Rehoboam tile Salomón koan xi 40 nó tsakatéxoma ya naxinandá Israel (1 Rey. 11:42). Kʼianga jekʼien Salomón nga nó 997 tongini nga nó 1, je Rehoboam yaa naxinandá Siquem ki nga rey si̱kao (2 Crón. 10:1). A kui nʼio kisikjáojin nga je kʼoéjnayangajaole je nʼaile xi nʼio chjine koan. Likuijin kiya jko̱ nga tiʼakʼia kʼoendajinni kjoa xi ñʼai tjín.

Nʼiojin tse kjoa tjín ya naxinandá Israel nga tsakʼaile xá je Rehoboam. Xijekoanni, je chjota xi nyatítjonle naxinandá kitsoyale jmeni xi tjíosíkjáojin, i kitsole: “Je nʼaili taja kisikao je yugonajin. Kʼoa tsa je xá ai xi tsakánenajin nʼaili ngisa tja̱ si̱koai kʼoa ngisa tja̱ si̱koai je yugo xi tsakánenajin, si̱xálaijin” (2 Crón. 10:3, 4).

Likuijin titsabeni jmeni xi kisʼin. Tsa kʼoalani kisʼin je Rehoboam jokitso je naxinandá kʼoa tsa tsín nʼio tsakʼénele likuijin tikʼoakji tsojmi kisʼenile, familiale kʼoa kao xi ya síxákao. Tonga tsa tsín sitjosonle naxinandá tochajinle kʼoetʼale. Jméni xi kisʼin Rehoboam. Jé títjon tsakjákao je chjotajchínga xi kitsjoale kjoafaʼaitsjen je Salomón. Xijekoan, sajé kiskonangingále je xi kʼoati tjín nóle joni je, kʼoa je chjota jebi kʼoakitsole nga totaon katabe je naxinandá, kʼoa je Rehoboam tosaa je tsakʼaʼénle chjota jebi, kuinga i̱ kitsonile naxinandá: “Je nʼaina ai yugo tsakáneno, tonga an kʼoesonsale yugono. Je nʼaina kao látigo kisikjaʼánino kjoañʼai, tonga an kui koano je xi ki̱cha̱ tjíojko” (2 Crón. 10:6-14).

Jméni xi bakóyaná jebi. Kuiní nga ngisa nda nga je chʼaʼénlee je chjota xi jetjínle nó kao xi jetjínle kjoafaʼaitsjenle Niná. Makjoanni nga jetjínle kjoafaʼaitsjen chjota jebi, koaanle koasenkaoná kʼoa tongini kʼoakuitsoná josʼin kuichotsjoá jngo kjoa (Job 12:12).

Je Rehoboam kisikatíondaa je chjotakjoajchánle nga koaikʼétʼale je chjota xi tjíosíxíjin,  tonga je Jeobá alikui kitsjoaʼndele, jé profeta Semaya kisikasén nga i̱ katatsole je Rehoboam: “Ali mangímijion nga kuixkaon kao je ndsʼao, je chjota israelita. Tangínño ya ndʼiano nga jngó jngó, nga̱ an xotisʼian nga kʼoakjimani jebi” (1 Rey. 12:21-24). *

A tojyó tsakʼejna je Rehoboam. Nʼiojin kisijtile yaole nga kʼoakoan. Jóxótse sʼin kisikjaʼaitsjen chjota xi tʼatsʼe, nga kʼoakitso nga kjoañʼai sikjaʼá je naxinandá tonga tsínni kʼoakisʼin (tingósonkoai 2 Crónicas 13:7). Ninga kʼoalani, je rey kʼoa kao chjotakjoajchánle “kisitjoson je én xi kinchja̱ Jeobá, kini ndʼiale tojo kitso Jeobá”.

Jebi kui bakóyaná nga ngisa nda nga je Jeobá chʼa̱ʼénlee ningalani skoe̱sinná je chjota. Tsa kʼoasʼiaan, je Jeobá sa̱sénle xi tʼatsaan kʼoa sichikontʼainná (Deut. 28:2).

Je Rehoboam kisitjoson kʼoa likui kikján kao je xi te ntje̱. Tosaa kui xi kisʼin nga nʼio tsakʼé naxinandále, kʼoa tsakʼéndasa xi kjaʼaí ya Judá kʼoa kao ya Benjamín jñani tíbatéxoma (2 Crón. 11:5-12). Tonga xi ngisa tjínle kjoandosin kuinga kisitjoson choatsele Jeobá. Ningalani niná ndiso tsakʼétsʼoale je Jeroboán je xi tíbatéxomale xi te ntje̱, nkjín chjota xi ya ki Jerusalén nga kikʼétsʼoale Jeobá kʼoa nga kitsjoanganʼiole Rehoboam (2 Crón. 11:16, 17). Nga tsakʼaʼénle Jeobá kui xi tsakasenkao nga nʼio kisʼejna josʼin tsakatéxoma.

Kʼianga jendasʼin tíbatéxoma je Rehoboam, toʼikoan likui tinda kisʼinni, alikui tikisitjosonni kjoatéxomale Jeobá kʼoa niná ndiso tsakʼétsʼoale. Tonga ánni nga kʼoakisʼinni, a je na̱le tsakʼaʼénle xi chjoón ammonita koan (1 Rey. 14:21). Alikui ʼyaa, tonga nga kʼoakisʼin je Rehoboam kʼoati kisʼin ngatsʼi naxinandá, kʼoa kuinga kitsjoaʼndeni je Jeobá nga je rey xi tsʼe Egipto xi Sisaq tsakʼin kisikje kʼa naxinandále Judá ningalani nʼio tsakʼé je Rehoboam (1 Rey. 14:22-24; 2 Crón. 12:1-4).

Kʼoa ngisaa titse kjoa jmeni xi koanngáni kʼianga je Sisaq kicho ya Jerusalén jñani tíbatéxoma je Rehoboam. Kʼianga kui kjoa tjíojin chjota jebi, je profeta Semaya i kitsole Rehoboam kʼoa kao xi xángʼa tjínle: “Jon kinjiotokonnáo, kʼoa an kʼoati tsjionkonno ya yantsja Sisaq”. Jókisʼin kʼianga kʼoatsakʼinle Rehoboam. Kinrʼoéní, je Biblia itso: “Je chjota xi xángʼa tjínle ya Israel kʼoa kao je rey kʼoakoannile jéele kʼoa i kitso: Je Jeobá kixiní”. Kuinga tsakʼasjentjaini Jeobá je Rehoboam kʼoa nga tsín kitsjoaʼndeni nga kinikjeson naxinandá Jerusalén (2 Crón. 12:5-7, 12).

Kʼianga jejetʼa ngayeje jebi, je Rehoboam tojo je tsakatéxomale xi jao ntje̱. Kʼianga tojeme kuiyá, nkjín kjoatjao kitsjoale xtile, tsakui nichxin kui kʼoakisʼinni nga tsín je Abías kontra koatiole, xi rey koan nga koanskanni (2 Crón. 11:21-23). Kʼianga kʼoakisʼin tsakakó nga nangitokon koan kʼoa nga ndasʼin kisikjaʼaitsjen.

Ningalani nda kisʼin je Rehoboam, tonga tsín ndasʼin tsakʼejna ngixko̱n je Jeobá. Je Biblia kʼoatso nga kui kʼoakisʼin xi chʼaotjín. Ánni nga kʼoatsosíni. Kuinga tsín ñaki tjínjngo ni̱ma̱le nga tsakásjai je Jeobá (2 Crón. 12:14).

Machjén nga si̱kjaʼaitsjenjiaan jebi. Je Rehoboam sakʼoaa kisitjosonle Niná kʼoa tsakasenkao naxinandále, tonga alikuikʼia nga ñaki miyole Jeobá koan nga̱ tsín ñaki kʼoatsakʼé kon nga je sitjosonle, kuinga chʼao kisʼinni kʼoa niná ndiso tsakʼétsʼoanile. Kʼianga tsakatekjáyale Jeobá je Rehoboam, a ñaki kʼoakoannile je jéele kʼoa a koanmele nga ndasʼin kʼoéjna ngixko̱n Niná axo tokui tsakʼaʼénni nga kjaʼaí xi kʼoakitsole (2 Crón. 11:3, 4; 12:6). Nga jeki nichxin, je Rehoboam tikui kʼoakisʼinngáni xi chʼaotjín, alikui koanngóson jokisʼin David xi pajchále koanni, ningalani nʼio chʼao kisʼin David kʼoakoannile jéele, tsjoake koan Jeobá kʼoa kʼoakitso nga toje katasʼetsʼoale (1 Rey. 14:8; Sal. 51:1, 17; 63:1).

 Jmeni xi kisʼin je Rehoboam nʼio tse xi bakóyaná. Tsa mená nga je Jeobá katasasénle xi tʼatsaan ali tsa tokuijin xi machjén nga si̱kuindaa je familianá kʼoa nga kui kʼoasʼiaan xi ndatjín, xi ngisa chjíle kuinga kui títjon si̱kʼéjnaa je xále Niná.

Tsa tosi tonda tsjoacha koaan je Jeobá, kui xi koasenkaoná nga kuichotjenngiaa jebi. Je kjoatsjoacha xi tjínná kao Jeobá kʼoati ma joma je lʼí nga chikín machjénle nga tsín kjuitsʼao, kʼianga tsín kuinjenyʼán tjínnele nga nyaon nyaon chótʼayá Énle Niná, si̱kjaʼaitsjenjiaan jmeni xi kabʼexkiaa kʼoa tosi tonda kʼoétsʼoaa (Sal. 1:2; Rom. 12:12). Je kjoatsjoacha xi tjínná kao Jeobá koasenkaoná nga kui kʼoasʼiaan jmeni xi sasénle kʼoa tsa kuijnyíjée kʼoati koasenkaoná nga kʼoakoa̱nniná jéená. Alikui kʼoasʼiaan jokisʼin Rehoboam, tosa kixi kjuintʼalee Jeobá (Jud. 20, 21).