Solomoni ikeye wapwile ishe ya Lehovowame, cho wayulile mu Isalele ha myaka 40. (1 Vimye 11:42) Solomoni wathsile mu mwaka wa 997 B.C.E. Lehovowame watundile mu Yelusalema na kuya ku Shekeme mangana vakamuvwavethe kupwa mwene. (2 Mithzi 10:1) Hamo walishoshomwenene ha kukavangeya vilinga vya Solomoni uje wakele manene na mana. Lehovowame wakele hayehi na chetheko chije chethi kumwethele indi atha kwangula kulinga vyuma vyavivwa.

Ha thimbu yashangumukile kuyula, vanu vakele mu vukalu mu Isalele. Ngechi, vaka-kwimanena vanu vethzile kuli Lehovowame na kumuleka vukalu vwavo ngwavo: “Isho Solomoni watuyandethele manene na kutulemuwitha na vitele vyavikalu. Nga utepulula ku vulemu ovu na kutuyoyetha mwamuvwa, cho tukakupangela na kulongwa.”—2 Mithzi 10:3, 4.

Hamo Lehovowame walithzivile ngwendi ali mu vitanga. Lehovowame na nanga yendi na vaje vakele na kupangela ku lipela lyendi vapandele kulingako vimo mangana vashuvulwithe vanu. Oloni ngwe wavyanene kulingila vanu vivashakele, ngwe vanu vamutengulukilile. Cho wapandele kulinga vika? Ha kupwa mwene wamuha, wehwile vakulunu vaje vakele na kunangula Solomoni. Lehovowame wakehwile lalo vakwenje vaje muvakolelele hamo lika nendi. Cho mu kukavangeya vivamunangwile vakwenje, Lehovowame wayongwele kuyandetha vanu, cho wendekele ngwendi: “Tate wamitwikile vitele vya kulema, yange njikamilemuwitha manene. Tate wamipupithile chivandthzi, oloni yange njikamipupitha cha mambimbo.”—2 Mithzi 10:6-14.

Vyuma muka vitulilongethaho? Nga tupangetha vivatunangula vakulunu va kukola ku sipilitu, cho tukala na mana. Ha kupwa vakulunu, vanamono vyuma vyavingi, cho vatha kuthzivuka vitunda mu kulinga vyuma vimo, ngechi vatha kutunangula mu ngila yaivwa.—Yombi 12:12.

Lehovowame wakungululwile maswalale mangana vakalwithe miyati ije yamutengulukilile. Oloni Yehova wamuvindikile kwitila muli kapolofweto Shemaya ngwendi: “Kethi mulwithe vandolome veni, vanu va Isalele, ilukeni kwimbo yeni voshe. Echi chinalingiwa chinapu chithzango change.”—1 Vimye 12:21-24. *

Kuma kuvakalwithile vandolome vavo ndi? Achithinganyekeni mwalithzivililemo Lehovowame. Vanu vamwene vati mwene uje wajujwithile mbunga ngwendi avapupanga na ‘vivandthzi vya mambimbo’ oloni alyononwetha? (Etheketheni 2 Mithzimbu 13:7.) Mwene na mashwalale vendi ‘vononokele kushika kwa Shukulu Kalunga, cho velukile ku membo ngwe mwavalekele Yehova.’

Vyuma muka vitulilongethako? Kwononoka Njambi kwapwa kwakuvwa manene nambe vanu vatujola. Nga twononoka kuli Njambi, cho atuvethzikitha.—Kwi 28:2.

Vika vyatundile mu kwononoka kwa Lehovowame? Kwononoka kwamulingithile alikele kukalwitha vuje vumwene vwavuha, oloni washangumukile kutunga vinganda mu lifuti lya Yunda na Mbenjemani muje mwayulile. Wakele evi vinganda mu “vimpaka vya kukola manene.” (2 Mithzi 11:5-12) Walingile mwamuvwa ha thimbu eyi mwafwa wononokele mashiko a Yehova. Miyati 10 ya va Isalele ije yayulile Yelovowame muyashangumukile kulombela tumponya, vanu vavangi “vakwathele Lehovowame” omwo vaile ku Yelusalema mu kukakundwiya vulombelo vwa vuthunga. (2 Mithzi 11:16, 17) Ngechi, kwononoka kwa Lehovowame kwakanyamethele vumwene vwendi.

Omwo vumwene vwendi vwakanyamene, Lehovowame walingile vyuma vimo vya kukathametha manene. Wapokwele mashiko a Yehova omwo washangumukile kulemetha vinjambi va vaka-mafuti. Vika vyamulingithile ngocho? Kuma vamutanganethele kuli vaina vaje vapwile Vaamoni ndi? (1 Vimye 14:21) Nameme kuli vyamulingithile ngocho, oloni tuthzivuka ngwetu vanu voshe vakavangeyeye vilinga vyendi. Nameme Lehovowame wathzengelekele vimpaka ku vinganda, oloni Yehova wechelelele Mwene Shishake wa ku Ingito kufungulula vinganda vya ku Yundeya.—1 Vimye 14:22-24; 2 Mithzi 12:1-4.

Vyuma vyatengulukile omwo Shishake wetele mu Yelusalema mwakele na kuyulila Lehovowame. Ha thimbu ije, Yehova watumine kapolofweto Shemaya akaleke Lehovowame na vanu ngwendi: “Munanjikengetha nima, mukemwo njinamikundika mu mavoko a Shishake.” Lehovowame walingile vati muvamunangwile? Walingile mwamuvwa mwafwa Mbimbiliya ngwayo: “Vantwama valitavelele ngechi vanalingi vuvi, vendekele ngwavo, ‘Shukulu Kalunga wapwa wa vuthunga.’” Ngechi Yehova wamenene Lehovowame na Yelusalema.—2 Mithzi 12:5-7, 12.

Kutundoho, Lehovowame watwaleleleho kuyula vumwene vwa ku mbwela. Thimbu kanda athse, Lehovowame wanene vana vendi vwana mangana kethi vatengulukile Aviya uje wapandele kumuswana ha litanda (2 Mithzi 11:21-23) Chuma chalingile Lehovowame chamwethele ngwavo wakele na mana mwafwa kalingile ngocho ha kulivanga.

Nameme Lehovowame wethekele kulinga vyuma vyavivwa, oloni Mbimbiliya ngwayo: “Walingile mwamuvi.” Mwafwa vika? Mwafwa “Kalingile chithzango cha Shukulu Kalunga.”—2 Mithzi 12:14.

Achithinganyekeni ha vyuma vyatundile mu vilinga vya Lehovowame. Ha vithimbu vimo, wakele na kwononoka kuli Njambi. Wakele na kulinga vyuma vyavivwa ku vanu va Yehova. Oloni wonowele kukanyametha vuthamba vwendi na Yehova, cho kakele na lishungu lya kulinga vyuma vije vithzivitha Njambi kuvwaha ku mbunge. Ngechi, walingile vyuma vyavivi na kulikoveletha mu vulombelo vwa makuli. Munatha kulihula ngweni: ‘Omwo Lehovowame wononokele kumunangula kuli Njambi, kuma walingile ngocho mwafwa ya kumuthindiya ku vanu indi wakele na lishungu lya kutundilila kwithi ya mbunge yendi lya kutenguluka na kuthzivitha Njambi kuvwaha ku mbunge ndi? (2 Mithzi 11:3, 4; 12:6) Mu kwita  kwa thimbu, washangumukile kulinga vyuma vyavivi mu vuyoye vwendi. Walithethzele manene na kuku yendi Mwene Ndaviti. Nameme Ndaviti wakele na kuthevuka, oloni watengulukile mwafwa wathzemene manene Yehova, cho wakele mbunge ku vulombelo vwa vuthunga.—1 Vimye 14:8; Myatho 51:1, 17; 63:1.

Tuvavoshe twatha kulilongethako vimo kuli Lehovowame. Kwapwa kwakuvwa kuwanena nanga vyuma viyitonda na kujeneka kwivala vyuma vya ku sipilitu. Oloni nga tushaka ngwetu Njambi atuvethzikithe, tunapande kutwalelelaho kukundwiya vulombelo vwa vuthunga.

Twatha kulinga ngocho nga tutwalelelaho kuthzema manene Yehova. Tunapande kushambeya tuhya mangana tutwaleleleho kushukuma, cho na chithzemo chetu kuli Njambi ngwavo chitwaleleleho kukanyama, tunapande kulilongetha Lijwi lya Njambi na kuthinganyekethetha vitutanda na kulombela thimbu yoshe. (Myatho 1:2; Loma 12:12) Tuthzema manene Yehova na kulinga vyuma vije vimuthzivitha kuvwaha ku mbunge. Kuthzema Njambi kutushongangeya tutenguluke mu vuthunga nga tunaviyitha. Kututembwinina Lehovowame, oloni yetu tutwalelelaho kukala mu vulombelo vwa vuthunga.—Yunda 20, 21.