1. Ka adügübei lun amu wamá hawéi animaalugu?

RUTI Heowá aban katei houn gürigia le adügübei lun amu hamá hawéi animaalugu: saminaü. Gayaraati meha lasaminarun Adán tuma Ewa. Ida liña wasubudiruni? Lárigiñebei hadüraaguni lilurudun Bungiu, aba haramudagun. Arufudati lira aba lan hasandiragun houngua wuriba luagu le hadügübei.

2. Ida liña genegegua lan saminaü luma aban kónpasi? (Ariha huméi dibuhu le lídanbei lagumeseha arütíkulu).

² Saminaü ligía aban katei le wádanbei lun wasubudiruni le buídubei lumoun le wuribabei ani adundeha lumutiwa lidan wabagari. Ítara liña kei aban kónpasi. Aban kónpasi le buiti lesetirun íderagua lumuti tarünei waporu lun lachülürün lidoun fulasu le ñeinba lubéi lidin. Gama lumoun, kaba asusereda anhein mesetirún kónpasi buidu? Gayaraabei ménrengun lan ladügün garabali luma ébeeni lun tidin waporu lidoun amu fulasu. Ítarameme, aban saminaü le buiti adundeha lumutiwa lidoun üma le buídubei, ánheinti saminaü le mabuidunbei denchati.

3. Ka gayaraabei lasuseredun anhein wuriba lubéi lisaminan gürigia?

 ³ Saminaü le mabuidunbei mawisarun lubadiwa anhein dencha lubéi somu katei ni luagu moun lumuti lan lun wadügüni (1 Tim. 4:1, 2). Gayaraati ladügün lun wagúarun “lun le wuribabei buiti” (Isa. 5:20). Ariñagati Hesusu houn lani disipulugu: “Wuribabei dan hun darime lun anhaün lan láfaragua furumiñeguarügü gürigia hilagubei, laritaguba luagu leseriwiduña lan lun Bungiu lau lira” (Huan 16:2). Ligía meha asuseredubei houn ha áfarubalin disipulu Esütéban hilagubei, ani ligía giñe hasaminarubei ha óuserubaña kei hagía (Adü. 6:8, 12; 7:54-60). Gürigia ha ganigibaña ligilisi ha adügübalin wuribani le ariñagatiña seriwi hamá lun Bungiu. Ani le linarün katei, hadüraaguñein lilurudun (Afu. 20:13). Furanguti larihín leyeeduñanu lan hasaminan.

4. Kaba wadüga lun meyeedun lániwa wasaminan?

⁴ Ka lunbei wadügüni lun meyeedun lániwa wasaminan? Huuti lilurudun Bungiu luma adundehani le tídanbei Lererun ‘lun larufudahan, lun ladeinhan, adügati lun hígiruni gürigia katei le mabuidunbei ani arufudahati houn gürigia lidan richaguaü’ (2 Tim. 3:16). Lun ladundehaniwa wasaminan buidu luma lun úara lan wasaminan luma lisaminan Bungiu lunti waturiahanu Bíbülia buidu, wasaminarun hulili luagu le tariñagubei ani winwan wameime le wafurendeirubei. Ariha waméi ida luba lan líderaguniwa lilurudun luma ladundehan Bungiu lun buidu lan wasaminan.

5, 6. Ida liña lahuudun woun gaganbadi wamá lun lilurudun Bungiu?

⁵ Lun wasagarun buiti lídangiñe lilurudun Bungiu, úati buídurügü lan waliihani o wasubudiruni lúrudu ligía. Mosu hínsiñe lan woun ani inebe ligíame woun. Ariñagatu Lererun Bungiu: “Iyereegulá wuribani hun, ani hinsiñe lan le buídubei hun” (Amos. 5:15, TNM). Gayaraati wadügüni lira lau wafurendeirun arihei katei ítara kei aubei larihei Heowá. Samina wamá barühadiwa lan fiu dan marumugunga buidu. Ábati lariñagun surusia woun lunti lan weigin ítaga katei, wadügün ehersísiu ani sansi wameime fiu lídangiñe katei le wadügübei lidan wabagari. Ánhawa ariha buídutimahali lan wátuadi lárigiñe wadügüni sun le lariñagubei, ma wéiribei weteingiruni surusia ligía gebegi ligíame sun adundehani le líchugubei woun?

⁶ Ítarameme, rúhali Bungiu lúrudu burí woun le óunigirubaliwa luéi wuribani le lanügübei figóu, ani ídehati lun buídutima lan wabagari. Samina wamá luagu ida liña lan lahuudun woun gaganbadi wamá lun le tariñagubei Bíbülia luagu iyeeni, íweruhani, magíaguni, furundei luma katei le hámagiñeti máfianu (aliiha huméi Ariñawagúni 6:16-19; Aruf. 21:8). Dan le warihini sun buiti le lanügübei gaganbadi wamá lun Heowá ábatima laganwoundun ínsiñeni luma eteingiruni le wasandirubei luagu luma luagu lilurudun.

7. Ida liña lahuudun woun waliihani abahüdaguni burí le tídanbei Bíbülia luma wararamagun asaminara luagu?

⁷ Mama mosu wasufuriruni wuribani le lanügübei maganbadi lun Bungiu lun gayara lan wafurendeirun katei buiti. Gayaraati wafurendeirun lídangiñe hachara amu lau waliihanu Bíbülia ráramagua wagíame asaminara luagu le waliihabei. Ariñagati Ariñawagúni 1:5: “Gürigia chu tau ha aganbuti dimurei le, lachuudatimaba hau”. Lúmagiñe Heowá liabin arufudahani le ani úati amu buídutimati luéi. Kei hénpulu, samina wamá luagu sun le lasufurirubei Dawidi lárigiñe maganbadi lan lun Bungiu luma lagabarahan tuma Betüsawé (2 Sam. 12:7-14). Lidan awanha lan aliihei sügǘ le, gayaraati wasaminarun luagu burí álügüdahani le: “Kaba hamuga meha san ladüga Dawidi lun masuseredun lan sun le lun? Lun hamuga nagagibudagun luma aban sügǘ ítarati, kaba hamuga nadüga? Néibaaguba hamuga  san, ítara kei ladügüni Hosé o néiguaduba hamuga lidoun óuchawaguni ítara kei Dawidi?” (Agu. 39:11-15). Ánhawa asaminara luagu wuribani le lanügübei figóu, liyereegudubatima le wuribabei woun.

8, 9. a) Ka un lahuuda wasaminan? b) Ka lánibei ladundehan Bungiu luma wasaminan?

⁸ Chóuruti sun lan wagía áfaaguatiwa lun dise wamá luéi sun le iyereegubei lun Bungiu. Kaba wadüga dan le wagagibudagun luma somu sügǘ le uágubei mariñagun tan Bíbülia ni kata? Ida luba wasubudiruni ka lan labusenrunbei Bungiu lun wadügüni? Ánhawa ebelaagüda katei tídangiñeti Bíbülia lidoun wasaminan, buídubei le lunbei wanúadiruni.

⁹ Hínsiñetiwa lun Heowá ligía rúhali lubéi adundehani woun le adundehabalin wasaminan. Ligía guánarügü ariñagubei: “Au Aburemeibei le Bubungiute; arufudaha numuti le buídubei bun, adundeha numutibu luéigiñe üma le lunbei bafalaruni” (Isa. 48:17, 18). Dan le wararamagun asaminara luagun adundehani tídangiñeti Bíbülia ígira wagía lun lachülürün tidoun wanigi, waranseruñein ani wasansiruñein ligaburi wasaminan lun úara lan luma le wafurendeirubei. Adügati le lun wanúadahan wadügün katei buiti.

10. a) Ida liña líderaguniwa adundehani? b) Ida liña meha layusuruni Hesusu adundehani tídangiñeti Bíbülia?

¹⁰ Íderagua lumutiwa adundehani lun desidírü wamá buidu. Adügati gunfuranda wamani adundehani tídangiñeti Bíbülia lun gunfuranda wamani ligaburi lasaminarun Heowá luma ka lan uagu líchiga ítaga lúrudu. Lidan sun dan le ladurarubei lani Hesusu ministeriu, arufudahati adundehani méiniti houn lani disipulugu lun líderaguniña arihei le lanügübei ladügǘn somu katei o gagaburi hamá ítaga igaburi. Kei hénpulu, ariñagati houn barǘ lumutiña lan igarihabu gürigia lun hóuserun lau furundei, ani gayara lan ladügün luriban saminaü lun lagabarahan gürigia (Mat. 5:21, 22, 27, 28). Ánhawa ígiraguagüda woungua lun ladundehaniwa adundehani lúmagiñeti Bungiu buídubei wasaminan ani wadügüba katei le lunbei líchugun uéiriguni lun (1 Kor. 10:31).

11. Ida liña ámuñegueinarügü lan saminaü?

¹¹ Lunti san ábanmeme lan wasaminan lidan sun katei? Uá. Anihein dan, hadügüba bián kristiánugu ámuñegueinarügü katei lidan ligiaméme kesi lau sun buidu lan hasaminan biángubei hagía. Samina wamá luagu laatún binu. Ariñagatu Bíbülia moun lumuti lan wabachuarudun ni lun gátadi wamá. Gama lumoun, mariñaguntu wuriba lan hatun gürigia murusunraü (Ari. 20:1; 1 Tim. 3:8). Lidan lóurate wasaminarun anhein wátuba lubéi lumoun mátunbadiwa lan, luágurügüba san gayara lan watun murusunraü wasaminara? Uá. Mámarügüñein lun wachoururuni darangilu lan wasaminan, mosu giñe gabaroun wamani hasaminan wábirigu.

12. Ida luba línchahaniwa dimurei burí le ariñawagúbei lidan Rómana 14:21 lun inebe lan hasaminan amu woun?

¹² Arufudahati Pábulu lunti lan gabaroun wamani hasaminan amu. Ariñagati: “Buítimati hamuga lun meigin ban úi, matun diwéin, madügün ni kata le achugeraguagüdüti biduhe, o lábürügüdüni lan lidoun figóu, o ledebilidagüdüni lan lafiñen” (Rom. 14:21). Anhein matun lubéi aban íbiri ladüga ligía lan lariñagubei lisaminan lun, ma mátunbadiwa hamuga giñe luéi wadügün lun lachugeragun íbiri ligía, lau sun gayara lan yebe watun? Chóuruti ítara luba lan. Añahein íbirigu ha meha gátadibaña lubaragiñe hadügagun houngua Gefentiña, gama lumoun, mabusenrunhaña ni lun hatun ni murusun. Chóuruti mabusenrun lan ni aban wádangiñe lunya habürühan íbirigu ha lidoun igaburi le luma lun hasufurirun saragu (1 Kor. 6:9, 10). Ligíati, ánhawa íchiga diwéin o somu uniñein lun aban íbiri ani máhati  látuni marufudunbadiwa hamuga ínsiñehabuni lun ánhawa hamuga adügüdara luagu lun latun.

13. Ka ladügübei Timotéu lun líderaguniña amu gürigia lun hánharun lun uganu buiti?

¹³ Ariha waméi lani Timotéu hénpulu. Dan meha nibureingili, kéiburi 20 irumu lau, ánhati meha lun lichugún seini tuagu lóustarun, aban meha ibigúni le gáriti. Adüga lumuti lira lun madügün lan lun hachugeragun huríu ha meha únbaña lunti lan lapurichiha. Ítara liña láyeihani ligaburi apostolu Pábulu (Adü. 16:3; 1 Kor. 9:19-23). Aranseñu waña san lun wadügün sákürifisiu luagu hafulesein amu, ítara kei ladügüni Timotéu?

14, 15. a) Ka lunbei wadügüni lun lederebugudun wafiñen? b) Ka lánibei derebugu lan wafiñen lumoun warufudun ínsiñehabuni?

¹⁴ Sun kristiánugu lunti merederagun wamá lidan “arufudahani le ménrengubei libügürü Kristu”, mosu wederebudagüdüni wafiñen (Ebü. 6:1). Gama lumoun, mama ítaraguarügü lasuseredun le. Mosu wáfaagun súnwandan. Lun wederebudagüdüni wafiñen lunti laganwoundun wasubudin luma le gunfuranda wabéi. Ligía lariñawagúnbei woun sagü dan lun waliihanu Bíbülia sagü weyu (Sal. 1:1-3). Wadügüñein san? Líderagubadiwa waliihanu Bíbülia sagü weyu lúntima gunfuranda wamani lilurudun luma ladundehan Bungiu.

¹⁵ Lúrudu luáguti ínsiñeni ligíatima lúrudu súdinitimabei houn kristiánugu. Ariñagati Hesusu houn lani disipulugu: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35). Wati Santiagu, le lamulen Hesusu, lun ínsiñeni “liñun-agei lúrudu” (Sant. 2:8). Ani ariñagati Pábulu: “Ánhawa lubeiti hínsiñehabu, gúnfuli wamaali sun lilurudun Bungiu keisi lubudubu” (Rom. 13:10). Maweiriduntu wanigi lau tayanuhan Bíbülia saragu luagu lisudinin ínsiñeni “lugundun ínsiñeni Bungiu” (1 Huan 4:8). Lun Heowá, mámarügüñein aban katei le asandirúbei ínsiñenibei, ínsiñeni aban katei le arufudúbei lau le wadügübei. Abürühati Huan: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe” (1 Huan 4:9). Ligíati, dan le warufudun hínsiñe lan Heowá luma Liráü woun, hínsiñe hagía wíbirigu hama amu gürigia woun warufuduña derebuguhali lan wafiñen (Mat. 22:37-39).

16. Ka uagu súdinitimabei lubéi adundehani tídangiñeti Bíbülia woun éibutima lederebugudun wafiñen?

 ¹⁶ Liibe-agei dan, seriwiti lúrudu lúnrügü lagunfulirúniwa lidan somu kesi, ánheinti adundehani huuti lun furumiñeguarügü katei. Ligíati, éibutima lederebugudun wafiñen súdinitimabei adundehani tídangiñeti Bíbülia woun. Kei hénpulu, dan le ñǘbürigiña irahüñü, úati gunfuranda hamani dencha lan gamadagua hamá hama hagübüri umadagu ligía mosu lubéi híchugun hagübürigu lúrudu houn lun hóunigiruniña (1 Kor. 15:33). Danti le ederebugudeina liña lan lisaminan irahü, aba lafurendeirun asaminara buidu gabaroungaléi adundehani tídangiñeti Bíbülia, ani ítara liña giñe lafurendeirun anúadiraña lumadagu buidu (aliiha huméi 1 Korintuna 13:11; 14:20). Ítarameme, dan le wararamagun asaminara luagu adundehani tídangiñeti Bíbülia ábatima wagumeserun asaminara ítara kei Bungiu ani gayaraahali wafiñerun luagu ladundehan wasaminan.

17. Ka uagu gayara lubéi wariñagun anihein lan le wemegeirubei wama lun wadügüni le buídubei?

¹⁷ Anihein sun le wemegeirubei wama lun wadügüni le aubei lagundaara Bungiu. Ka uagu wariñagei le? Ladüga ídehati lúrudu luma adundehani tídangiñeti Bíbülia lun “aranseñu wamá lun wadügün sun luwuyeri wadagimanu buiti” (2 Tim. 3:16, 17). Ligíati, anhein busén wabéi wasubudiruni ‘ka lan lugundanbei Heowá’ mosu wáfaagun lun wáluahan adundehani tídangiñeti Bíbülia (Efe. 5:17). Yusu waméi sun burí ídemuei le ichugúbei woun buidu, kei burí Índice de las publicaciones Watch Tower, Adundehani lun haturiahan gefentiña luagu Heowá, programa Watchtower Library, LÍBURU-AGEI LIDAN INTERNET Watchtower luma programa JW Library. Líderagubadiwa sun le lun wasagaruni sun buiti le wayaraati lídangiñe waturiahan wábuguarügü luma hama waduheñu.

18. Ka burí buiti wibihubei dan le úara lan ligaburi wóuserun luma lilurudun Bungiu luma ladundehan?

¹⁸ Weresibiruba saragu abiniruni ánhawa inebenehabu lun lilurudun Heowá luma ladundehan. Ariñagati Sálumu 119:97-100: “Wéiriti línsiñe barufudahan nun! Sun weyu nau asaminara luagun! Nani bugumadin lun súnwandan; chúgüdaali nau hawéi náganiñu. Gunfurandatina sügǘ hau numaisturungu ladüga saminatina saragu luagu bugumadin. Gunfurandatina sügǘ hau wéiyaaña mutu ladüga ñǘdüntina lau barufudahan”. Ánhawa asagara dan lun wasaminarun luagu lilurudun Bungiu luma ladundehan lachúdatimaba wau, buídutimabei wayusuruni wachügü ani laganwounduba wasubudin. Ani ánhawa áfaagua lun úara lan ligaburi wasaminan luma burí katei le wibihiba lun “gürigia wamá wéinamuhaña lidan wéibugun luma Kristu, ladüga waweinamuduba darí wachülürün lumoun lubunwari Kristu” (Efe. 4:13).