Te Roboam jaʼ snichʼan te Salomón te aʼtej 40 jaʼbil ta ajwalil ta Israel (1 Reyes 11:42). Kʼalal laj te Salomón ta jaʼbil 997 kʼalal mato talem-a te Cristo te Roboam bajtʼ ta Siquem te ay ta norte yuʼun Jerusalén yuʼun ya yichʼ yaʼtel ta ajwalil (2 Crónicas 10:1). ¿Jichbal la yaʼiy te Roboam te ma xjuʼ yuʼun spasel te aʼtelil, melel jaʼ ya yichʼbey yaʼtel te stat te naʼbil sba te kʼax pʼije? Ta melel, ma snaʼoj-a te ya yichʼ pasel ta prueba teme yanix snaʼ sitintayel tulan wokoliletik.

Kʼalal te Roboam och ta ajwalil maniwan lamaluk yoʼtan te yajwal te lum Israel. Ta patil bael, chaʼoxtul israeletik te ay yaʼtelik ta stojol te lum la yalbeyik ta jamal bin ya smel yoʼtanik yuʼun: «Te atat la yacʼ jcuchcotic al ihcatsil; pehcʼana te tulan aʼbatinel soc te yalal te ihcatsil te la yacʼ jcuchcotic te atate, hich ya cacʼ jbahcotic ta aʼbatinel awuʼun» (2 Crónicas 10:3, 4).

Te Roboam ma snaʼ bin ya spas yuʼun. Teme ya schʼuunbey skʼop te yajwal te lum sok te maʼyuk bayal bin ya skʼanbeye, te sfamilia sok te yok skʼab ta aʼtel bayal bin maba ya smulanbeyik yutsil. Pero teme maba ya yaʼiybey skʼop te yajwal te lume, yaniwan xjajch kontrainotuk yuʼun. ¿Bin la spas? Ta sbabial la sjojkʼoybey yaʼiy te mamaletik te la skoltayik te Salomón bin ya xjuʼ ya spas. Ta patil la sjojkʼoybey chaʼoxtul te pajal yaʼbilal soke, la yalik stukelik te manchuk ya snaʼbey yoʼbolil sba te lume, te Roboam la schʼuun spasel te bin albot yuʼunike. Jaʼ yuʼun jich la yal ta stojol te lume: «Te jtat la yaʼbeyex acuchic al ihcatsil, cʼax to xan hich yalal ya caʼbeyex a te hoʼone. Te jtat la smajex ta xul, pero hoʼon ya jmajex ta tsequetic» (2 Crónicas 10:6-14).

¿Bin ya jnoptik yuʼun? Te jaʼ lek te ya jchʼuuntik spasel te bin ya yalbotik te machʼatik ayix lek yaʼbilalik sok te yijuben ta lek schʼuunel yoʼtanik. Jich bitʼil bayal bin yilojikix ta skuxlejalik, ya xjuʼ ya staik ta ilel bin-utʼil ya xkʼot ta lokʼel te bin ya jpastik sok te ya yakʼbotik lekil tsitsele (Job 12:12).

Swenta ya schajpan te kʼop jajchem, te Roboam la schajpan sba sok te soldadoetik yuʼun ta yakʼel  guerra, pero te Jehová ay bin la yakʼbey snaʼ ta jamal ta swenta te j-alwanej Semaías (Semaya): «Ma me xawaʼbe guerra te awermanotac, te snichʼnab Israel. Jujutuhl suhtanic bahel ta anahic, como hoʼon jpasoj ini» (1 Reyes 12:21-24). *

Jich yuʼun, ¿jichnaxbal ya yijkʼitay te Roboam te kʼop jajcheme, melel yalojix ta nail te ya smaj «ta tsequetic» te lume? Jaʼukmeto, ¿binwan ya yal te lum kʼalal ya yil te maba ya x-akʼbot kastigo yuʼun te ajwalile? (Paja sok te 2 Crónicas 13:7). Chikan bin ya yalik ta stojol, te Roboam sok te soldadoetik yuʼun «la yaʼiybeyic scʼop te Diose suhtic bahel hich te bin utʼil halbotic yuʼun te Jehová».

¿Bin ya yakʼ jnoptik te bin la spase? Te jaʼ lek te ya jchʼuunbeytik skʼop te Dios manchukme ay machʼatik ya slabanotik yuʼun. Teme jich ya jpastik, lek ya yilotik te Jehová sok ya yakʼbotik bendision (Deuteronomio 28:2).

Jich la spas te Roboam. La schʼuun kʼop, melel maba la stsak sba ta guerra sok te yachʼil nasion lokʼe. Te bin la spase, jaʼ te la yakʼtiklanbeyxan yip stsʼajkʼul chaʼoxpam lumetik sok la sjach yantik lumetik ta skʼinal Judá sok Benjamín te jil ta skʼabe (2 Crónicas 11:5-12). Te bin mukʼxan skʼoplale, jaʼ te jun tiempo la schʼuun te leyetik yuʼun Jehová. Jaʼ yuʼun manchukme te lajunchajp tsʼumbalil te jil ta skʼab te ajwalil Jeroboam jajch yichʼ ta mukʼ lotil diosetik, ay bayal machʼatik ya xbajtʼik ta Jerusalén ta skoltaybeyel skʼoplal te Roboam sok ta yichʼel ta mukʼ te Jehová (2 Crónicas 11:16, 17). Te wentainel yuʼun te Roboam la yichʼ yip ta swenta te la schʼuun kʼope.

Kʼalal la stsak yip te wentainel yuʼun te Roboam ay bin la spas te chajpnax ta ilele. Ma la skʼan schʼuunbeyix skʼop te Jehová, jajch yichʼ ta mukʼ yantik diosetik. Pero, ¿binwan yuʼun te jich la spase? ¿Jaʼbal la stʼun te bin ya spas te smama te talem ta Amón? (1 Reyes 14:21). Chikan bin yuʼun te jich la spas mananix lek-a, melel spisil te yajwal te lum la stʼun te chopol ejemplo yuʼune. Jaʼ yuʼun te Jehová la yakʼ permiso te ya xpojbot bayal lumetik ta Judá yuʼun te Sisac, ajwalil yuʼun Egipto, manchukme te Roboam yakʼojbey lek stsʼajkʼul (1 Reyes 14:22-24; 2 Crónicas 12:1-4).

Pero batsʼejxan swokol te Roboam kʼalal te Sisac kʼot ta Jerusalén te jaʼ banti ya x-aʼtej ta ajwalil. Te kʼalal jich kʼot ta pasel, te Jehová ay bin la yakʼbey snaʼ te Roboam sok te principaletik yuʼun ta swenta te j-alwanej Semaías: «Haʼex la awihquitayoniquix, ha nix hichon la jquihquitayex hilel ta scʼab Sisac». ¿Bin la spas te Roboam kʼalal jich albot ta jamal yuʼun te Jehová? Leknax bin la spas yuʼun. Te Biblia jich ya yal: «Te príncipaletic yuʼun Israel soc te ajwalil la spehcʼan sbahic, hich la yalic: Toj yoʼtan te Jehová». Jaʼ yuʼun te Jehová ma la yakʼ ta kʼabal te Roboam sok ma la yakʼ ta lajinel ta skʼab Sisac te Jerusalén (2 Crónicas 12:5-7, 12).

Ta patil bael te Roboam aʼtejto ta ajwalil ta stojol te chaʼchajp tsʼumbalil jil ta sur. Kʼalal nopol ya xlajix-a, la yakʼbey yil yutsil yoʼtan te snichʼnab, melel bayal bintik la yakʼtiklanbey, jichniwan la spas yuʼun maba ya skontrainik te sbankilik Abiam (Abías) te jaʼ ya xjelolinot yuʼun ta ajwalil (2 Crónicas 11:21-23). La yakʼ ta ilel spʼijil kʼalal jich la spas, maʼyuk jich spasoj ta nail talel-a.

Te Roboam ay bintik lek la spas, pero maba lek ilot yuʼun te Diose. Te Biblia jich ya yal ta stojol: «Chopol bin la spas te Roboam». ¿Bin yuʼun jich skʼoplal spisil te yaʼtel ta ajwalile? Jaʼ ta skaj te maba la sle te Jehová sok spisil yoʼtan (2 Crónicas 12:14).

Lek te ya jnopilan ta koʼtantik ini, te Roboam ay la schʼuunbey skʼop te Jehová sok ay bintik lek la spas ta stojol te lum yuʼun, pero maʼyuk bin-ora jkʼaxel jun yoʼtan ta stojol te Jehová sok maʼyuk bin-ora jich yoʼtan te ya skʼan ya spas te bin ya smulan te Jehová. Jaʼ yuʼun la spas te bintik chopol sok la yichʼ ta mukʼ lotil diosetik. Jnop kaʼiytik ini, kʼalal ay la schʼuun te tojobtesel yuʼun te Jehová, ¿yuʼunbal la sujtes yoʼtan ta smelelil sok yoʼtan ya spas te bin ya smulan te Jehová? O ¿jaʼnax yuʼun tijbot yoʼtan yuʼun yantik? (2 Crónicas 11:3, 4; 12:6). Ta patil bael te Roboam la spas yan buelta te bin ma lek ya  yil te Jehová. ¡Jkʼaxel ma pajaluk stalel sok te ajwalil David te jaʼ smamuche! Te David la spas tulan muliletik–euk, pero la sujtes yoʼtan ta smelelil stukel, spisil-ora kʼux ta yoʼtan te Jehová sok la skoltaybey skʼoplal te smelelil yichʼel ta mukʼe (1 Reyes 14:8; Salmo 51:1, 17; 63:1).

Te bin la spas ta skuxlejal te Roboam ay bin ya yakʼ jnoptik. Swenta lek ya yilotik-a te Dios, ma tikʼuk-a te ya jwentaintik ta lek te jfamiliatik o te ya jpastik tulan yuʼun ay bintik lek ya jtatik, te bin tulanxan skʼoplale, jaʼ te spisiluk-ora jaʼ nail ya kakʼtik ta jkuxlejaltik te smelelil yichʼel ta mukʼ te Jehová.

Yame xjuʼ kuʼuntik teme ya jpastik tulan te ma sikub te skʼuxul koʼtantik ta stojol Jehová. Jich bitʼil te kʼajkʼ ya skʼan ya kakʼbeytik siʼul yuʼun ma xtupʼ, jaʼnix jich swenta ma xlaj bael te skʼuxul koʼtantik ta stojole, yame skʼan te ya jnoptik ta jujun kʼajkʼal te sKʼop, te ya jnopilan ta koʼtantik sok te ma jkejchantik ta skʼoponele (Salmo 1:2; Romanos 12:12). Teme jiche te skʼuxul koʼtantik ta stojol Jehová ya stij koʼtantik ta spasel jaʼnax te bin lek yoʼtan yuʼune. Teme la jpastik mulil, te skʼuxul koʼtantik ta stojol ya skoltayotik ta sujtesel koʼtantik ta smelelil. Jich maba pajalotik bitʼil te Roboam, melel spisil-ora jun koʼtantik ya kakʼ jbatik ta stojol te Jehová (Judas 20, 21).