Rehoboam i yalobilʌch Salomón, tsaʼ bʌ i chaʼle yumʌl 40 jab ti Israel (1 R. 11:42). Cheʼ bʌ Salomón tsaʼ chʌmi ti jabil 997 cheʼ maxto tilemic Cristo, Rehoboam tsaʼ majli ti Siquem chaʼan miʼ waʼchocontel ti rey (2 Cr. 10:1). ¿Tsaʼ ba i bʌcʼña i chʼʌm jiñi eʼtel tiʼ wenta i tat, juntiquil tsaʼ bʌ wen cʌjñi chaʼan cabʌl i ñaʼtʌbal? Rehoboam tajol maʼañic tsiʼ ñaʼta mi orajach mi caj i qʼuejlel mi añʌch i ñaʼtʌbal chaʼan miʼ tojʼesan tsʌts tac bʌ wocol.

Cheʼ bʌ Rehoboam tsiʼ chʼʌmʌ i yumʌntel, wen an ti wocol tsiʼ taja jiñi israelob. Ti wiʼil, jiñi waʼchocobiloʼ bʌ ti tejclum tsaʼ majli i pejcañob Rehoboam, i tiʼ subeyob: «A tat tsiʼ yʌqʼueyon lojon wocol bʌ eʼtel yicʼot al bʌ j cuch lojon. Jini chaʼan a wocolic tʼox juʼsʌbeñon lojon ili wocol tsaʼ bʌ i yʌqʼueyon lojon a tat. Cheʼ jini mi caj c yumañet lojon» (2 Cr. 10:3, 4).

Rehoboam tajol maʼañic tsiʼ ñaʼta chuqui yom miʼ mel. Mi tsiʼ jacʼʌ jiñi woli (choncol) bʌ i subentel i maʼañic chuqui miʼ cʌlʌx cʼajtiben jiñi tejclum, jiñi i familia yicʼot yaʼ bʌ añob tiʼ yotot tajol mach wen oñic mi caj i tempʌyel i chubʌʼañob. Pero mi maʼañic miʼ jacʼ, jiñi wiñicob xʼixicob (quixtañujob) miʼ mejlel i chañʼesañob i bʌ tiʼ tojlel. ¿Chuqui tsiʼ mele? Ñaxan, tsaʼ majli tiʼ tojlel jiñi xñoxob tsaʼ bʌ ajñiyob bajcheʼ xticʼojelob i chaʼan Salomón. Ti wiʼil, tsiʼ cʼajtibe ticʼojel jiñi i piʼʌloʼ bʌ ti colel, tsaʼ bʌ i subeyob chaʼan yom tsʌts miʼ mel i bʌ tiʼ tojel jiñi tejclum, i tsaʼʌch i jacʼʌ. Jin chaʼan, tiʼ sube jiñi tejclum: «Mi woli laʼ lon ñaʼtan al laʼ cuch tiʼ tojlel c tat, la wila to bajcheʼ mi caj laʼ cuch tic tojlel. Jini c tat tsiʼ jatsʼʌyetla ti asiyal, pero joñon mi caj c jatsʼetla ti asiyal am bʌ i taqʼuiñal lajal bʌ i cʼuxel bajcheʼ siñan» (2 Cr. 10:6-14).

¿Chuqui mi laj cʌn ilayi? Chaʼan ñumen wen cheʼ jin mi lac jacʼbeñob i ticʼojel jiñi añobix bʌ i jabilel yicʼot i ñaʼtʌbal. Come cabʌlix chuqui cʌmbilob i chaʼan, miʼ mejlelob i subeñonla chuqui tac ti wocol miʼ mejlel lac taj chaʼan muʼ bʌ lac yajcan lac mel yicʼot miʼ yʌqʼueñoñobla wem bʌ ticʼojel (Job 12:12).

Rehoboam tsiʼ tempa cabʌl sodadojob chaʼan miʼ mʌlben (jotben) jiñi yan tac bʌ tribu woli (yʌquel) bʌ i contrajin, pero Jehová tsiʼ tiqʼui tiʼ tojlel jiñi xʼaltʼan Semaya: «Mach yomic mi laʼ wʌlʌc majlel ti guerra tiʼ contra laʼ piʼʌlob israeloʼ bʌ. Chaʼ cucuxla ti laʼ wotot come joñon tsaʼ c tʼoxoyob» (1 R. 12:21-24). *

¿Chuqui tsiʼ mele Rehoboam? Ñaʼtancu bajcheʼ cʼamel tsaʼ michʼa tiʼ caj jiñi. ¿Chuqui mi caj i yʌl jiñi quixtañujob tiʼ tojlel juntiquil rey tsaʼ bʌ i yʌlʌ chaʼan mi caj i ‹jatsʼ ti asiyal› jiñi tejclum, pero maʼañic bʌ chuqui miʼ mel cheʼ miʼ contrajintel? (Lajin yicʼot 2 Crónicas 13:7). Pero jiñi rey yicʼot i soldadojob «tsiʼ jacʼbeyob i tʼan lac Yum. Tsaʼ chaʼ sujtiyob tiʼ yotot cheʼ bajcheʼ tsaʼ subentiyob».

¿Chuqui miʼ cʌntesañonla iliyi? Chaʼan ñumen wen cheʼ mi lac jacʼben i tʼan Jehová anquese an muʼ bʌ i wajleñoñobla. Mi cheʼʌch mi lac mel, Jehová mi caj i qʼuelonla ti wen yicʼot mi caj i yʌqʼueñonla i bendición (Dt. 28:2).

Cheʼʌch tsaʼ ujti tiʼ tojlel Rehoboam. Tsiʼ jacʼbe i tʼan Dios i maʼañic tsaʼ majli i contrajin jiñi tsijib tejclum. Tsaʼ jach caji i ñumen pʼʌtʼesan i tejclum tac yicʼot tsiʼ mele yan tac bʌ tejclum yaʼ ti chaʼpʼejl tribu baqui woli ti yumʌntel: Tiʼ chaʼan Judá yicʼot Benjamín (2 Cr. 11:5-12). Pero jiñi ñumen ñuc bʌ i cʼʌjñibal, jin cheʼ tsaʼʌch i jumucʼ jacʼʌ i mandar tac Jehová. Anquese jiñi 10 tribu i chaʼan Israel, am bʌ tiʼ yumʌntel Jeroboán, tsaʼ caji i chʼujutesañob diosteʼ tac, yonlel quixtañujob miʼ yajñelob ti Jerusalén chaʼan miʼ coltañob Rehoboam yicʼot jiñi isujm bʌ chʼujutesaya (2 Cr. 11:16, 17). Cheʼ bʌ Rehoboam tsiʼ jacʼʌ jiñi ticʼojel ñumen pʼʌtʌl tsaʼ ajñi i yumʌntel.

Pero cheʼ bʌ Rehoboam wen woli ti yumʌntel, an chuqui tsiʼ mele maʼañic bʌ majqui pijtʌbil i chaʼan. Tsiʼ cʌyʌ i jacʼben i mandar Jehová yicʼot tsaʼ caji i chʼujutesan diosteʼ tac. Pero ¿chucoch cheʼ tsiʼ mele jiñi? ¿Tiʼ caj ba jiñi i ña, tilem bʌ tiʼ pʼolbal Ammón? (1 R. 14:21). Mach wen la cujilic chuqui tiʼ caj, pero pejtelel jiñi tejclum tiʼ tsajcʌbe i melbal. Jin chaʼan, Jehová tsiʼ cʌyʌ chaʼan jiñi rey Sisaq am bʌ ti Egipto, miʼ yochel ti cabʌl tejclum i chaʼan Judá, anquese Rehoboam tsiʼ lon pʼʌtʼesa (1 R. 14:22-24; 2 Cr. 12:1-4).

Jiñi wocol tsaʼto ñumen tsʌtsʼa cheʼ bʌ Sisaq tsaʼ cʼʌlʌ cʼoti ti Jerusalén, yaʼ baqui woli ti yumʌntel Rehoboam. Ti jimbʌ ora, jiñi xʼaltʼan Semaya tiʼ sube Rehoboam yicʼot jiñi i wiñicob chuqui tsiʼ yʌlʌ Jehová: «Jatetla tsaʼ laʼ cʌyʌyon. Jini chaʼan tsaʼ j cʌyʌyetla tiʼ cʼʌb Sisac (Sisaq) chaʼan mi laʼ ticʼlʌntel». ¿Bajcheʼ tsiʼ jacʼʌ Rehoboam ili i ticʼojel Jehová? Weñʌch tsiʼ jacʼʌ. Jiñi Biblia miʼ yʌl: «Jini añoʼ bʌ i yeʼtel ti Israel yicʼot jini rey tsiʼ peqʼuesayob i bʌ. Tsiʼ yʌlʌyob: Toj lac Yum». Jin chaʼan, Jehová tsiʼ colta Rehoboam i maʼañic tsiʼ cʌyʌ chaʼan miʼ jisʌntel Jerusalén (2 Cr. 12:5-7, 12).

Ti wiʼil, Rehoboam tsiʼ bej chaʼle yumʌntel ti jiñi chaʼpʼejl tribu am bʌ ti sur. Cheʼ tsʼitaʼ jax yom chaʼan miʼ chʌmel (sajtel), tsiʼ yʌqʼue cabʌl i majtan pejtelel i yalobilob. Tajol tsiʼ mele iliyi chaʼan maʼañic miʼ chañʼesañob i bʌ tiʼ tojlel Abías, jiñi i yeran tsaʼ bʌ ochi tiʼ qʼuexol bajcheʼ rey (2 Cr. 11:21-23). Cheʼ tsiʼ mele bajcheʼ iliyi, tsiʼ pʌsʌ i ñaʼtʌbal, mach cheʼic bajcheʼ tsiʼ mele ti ñaxan.

Rehoboam tsaʼʌch i mele chuqui tac wen, pero mach utsʼatic tsaʼ qʼuejli ti Dios. Jiñi Biblia miʼ yʌl: «Tsiʼ mele chuqui jontol». ¿Chucoch cheʼ miʼ yʌjlel bajcheʼ jiñi? Come mach tiʼ pejtelelic i pusicʼal tiʼ sʌcla Jehová (2 Cr. 12:14).

Weñʌch cheʼ mi lac ñaʼtan iliyi: An i tajol tsaʼʌch i jacʼbe i tʼan Dios yicʼot tsiʼ mele chuqui tac wen tiʼ tojlel jiñi tejclum, pero mach wen lʌcʼʌlic tsaʼ ajñi yicʼot Jehová mi tsaʼic i mulaj i mel chuqui wen tiʼ tojlel. Jin chaʼan, tsiʼ mele mach bʌ weñic yicʼot tsiʼ chʼujutesa diosteʼ tac. ¿Chaʼan ba yomʌch i cʌy i mul tiʼ sujm yicʼot i mel chuqui yom Jehová cheʼ tsiʼ jacʼbe i ticʼojel, o chaʼan jach an majqui tiʼ sube? (2 Cr. 11:3, 4; 12:6). Ti wiʼil, Rehoboam tsaʼ chaʼ caji i mel mach bʌ weñic.  ¡Mach wis lajalic bajcheʼ i tatuch, jiñi rey David! Isujm, David tsaʼʌch i mele tsʌts tac bʌ mulil, pero tsiʼ chʌn cʼuxbi Jehová, tsiʼ colta jiñi i sujm bʌ chʼujutesaya yicʼot ti jumpʼejl i pusicʼal tsiʼ cʌyʌ i mul (1 R. 14:8; Sal. 51:1, 17; 63:1).

Jiñi relato chaʼan Rehoboam an chuqui ñuc bʌ i cʼʌjñibal miʼ pʌsbeñonla. Mi la com chaʼan Jehová miʼ qʼuelonla ti wen, mach jasʌlic yom mi lac chʼʌm ti lac wenta lac familia o mi lac chaʼlen wersa chaʼan an chuqui mi lac taj, yomʌch mi lac chʌn acʼ ti ñaxan jiñi i sujm bʌ chʼujutesaya.

Jehová mi caj i qʼuelonla ti utsʼat mi mucʼʌch lac chaʼlen wersa chaʼan maʼañic miʼ jilel jiñi laj cʼuxbiya tiʼ tojlel. Cheʼ bajcheʼ yom mi lac chʌn otsʌben i siʼil jiñi cʼajc chaʼan maʼañic miʼ yajpel, ti bele ora yom mi lac pejcʌben i Tʼan Dios, mi lac wen ñaʼtan yicʼot mi lac chʌcʌ chaʼlen oración chaʼan chʌn cuxul miʼ yajñel laj cʼuxbiya ti Jehová (Sal. 1:2; Ro. 12:12). Jiñi laj cʼuxbiya ti Jehová cojach mi caj i ñijcañonla lac mel chuqui miʼ mulan. I mi tsaʼ yajliyonla ti mulil, jiñi cʼuxbiya mi caj i ñijcañonla laj cʌy lac mul ti jumpʼejl lac pusicʼal. Chʌn xucʼul mi caj la cajñel tiʼ tojlel Jehová, mach cheʼic bajcheʼ Rehoboam (Jud. 20, 21).