1. O tamdaw hano ikakaay ko inaneng to ˈaˈadopen hani?

O TAMDAW ikakaay ko inaneng to ˈaˈadopen, samanen misangaˈ ko Kawas to tamdaw, pafeliay to makapahay falocoˈ. Hano mafanaˈ kita hani? Tiya misafelit ca Atam aci Ifa to sarikec ni Yihofa i, milimekay Cingranan, paihekalay koni to cikiyamay ko makapahay falocoˈ nangra.

2. O makapahay falocoˈ hano mahecaday to lasingfang hani? (Nengnengen ko satapangan coka.)

² O makapahay falocoˈ no tamdaw ano caka songilaˈen pahatatanam, mahecad o mapalakay ko lasingfang a tamina, awa ko pakayraan matatodong ko pikayat to rakat no tamina. Itini pifiyor no fali ato tapelik, madoloay miliyas ko tamina to matatodongay a lalan, mihaenay ano awako ngaˈayay a lasingfang tada katalawanto. Ano salofen ko lasingfang, ngaˈay saka dademaken wa ngaˈayto ko parakatay to tamina matatodong ko palakat to tamina. O makapahay falocoˈ mahecaday o lasingfang, ngaˈayay pafafidaˈ to ngaˈayay ato tatiihay, padama  kitaanan matatodong ko patosokan. Kawraan, misaaliay to sasalofen ko makapahay falocoˈ no mita, mihaen wa mikayat kitaanan midemak to matatodongay a demak.

3. O makapahay falocoˈ ano caka pahatatanamen, wa ira ko masamaanay a teloc hani?

³ O makapahay falocoˈ ano caka pahatatanamen, caka piconged cingranan mararaw ko demak, awaayto ko kapo. (1 Timoti 4:1, 2) O hatiniay tamdaw wa oraten no makapahay falocoˈ halatek, ‘palo ngaˈayay to tatiihay,’ sanay. (Isaya 5:20) Paˈayawan ni Yis ko nisawawaan: “O saki Kawas a tayal ita konini, o sasaan cangra to nipipatay nangra i tamowanan.” (Yohani 16:2) Mahaenay ko harateng noya mipatayay ci Stifanoan. (Dmak 6:8, 12; 7:54-60) O pakinaliay ˈifowa ko falocoˈ to pihakelongan a tamdaw adihayay ko tatiihay a demak, tinakoen mipatayay to tamdaw, pakayniay i Kawas ko pidemak niyam sanay cangra, ˈarawhan o misafelitay to sarikec no Kawas. (Kasadakan 20:13) Mahapinangayto, mararaway ko sakayat no makapahay falocoˈ nangra.

4. Sasamaan ko demak ita ngaˈ, eca ka lahedaw ko epoc no makapahay falocoˈ hani?

⁴ Sasamaan ko demak ita ngaˈ eca ka lahedaw ko epoc no makapahay falocoˈ hani? O sarikec ato safalod no Fangcalay Cudad, ‘pasifanaˈay, mirikecay, misalofay, sahetoay o ciepocay.’ (2 Timoti 3:16) Mihaenay, malalok kita micekiw to Fangcalay Cudad, misimsim a midotim to lalakaw no sinael, hanaca saka dademaken i nokaˈorip, mihaen wa ngaˈay pahatatanam to makapahay falocoˈ no niyah, pahecad to harateng no niyah ato harateng no Kawas, mihaen o makapahay falocoˈ wa ngaˈayto tadiˈecen. Dotoc wa milengo kita sasamaan tano sarikec ato safalod ni Yihofa a pahatatanam to makapahay falocoˈ.

5, 6. O sarikec no Kawas pairaay to maanan a sadama kitaanan hani?

⁵ Ano sapilayapaw to sadama no sarikec no Kawas i, cowa ko piˈosi aca to Fangcalay Cudad anca mananam to lalakaw no sinael, wa palahadho kita to maolahay ato mikangodoay to Fangcaly Cudad a falocoˈ. Amos 5:15 sanay: ‘Kaˈitehen ko tatiihay. Kaolahen ko ngaˈayay a demak.’ Sasamaan a matoor konini hani? Wa minanam kita tano ni Yihofa a harateng a minengneng to demak. Patinakoen: Marariday cowa ka ngaˈay ko fotiˈ iso paˈaraw to ising, sasalofen no ising ko mikaenan ato pakayraan iso a maˈorip, mararid a miwiˈawiˈ to tireng. Tooren iso ko sapaini no ising a midemak, ikor ngaˈayay ko minaroˈan, coko miakoˈid kiso to ising padama tisowanan ngaˈayto ko kaˈorip han.

⁶ Mahecaday toni, pafeliay ko misangaˈay Tatapangan to sarikec Ningra, padama kitaanan miliyas to sakararawaw a macada ko roray, halo pisalof to kaˈorip no mita. Doedoen ita ko limoˈot no Fangcalay Cudad, eca ka mangah, eca ka pitakaw, eca ka pisaˈfit a midokaˈ to tamdaw, miliyasho to mariˈangay, miangangay ato malafoay a madadiˈiyay, mihaen o papairato taˈangayay saka ciepoc no mita! (ˈOsien ko Taneng 6:16-19; Paˈarawan 21:8) Tooren ita ko kahemekan ni Yihofa a pakayraan dademak, malifok ko adihayay sapalemed, wa matongal ko piakoˈid to nika pafeli ni Yihofa to sarikec, wa matongal ko kaolah ci Yihofaan ato sarikec Ningra.

7. Ano micekiw ato midotim kita to maˈoningay i laloma no Fangcalay Cudad, wa ira ko maanan a haepoc hani?

⁷ Cowa ko tatahacada kita to roray i noka raraw, ngaˈ minanam to sapasifanaˈ, o maˈoningay no Fangcalay Cudad, o taˈarawan ita a sapasifanaˈ. Itini Taneng 1:5 sanay: ‘O citanengay tamdaw makahiay micada to sapasifanaˈ, adihay ko haepoc.’ Micekiw kita to Fangcalay Cudad ato midotim to maˈoningay i lalomaˈ, o ngangaˈay micada to makapahay a sakayat no Kawas. Tinakoen, misafelitay ci Tafiti to limoˈot no Kawas maˈaˈodang ci Patsipaan, mansa micadaay to taˈangayay a roray. (2 Samuil 12:7-14) Ano micekiw toniya maˈoningay i, wa ngaˈay kita miharateng:  “Wa samaan ci Tafiti a miliyas to saka ˈaˈodangaw ci Patsipaan a midemak toniya taˈangayay a raraw hani? Ano tahasiˈayaw kako to mahecaday sakayhid i, wa ira ko ˈicel a miconged han? Wa mahecad kako ci Yosifan miconged to sakayhid, anca mahecad ci Tafitian a mapadik hokira?” (Satapangan 39:11-15) Ano haratengen ita ko teloc no mararaway, wa ngaˈay misaˈosi ko falocoˈ ‘kaˈitehen ko tatiihay’.

8, 9. (1) O makapahay falocoˈ samaanen misaka dademek hani? (2) O safalod no Fangcalay Cudad, samaanay milingat to makapahay falocoˈ no mita hani?

⁸ Soˈlin, cowa ko mamidemak kita to kaˈintehan no Kawas a demak, kawra itini kaˈorip adihayay a demakan, cowa ka ihekal ko saˈosi no Fangcalay Cudad. Ano mahaenay i, wa samaan a mafanaˈ kita to o maanan a demakan ko kaolahan no Kawas hani? Toniya demak, oya mapahatatanamay no Fangcalay Cudad a makapahay falocoˈ, wa ira ko sapadama.

⁹ Taˈangayay ko olah ni Yihofa, mihadakay Cingra to adihayay a safalod no Fangcalay Cudad, mikayat to makapahay a falocoˈ no mita, sanay ko sowal Ningra: “[Ci Yihofa] Kako o Kawas iso, to saka ciepoc iso, pasifanaˈen Ako kiso, pahapinangen Ako kiso to rarakaten iso a lalan.” (Isaya 48:17, 18) Sarocoden ita ko falocoˈ a misimsim to safalod no Fangcalay Cudad, wa ngaˈay makayat ko makapahay falocoˈ, masalof a masangaˈ padama kitaanan matatodong ko misaˈosian.

10. (1) O manan ko safalod hani? (2) Samaanan ni Yis pasifanaˈ ko nisawawaan misakadademak ko safalod hani?

¹⁰ Safalod ngaˈayay o taˈenengan no soˈlinay kimad anca o tatooren a palinian ko tatodong, ngaˈayay sapiharateng anca o taadoan a midemak. Cipinang kita to safalod no Fangcalay Cudad, wa cipinangto harateng ni Yihofa mafanaˈ to samanay hano pafeli Cingra to sarikec kitaanan. Itiniho i fafekang no sera ci Yis mitosil i, pasifanaˈay to nisawawaan to taˈenengan a kimad, padama cangranan cipinang to maanan a waywayan ato demakan, wa ira ko masamanay a minaroˈan. Tinakoen pasowalan ningra ko nisawawaan, o ˈintehay wa mikayhid to tamdaw tano mariˈangay ko saka dademak, o maˈodangay harateng wa mikayat to saka ˈaˈodangaw to tamdaw. (Matay 5:21, 22, 27, 28) Saka tatodongaw no pidemak no makapahay falocoˈ no niyah, wa micada kita to sakayat no safalod no Fangcalay Cudad, o hatiniay a waywayan ko ngangaˈay paˈdil to Kawas.—1 Korinto 10:31.

11. Mitoor ko tamdaw to makapahay falocoˈ, wa mahecad ko misaˈosian han? Patinakoen.

¹¹ Itini roma pakayraan, mitoor ko Krisciyang to makayatay no Fangcalay Cudad a makapahay falocoˈ, cowa ka hecad ko misaˈosian. Tinakoen ko komaenay to epah, cowa piconged ko Fangcalay Cudad to tamdaw matatodong ko kakomaen to epah, kawra mirikecay to pakidemay komaen to epah ato malasangay. (Taneng 20:1; 1 Timoti 3:8) Sakoniya sowal, harateng no cecay Krisciyang, cowa pakidem ko niyah komaen to epah, hamaanto miharateng to roma a lalangian han? Cowa ka hatira, soˈlin mihayi ko makapahay falocoˈ ningra mihaen to demak, kawra, o haharatengenho ningra wa tatiih ko makapahay falocoˈ no tao hokira.

12. Mikitini i Loma 14:21, mananamay ita ko maanan?

¹² Patalipaˈelalay ci Pawlo to Krisciyang miharateng to makapahay falocoˈ no tao, sanay ko sowal ningra: ‘Ano komaento titi, komaento epah, kihecod a demak, ano sakapolin no salikaka i, aka a pidemak.’ (Loma 14:21) Pakayni saka ecaaw pakapolin to salikaka i noˈadingoan anca tatiih ko makapahay falocoˈ, makahi kita a misawad to kaolahan no niyah. O roma Krisciyang itini ˈayaw no minanam to Fangcalay Cudad, iraay ko haliepahay a nanaman, mansa misaˈosiay cato piˈenip to epah. Cowa ka ciharateng kita mararaw cangra to mahecaday a raraw,  samanen o mamidokaˈ konini to noˈadingoan nangra. (1 Korinto 6:9, 10) Mihaenay, ano tahidangen ita ko salikaka tayni i lomaˈ mitaheka, ano caka kahi cingra komaen to epah, cowa ka ngaˈay paciecien ita cingra, mihaen ngaˈ o maolahay to salikaka.

13. Pakayni i mitosilay a demak, samaanay ko demak ni Timoti hani?

¹³ Maedeng 20 ko mihecaan ni Timoti, maharateng ko mitosilan no niyah mahaopay ko Yutaya tamdaw, misaˈosiay to micada to kerit, ci Timoti mahecaday ci Pawloan, cowa ka ciharateng cangra pakapolin to tamdaw i noˈadingoan. (Dmak 16:3; 1 Korinto 9:19-23) Wa makahi kiso mitodong to taˈarawan ni Timoti, pakayni haepoc no roma tamdaw a kinafalah to haepoc no niyah han?

14, 15. (1) Ano sapasayraaw i matenesay a macakat kita, sasamaan ko demak hani? (2) O matenesay a Krisciyang hano o ciolahay a tamdaw hani?

¹⁴ Polong a Krisciyang o mamitaˈlif to “saˈayaway a ninanaman ita to pakayniay i ci Kristoan ko haharatengen ita”, ‘pasayra i matenesay a macakat.’ (Hipray 6:1) Cowa ko fahal sanay malaˈosi konini, oha ‘pasayra’ matenesay kita a macakat, tatodong noni papadotoc a misaˈicel ngaˈ ngaˈay. Pasayra i matenesay macakat mahaopay ko pitongal to sifanaˈ no Fangcalay Cudad, ato mitongal to micalepay miharateng a ˈicel, mihaenay oha mamiˈosi kita to Fangcalay Cudad to romiˈamiˈad. (ˈOlic 1:1-3) Patirengayto kiso toniya patosokan han? Miˈosi kiso to Fangcalay Cudad to romiˈamiˈad, mamatongal ko kacipinang iso to sarikec ato safalod ni Yihofa, wa matongalho ko kacipinang iso to Fangcalay Cudad.

¹⁵ Pakaynien i Krisciyang ko sowal, sakakaay kalimelaan a sarikec ono olah a sarikec. Pasowalan ni Yis ko nisawawan: “Ano masasiolaholah kamo i, pakayni tonini ko sakafanaˈ no tamdamdaw to nika o nisawawaan ako kamo,” sanay. (Yohani 13:35) Oya pasadakan a safa ni Yis ci Yakop sanay ko sowal, ‘o olah saˈakawangay a sarikec.’ (Yakop 2:8) O roma, masowalay ni Pawlo: ‘O olah o palaˈosiay to sarikec.’ (Loma 13:10) Ano ‘o olah ko Kawas’, mansa misaˈicel ko Fangcalay Cudad to kalimelaan ko olah. (1 Yohani 4:8) Kawraan, o olah no Kawas, cowa ko piharatengan aca soˈlinay Cingra a midemak, sanay ko sowal ni Yohani: “Ocoren no Kawas ko dengan a wawa Ningra a patayni i hekal. Pakayni i cingraan ko sakaciˈorip ita to midaˈocay a ˈorip. Itini  a mahapinang ita ko olah no Kawas i titaanan.” (1 Yohani 4:9) Mihaenay, maolah kita ci Yihofaan, ci Yisan, salikaka ato roma tamdaw, ano mihaen i, o matenesayto a Krisciyang.​—Matay 22:37-39.

16. Ano padotoc kita macakat i noˈadingoan, hano masakalimelaan ko safalod no Fangcalay Cudad wa saan ko harateng hani?

¹⁶ Ano padotoc kita macakat i noˈadingoan, o masakalimelaan ko safalod no Fangcalay Cudad wa saan ko harateng. Mafanaˈay kita cowa ka hakowa ko mahaopay no sarikec, kawra o safalod ngaˈayay saka dademaken i adihayay a demak. (1 Korinto 15:33) Ano palidlid saan lomahad ko wawa, matongal ko inaneng ningra miharateng, mafanaˈto tano safalod no Fangcalay Cudad a miharateng, mafanaˈ a mipiliˈ to cacawmaˈen a tamdaw. (ˈOsien ko 1 Korinto 13:11; 14:20.) Micerid kita a misimsim to safalod no Fangcalay Cudad, wa ngaˈayto tadiˈecen ko makapahay falocoˈ, hanaca matongal ko kacipinang to harateng no Kawas.

17. Ano matatodongay ko misaˈosian ita, hano mahemek ci Yihofa hani?

¹⁷ Wa ngaˈay kita samaan a matatodng ko misaˈosian, pakahemek ci Yihofaan hani? Mananam a misaka dademak to sarikec ato safalod no Fangcalay Cudad, “ta masongilaˈ a mapatala ko mamatayal no Kawas ta maedeng cangra a midemak to masamaamaanay a ngaˈayay a demak.” (2 Timoti 3:16, 17) Mihaenay micekiw kita to safalod no Fangcalay Cudad, “kafanaˈ kamo to nika o maan ko nafalocoˈan [ni Yihofa].” (Ifiso 5:17) Adihayay ko misadayan no likakawa sapicekiw a lalosidan, tinakoen o Pirorodan to Mitepangan Cudad no Mikecolay, Pirorodan to Mitepangan Cudad no Misawacayay Tamdaw ni Yhofa, Mikecolay Soko, Salilan a Soko no Cudad ato JW Library app.Songilaˈen ita ato paro no lomaˈ misaka dademak koniya lalosidan no Fangcalay Cudad a micekiw, wa milifok to adihayay a haepoc.

18. Ano tooren ko sarikec ato safalod ni Yihofa a midemak, wa ira ko maanan sapalemed hani?

¹⁸ Ano tooren ko sarikec ato safalod ni Yihofa a midemak wa ira ko maanan sapalemed hani? Itini ˈOlic 119:97-100 sanay ko sowal: “Tada maolah kako to rikec Iso, saromiˈamiˈad sa kako a miharateng tonini. Mararid i falocoˈ ako ko limoˈot Iso, saka, ikaka no ˈada ako ko nika citaneng ako. Ikaka no polong no singsi ako ko nika fanaˈ ako, nawhani miharateng kako to sifanaˈ Iso. Ikaka no matoˈasay ko nika citaneng ako, nawhani o midoedoay kako to limoˈot Iso.” Palaken ita ko toki ‘misimsim’ to sarikec ato safalod no Kawas, wa matongal ko taneng ato sifanaˈ, wa ngaˈay micalep miharateng to demak. Ano ciharatengay kita ‘sapahecadaw to harateng ni Kristo’, papadotoc tano sarikec ato safalod no Kawas a pahatatanam to makapahay falocoˈ no niyah.​—Ifiso 4:13.