O wama ni Rihopoam ci Solomon, 40 miheca a mikowan to Israil. (1 Hongti 11:42) Itini ˈayaw ni Yis 997 miheca, mapatay ci Solomon, ikor mikitini Yirusalim malinahay ci Rihopoam tayra kaˈamis a Sikim, itiraay mapasimal mala hongti. (2 Rayray 10:1) O inanengay ngaˈayay a hongti ci Solomon, midotocay ci Rihopoam mala hongti, calemcemay cingra alatek papakafilo ko niyah hokira. Kahenayay, malifaayto ni Rihopoam ko pasangaray a demak, wa ira ko inaneng ningra a misaysay han?

Ikor no mala hongti ci Rihopoam, mahapinangay ko karawraw no kitakit. Caka halafin, miocoran no finawlan ko taypiyaw, miˈaraw ci Rihopoaman, mifanaˈ cingraanan to saali nangra, saan ko sowal: “Mipaˈorong ci wama iso ci Solomon i tamiyanan to karetengay a ˈinorong. Ano sakahemawen iso ko ˈinorong niyam i, rahodayto ko ˈorip niyam, mihakelong kami i tisowanan.”—2 Rayray 10:3, 4.

Maedeng pasangaray ci Rihopoam a misaˈosi! Ano hayien ningra ko saali no finawlan, o paro no lomaˈ ningra ato sikawdan, cowato ko kakadofah ko kaˈorip nangra. Kawraan ano naˈayen ningra wa misafelit ko finawlan alatek. Oniya faelohay a hongti, wa samaan ko demak hani? Salakatay cingra milicay to harateng no malohemay malitengay, ikor mikilimay cingra to sakalecad no mihecaan a tamdaw, milicay to sapaini nangra. Salikor misaka dademakan ningra ko sapaini no kaemangay tamdaw, cowa ko mamisangaˈay to finawlan, sanay ko sowal ningra: “Ikaka haca ko kareteng no sapaˈorong ako i tamowanan. O kalosastiˈ ko sapistiˈ ningra i tamowanan, nikawrira, o rafirto ko sapistiˈ ako i tamowanan.”​—2 Rayray 10:6-14.

Mikitini toniya demak, o maanan ko mananam iso hani? O matoˈasay a salikaka, matenesay i noˈadingoan halafinayto a midoko ci Yihofaan, adihayay ko milifetan nangra, o sapaini nangra wa ngaˈay padama kitaanan matatodong ko pisaˈosi.  Ano makahi kita, mitoor to sapaini nangra wa malo citanengay a tamdaw.​—Yopu 12:12.

Sapisalofaw ci Rihopoam to misafelitay, misaˈopoay to sofitay a milood, kawra miocoran ni Yihofa ko pairasolay ci Simaya, pasowal ci Rihopoaman saan ko sowal: “Aka pilood to salikaka namo a finawlan no Israil, pinokay kamo a maemin. Onini a demak i, o nafalocoˈan Ako saan ko Kawas.”—1 Hongti 12:21-24. *

Sapitengilaw ci Rihopoam to limoˈot ni Yihofa, cowa ko madoloay. Haratengen hena, wa samaan ko pinengneng no finawlan ci Rihopoaman, na somowalay koniya hongti wa tano “o rafirto ko sapistiˈ” to finawlan, ˈarawhan pakiyadi han ko misafelitay a tamdaw! (Nengnengen ko 2 Rayray 13:7.) Ano samaanto ko piharateng no finawlan, ci Rihopoam ato sofitay ningra kamayan a ‘mitengil to sowal ni Yihofa, mitoor to sowal ni Yihofa a minokay.’

Mikitini toniya demak mananamay ko maanan hani? Ano mitengil kita to sowal no Kawas, latekay mamalikaf no tamdaw, kawra mihaen to demak, o citanengay, o mamilifok to olah ato sapalemed no Kawas.​—Limoˈot 28:2.

Mitengil ci Rihopoam to sowal no Kawas, eca ka pilood to Israil kitakit, samanayto ko teloc hani? Itini pikowan ni Rihopoam, talaˈayaway patireng to niyaroˈ no Yutaya ato Pinyamin. Sowal no Fangcalay Cudad, ‘taˈangayay ko patanektek ningra toniya niyaroˈ.’ (2 Rayray 11:5-12) Sakakaay i, cecay liyad midofdofay ci Rihopoam to sarikec ni Yihofa. Itiya 10 finacadan a Israil kitakit misatapangay midoko to makaniway kawas, orato pasayraay ci Rihopoam ko ˈalomanay tamdaw a midama, tayra i Yirusalim midoko ci Yihofaan. (2 Rayray 11:16, 17) Midofdof ci Rihopoam to Kawas, telocto matongalay ko tanektek no fadangalan ningra.

Tanektek ko kitakit ni Rihopoam i, miliyasay to sarikec ni Yihofa, hanaca misatapang a midoko to makaniway kawas! Hano mihaen ko demak ningra hani? O Amon a tamdaw ko wina ni Rihopoam, mafiyoray no wina cingra hokira? Cowa ka fanaˈ kita. (1 Hongti 14:21) Ikorto, polong no Yutaya tamdaw mikotoday ci Rihopoaman a midoko to makaniway kawas. Orato, mihayian ni Yihofa ko hongti no Icip ci Sisak, milood to Yirusalim. Soˈlin mitongalan ni Rihopoam a paˈicel ko niyaroˈ no Yutaya, kamayan a malowid ni Sisak!—1 Hongti 14:22-24; 2 Rayray 12:1-4.

Tiya tahirato i Yirusalim ko pilood ni Sisak i, katalawanto ko demak. Toni toki, o pairasolay ci Simaya miˈaraway ci Rihopoaman ato ˈalomanay a ˈaˈideman, palihaf to sowal no Kawas cangranan, saan ko sowal: “Miliyas kamo i Takowanan saka, miliyas Kako i tamowanan anini, patoroden Ako kamo i kamay ni Sisak.” Samaanay ko harateng ni Rihopoam hani? Sanay ko sowal no Fangcalay Cudad: “Hai sato a mafanaˈ ko hongti ato kakerikeridan to nika ciraraw nangra, saka, sowal sa cangra: ‘O moecelay ko demak [ni Yihofa].’” Pakayni pirikec ni Yihofa ngaˈayay ko waywayan ni Rihopoam, telocto milidongan ni Yihofa ci Rihopoam ato Yirusalim.​—2 Rayray 12:5-7, 12.

Ikorto, padotocay ci Rihopoam a mikowan to katimolay a Yutaya Kitakit. Itini kalahongtian ningra, sapatirengaw ci Rihopoam to wawa ningra ci Apiya, midotoc cingranan mala hongti, pakayni sapiliyasaw to sakalaˈafasaw no roma wawa to saaroˈan no hongti, adihayay ko sapatelong ni Rihopoam cangranan. (2 Rayray 11:21-23) Itini toniya demak, ikakaay ko taneng ni Rihopoam tono kaemanganho ningra.

Ci Rihopoam soˈlin midemakay to pina a ngaˈayay demak i pinengneng no Kawas, salikor cowa pilifok to olah no Kawas. Misamaanay hani? Sowal no Fangcalay Cudad: “Tatiih ko demak ni Rihopoam, nawhani caay pilongoc cingra to nafalocoˈan [ni Yihofa].”​—2 Rayray 12:14.

Mikitini ci Rihopoaman mananamay ita ko maanan hani? Itini hakelong no kaˈorip ningra, latekay midofdofay cingra ci Yihofaan, midemakay to ciepocay to finawlan no Kawas a demak. Kawraan, cowa ka palahad ci Rihopoam to ngaˈayay kalalaˈed ci Yihofaan, cowa pisarocod to falocoˈ a pakahemek ci Yihofaan, telocto marefongay a midoko to  makaniway kawas, midemak to kapiliˈan ni Yihofa a demak. Mihaen ko harateng iso alatek: “Mitengil ci Rihopoam to salimoˈot ni Yihofa, o soˈlinay sapaka hemekaw ci Yihofaan a pasiyor, anca mafiyoray no tao hokira?” (2 Rayray 11:3, 4; 12:6) Tahini katoˈasan ni Rihopoam, miliyaway midemak to kapiliˈan ni Yihofa a demak, cowa ka hecad cingra to akong ci Tafitian! Soˈlina na mararaway ci Tafiti, kawra soˈlinay a pasiyor to raraw no niyah. Tangongolay ko kaolah ningra ci Yihofaan, itini kaˈorip midopoay to matatodongay a pidoko.​—1 Hongti 14:8; ˈOlic 51:1, 17; 63:1.

Mikitini ci Rihopoaman adihayay ko mamananam ita, midipot kita to paro no lomaˈ, matayal saki Kawas, citatodongay to papakahemeken. Kawra sapilifokaw to olah ato sapalemed ni Yihofa, tatano kahemekan ni Yihofa a pakayraan ko sapidoko ita Cingranan, hanaca ira ko ngaˈayay kalalaˈed to Kawas.

Sakairaaw no ngaˈayay kalalaˈed ita aci Yihofa, kalimelaan ko palahad to tangongolay olah to Kawas. O kaolah ita to Kawas mahecaday o talingoan, ceriden a mitongal ko kasoy, ho eca ka padeng ko namal. Micerid kita miˈosi to Fangcalay Cudad, midotim to sinael, mikifalocoˈ a mitolon wa matongal ko olah ci Yihofaan. (ˈOlic 1:2; Loma 12:12) O hatiniay a olah miocoray kitaanan misaˈicel midemak to kaolahan ni Yihofa a demak, hanaca ano mararaw i, soˈlin a pasasiyor, micangacang to sasodod no Kawas. Aka a pidoedo kita to pasaripaˈan ni Rihopoam, tanekteken ita a midopo ko matatodongay a pidoko.​—Yuta 20, 21.