Rehoboam xkgawasa Salomón, mapakgsinalh k’Israel liwaka 40 kata (1 Rey. 11:42). Akxni Salomón nilh kkata 997 akxni nina xmin Jesús, Rehoboam alh kSiquem, kxnorte Jerusalén, xlakata mapakgsina natlawakan (2 Crón. 10:1). ¿Nitlan xlimakgkatsi xlakata x’ama tlawa xtaskujut xtlat, tiku lu xlakgapaskan xlakata lu skgalala xwanit? ¿Xlilakpuwan pi x’amaka li’akxilhkan komo tlan nalakkaxtlawa taʼakglhuwit?

Akxni Rehoboam mapakgsina litaxtulh, max wi tuku xlilakgaputsakgo kachikin xla Israel. Titaxtulh kilhtamaku, makgapitsi tiku xpulalinkgo kachikin wanikgolh tuku xlilakgaputsakgo: «Mintlat lu kinkamakgapatinan, lu palha tlawalh kimukiwikan, pero wix nichuna natlawaya la tlawalh mintlat xlakata tsinka taskujut nema kinkamatlawin chu nakkaskujnaniyan» (2 Crón. 10:3, 4).

Max Rehoboam ni xkatsi tuku natlawa. Komo xtlawalh tuku kskinimakgolh chu ni lhuwa xkamaskujulh ama kachikin, max ni xkgalhikgolh tuku lhuwa xtapalh. Pero komo ni chuna xtlawalh, ama kachikin x’ama lakatakikgo. ¿Tuku tlawalh? Pulana kalitachuwinalh lakgkgolotsin tiku kstakyawakgo Salomón. Alistalh kaskinilh tastakyaw lakchixkuwin tiku nina xlinkgo kata chu wa tlawalh tuku wanikgolh. Wa xlakata wa uma tachuwin: «Tlakg tsinka naktlawa mi mukiwikan chu asta tlakg xaliwaka tuku naktlawa. Kintlat kaliwilinin lazo, pero akit nakmaklakaskin nema kgalhi lhtukun» (2 Crón. 10:6-14).

¿Tuku kinkamasiyaniyan uma? Pi xlakaskinka natlawayaw tuku nakinkawanikgoyan tiku linkgoya kata chu tliwakga wi xtakanajlakan. Xlakata kgalhikgoya liskgalala, katsikgo tuku nakitaxtu akxni wi tuku laksakaw chu tlan nakinkastakyawakgoyan (Job 12:12).

Xlakata Rehoboam nalakkaxtlawa uma taʼakglhuwit, kamamakxtumilh ksoldados, pero Jehová ni maxkilh talakaskin chu wanilh  palakachuwina Semaya pi xwanilh Rehoboam: «Ni napinatit talachipayatit minatalankan, xkamanan Israel. Minchatunukan kataspittit kminchikkan, xlakata akit ktlawalh pi chuna xlalh» (1 Rey. 12:21-24). *

¿Chuna x’ama tamakgxtakga? Kalilakpuwanti la lisitsilh Rehoboam. ¿Tuku x’ama lakpuwan latamanin xlakata mapakgsina tiku lichuwinalh pi x’ama kalimakgapatinan kachikin tuku «kgalhi lhtukun», pero masta talakaskin pi nalakatakikgo? (Katamalakxtupi 2 Crónicas 13:7). Maski chuna, uma mapakgsina chu ksoldados «kgalhakgaxmatkgolh xtachuwin Jehová chu taspitkgolh kxchikkan, chuna la xwanit Jehová».

¿Tuku kinkamasiyaniyan uma? Pi tlakg tlan nakgalhakgaxmataw Jehová maski amakgapitsin nakinkalikgalhkgamanankgoyan. Komo chuna natlawayaw tlan nakinka’akxilhan Jehová chu nakinkasikulunatlawayan (Deut. 28:2).

Chuna titaxtulh Rehoboam. Xla kgalhakgaxmatnalh chu ni katalatlawalh xasasti tamapakgsin. Wata tlakg lakkaxwililh makgapitsi kachikin niku xmapakgsinanku: Judá chu Benjamín (2 Crón. 11:5-12). Chu tuku tlakg xlakaskinka, milh kilhtamaku kgalhakgaxmatli xlimapakgsin Jehová. Maski tamapakgsin xalak norte niku xmapakgsinan Jeroboán, tsukukgolh kakninanikgo ídolos, lhuwa latamanin x’ankgo kJerusalén xlakata namakgtayakgo Rehoboam chu natatayakgo xaxlikana takaknin (2 Crón. 11:16, 17). Komo kgalhakgaxmatnalh Rehoboam tatliwakgli xtamapakgsin.

Akxni xtamapakgsin Rehoboam tlan tawi, tlawapa tuku nitlan. Nialh kgalhakgaxmatli xLimapakgsin Jehová chu tsukulh kakninani nixaxlikana dioses. Pero ¿tuku xlakata chuna tlawalh? ¿Chuna tlawalh xlakata xtse ammonita xwanit? (1 Rey. 14:21). Ni katsiyaw, pero putum kachikin stalanilh nixatlan xliʼakxilhtit. Wa xlakata, Jehová maxkilh talakaskin pi Sisaq, mapakgsina xalak Egipto, xkaʼakgchipalh lhuwa kachikinin xalak Judá, maski Rehoboam liwana xlakkaxwilinit (1 Rey. 14:22-24; 2 Crón. 12:1-4).

Lu nitlan tuku lalh xlakata Sisaq nachuna akgchipalh Jerusalén niku xmapakgsinan Rehoboam. Ama kilhtamaku, palakachuwina Semaya kamaxkilh Rehoboam chu xpríncipes akgtum tamakatsin xla Jehová: «Wixin kimakgxtakgnitantit chu kimpalakata nachuna kkamakgxtakgnitan kxmakan Sisaq». ¿Tuku tlawalh Rehoboam xlakata xtastakyaw Jehová? Lu nitlan limakgkatsilh. Biblia lichuwinan: «Príncipes xalak Israel chu mapakgsina taktujukgolh chu wankgolh: “Jehová xa’akgstitum”». Wa xlakata Jehová lakgmaxtulh Rehoboam chu ni mastalh talakaskin pi xmalakgsputuka Jerusalén (2 Crón. 12:5-7, 12).

Alistalh, Rehoboam chuntiya xmapakgsima akgtiy tribus xalak sur. Akxni nina xniy lu kalakgalhamalh putum xkamanan chu kamaxkilh tamaskiwin, xlakata ni natalatlawakgo Abías, xkgawasa tiku alistalh wa x’ama mapakgsinan (2 Crón. 11:21-23). Akxni chuna tlawalh lu tlan tuku limasiyalh nema nikxni chuna xtlawanit.

Rehoboam tlawalh tuku tlan, pero Jehová nitlan akxilhli. Biblia lichuwinan: «Tlawalh tuku nitlan». ¿Tuku xlakata chuna lichuwinankan? Xlakata ni putsalh Jehová xliputum xnaku (2 Crón. 12:14).

Maski lakgachunin Rehoboam kgalhakgaxmatli Jehová chu tlawalh tuku tlan xpalakata xkachikin, nikxni liwana talalilh Jehová chu ni tsinu xmakgapaxuwaputun. Wa xlakata tlawalh tuku nitlan, chu kakninanilh nixaxlikana dioses. ¿Makgamakglhtinalh xtastakyaw Jehová xlakata nitlan xlimakgkatsi tuku xtlawanit chu xmakgapaxuwaputun o kaj xlakata amakgapitsin wanikgolh tuku xtlawalh? (2 Crón. 11:3, 4; 12:6).  Titaxtulh kilhtamaku Rehoboam tlawapa tuku nitlan. ¡Lu tanu xwanit nixawa xtata, mapakgsina David! Xlikana pi David tlawalh laklanka talakgalhin, pero ankgalhin paxkilh Jehová chu tatayalh xaxlikana takaknin chu xliputum xnaku nitlan limakgkatsilh tuku tlawalh (1 Rey. 14:8; Sal. 51:1, 17; 63:1).

Xliʼakxilhtit Rehoboam lu xlakaskinka tuku kinkamasiyaniyan. Xlakata Jehová tlan nakinkaʼakxilhan, ni kajwatiya namaxkiyaw kifamiliajkan tuku maklakaskin o naliskujaw xlakata wi tuku nakgalhiyaw, tuku tlakg xlakaskinka wa pulana nawiliyaw xaxlikana takaknin.

Tlan chuna natlawayaw komo naliskujaw xlakata namatliwakglhaw tapaxkit nema kgalhiniyaw Jehová. Xtachuna la lhkuyat, komo lakaskinaw pi ankgalhin napasa talakaskin nawiliniyaw kiwi, xlakata ankgalhin nakgalhiniyaw tapaxkit Jehová, talakaskin ankgalhin nalikgalhtawakgayaw xTachuwin, nalilakpuwanaw chu natlawayaw oración (Sal. 1:2; Rom. 12:12). Nachuna, xtapaxkit Jehová kajwatiya kinkamatlawiyan tuku xla lakaskin. Chu komo natlawayaw akgtum talakgalhin, uma tapaxkit natlawa pi xlikana nitlan nalimakgkatsiyaw tuku tlawanitaw. Ni chuna natlawayaw la Rehoboam, akinin ni namakgxtakgaw Jehová (Jud. 20, 21).