1. ¿Kunansa jaqenakajj animalanakat sipansa mayjätanjja?

¿KUNANSA jaqenakajj animalanakat sipansa mayjätanjja? Jehová Diosajj jaqenakarojj concienciani lurawayistu. Adanampi Evampejj ukhamäpjjarakïnwa. Diosan leyipar jan istʼapkäna uka qhepatjja, concienciapajj juchañchänwa, ukatwa imantasipjjäna.

2. ¿Kunjamsa concienciasajj barcon timonapäkaspas ukhamajja? (Aka paginankir dibujo uñjjattʼäta).

² Jan suma yatichat conciencianinakajja, lamar qotnam saraskir mä barcojj jan suma timonanïki ukamp sasispawa. Ukham jan suma timonani barcot sarasajj jan waliruw purtʼassna. Jachʼa thayasa oladanakas sartaspa ukhajja, jan suma timonanïtap laykojj maysaruw barcojj sarjjaspa. Ukampis barcon timonapatï suma cuidatächi ukhajja, kawknamtï sarañapäki uknam sarañatakiw barco apnaqerirojj yanaptʼaspa. Concienciasajj niya ukhamarakiwa, Bibliarjam sum yatichañäni ukhajja, kunatï walïki jan walïkaraki uk amuyañatakiw yanaptʼistani.

3. ¿Kuna jan walinakarus jan suma yatichat concienciajj puriyistaspa?

³ Concienciasajj jan suma yatichatäki ukhajja, janiw kunatï jan walïki uk amuyañatak yanaptʼkistaspati (1 Tim. 4:1, 2).  ‘Jan walïki ukajj walikïkaspas’ ukhamwa amuyayistaspa (Is. 5:20). Jesusajj discipulonakapar akham sänwa: “Horasajj jutaskiwa, ukapachaw jumanakar jiwayapjjätam, uk lurasajj Diosarus servipkaspa ukhamwa amuyasipjjani” sasa (Juan 16:2). Cheqas ukhamwa Esteban chachar jiwayirinakajj amuyapjjäna, uka jaqenakjam luririnakajj ukhamwa amuyapjjaraki (Hech. 6:8, 12; 7:54-60). Diosaruw servipjjta sasin amuyiri jaqenakajja, kunayman jan walinak lurasajj Diosan munañap lurapjjta sasaw sapjje, ukampis Diosan leyinakapwa pʼakintasipki (Éx. 20:13). Uka jaqenakan concienciapajj janiw suma yatichatäkiti.

4. ¿Kunsa yanaptʼir suma conciencianïñatakejj lurañasa?

⁴ ¿Kunsa yanaptʼir suma conciencianïñatakejj lurañasa? Diosan leyinakapasa Biblian yatichäwinakapas wakiskiriw “yatichañataki, cheqañchañataki, kunatejj jan walïki ukanak askichañataki ukhamarak cheqapar sarnaqañ yatichañatakisa” (2 Tim. 3:16). Ukhamasti kunjamtï Diosajj amuyki, kunatï walïki ukarjam lurañatakiw conciencias sum yatichañasa. Ukatakejj Bibliat sum yatjjatañasawa, yatjjatktan ukanakatsa lupʼiñasawa, ukarjamaw sarnaqañasaraki. Kunjamsa Diosan leyinakapasa Biblian yatichäwinakapas concienciasar yatichañatak yanaptʼistaspa ukwa jichhajj yatjjataskañäni.

5, 6. ¿Kunjamsa Diosan leyinakapar istʼañajj yanaptʼistu?

⁵ Diosan leyinakapampi yanaptʼayasiñatakejj janiw uka leyinak aleqak uñtʼañasäkiti ni aleqaksa liyiñasäkiti, jan ukasti munasiñasawa respetañasarakiwa. Diosan Arupajj akham siwa: “¡Jan walïki ukjja uñisipjjam! ¡Sumäkis ukjja munapjjam!” sasa (Amós 5:15). Ukatakejj kunjamtï Jehová Diosajj amuyki ukham amuyañaw wakisi. Amuytʼañataki, mä qhawqha arumanakajj janis sum ikiñ puedksna ukham sañäni. Ukhamïpanjja doctorajj kunsa manqʼañasa kunsa jan manqʼañasäkaraki ukwa sistaspa. Ejercicionaksa lurañamawa, janiw nayrjam taqe kunsa lurañamäjjeti sarakistaspawa. Doctoran uka ewjjanakapajj yanaptʼistaspa ukhajja, ¿janit uka doctorar wal yuspärksna?

⁶ Jehová Diosajj niya ukhamarakiw leyinak churistu. Uka leyinakaw juchar jan purtʼasiñatakisa, jan walinakan jan uñjasiñatakisa, sum jakasiñasatakis yanaptʼistu. Sañäni, kuntï Bibliajj kʼarisiñatsa, lunthatasiñatsa, qʼañu jucha lurañanakatsa, nuwasiñanakatsa, layqasiñanakatsa ewjjtʼkistu ukanakajj wal yanaptʼistu (Proverbios 6:16-19 liytʼañataki; Apoc. 21:8). Jehová Diosar istʼañajj kunjamsa yanaptʼistu uk amuytan ukhajja, jukʼampiw Juparusa leyinakaparus munastanjja.

7. Biblian qellqatäki uka sarnaqäwinakat liytʼañasa ukanakat lupʼiñas ¿kunjamsa yanaptʼistu?

⁷ ¿Kunatï walïki uk yateqañatakejj Diosan leyinakap pʼakintañapunit wakisi? Janiwa. Diosan leyinakap pʼakintirinakajj kuna jan walinakansa uñjasipjjäna ukajj Biblian qellqatawa, ukhamajj uka sarnaqäwinakat liyisa ukat lupʼisaw kunatï walïki uk yateqsna. Proverbios 1:5 textojj akham siwa: “Khititejj yatiñani, chʼikhïki ukawa aka arunakjja istʼejja, ukatsti jikjjatiwa jukʼamp yatiñ kankaña” sasa. Jehová Diosakiw uka yatiñ churistaspa, janipuniw yaqhajj utjkaspati. Sañäni, David chachajj Diosar jan istʼasina Betsabé (Bat-seba) warmimpi juchar purtʼasïna ukhajja, jan walinakanwa uñjasïna (2 Sam. 12:7-14). David chachat Biblian liytʼkañäni ukhajja, akham sasaw jisktʼassna: “¿Kunsa Davidajj jan walinakar jan purtʼasiñatakejj luraspäna? David chachjam juchar purtʼasiñjamäspa ukhajja, ¿kunsa lurirista?  ¿José waynjamat jaltjjerista, jan ukajj David chachjamach juchar purtʼasirista?” sasa (Gén. 39:11-15). Juchar purtʼasisajj kuna jan walinakansa uñjassna ukanakat lupʼiñäni ukhajja, kunatï jan walïki ukarojj jukʼampiw uñisiñäni.

8, 9. 1) ¿Kunjamsa concienciajj yanaptʼistu? 2) ¿Kunjamsa Biblian yatichäwinakapajj concienciasar yanaptʼi?

⁸ Cheqas taqeniw kuntï Diosajj uñiski ukanak jan lurañatak chʼamachastanjja. Ukampis Bibliajj uka toqet jan sum qhanañchki ukhajja, ¿kun lurañassa Jehová Diosajj muni uk kunjamatsa yatsna? Concienciasatï Bibliarjam suma yatichatächi ukhajja, suma amtanakaruw puriñäni.

⁹ Jehová Diosajj wal munasistu ukatwa Biblian yatichäwinakap churistu, ukaw concienciasar yanaptʼi. Jupajj akham sistuwa: “Nayätwa [Jehová] Tatitu Diosamajja, nayasti kunatejj jumatakejj askïki ukwa yatichsma, kawki thakinjamtejj sarañamäki ukanjam irparaksma” sasa (Is. 48:17, 18). Biblian yatichäwinakapat lupʼtan, chuymasarus katoqastan ukhajja, concienciasaruw sumäñapatak yanaptʼtanjja. Ukhamatwa concienciasajj suma amtanakar puriñatak yanaptʼistu.

10. 1) ¿Kunjamsa Biblian yatichäwinakapajj yanaptʼistu? 2) ¿Kunjamsa Jesusajj Biblian yatichäwinakaparjam yatichirïna?

¹⁰ Biblian yatichäwinakapajj suma amtanakar puriñatakiw yanaptʼistu. Uka yatichäwinak sum amuyañajja, kunjamsa Diosajj amuyi, kunatsa leyinak qellqayäna ukanak amuyañatakiw yanaptʼistu. Jesusajj Biblian yatichäwinakaparjamaw discipulonakapar yatichirïna, ukhamat luratanakapasa amuyunakapas kunjamanakansa uñjasiyaspa, ukanakat amuyasipjjañapataki. Amuytʼañataki, chuyma ustʼat sarnaqañajj nuwasiñanakaruw puriyaspa, jan walinak lupʼiñasti wachoq jucharuw puriyaspa, ukwa Jesusajj jupanakar yatichäna (Mat. 5:21, 22, 27, 28). Biblian yatichäwinakapampi yanaptʼayasiñäni ukhajja, concienciasajj suma yatichatäniwa, amtanakasas Diosaruw jachʼañcharakini (1 Cor. 10:31).

11. ¿Kunatsa taqenis jan mä pachpa conciencianïktan?

¹¹ Cristianonakajj Bibliarjamas conciencias yatichkstanjja, awisajj janiw taqenis mä amtaruki purksnati. Amuytʼañatakejj alcohol umañat parltʼañäni. Bibliarjamajja alcohol mä jukʼa umtʼañajj walikïskiwa, ukampis machjasiñaw jan walïkiti (Prov. 20:1; 1 Tim. 3:8). Ukhamasti, alcohol umañäniti janicha uk amtkasajja, ¿jan jiljas umañatakti llakisiñasa? Janiwa. Concienciasataki llakisiñat sipansa, jilat kullakanakan concienciapatwa llakisiñasa.

12. ¿Kunjamsa Romanos 14:21 textojj mayninakan concienciap respetañ yanaptʼistu?

¹² Cristianonakajj mayninakan concienciap respetañasawa sasaw apóstol Pablojj yatichäna, akham sänwa: “Jukʼamp walïspaw jan aycha manqʼañajja, ni vino umañasa jan ukajj yaqhanak lurañasa, jilamatejj ukanak luratamat lanktʼaschi ukhajja” sasa (Rom. 14:21). Mä jilatatakejj alcohol umañajj jan walïkchi ukhajja, concienciapar respetatasat janiw alcohol umkañäniti ukhamat jan lanktʼayañataki. Yaqhepajj Jehová Diosan janïr Testigopäkasajj wali umirïpjjänwa, ukampis jichhajj janiw alcohol ni mä jukʼsa umañ munjjapjjeti. Jupanakar janiw lanktʼayañ munktanti ni jan walinakan uñjasipjjañapsa munktanti (1 Cor. 6:9, 10). Ukhamajj mä jilatatï alcohol churatajj jan munkani ukhajja, janiw obligañasäkiti.

13. ¿Kunsa Timoteojj Diosan arunakap yatiyañ laykojj luräna?

¹³ Timoteot parltʼañäni, jupajj mä 20 maranïkäna ukhajja, circuncidayasïnwa. Ukham  luratajj walsa usuyaskchïnjja, Diosan arunakap yatiyañapäkäna ukanakar jan lanktʼayañatakiw uk luräna. Jupajj apóstol Pabljamarakiw jaqenakar jan lanktʼayañ munkänti (Hech. 16:3; 1 Cor. 9:19-23). ¿Jiwasajj mayninakar jan lanktʼayañatakejj chʼamachasiraktanti?

14, 15. 1) ¿Kunjamsa jilïr jaqer tukutas uñachtʼaysna? 2) ¿Kunjamsa Diosar serviñan jilïr jaqer tukutäjjapjje ukanakajj mayninakar uñjapjje?

¹⁴ ‘Jilïr jaqer tukuñasatakejja’, taqe cristianonakaw ‘Cristjjat qallta yatichäwinak yatjjatañ tukuyañataki’ chʼamachasiñasa (Heb. 6:1). Ukampis janiw ina chʼusatak ukham jaqer tukksnati, sapüruw chʼamachasiñasa. Diosar serviñan jilïr jaqëñatakejja, jukʼamp yatjjataskakiñasawa, sapürutjamaw amuytʼasiri jaqëñatakis chʼamachasiñasa. Ukatwa Diosan markapajj Biblia sapür liyiñatak chʼamañchistu (Sal. 1:1-3). ¿Uk lurañatakejj chʼamachasisktanti? Jiwasatï Biblia sapür liyiñänejja, Diosan leyinakapsa Biblian yatichäwinakapsa sumwa amuyañäni.

¹⁵ Taqe leyinakat sipansa munasiñaw cristianonakatakejj jukʼamp wakiskiri. Jesusajj arkirinakapar akham sänwa: “Jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:35). Jesusan Santiago jilapajja, uka leyirojj ‘Reyin jachʼa leyipa’ sasaw säna (Sant. 2:8). Pablojj akham sarakïnwa: “Khititï yaqhanakar munaski ukajja, cheqpachapuniw leyirjam phoqaski” sasa (Rom. 13:10). Bibliarjamajja munasiñajj wali wakiskiriwa, cheqas “Diosajj munasiñawa” (1 Juan 4:8). Ukampis Jupajja, janiw munassmawa sasin aleqak siskistuti, jan ukasti, luratanakampiw munasiñap uñachtʼayistu. Apóstol Juanajj akham sänwa: “Diosajj mä sapa Yoqaparuw akapachar khitanïna, ukhamat jupïpan wiñay jakañ katoqañasataki, ukhamatwa Diosan munasiñap uñjtanjja” sasa (1 Juan 4:9). Ukhamajj Jehová Diosaru, Yoqaparu, jilat kullakanakaru, yaqha jaqenakar munastan ukhajja, Diosar serviñan jilïr jaqëtaswa uñachtʼaytanjja (Mat. 22:37-39).

16. Jilïr jaqer tukkasajja, ¿kunatsa Biblian yatichäwinakap jukʼamp wakiskirit uñj-jjtanjja?

¹⁶ Leyinakajj kunsa lurañasa, kunsa jan lurañasäkaraki ukakwa sistu, ukampis Biblian  yatichäwinakapajj taqe kunanwa yanaptʼistu. Ukatwa jilïr jaqer tukkasajj Biblian yatichäwinakapar jukʼamp wakiskirit uñj-jjtanjja. Uk amuytʼañatakejj wawanakat parltʼañäni. Jiskʼäsipki ukhajja jan wali amigonïñajj kunatsa jan walïki uk janiw amuyapkiti, awk taykapaw ukatakejj yanaptʼapjjañapa (1 Cor. 15:33). Ukampis wawanakajj jilïr jaqer tukusipki ukhajja, jukʼat jukʼatwa Biblian yatichäwinakaparjam amuytʼasiñ yateqapjje, amigonakapsa sum ajllisjjapjjaraki (1 Corintios 13:11; 14:20 liytʼañataki). Jiwasampejj ukhamarakiw pasi, Biblian yatichäwinakapat amuytʼtan ukhajja, concienciasajj jukʼat jukʼatwa kunatï walïki uk lurañatak yanaptʼistu, kuntï Diosajj amuyki ukarjam amuytʼasiñatakis yanaptʼarakistuwa.

17. Suma amtanakar puriñatakejj walja yanaptʼanakaw utjistu sasajj ¿kunatsa sissna?

¹⁷ Kunjamtï Jehová Diosajj amuyki ukarjam amtañatakejj walja yanaptʼanakaw utjistu. Biblian qellqatäki uka leyinakasa yatichäwinakapasa, ‘suma yatjjatatäñasataki, taqe suma luräwinak lurañataki suma wakichtʼatäñatakiw’ yanaptʼistu (2 Tim. 3:16, 17). ‘Kun lurañassa Jehová Diosajj muni’ uk amuyañatakejja, chʼamachasiñasawa (Efes. 5:17). Diosan markapajj yanaptʼanak churkistu ukanakampis yanaptʼayasiñasarakiwa. Uka yanaptʼanakajja, Jehová Diosan Testigonakapan Bibliat yatjjatapjjañapataki, Watchtower INTERNETANKIR BIBLIOTECA, JW Library sat aplicación ukanakawa. Español arunjja, Watchtower Library sat programa, Índice de las publicaciones Watch Tower sat yanaptʼas utjarakiwa. Ukanakampejja, Bibliat sapak yatjjatkasa jan ukajj familjam yatjjatkasaw yanaptʼayassna.

18. Biblian yatichäwinakaparjama, Diosan leyinakaparjam sarnaqasajj ¿kuna bendicionanaksa katoqañäni?

¹⁸ Biblian yatichäwinakaparjama, Diosan leyinakaparjam sarnaqañäni ukhajja, walja bendicionanakwa katoqañäni. Salmo 119:97-100 qellqatajj akham siwa: “Yatichäwimarojj walpun munasta: ¡Sapüruw ukjjat lupʼiskta! Arunakamajj timanakajjat [jan ukajj enemigonakajat] jukʼamp yatiñan tukuyitu, kamächit arunakamajj nayamp chiktʼatapuniwa. Taqpach yatichirinakajjat sipan jukʼamp amuyta, arunakam lupʼitajj layku. Chuyman jaqenakat sipan jukʼamp amuyta, arunakamarjam sarnaqatajj layku” sasa. Biblian yatichäwinakapata, Diosan leyinakapat lupʼiñatak tiempo apstʼasiñänejja, jukʼamp yatiñaniñäniwa, amuytʼasiñsa yateqarakiñäniwa. Ukat ukanakarjam conciencias yatichañataki chʼamachasiñäni ukhajja, “qhawqchʼäkitejj Cristojj ukar puriñka[maw]” cristianjamajj jiltaskakiñäni (Efes. 4:13).