Rubuon éra fidju di Salumon ki governa Israel pa 40 anu. (1 Reis 11:42) Salumon móre na anu 997 A. J. Nton Rubuon bai di Jiruzalen ti Sikén, pa el pode skodjedu pa ser rei. (2 Cró. 10:1) Se pai éra konxedu pa un ómi ki tinha txeu sabedoria. Bu ta imajina modi ki Rubuon fika txeu preokupadu si el ta konsigiba sérba sima se pai? Dipôs ki el bira rei, kontise un kuza ki ta provaba si el tinha sabedoria ô nau.

Rubuon da kónta ma kuzas ka staba dretu na Israel. Israelitas staba ta xinti frontadu i kes ki ta reprizentaba povu bai na Rubuon pa ba pâpia sobri ses prubléma. Es fla: ‘Pai di nho poi nos kanga bira pizadu. Má si nhu folga-nu un poku di kel trabadju duru i poi nos kanga bira más lébi ki pai di nho poi riba nos, nu ta sirbi nho.’ — 2 Cró. 10:3, 4.

Kel pididu ki es faze éra difísil. Si Rubuon fazeba kuzê ki povu pidi-l, se família i kes ki ta staba na palásiu ta tinha ki abriba mô di alguns luxu i es ka ta podia izijiba txeu di povu. Má, si el ka setaba kel pididu, povu podia rabelaba. Kuzê ki el ta fazeba? El disidi bai pâpia ku kes ómi más grandi ki ta konsedjaba Salumon. Es fla Rubuon pa seta pididu di povu. Dipôs, Rubuon bai pidi opinion na jóvens ki tinha mésmu idadi ki el. Es fla-l pa el ka faze kuzê ki povu sta pidi-l. Nton, el sigi konsedju di kes jóven i el disidi ser duru ku povu. El fla: ‘Nha pai poi nhos un kanga pizadu, má N ta pô-l bira más pizadu inda. Nha pai kastiga nhos ku xikóti, má ami N ta faze-l ku xikóti farpadu’, ki éra un xikóti fetu di péli ku padás di osu ô féru na el pa el pode fikaba más pizadu. — 2 Cró. 10:6-14.

Kuzê ki nu ta prende ku kel-li? É mutu más midjór nu obi konsedju di kes algen más grandi i ki ten más spiriénsa. Kuzas ki es pasa na vida ta djuda-s odja rezultadu di un disizon i es ta pode da-nu bons konsedju. — Jó 12:12.

Rubuon pripara se trópas pa el pode kontrola revólta di povu. Má Jeová ka dexa-l bai géra. El manda proféta Semaías pa fla Rubuon: ‘Ka nhos bai géra kóntra nhos irmon israelitas. Nhos volta pa kaza kada un di nhos, pamodi é mi ki poi kel-li kontise.’ — 1 Reis 12:21-24. *

Bu ta atxa ma foi fásil Rubuon obi ku Jeová? Kuzê ki pesoas podia pensaba di ses novu rei? El flaba ma el ta kastigaba es ku xikóti farpadu, má gósi povu rabela i el ka faze nada! (Konpara ku 2 Crónicas 13:7.) Má rei ku se trópas, ‘obi ku kel ki Jeová fla i es volta pa kaza sima Jeová manda-s.’

Kuzê ki kel-li ta inxina-nu? Midjór kuza ki nu debe faze é obi ku Jeová sénpri, mésmu ki nu xinti vergónha pamodi kuzê ki otus algen pode pensa. Si nu obi ku Deus, el ta abensua-nu. — Deut. 28:2.

Modi ki Jeová abênsua Rubuon? El kontinua ta ser rei di tribu di Judá i di Benjamin. El disidi faze sidadis novu na undi ki ta fikaba kes dôs tribu i el poi kes sidadi bira más fórti. (2 Cró. 11:5-12) I más inportanti inda, Rubuon sigi leis di Jeová duránti alguns ténpu. Kes 10 tribu ki Jerubuon ta governaba, staba xeiu di adorason falsu. Nton txeu algen ki ta moraba la apoia Rubuon. Es ta baba ti Jiruzalen pa mostra ma es ta apoiaba adorason verdaderu. (2 Cró. 11:16, 17) Rubuon obi ku Jeová i kel-li poi se reinu ta fika más fórti.

Kantu se reinu staba fórti, Rubuon faze un kuza ki ningen ka sta speraba. El dexa di sigi leis di Jeová i el kumesa ta adora deus falsu! Má pamodi ki el faze kel-li? Bíblia ka ta fla. Talvês se mai, ki éra amonita, pô-l ta faze kel-la. (1 Reis 14:21) Ka ta nporta kuzê ki pô-l ta faze kel-la, povu di Israel sigi se izénplu i es kumesa ta faze adorason falsu. Pur isu, Jeová dexa Rei di Ijitu, ki txomaba Sizaki, toma txeu di kes sidadi di Judá ki Rubuon fazeba! — 1 Reis 14:22-24; 2 Cró. 12:1-4.

Situason ba ta piora kantu Sizaki txiga Jiruzalen, undi ki Rubuon staba. Nton, proféta Semaías fla rei ku kes prínsipi kuzê ki Jeová manda fla: ‘Nhos bandona-m, pur isu ami tanbê N ta bandona nhos na mô di Sizaki.’ Modi ki Rubuon reaji ku kel disiplina di Jeová? El foi un izénplu! Bíblia ta fla: ‘Prínsipis di Israel rabaxa ses kabésa i es fla: “Jeová é justu.”’ Pur isu Jeová salva Rubuon i Jiruzalen pa ka distruídu. — 2 Cró. 12:5-7, 12.

Dipôs di kel-li, Rubuon kontinua ta governa párti sul di Israel. Antis di el móre el da se fidjus txeu prezenti. Talvês el faze kel-li pa es ka rabelaba kóntra ses irmon Abias, fidju di Rubuon ki ta ben sérba rei. (2 Cró. 11:21-23) Na kel situason li Rubuon aji ku bon juís ki el ka tinha kantu el éra jóven.

Nbóra el faze txeu kuza dretu, Rubuon ka foi lial pa Deus. Bíblia ta fla sobri se govérnu: ‘El faze kuzê ki éra mau’. Pamodi? ‘Pamodi el ka disidi buska Jeová na se korason.’ — 2 Cró. 12:14.

Kuzê ki nu ta prende di kuza ki kontise ku Rubuon? El obi ku Jeová na alguns situason. I el faze kuzas dretu pa povu di Deus. Má nunka el ka sforsa pa ser amigu di Jeová ô pa faze se vontadi. Pur isu el faze kuza mariadu i el mete na adorason falsu. Mésmu kantu el obi ku Jeová, nu pode pergunta: ‘Rubuon obi ku Jeová pamodi el rapende i el krê fazeba vontadi di Jeová? Ô pamodi otus algen fla-l ma el tinha ki obiba ku Deus?’ (2 Cró. 11:3, 4; 12:6) Ku ténpu, Rubuon torna faze kuzê ki éra mariadu. El aji diferenti di se avó Davidi. Davidi tanbê faze pekadu, má el rapende di korason. I el tinha txeu amor pa Jeová i pa adorason verdaderu. — 1 Reis 14:8; Sal. 51:1, 17; 63:1.

 Nu pode prende más un lison ku stória di Rubuon. É txeu inportanti pa un algen sforsa pa kuida di família i trabadja txeu pa Jeová. Má pa nu ser se amigu nu meste faze otu kuza más inportanti inda, ki é apoia adorason verdaderu i nunka ka bandona-l.

Pa nu kontinua na adorason verdaderu nu meste ten un amor fórti pa Jeová. Faze kel-li é sima poi lenha na lumi. Pa kel lumi ka paga, nu ten ki poi lenha sénpri. Di mésmu manera pa nos amor pa Jeová ka kaba, nu meste lé Bíblia sénpri, pensa na kuzê ki nu lé i faze orason. (Sal. 1:2; Rom. 12:12) Asi kel amor ta djuda-nu faze vontadi di Jeová na tudu kuza. Tanbê el ta djuda-nu rapende di korason si nu faze un pekadu. Pur isu nu krê ser diferenti di Rubuon i kontinua ta apoia adorason verdaderu. — Judas 20, 21.