Ja stat ja Rehoboam jani waj ja Salomón, ajyi mandaranum ja bʼa Israel 40 jabʼil (1 Rey. 11:42). Yajni cham ja Salomón ja bʼa jabʼil 997 bʼajtanto bʼa jtyempotik, ja Rehoboam waj bʼa Siquem, bʼa norte bʼa Jerusalén, bʼa oj ajuk och mandaranum (2 Crón. 10:1). ¿Chamkʼujol maʼ ay yuja oj yikan ja xchol ja stati, bʼa jel naʼubʼal sbʼaj yuja sbiboʼili? ¿Chapanxa maʼ ay ja Rehoboam bʼa oj ajuk och probar ja sbiboʼil bʼa stojbʼesel tsatsal wokolik?

Yajni ja Rehoboam kʼe ya mandar, bʼobʼta ja bʼa Israel jelni ja wokolik. Tʼusan tsaʼan, jujuntik ja olomalik ja bʼa chonabʼi yalawe yabʼ jaman lek ja chamkʼujolik yiʼoje: «Jawa tati jel tsats yaʼa ja jyukotikoni. Pe ta mi wokol akʼulan ja jas skʼulan jawa tati sok ja weʼn awa tsʼujuk ja yalal ja yuko yaʼa bʼa keʼntikon, ja keʼntikoni ojni kaʼteltayatikon» (2 Crón. 10:3, 4).

Bʼobʼta ja Rehoboam mini snaʼa jas oj skʼuluk. Ta skʼulan ja jas wa xkʼanjiyi sok mi jel jas skʼanayi ja chonabʼi, ja yeʼn soka spamilya, sok spetsanil ja yaʼtijumiki mixani jel oj ajyuk yujile ja bʼa jastik jel tsamali. Pe ta mi kʼa skʼulani, ojni iljuk yuj kontra ja ixuk winik. ¿Jasa skʼulani? Bʼajtan skʼanayi rason ja matik ayxa skʼujole bʼa jani waj ja maʼ ajiyi rasonik ja Salomón. Pe mas tsaʼan skʼanayi rason ja winike bʼa mito ay skʼujole bʼa junxta sjabʼilsok, sok jani skʼuʼanyi ja winike jaw. Ja yuj yala ja it: «Ja keʼn mas al oj kawilex jawa yukoʼexi, sok ojto ka ochyi mas. Ja jtati skʼulanex kastigar ja weʼnlexi sok tsʼuʼumik, pe ja keʼn oj jkʼul-ex kastigar sok tsʼuʼumik bʼa ay sniʼ» (2 Crón. 10:6-14).

¿Jasa wa xnebʼatik? Ja jas mas lek oj jkʼuluktiki jani skisjel ja jas wa xyalawe kabʼtik ja matik ayxa skʼujole sok ja matik takʼanxa wa xtaxye soka Dyosi. Yuja ayxa yiʼoje snajeli, wanxani xbʼobʼ snaʼe ja jasa oj yijankitik ja jas oj jtsatik skʼulajeli sok ojni yawe kitik lekil rasonik (Job 12:12).

Bʼa oj ya lamxuk ja wokol ay ja bʼa chonabʼi, ja  Rehoboam stsomo ja skʼakʼanumiki, pe ja Jyoba xchʼika sbʼaj sok ya makunuk ja aluman Semaya bʼa yaljel yabʼ: «Mok wajanik sok mok tiroʼananik soka wa moj-aljelex israʼelenyo. Bʼa jujune ja weʼnlex tʼilani oj kumxanik bʼa wa najex, yujni keʼn kaʼakan aʼekʼuk ja it» (1 Rey. 12:21-24). *

¿Jach ta maʼ oj yakan ja Rehoboam? Pensaraʼan janekʼto tajki. ¿Jasa oj spensaraʼuk ja ixuk winik bʼa jun mandaranum bʼa yala oj skʼul kastigar ja chonabʼ «sok tsʼuʼumik bʼa ay sniʼ», pe mini jas skʼulan bʼa oj ya lamxuk? (A-slaj sbʼaj soka 2 Crónicas 13:7). Anima jachuk, ja mandaranum sok ja skʼakʼanumi «skʼuʼane ja jas yala ja Jyoba sok kumxiye ja bʼa snaje, jastalni aljiyabʼye yuja Jyoba».

¿Jasa wa sjeʼakitik ja it? Jani mas lek ja oj jkʼuʼuktikyi ja Dyosi, anima skʼenayotik ja tuk. Ta jkʼulantik, lekni oj yil-otik ja Jyoba sok oj ya koʼ jlekilaltik (Deut. 28:2).

Jachni skʼulan ja Rehoboam. Ja yeʼn kʼuʼabʼal waji sok mi tiroʼani soka ajkʼach mandaranumi. Jaʼukto maʼ, ja yeʼn stojbʼes mas ja bardaʼik bʼa jujuntik chonabʼ sok skʼulan tuk chonabʼik ja bʼa lugarik yeʼnto wan yajel mandari: ja Judá sok ja Benjamín (2 Crón. 11:5-12). Sok ja jas mas tʼilani, bʼa jun tyempo skʼuʼan ja sleyik ja Jyoba. Anima ja bʼa smandaranel ja Jeroboán kʼe yaʼteltaye kʼulubʼal dyosik, jitsan ja bʼa swinkili wajye bʼa Jerusalén bʼa skoltajel ja Rehoboam soka meran skʼuʼajeli (2 Crón. 11:16, 17). Yuja kʼuʼabʼal waj ja Rehoboam tsatsni ajyi ja smandaraneli.

Yajni ja smandaranel kulanxa ay lek, ja Rehoboam skʼulan jun jasunuk bʼa mi jaʼuk wa xmajlaxi. Yaʼakan skʼuʼajel ja sLey ja Jyoba sok kʼe yayi stoyjel kʼulubʼal dyosik. ¿Pe jas yuj skʼulan? ¿Ja maʼ jomji yuja snani, yuja jun ammonita? (1 Rey. 14:21). Chikani jas rasonil, spetsanil ja chonabʼi jani snochowe ja jas skʼulani. Ja yuj ja Jyoba yaʼakan ja Sisaq, mandaranum bʼa Egipto, oj sbʼajukan jitsan chonabʼik bʼa Judá, anima ja Rehoboam stojbʼes lek (1 Rey. 14:22-24; 2 Crón. 12:1-4).

Mastoni ipaxiʼel ja wokol yajni ja Sisaq kʼot man Jerusalén ja bʼa wan yajel mandar ja Rehoboam. Ja ekʼele jaw, ja Jyoba ya makunuk ja aluman Semaya bʼa yaljel yabʼ ja Rehoboam soka swiniki: «Ja weʼnlexi awaʼawonextakan, anto ja keʼn oj cha kaʼexkan ja bʼa skʼabʼ ja Sisaq». ¿Jastal yila ja Rehoboam ja tojelal ajiyi yuja Jyoba? Jelni lek ja jas skʼulani. Ja Biblia wa xyala: «Ja olomalik bʼa Israel sok ja mandaranumi yaʼa sbʼaje chʼin sok yalawe: ‹Ja Jyoba jel toj›». Ja yuj, ja Jyoba skoltay ja Rehoboam sok mi yaʼakan oj chʼayjuk snajel ja Jerusalén (2 Crón. 12:5-7, 12).

Yajni ekʼ ja jaw, ja Rehoboam yaʼatoni ja smandaranel sbʼaja chabʼ kʼole bʼa sur. Bʼajtanto oj chamuk, jelni jaman skʼabʼ waj sok spetsanil ja yuntikili sok yayile jitsan majtanalik, bʼobʼta jani bʼa mok iljuk kontra ja skerem Abías, ja maʼ ojto och mandaranumi (2 Crón. 11:21-23). Yajni jach skʼulani, sjeʼa ja sbiboʼil bʼa mini sjeʼunej ajyi.

Ja Rehoboam skʼulan jastik lek, pe mini lek ilji yuja Dyos. Ja Biblia wa xyala: «Skʼulan ja bʼa mi lekuki». ¿Jas yuj jach wa x-alxi sbʼaja smandaraneli? «Yujni mi meran yala ja bʼa skʼujol slejel ja Jyoba» (2 Crón. 12:14).

Anima ajyi ekʼeleʼik ja Rehoboam skʼuʼanyi ja Dyos sok skʼulan jastik lek sbʼaja xchonabʼi, mini kʼot yamigoʼuk ja Jyoba cha mini kʼankʼuniyuj bʼa oj ya gustoʼaxuk. Ja yuj, mini lek ja jas skʼulani sok yayi stoyjel kʼulubʼal dyosik. ¿Skʼuʼan maʼ ja Rehoboam ja tojelal ajiyi yuja Jyoba yuj meran sutxi skʼujol sok skʼana oj ya gustoʼaxuk, ma yuj pilan maʼ alji yabʼ bʼa skʼulajel? (2 Crón. 11:3, 4; 12:6). Soka tyempo, ja Rehoboam cha kumxi skʼulajel ja bʼa mi lekuki. ¡Mini tʼun oj slaj ja jastal waj ja statawelo, ja mandaranum David! Anke ja David koʼ chaʼan mulalik, pe tolabida syajtay ja Jyoba, skoltay ja meran skʼuʼajeli sok sutxi meran skʼujol (1 Rey. 14:8; Sal. 51:1, 17; 63:1).

 Ja loʼil bʼa Rehoboam wa sjeʼakitik jun jasunuk jel tʼilan. Bʼa lek oj yil-otik ja Dyos, mini malanukta yajelyi ja jas wa xmakuniyuj ja pamilya sok skʼulajel jastik lek. Ja mas tʼilani jani yajel bʼajtan bʼej tolabida ja meran skʼuʼajeli.

Ojni bʼobʼkujtik ta wa xkʼujolantik bʼa mi oj chʼaytik ja meran yajtanel kiʼojtik bʼa Jyoba. Jastalni bʼa mi oj tupuk jun kʼakʼ tʼilani oj katik och mas siʼil, bʼa mi oj tupuk ja yajtanel kiʼojtik soka Jyoba, tʼilani mok katikan spaklajel ja Yabʼali, spensarajel ja jas wa xnebʼatiki sok mok katikan yajel orasyon (Sal. 1:2; Rom. 12:12). Ta jach wa xkʼulantik, ja yajtanel kiʼojtik bʼa Jyoba oj snik-otik bʼa kechan oj jkʼuluktik ja jastik lek xyila. Sok ta kotik jun mulal, ja yajtanel jaw oj skoltayotik bʼa oj jnatik malaya sok spetsanil jkʼujoltik. Ja stukil bʼa Rehoboam, ja keʼntiki tolabida toj oj ajyukotik soka Jyoba (Jud. 20, 21).