1. Ang’o m’uketho wasagu lei?

YEHOVA umio piny moko ma segi mandha ni dhanu: emio pidocwiny. Eno re ma tie gin m’uketho wasagu lei. Ang’o m’ubenyutho nia Adamu giku Eva gibino ku pidocwiny? I ng’ei ma gidubo ni Mungu, gicidh gipondo ire, pilembe pidocwiny migi ubino sendogi.

2. Pidocwiny mwa urombo ku vala mi meli nenedi? (Nen cal mir acaki.)

² Pidocwiny utie copo ma watie ko yor i iwa, ma ketho wang’io gin ma ber ku gin ma rac, man ma copo telo wiwa i kwo mwa. Juromo poro ng’atu ma pidocwiny pare tio cuu ngo ku meli ma valane unyothere. Kinde ma meline uberingo, yamu ku mujanga copo wiro wie kaka ma rac. Ento ka valane ubetio cuu, ng’atu m’uberingo kude copo nitiro wie ma ber. Kumeno bende, ka waponjo pidocwiny mwa cuu, ecopo telo wiwa i yo m’atira.

3. Ka waponjo pidocwiny mwa cuu ngo, matokene copo bedo ang’o?

³ Ka waponjo pidocwiny mwa cuu ngo, ecopo poyowa ngo ka wabecitimo lembe ma rac. (1 Tim. 4:1, 2) Ecopo ketho waneno  nia “dubo [tie] ber.” (Isa. 5:20) Yesu uyero ni julubne kumae: “Saa bebino, nia ng’atu m’unegowu biwacu nyo [ebetimo tic ma leng’] ni Mungu.” (Yoh. 16:2) Dhanu m’unego Stefano gigam giparu tap kumeno. (Tic. 6:8, 12; 7:54-60) Niai con, jurudini gitimo lembe ma dongo ma reco, calu ve nek, man giwacu nia gitimo kumeca pi Mungu. Re i andha, timo migine utie tung’ ku cik pa Mungu. (Ai 20:13) Ma jiji mbe, pidocwiny migi utelo wigi cuu ngo!

4. Wacopo timo ang’o kara pidocwiny mwa utii cuu?

⁴ Dong’ wacopo timo ang’o kara pidocwiny mwa utii cuu? Cik man cik mir ukungu mi Biblia “kulokane nuti mi ponji, mi nyuth ma junyutho ko dubo, ku mi twiny ma jutwinyo kojo de, ku mi ponji ma mi bedopwe.” (2 Tim. 3:16) Wacikara niponjo Biblia nja, ninyamu i lembe ma wabeponjone, man nitio kude i kwo mwa. Eno biketho wabicaku paru lembe i kite ma Yehova paru ko, e pidocwiny mwa bitelo wiwa cuu. Kawoni wakenen kite ma waromo tio ko ku cik, man cik mir ukungu pa Yehova pi niponjo pidocwiny mwa.

5, 6. Cik pa Mungu utie ku kony ang’o iwa?

⁵ Ka wabemito nia cik pa Mungu ukonywa, wacikara ngo kende kende nisomogi kunoke ning’eyogi. Wacikara bende nimarugi man niworogi. Biblia uyero iwa kumae: “Wudag gin ma rac, man wumar gin ma ber.” (Amo. 5:15) Dong’ waromo timo kumeno nenedi? Ubekwayu waponj nineno lembe i kite ma Yehova neno ko. Kepar nia ibenindo cuu ngo, pieno munganga ung’olo iri nia icam cam ma giero kum, itim jimnastik lee, man itim alokaloka mange i kwo peri. E ilubo lembe m’ekwayu itim, man lembene ukonyi. Ma jiji mbe, icopo foyo munganga eno lee dit pi lembe m’eng’olo nia itim.

⁶ Kumeno bende, Jacwic mwa umio iwa cik kara ugwokwa i kum adwogi ma reco ma dubo kelo, man kara uyik kwo mwa udok ma ber. Ku lapor, Biblia uponjo nia wacikara ngo nicwayu vupo, nikwalu kwo, nitimo tarwang’, nibedo weg rop, man nibedo ku gin moko ci ma tie ku ribiri ku pajogi. (Som Lembrieko 6:16-19; Nyu. 21:8) Ka wabeneno adwogi ma beco ma wabenwang’u nikum woro Yehova, mer ma wamare ko man ma wamaru ko cik pare medere magwei.

7. Korolembe mi Biblia konyowa nenedi?

⁷ Kara wang’ei gin ma ber ku ma rac, wacikara ngo niketuro cik pa Mungu man ninwang’u masendi mi turocikne. Wacopo nwang’u ponji niai kud i kum kosa ma dhanu ma con gitimo, ma jukiewo pigi i Biblia. Lembrieko 9:9 uyero kumae: “Mi ponji ni ng’atu ma riek, man ebicikudoko riek.” Ponjine uai i bang’ Mungu, man e ber mire ma! Ku lapor, kepar kite ma Daudi usendere ko i ng’ei m’eturo cik pa Yehova man etimo tarwang’ ku Bath-ceba. (2 Sam. 12:7-14) Kinde m’ibesomo korolembe maeno, penjiri kumae: ‘Nwang’u Daudi copo timo ang’o kara kud epodh i tarwang’? Ka nwang’u eca ubino an, nwang’u acopo timo ang’o? Nyo nwang’u acopo bedo ve Daudi, kunoke ve Yosefu?’ (Tha. 39:11-15) Ka wabeparu  cuu mandha iwi adwogi ma rac mi dubo, wabidagu gin ma rac dong’ magwei.

8, 9. (a) Pidocwiny mwa konyowa nenedi? (b) Cik mir ukungu pa Yehova konyowa nenedi niponjo pidocwiny mwa?

⁸ I andha, wabed waurara cen ku lembe ma Mungu dagu. Re wacikara nitimo ang’o ka wabenwang’ara i wang’ lembe moko ma cik mi Biblia uweco ngo i wie terere? I saa maeno, wabing’eyo nenedi lembe ma Mungu ubemito watim? Ka walar waponjo pidocwiny mwa cuu ku Biblia, wabimaku yub mi rieko.

⁹ Yehova umaruwa lee dit, uketho emio iwa cik mir ukungu pi nitelo wi pidocwiny mwa. Eyero kumae: “An a Yehova Mungu peri, m’aponji ni kuloka, m’atelo wii kud i yo ma maku iwoth i ie.” (Isa. 48:17, 18) Tek wabenyamu i cik mir ukungu mi Biblia cuu, man wabeweko cikne umul adundewa, eno copo konyowa nitwinyo man nitiro pidocwiny mwa. Ka watimo kumeno, m’umbe jiji, wabimaku yub mi rieko.

10. Cik mir ukungu tie ang’o, man Yesu utio kugi nenedi pi niponjo julubne?

¹⁰ Cik mir ukungu utie lemandha ma lokere ngo ma telo wi paru mwa, man ma konyowa nimaku yub ma beco. Ka wang’eyo cik mir ukungu pa Yehova, wabinyang’ i paru pare man wabing’eyo thelembe m’uketho emio iwa cik moko. Yesu utio ku cik mir ukungu pi niponjo julubne nia paru man timo bedo ku matokene kokoro. Ku lapor, eponjo nia kwinyo romo royojo i rop, man paru mi tarwang’ copo ketho jutimo gier. (Mat. 5:21, 22, 27, 28) Ka wabeweko cik mir ukungu pa Yehova re m’utel wiwa, wabiponjo pidocwiny mwa cuu, man wabitimo ng’iong’ic ma mio yung ni Mungu.​—1 Kor. 10:31.

11. Pidocwiny mi Jukristu copo koc nenedi?

¹¹ Kadok Jukristu gitio ku Biblia pi niponjo pidocwinygi de, re asu ng’atuman copo maku yub m’ukoc ku pa wadi. Yubne moko copo bedo iwi madhu kong’o. Biblia uyero ngo nia etie rac nimadhu kong’o, ento ecimo wang’wa nia wacikara ngo nimadhu kong’o nikadhu mukero kunoke nimer kude. (Rie. 20:1; 1 Tim. 3:8) Nyo eno ubenyutho nia ka Jakristu moko bemadhu kong’o i kadiri ma ber, dong’ ecopo dieng’ ungo ku pidocwiny mi jumange? Ungo. Kadok pidocwiny pare uyio ire nia emadh kong’o de, re asu ecikere nidieng’ pi pidocwiny mi jumange.

12. Wec ma nwang’ere i Jurumi 14:21 copo konyowa nenedi niworo pidocwiny mi jumange?

¹² Jakwenda Paulo unyutho nia wacikara niworo pidocwiny mi jumange. Ekiewo kumae: “En e ber nicamu ring’o ngo, kadi madhu pigulok, kadi timo gin moko m’umeru kier i kume.” (Rum. 14:21) Pieno, kadok watie ku twero mi madhu kong’o de, wabiketho twerone ang’et, tek waneno nia madhu kong’o copo nyotho pidocwiny mi Jukristu wadwa. Saa moko nyo umego moko ular ubedo umath i wang’ niponjo lemandha, pieno eng’io nia dong’ ebimadhu ngo kong’o zoo de. Wabimito ngo watim lembe ma copo ketho edok i kura pare ma con. (1 Kor. 6:9, 10) Kan umego maeno uwendi, nyo ibidiye nia emadh kong’o kadok ebekwero de? Ungo!

13. Timoteo uworo pidocwiny mi jumange nenedi kara ekonygi giwinj lembanyong’a?

 ¹³ Kinde ma Timoteo ubino jalawobi, eyio jutim yaa i kume, kadok timo yaane ubino lith de. Eng’eyo nia timo yaa ubino gin ma pire tek ni Juyahudi m’ebecirweyo igi. Calu Paulo, Timoteo umito ngo eketh jumange gikier. (Tic. 16:3; 1 Kor. 9:19-23) Nyo in de itie ayika nitwoniri ku lembe moko, pi bero mi jumange?

14, 15. (a) Wacikara nitimo ang’o kara wateng’ini? (b) Jukristu m’uteng’ini gikwo ku jumange nenedi?

¹⁴ Wacikara ngo kende kende nijik i kum “ponji ma kwong’a pa Kristu,” ento ukwayu wacwalara i kum teng’ini. (Ebr. 6:1) Wadoko Jukristu m’uteng’ini, ungo kende kende pilembe wadaru timo oro dupa i lemandha. Kara wateng’ini, wacikara nitimo kero lee. Ubekwayu wamed ng’eyong’ec man nyang’ i lembe mwa ameda. Pieno, wacikara nisomo Biblia kubang’ nindo. (Zab. 1:1-3) Kan ibesomo Biblia kubang’ ceng’, ibinyang’ ma ber mandha i cik man cik mir ukungu pa Yehova.

¹⁵ Cik ma pire tek akeca ni Jukristu utie ma kani? Utie cik mi mer. Yesu uyero ni julubne kumae: “Kum kumeni dhanu ceke bing’eyo nia wu julubna tek wumeru.” (Yoh. 13:35) Biblia uyero nia mer utie “cik mi ker” man ‘timbri mi cik.’ (Yak. 2:8; Rum. 13:10) Lembuno copo zungowa ngo pilembe Biblia uwacu nia “Mungu en e mer.” (1 Yoh. 4:8) Mer pa Mungu ujik ungo kende kende i kite m’ewinjere ko awinja nia emaruwa, ento enyutho merne ku timo. Jakwenda Yohana ugoro kumae: “I maeni mer pa Mungu nyuthre iwa, nia Mungu oro Wode kulong’ i ng’om kara wabed kwo ni kume.” (1 Yoh. 4:9) Ka wabenyutho mer ni Yehova, ni Yesu, ni umego mwa man ni jumange, nwang’u wabenyutho nia watie Jukristu m’uteng’ini.​—Mat. 22:37-39.

16. Kinde ma wabeteng’ini, pirang’o wacaku neno cik mir ukungu ni gin ma pire tek akeca?

¹⁶ Kinde ma wabeteng’ini, wacaku neno cik mir ukungu ni gin ma pire tek  akeca. Wang’ ma pol, jutio ku cik kende kende i lembe ma cikne uyio kunoke m’ekwero, ento cik mir ukungu jutio ko i lembe dupa ma tung’ tung’. Ku lapor, nyathin ma nyanok nyang’ ungo nia theyo mer ku jurimo ma reco utie kud ariti, pieno junyodo pare gicikiri niketho cik kara ugwoke. (1 Kor. 15:33) Ento ka nyathin ne ubeteng’ini, ecaku nyamu i lembe nimakere ku cik mir ukungu mi Biblia. Cik mir ukungune gam konye ning’io jurimo ma beco. (Som 1 Jukorinto 13:11; 14:20.) Ka wabemedara nitio ku cik mir ukungu mi Biblia, pidocwiny mwa de bimedere nitio ma ber akeca. E wabitundo ning’eyo cuu lembe ma Mungu ubemito watim i lembe moko ci.

17. Ang’o m’ubenyutho nia watie ku piny ceke ma copo konyowa kara wamak yub mi rieko?

¹⁷ Watie ku piny ceke ma romo konyowa nimaku yub ma foyo i Yehova. Biblia utie ku cik man cik mir ukungu ma copo konyowa nidoko dhanu ‘m’uromo kakare, m’uyikre ndhu kum tic ceke ma ber kubang’gi kubang’gi.’ (2 Tim. 3:16, 17) Cik mir ukungu mi Biblia konyowa ninyang’ i paru pa Yehova. Re kara wanwang’gi, ubekwayu watim kero lee. (Ef. 5:17) I kind piny ma konyowa, watie kud Index des publications des Témoins de Jéhovah, Guide de recherche pour les Témoins de Jéhovah, Watchtower Library, BIBLIOTHÈQUE EN LIGNE Watchtower, man application JW Library. Ka wabetio ku jamtic maeno pi nitimo ponji mwa ma segi kunoke ponji mi juruot, wabinwang’u bero lee akeca.

18. Ka wabetio ku cik man cik mir ukungu pa Yehova, wanwang’u adwogi ma kani?

¹⁸ Ka wabetio ku cik man cik mir ukungu pa Yehova, kwo mwa yikere doko ma ber mandha. Zaburi 119:97-100 uyero kumae: “Amaru cik peri mire ma! En e lembapida para ceng’ du. Lembang’ola peri dwoka riek ma sagu judegi para; Kum ginuti kuda thiri thiri. Ng’eyothelembe para dit ma sagu mi juponji para ceke; Kum lembatuca peri gi lembapida para. Ang’eyo lembe ma sagu ju m’uti, kum aworo ponji peri.” Ka wabekoyo saa mi nyamu i lembe cuu mandha iwi cik pa Mungu, wabinyutho ng’eyothelembe man rieko i lembe ceke ma wabetimo. Bende, ka wabetio ku cik man cik mir ukungu pa Mungu pi niponjo pidocwiny mwa, wabitundo i “mukero mi kadongo mi pong’ pa Kristu.”​—Ef. 4:13.