Oguhwe vaRehabiyamu kwa kere Saromo ava va pangerere moIsraeli nomvhura 40. (1 Vah. 11:42) Saromo kwa ya fire momvhura 997 komeho zokuwiza Jesus pevhu. Makura Rehabiyamu yiyo ga tundire moJerusarema a ze koSekemu va ka mu ture hompa. (2 Hist. 10:1) Ga kere nowoma mokukara hompa ndi? Oguhwe Saromo kwa kere nounongo, nage ga hepere kuyilikida nsene asi kuvhura a kohonone po maudigu govantu.

Rehabiyamu kwa kere moukaro woudigu. Vaisraeli kwa tumine vakarelipo vawo kwendi nokukamutantera asi: “Guhwo Saromo kwa digopekere ukaro wetu. Ninka nye yirugana yoguhwo yoyidigu nondjoko zendi zondigu ezi ga tu twika o zi rerupike, ntani ngatu ku ruganena.”—2 Hist. 10:3, 4.

Rehabiyamu kwa kere moukaro omu ga hepere kutura po etokoro. Ngano ga rugene eyi va mu pulire vantu, nage nepata lyendi ntani nava womombara zendi ngano kapi va gwene mauwa gomanzi. Ano koruha rumwe nsene asi ngano ga nyokere kurugana eyi va mu pulire vantu, awo ngano va mu rwanesere. Yisinke ga rugene? Pomuhowo, age kwa pulire magano komasimbi aga ngaga ruganene oguhwe. Nampili ngoso, age kwa kweme magano govadinkantu vakwawo nokutokora kutekura vantu nonyanya. Makura ta va tantere asi: ‘Otate kwa mu twika ndjoko zondigu, ano ame ngani gwederera ko nye. Tate nga mu sepwisa nongora; ano ame ngani mu sepwisa nongora zomega!’—2 Hist. 10:6-14.

Yisinke natu lirongera ko? Ya wapa kupurakena kovanavazinyetu wovakurupe ndi ava va kura pampepo. Awo va kara noudivi wounzi ntani awo kuvhura kutuvatera tu ture po matokoro gomawa.—Joba 12:12.

Makura Rehabiyamu ta pongaike vakwayita vendi va ka rwise mazimo gena ga mu rwanesere.  Nye Jehova ta tumu muporofete Semaya a ka tantere Rehabiyamu asi: “Mwa ha za kovanavazinyeni Vaisraeli, asi mu ka rwe nawo yita. Tengureni namuvenye kembo, morwa yihoroka eyi, kwange yina tundu.”—1 Vah. 12:21-24. *

Ya kere ureru kwendi mokupurakena kwaJehova ndi? Yisinke ngano va mu gazarerere vantu hompa ogu ga uyungire pomuhowo asi ngava tengeka ‘nonongora domega,’ nye konyima a ya limburukwe mapukururo gaJehova mokudira kukavarwisa? (Hetakanesa 2 Histoli 13:7.) Yi kare asi yisinke va gazarere, hompa novakwayita vendi ‘kwa limburukwire kononkango daHOMPA nokutengauka komambo gawo.’

Yisinke natu lirongera ko? Ayo ya wapa kulimburukwa Karunga nampili wopeke va tu swaure. Nsene tu limburukwa Karunga, age ngatu hafera ntani ngatu tungika.—Deut. 28:2.

Karunga ga tungikire Rehabiyamu ndi? Age kwa tungire yitata moyirongo eyi nga pangere ngwendi Juda naMbenyameni. Ntani hena age kwa pamekere yitata yimwe. (2 Hist. 11:5-12) Posikando simwe, age kwa limburukwire konoveta daJehova. Apa mazimo murongo gena ga tamekere kukarera yikarunga yoyimpempa, sinzi sovantu kwa zire koJerusarema va ka kwatese ko ukareli wousili. (2 Hist. 11:16, 17) Morwa Rehabiyamu kwa limburukwire, uhompa wendi kwa ya nkondoparere.

Apa wa ya nkondoparere uhompa wendi, Rehabiyamu kwa rugene sininke sosidona. Age kwa hagekere kukarera Jehova nokutameka kukarera yikarunga yoyimpempa. Morwasinke? Ngoso age kwa yi rugene oyo morwa kwa mu pukisire ozina nekoro lyendi ava va kere Vaamoni ndi? (1 Vah. 14:21) Yi kare asi konda musinke za mu pukisire, muhoko nagunye kwa kweme sihonena sendi. Jehova yipo ga pulisilire hompa Sisaka gwaEgipite a ka kwate yitata yomoJuda nampili ngomu ga yi pamekere Rehabiyamu.—1 Vah. 14:22-24; 2 Hist. 12:1-4.

Ukaro kwa ya rundurukire apa Sisaka ga here kuyahomona Jerusarema omu ga kere Rehabiyamu. Sikando esi, muporofete Semaya kwa tanterere Rehabiyamu novagendesi vendi asi: “One kwa zumba nge, name yipo nina mu gava momawoko gaSisaka.” Yisinke ga rugene Rehabiyamu apa ga zuvhire mbudi ozo? Bibeli kwa tanta asi: “Hompa novagendesi tava linunupike tava tanta asi va zona, makura tava tanta asi: ‘Eyi ana kurugana Hompa, youhunga.’” Makura Jehova ta popere Rehabiyamu nositata saJerusarema.—2 Hist. 12:5-7, 12.

Kutunda pena, Rehabiyamu kwa twikilire kupangera mazimo gavali gaIsraeli. Komeho a ka fe, age kwa geve mauhwi kovana vendi wovagara, nampo yipo va dire kurwanesa munwendi Abiya ogu ga ya mu kweme mouhompa. (2 Hist. 11:21-23) Pokuyirugana ngoso, Rehabiyamu kwa rugene sininke somulyo esi ga dilire kurugana pomuhowo.

Nampili ngomu Rehabiyamu ga hetekerere ko kurugana uwa, Karunga kapi ga mu haferere. Bibeli kuuyunga kumuhamena asi: “Age nga rugana yoyidona.” Morwasinke? Morwa “kapi nga heteke kupapara eharo lyaHOMPA.”—2 Hist. 12:14.

Rehabiyamu nga limburukwa Karunga poyiruwo yimwe. Ntani ga ruganenene uwa vantu vaKarunga. Nye kapi ga kere neharo lyokutunga po ukaume naJehova. Eyi yiyo ya mu ninkisire a karere yikarunga yoyimpempa. Kuvhura o lipure asi: ‘Apa Rehabiyamu ga tambwire mapukururo gokutunda kwaKarunga, age kwa litezwilire sili ndi vakwawo va mu sininikire?’ (2 Hist. 11:3, 4; 12:6) Konyima, age kwa ya twikilire kurugana yoyidona. Age kwa lisigire nozinakuru hompa Ndafita ava nawo va tulire mapuko nye morwa kuhara Jehova noukareli wousili awo kwa litezwilire nawa-nawa kononzo dawo.—1 Vah. 14:8; Epis. 51:1, 17; 63:1.

 Yisinke natu lirongera ko kwaRehabiyamu? Kapi ya kara epuko kupakera mbili mapata getu nokurugana unene mosirugana saJehova. Nye nsene tuna hara Jehova a tu hafere, pomuhowo twa hepa kukara nelikwatakano lyenene nendi.

Mokuyisikisa mo oyo, twa hepa kutwikira kuhara unene Jehova. Ngwendi moomu atu humine komundiro yipo gu twikire kutwera, neharo lyetu lyokuhara Karunga nga li kura nsene tu lironga Nonkango dendi nkenye ezuva nokugazadara ko kweyi tuna resa nokulitura mo momakanderero. (Epis. 1:2; Rom. 12:12) Makura eharo lyetu lyokuhara Jehova nga li tu tumangeda tu mu limburukwe mwanayinye eyi tuna kurugana ntani nga li tu vatera tu litezurure nawa-nawa nsene tuna zono. Ose kapi ngatu kara ngwendi Rehabiyamu nye ngatu kwaterera koukareli wousili.—Juda 20, 21.