Reoboami Salomoni uájpespti, rei ma enga kuarenta uéxurhini juramupka Israeli (1 Rey. 11:42). Enga Salomoni uarhipkia uéxurhini 997 ante de Jesusi, Reoboami Sikemi niraspti, Jerusaleni nortirhisï para rei únhani (2 Crón. 10:1). ¿Uandanhiani japi jimboka iásï ima reipiringia, ísï eska tátemba enga mítikatepka imeri mímixekua jimbo? ¿Eranhaskeni eska no ióndani exenhapiringa sini úpirini sési péntaani ambe ma?

Enga Reoboami reipkia, seguru eskaksï uánikua problemecha japka Israeli. Tátsekua, máru ireteri representantichaksï aianguspti imecheri uandanhiatechani: “Chíti táti kʼuetsapiti ústi imeri juramukua para jucha. Peru engari úska eska nóteru xáni úkua jukakia chíti tátiri juramukua ka eska sánderu fásiliuaka kumplirini ambe engajtsïni ima juramuchika, kurhajchaakaksïni” (2 Crón. 10:3, 4).

Jamberi Reoboami no jánhaskendi ambe úni. Enga úpiringa ambe engaksï kurhakuni japka ka nóteru xáni kurhakunia iretani, ima ka imeri familia ka iámindu imecha engaksï imani jingoni ánchikuarhenga, nóteruksï jatsipirindia xáni ambakiti ambe. Peru enga no ísï úpiringa, kʼuiripu úpirindi nóteru kurhajchania. ¿Ambe úspi? Orheta, kurhamarhiaspti orhejtsïkutichani engaksï Salomonini arhistakuenga. Tátsekua, konseju kurhakuaspti imechani engaksï májkueni jatiripka eska ima ka imaksï arhispti eska no sési kámapiringa iretani ka Reoboami kurhajchaaspti. Jimbosï ari ambe uandapti: “Uáka eska juramukua sánderu kʼuetsapeaka para cha ka útasïni kuturaaka. Juchiti tátiksïni látigu jingoni kastigaristi, peruni ji chikote ma úraaka” (2 Crón. 10:6-14).

¿Ambechi jorhenguarhisïni? Eska méntkisï sánderu sésisïnga úni imani ambe engajtsïni kʼuiripu arhiaka enga jatirikia ka enga espiritualika, jimboka sánderu mítikuska ka úsïndi eranhaskani ambe enga uáka úkuarhini desisioni ma jimbo ka  ístujtsïni uáti ambakiti konsejuechani íntsaani (Job 12:12).

Ísï tátsekua enga Reoboami arhiapkia imani ambe, kʼuiripu nóteru uékasïrendia kurhajchani, ísï jimbo, tánantaspti imeri ejersituni, peru Jeoba pʼínguspti ka profeta Semaiani úraspti para juramukuni: “Nori jatsiska para nirani uarhipeni chíti ermanu israelitecha jingoni. Iáminduechajtsï jatsiska para kʼuanhatsintani chári kʼumanchikuecharhu, jimbokani ji úska eska i ambe úkuarhipiringa” (1 Rey. 12:21-24). *

¿Ísku pakarapirini Reoboami? Eranhaska je na enga xáni ikiapka. ¿Ambe eratsipirini kʼuiripu ima reiri enga uandapkia eska kastigaripiringa iretani ‘chikote ma úraparini’, peru kʼóru jurajkuni jarhani eska ireta no kurhajchapiringa? (Terokutanta je 2 Crón. 13:7 jingoni). Nájtuka ísï úkuarhipka, rei ka imeri ejersitu “kurhajchasptiksï Jeobaeri uandakuani ka kʼuanhatsintasptiksï imecheri kʼumanchikuarhu, ísï eska Jeoba na uandapka”.

¿Ambejtsïni jorhendasïni i ambe? Eska sánderu sésiska Tata Diosïni kurhajchani nájkirukajtsïni máteruecha teresmarhuaka. Engachi ísï úska, Jeobajtsïni jaiapanhintaati ka újchakuraatijtsïni (Deut. 28:2).

Ísï úspti Reoboami. Ima kurhandiraspti ka no uarhipespti jimbanhi nasioni jingoni. Sánderu sési, úspti eskaksï iretecha kuájchakukata japiringa ka uáspti máteru iretechani imani territoriu jimbo enga útasï juramuni japka jini Juda ka Benjamini (2 Crón. 11:5-12). Peru ambe enga sánderu sési úpka, kumpliriuaspti ma tiempu Jeobaeri leichani. Nájtuka reinu enga nortirhu ísï japka nani enga Jeroboani reipka, kómarhiauenga idoluechani, uánikuaksï jima anapuecha nirasïrendi Jerusaleni para Reoboamini apoiarini ka pímbinhasï kómarhikuani (2 Crón. 11:16, 17). Enga Reoboami kurhajchapka Jeobani, imeri juramukua sési jarhaspti.

Enga imeri juramukua sési uaxastakata japkia, Reoboami úspti ambe ma enga no sési japka. Nóteru kumplirisptia Jeobaeri leini ka uénaspti máteru diosïchani kómarhiani. Peru ¿andisï ísï úpi? ¿Amambani jimboepi enga ammonitepka? (1 Rey. 14:21). Ambe uéjki jimboeni, iámu ireta chúngumaspti Reoboamini no sési jásï ambe úni, jimbosï Jeoba jurajkupti eska Sisaki enga reipka Ejiptu, pʼíkuapiringa uánikua Juda anapu iretechani, nájkiruka Reoboami kuájchakukata jatsiapka (1 Rey. 14:22-24; 2 Crón. 12:1-4).

Niáraspti sánderu no sési jánhaskuarheni enga Sisaki asta Jerusaleni niárapka, jima enga Reoboami juramuni japka. Jiájkanisï, profeta Semaia íntsaaspti Reoboamini ka imeri prínsipechani Jeobaeri mensaji ma: “Chájtsïni jurajkuska, ísï jimbo, jíjtuksïni jurajkuska Sisakiri jájki jimbo”. ¿Ambe úspi Reoboami enga Jeoba jurhimberantapka? Ima jiókuarhispti. Biblia uandasïndi: “Israeli anapu prínsipecha ka rei, kánikuaksï no sési pʼikuarheraspti ka uandasptiksï: ‘Jeoba jurhimbitiisti’”. Indeni ambe jimbo, Jeoba salbarispti Reoboamini ka no jurajkuspti eska Jerusaleni kʼamajkunhapiringa (2 Crón. 12:5-7, 12).

Enga inde ambe nitamapkia, Reoboami seguirispti juramukuani tsimani tribuechani surirhu anapu. Ante de uarhini, uánikua regaluechani íntsaaspti iámindu uájpechani, jamberi paraksï kurhajchani imecheri ermanuni, Abíasini, enga reipiringa sánderu orhepani (2 Crón. 11:21-23). Enga indeni ambe úpka, sánisï xarhataspti jánhaskakua, ambe ma enga antesi no xarhatapka.

Reoboami ambakiti ambe úspti, peru Jeoba no jaiapanhintaspti. Biblia arhisïndi: “Imani ambe úspti enga no sési japka”. ¿Andisï ísï uandajki Biblia? Jimboka no jirinhaspka Jeobani iámu imeri mintsita jingoni (2 Crón. 12:14).

Sési japirindi eskachi eratsintapiringa arini ambe: nájkiruka ménisï Reoboami kurhajchapka Tata Diosïni ka ambakiti ambe úni ireta jimbo, no méni niáraspti ambakiti pájperakua ma jatsini  Jeoba jingoni, ni sikiera mintsita jingoni uékapi jaiapanherantani. Jimbosï no sési ambe úpti ka kómarhiani diosï úkatechani. ¿Jiókuarhispi Reoboami Jeobaeri jurhimberantskuani jimboka sési jimbo moantaspka ka uékani jaiapanherantani, o jimbokaksï máteruecha arhispka? (2 Crón. 11:3, 4; 12:6). Ísï tátsekua, Reoboami ménderu no sési jásï ambe úspti. ¡Na enga xáni ménderuenipka eska imeri abuelu, rei Dabidi! Ísïsti, Dabidi niáraspti kánikua no sési jásï ambe úni, peru méntkisï xénchaspti Jeobani, apoiarispti kómarhikua jurhimbitini ka mintsita jingoni moantaspti (1 Rey. 14:8; Sal. 51:1, 17; 63:1).

Reoboamiri istoria ambakiti ambejtsïni jorhendasïndi. Parajtsïni Jeoba jaiapanhintani, no solu uétarhisïndi mantenerini familiani, o jánguarhintani pribilejiu ambe jatsini, ambe enga sánderu jukaparhakueka, jindesti orheta peerani kómarhikua jurhimbitini.

Uákachi ísï úni engachi jánguarhintaska no méni jurajkuni imani uékperakuani engachi Jeoba jimbo pʼikuarhinhijka. Ísï eska chpiri na no pátakuarhijka engachi sánderu chkari jatsikujka, parachi méntkisï uékani Jeobani, jatsiskachi para estudiarini imeri Karakatani, eratsintani ambe engachi arhintaaka ka méntku jauenani kómarhini (Sal. 1:2; Rom. 12:12). Ka ísï jámani, uékperakua engachi Jeoba jimbo pʼikuarhinhijka, uáti eskachi solu imani ambe uáka enga ima jaiapanhintajka. Ka engachi pekadu ma úska, inde uékperakua uáti eskachi mintsita jingoni moantaaka. Reoboami jurajkuspti Jeobani, peruchi jucha no méni jurajkuaka (Jud. 20, 21).