu?”. Jesusi mókukuntaspti aianguparini ilustrasionini ambakiti samaritanueri, achati ma enga pʼamojkupka judiuni ma engaksï atapka ka euakuarhini ambe. Uánikua judiuechaksï uanokuspti ka nóksï ambe ma úni. Peru samaritanu kʼóru anhaxurhispti ka jarhuani. Enga Jesusi uandantapkia ilustrasionini, arhispti kararini eska ísïpiringa komueska samaritanu (Luk. 10:25-37). Indeni ambe uandantaparini, Jesusi xarhataspti eska samaritanu ma úpiringa jorhendaani judiuechani paraksï iámindu kʼuiripuechani uékaani.

11. a) ¿Andiksïsï Jesusiri chúxapaticha jatsipi paraksï iáminduechani pareju kaani? b) ¿Néna jarhuataaspi Jesusi imeri chúxapatichani kurhanguni eskaksï jatsispka para iáminduechani pareju kaani?

¹¹ Antesi de auandarhu karhanchintani, Jesusi arhiaspti imeri chúxapatichani eskaksï predikaripiringa “iápuru Judea ka Samaria ísï ka iápuru parhakpinirhu asta jima enga sánderu iauaniika” (Uku. 1:8). Paraksï ísï úni, jatsipirindiksï para jánguarhintani uékani iámindu jásï kʼuiripuni ka nóksï kʼéri exekuarhini. Antesi, Jesusi preparariuasptia paraksï predikarini, aianguapariani na engaksï ambakiti kʼuiripuepka imecha engaksï no judiuepka. Por ejemplu, Jesusi sési ambe arhispti ejersitueri ofisialini ma enga máteru nani anapuepka imeri kʼéri jakajkukua jimbo (Mat. 8:5-10). Ka enga Nasareti japka, uandaspti eska Jeoba jeiapanhintaaspka imechani engaksï no judiuepka, komu Sarepta anapu uarhiiti tsïndini ka Naamanini enga lepra pʼamenchapka jini Siria anapu (Luk. 4:25-27). Ka Jesusi no solu predikarikuspti samaritanani, sino ístu tsimani jurhiatikua pakaraspti Samaria, jimboka kʼuiripu jingontku kurhaaspka mensajini (Juanu 4:21-24, 40).

12, 13. a) ¿Náksï exespi apostulicha enga Jesusi samaritanani ma predikarikuni japka? (Exe je segundu dibujuni enga uénakuarhu jaka). b) ¿Nénachi mítiski eska Santiagu ka Juanu nóksï úspka sési kurhanguni ambe enga Jesusi uékapka jorhendaani?

¹² Apostulichaksï úkua jukanchaspti jorhenguarhini uékaani iámindu jásï kʼuiripuechani. Por ejemplu, ískuksï pakaraspti engaksï exepka eska Jesusi  samaritanani ma predikarikuxapka (Juanu 4:9, 27). Judiuecha engaksï relijioniri orhejtsïkutipka, nóksï uandontskuarhisïrendi uarhiiticha jingoni kʼuiripu japarini ka menosi Samaria anapu ma jingoni enga no sési exekatepka. Enga Jesusi ióni sáni uandontskuarhipkia uarhiiti jingoni, apostulichaksï arhispti eska tʼirepiringia. Peru Jesusi sési uandontskuarhixapti enga no jamberi kasu úpka tʼireni. Para ima, úni ambe enga Tátemba uékenga ka aianhpini, ísïspti komueska imeri tʼirekua, jimbosï asta samaritanani ma predikarikupti (Juanu 4:31-34).

¹³ Santiagu ka Juanu, nóksï kurhanguspti ambe enga Jesusi uékapka jorhendaani. Engaksï Samaria ísï nirani japka Jesusi jingoni, disipuluechaksï exexapti naniksï pakarapirini ima chúri. Peruksï Samaria anapuecha no jiókaaspti, jimboksïsï Santiagu ka Juanu uandapti sinksï úpirini kurhajkuarhini eska auandarhu uératini chpiri uekorhipiringa para kʼamajkuni imani iretani. Peru Jesusi uinhamu xukaaspti (Luk. 9:51-56). Engaksï Galilea anapuecha ísï kápiringa, nani engaksï Santiagu ka Juanu anapuepka ¿ísïksï ikiapirini? Jamberiksï jimbo xáni ikiapti jimbokaksï útasï no úsïrenga sési pájperani máteruecha jingoni. Ísï ióni jimbo, apostuli Juanu niraspti samaritanuechani predikarikuani ka uánikuaksï kurhajchaspti. Jamberi niárapti kʼuratseni enga miántapka imani ambe enga antesi úpka (Uku. 8:14, 25).

14. ¿Néna sési pénhantaspi problema ma enga tsimani grupuecharhu úkuarhipka engaksï táchani jásï idioma uandenga?

¹⁴ Enga nitamapkia Pentekostesi uéxurhini 33 jimbo, problema ma úkuarhispti kúnguarhikuarhu jimbokaksï no iáminduecha pareju kánhaspka. Engaksï tʼirekua arhukukuani japka uarhiiti tsïndichani, nóksï íntsaaspti imechani engaksï griegu uandenga (Uku. 6:1). Jamberi ma ambe jimbo engaksï ísï kánhapka, jindepti jimbokaksï máteru idioma uandasïrenga. Apostulichaksï jirejiresï ánchikuarhispti ka erakuasptiksï uánikua achati jánhaskatichani paraksï tʼirekua etsakuni. Ka iámindu ima achaticheri nombrichaksï griegu jimboespti ka inde ambe marhuaspti paraksï uarhiiti tsïndicha engaksï kristianepka sési pʼikuarherantapiringa.

15. ¿Néna niáraspi jorhenguarhini Pedru sési pájperani iáminduecha jingoni? (Exe je terseru dibujuni enga uénakuarhu jaka).

¹⁵ Uéxurhini 36 jimbo, sánderu uápurisï aianhpinhaxaptia. Apostuli Pedru pʼindespti solu judiuecha jingoni kúnguarhini. Peru enga Jeoba xarhatapka eskaksï kristianuecha jatsispka para iáminduechani sési kaani, Pedru soldadu romanuni ma predikarikuspti enga Korneliu arhinhenga (arhinta je Ukuecha 10:28, 34, 35). Jiáni uératini, uénaspti tʼireni ka májku kʼéri jarhani jakajkuticha jingoni engaksï no judiuepka. Peru máru uéxurhini tátsekua, nóteru uékasïrendia tʼireni máru kristianuecha jingoni engaksï no judiuepka jini Antiokia (Gal. 2:11-14). Jiáni, Pablu jurhimberantaspti Pedruni ka ima jiókuarhispti imani ambe. ¿Nénachi mítiski eska jiókuarhispka? Jimboka enga Pedru primeru karta karakuapka kristianu judiuechani ka ístu no judiuechani Asia Menor anapuechani, uékperakua jingoni uandaspka iámindu erachicheri ambe (1 Ped. 1:1; 2:17).

16. ¿Nénaksï niáraspi mítikateni primeru kristianuecha?

¹⁶ Seguru eska Jesusiri ejemplu jingoni, apostulichaksï jorhenguarhispka uékaani iámindu jásï kʼuiripuechani (Juanu 12:32; 1 Tim. 4:10). Nájkirukaksï tiempu uétarhinchapka, úsptiksï mójtakukuarhini ka uékaani iáminduechani. Asta jamberiksï primeru kristianuecha niáraspti mítikateni imecheri uékperakua jimbo. Seguni Tertuliano, karari ma segundu siglurhu anapu, no kristianuechaksïnha arini ambe uandasïrendi: “Exe na engaksï uékperajka máteru ka máteruni jingoni ka na engaksï asta uéjka uarhini máteruni jimbo”. Engaksï primeru kristianuecha na mójtakurhipkia, niárasptiksï iámindu kʼuiripuechani ísï exeani eska Jeoba na exeajka (Kol. 3:10, 11).

17. Explikari je ejempluecha jingoni ambejtsïni jarhuataa uékaani iáminduechani.

¹⁷ Iásï, jamberichi juchajtu tiempu uétarhinchaaka parachi úni iáminduecha jingoni sési pájperani. Pirenchi ma Francia anapu uandantasïndi na enga jánguarhintani jaka inde ambe úni: “Jeobarini jorhendasti nénaeski uékpini, nénaeski intsïmpitiini, ambe enga arhikuekajka iámindu jásï kʼuiripuechani xénchaani. Peruni útasï jorhenguarhixaka néna sési pájperani iáminduecha jingoni ka no méntkisï fásilisti. Jimbosïni seguirini jaka kómarhini indeni  ambe jimbo”. Pirenchi ma enga España irekaka, sáno májkueni ambe nitamanchaxati. Uandasïndi: “Jánguarhintaxaka nóteru kurhunhiania máru kʼuiripuechani engaksï máteru jásï pʼindekuechani jatsiaka. Sáno méntkisï úsïnga nóteruni ísï pʼikuarherania, peruni uétarhinchasïnga seguirini jánguarhintani. Diosmeiamu Jeobani, sési pʼikuarherasïnga familia ma jingoni jarhani enga májku kʼéri jaka”. Táchanisïchi jatsiska para exeni ambe enga juchari mintsitarhu jaka. ¿Jarhaski útasï ambe ma engachi jatsika para mójtakuni, ísï eskaksï i pirenchicha?

18, 19. a) ¿Náki rasonichanchi jatsiaski parachi tsípikua jingoni erokaani iámindu jásï kʼuiripuechani? b) ¿Nénachi uá ísï úni?

¹⁸ Sési japirindi miántani eskachi ióntki iáminduecha jarharitixapka Tata Diosïni (Efes. 2:12). Peru Jeoba imeri uékperakua jimbo, ústi eskachi andarherapiringa (Os. 11:4; Juanu 6:44). Ka Jesusijtsïni tsípikua jingoni erokasti. Ústi eskachi jucha uáka Jeobaeri familia jingoni úkuarhini (arhinta je Roma 15:7). Engajtsïni Jesusi xáni uékperakua jingoni erokaka, nájkirukachi no perfektueka, ¿nénachi úpirini jucha no ísï erokani nemani?

¹⁹ Eska na sánhani arhini jaka axuterku jarhania jurhiatikua enga kʼamajkunhaaka no sési jásï ambe, kʼuiripu sánderu no uáti májku kʼéri jarhani, no uáti sési pájperani iáminduecha jingoni ka no xénchperaati (Gal. 5:19-21; 2 Tim. 3:13). Peru jucha engachi Jeobani marhuakujka, jirinhasïngachi ‘auandarhu anapu mímixekuani’ enga iáminduechani marhuakuajka ka enga újka eska pínandikua jauaka (Sant. 3:17, 18, Táta Diósïri Uandakua Tata Jesukristueri Aiatsperakua). Kánikuachi sési pʼikuarherasïnga amigu úkuarhini imecheri engaksï máteru lugarirhu anapueka, jiókuarhiani imecheri pʼindekuechani ka asta jamberi jorhenguarhini idiomani engaksï uandajka. Engachi jánguarhintaska ísï úni, jatsiakachi pínandikua ísï eska ríu ma ka méntkisïchi jurhimbitku jámaaka komueska marirhu anapu olecha (Is. 48:17, 18).

20. ¿Ambe niárasïni úkuarhini engachi jurajkujka eska uékperakua mójtakuaka juchari mintsitani ka eratsikuani?

²⁰ Pirenchi Australia anapu engachi párrafu 6 exeka, uandasïndi na enga marhuakuka Bibliani estudiarini. Uandasïndi: “Iásï kʼóruni jorhenguarhiskia ambe enga jindeka jurhimbikua ambe. Ka inde ambe ústi eskani kénditapiringa imani ambe enga juchiti mintsitarhu japka ka ambe engani eratsenga. Exeska na engani sánhani arhika nóteruni kurhunhiania máteruechani ka xénchaania iámindu jásï kʼuiripuechani”. Ka erachi Canadá anapu uandasïndi eska kuenta íntskukuarhiskia eska “no mítiani máteruechani, úsïnga eska nema sánderu kʼéri ambe exekuarhiaka eska máteruecha” ka eska “kʼuiripu ma uáka kualidadichani xarhataani nani uéjki anapueni”. Asta jamberi tembuchasti pirenchi ma jingoni enga inglés uandajka. Íksï experiensiecha xarhatasïndi eska ambakiti uékperakua, úsïnga eskachi májku kʼéri jauaka ka eskachi no jámaaka menusi uaani máteruechani (Kol. 3:14).