1. Oshike sha ningifa ovanhu va kale ve dule oinamwenyo?

OSHINIMA shimwe osho sha ningifa ovanhu va kale va yooloka ko koinamwenyo oshosho kutya ovanhu ova shitwa ve na eliudo. Osho osho sha kala ngaho okudja eshi ovanhu va kala kombada yedu. Konima eshi Adam naEva va nyona omhango yaKalunga, ova li va hondama. Osho otashi ulike kutya eliudo lavo ola li tali va nyenyetele.

2. Omolwashike eliudo letu tali dulu okufaafanifwa nokoompasa? (Tala efano pehovelo loshitukulwa.)

² Ovo eliudo lavo inali deulwa otava dulu okufaafanifwa noshikepa oyo i na okoompasa ya nyonauka, ile tu tye oshilongifo shokuulika eembinga domhepo osho hashi longifwa okuwilika oshikepa, ashike itashi longo nawa. Osha nyika oshiponga okuya molweendo lomefuta ngeenge ku shii apa wa yuka. Omhepo nosho yo omakufikufi otaa dulu okuyukifa oshikepa konhele ya puka. Okoompasa oyo tai longo nawa otai dulu okukwafela omushingi woshikepa a yukife nawa oshikepa kefikilo. Sha faafana, eliudo letu, olo li li oukwatya womeni wokutongola pokati kaasho sha puka naasho shi li mondjila, otali dulu oku tu wilika tu ye nondjila oyo ya yuka. Ndele  opo li tu wilike nawa, oli na okukala la deulwa nawa.

3. Oshike tashi dulu okuningwa po ngeenge eliudo inali deulwa nawa?

³ Ngeenge eliudo lomunhu inali deulwa nawa, ihali mu londwele keenghatu dii. (1 Tim. 4:1, 2) Eliudo la tya ngaho otali dulu nokuli oku tu tomha kutya “owii oo ouwa.” (Jes. 5:20) Jesus okwa londwela ovashikuli vaye a ti: “Omafiku otae uya, keshe ou te mu dipaa, oye e shii ta yandjele Kalunga eyambo.” (Joh. 16:2) Ovo va dipaa omuhongwa Stefanus nosho yo vamwe ovo va li ve va fa ova li ve shii otava yandjele Kalunga eyambo. (Oil. 6:8, 12; 7:54-60) Mondjokonona, ovanhu vahapu momalongelokalunga ova kala hava longo owii, ngaashi okudipaa, nokupopya kutya otave shi ningile Kalunga, ashike paulelalela otava nyono eemhango daYe. (Ex. 20:13) Eliudo lavo ola li le va pukifa.

4. Oshike hatu dulu okuninga po opo eliudo letu li kale tali longo nawa?

⁴ Oshike hatu dulu okuninga po opo eliudo letu li kale tali longo nawa? Eemhango nosho yo omafinamhango oo e li mEendjovo daKalunga oku “shii kulonga nokukumaida nokupukulula nokutekula mouyuki.” (2 Tim. 3:16) Onghee hano, ohatu dulu okudeula eliudo letu li kale metwokumwe nokudiladila kwaKalunga nokukala li li ewiliko li shii okulineekelwa mokukonakona Ombiibeli noukeka, mokudilonga kwaasho tai ti nosho yo okutula moilonga osho twa lesha. Natu ka konakoneni nghee eemhango nosho yo omafinamhango aJehova taa dulu oku tu kwafela tu deule eliudo letu.

5, 6. Ongahelipi hatu mono ouwa mokudulika keemhango daKalunga?

⁵ Opo tu mone ouwa meemhango daKalunga, otwa pumbwa okuninga shihapu shihe fi ashike oku di lesha nokukala tu di shii. Otwa pumbwa okukala tu di hole noku di fimaneka. Eendjovo daKalunga oda ti: “Nye omu nokutonda eshi shii nokuhola eshi shiwa.” (Amos 5:15) Ongahelipi hatu dulu okuninga ngaho? Osho sha fimana, okulihonga okutala ko oinima monghedi omo Jehova he i tale ko. Oku shi faneka: Natu tye nee ngeno iho kofa nawa. Ndokotola woye okwe ku lombwela u kale to li oikulya i na oitungifi, to ningi omalideulo nosho yo u lundulule onghedi yoye yokukalamwenyo. Konima eshi we shi ninga, owa mona kutya oshe ku kwafela. Otashi dulika u pandule ndokotola woye neenghono omolwekwafo olo e ku pa opo u xwepopaleke oukolele woye.

⁶ Sha faafana, Omushiti wetu okwe tu pa eemhango odo tadi dulu oku tu amena koilanduliko youlunde nokuxwepopaleka onghalamwenyo yetu. Diladila kunghee hatu dulu okumona ouwa mokudulika keemhango daKalunga di na sha nokupopya oipupulu, nomauko mai, nokuvaka, noluhaelo, nelongifo leenghono nosho yo noumhulile. (Lesha Omayeletumbulo 6:16-19; Eh. 21:8) Ngeenge otwa mono omanangeko noupuna oo haa di mokuninga oinima monghedi omo Jehova a hala, ohatu ka kulika ohole yokuhola Jehova nosho yo eemhango daye.

7. Okulesha omahokololo Ombiibeli nokudilonga kuo otaku dulu oku tu kwafela tu ninge shike?

⁷ Inatu pumbwa okumona oixuna omolwoilanduliko yokuhadulika keemhango daKalunga opo tu lihonge oilihongomwa ya fimana. Ohatu dulu okulihonga komapuko avamwe ovo omanyono avo a shangwa mEendjovo daKalunga. Omayeletumbulo 1:5 okwa ti: “Omunongo na pwilikine opo a hapupalife eendunge.” Kalunga ohe tu pe ewiliko la denga mbada ngeenge hatu lesha omahokololo Ombiibeli nokudilonga kuo. Pashihopaenenwa, diladila kouyahame oo ohamba David ya li ya mona eshi ya li inai dulika koshipango  shaJehova nosho yo eshi ya haela naBatseba. (2 Sam. 12:7-14) Eshi hatu lesha nokudilonga kehokololo olo, ohatu dulu okulipula kutya: ‘Ongahelipi ohamba David ya li tai dulu okuhenuka oilanduliko inyikifa oluhodi omolwokuhaela naBatseba? Ngeenge onda shakeneke eyeleko la tya ngaho, mbela ohandi dulu ngoo oku li finda? Mbela ohandi ka ya onhapo ngaashi Josef, ile ohandi ke liyandja ngaashi David?’ (Gen. 39:11-15) Ohatu dulu okukala tu ‘tonde osho shii’ ngeenge otwa kala hatu diladila koilanduliko ii youlunde.

8, 9. (a) Eliudo letu ohali tu kwafele tu ninge shike? (b) Omafinamhango aJehova ohaa longele kumwe ngahelipi neliudo letu?

⁸ Otwa pumbwa okuhenuka oinima oyo Kalunga e tonde. Ashike ope na oinima imwe ile eenghalo dimwe omo Ombiibeli inai yandja oshipango shokondadalunde. Meenghalo da tya ngaho, ongahelipi hatu dulu okumona osho sha hokiwa kuJehova naasho tashi mu hafifa? Eliudo letu la deulwa kOmbiibeli otali dulu oku tu kwafela meenghalo da tya ngaho.

⁹ Jehova okwe tu pa pahole omafinamhango oo taa dulu okuwilika eliudo letu. Okwa ti: “Aame Omwene Kalunga koye, ou handi ku longo eshi tashi ku wapalele, ndele handi ku tula mondjila ei u nokweenda nayo.” (Jes. 48:17, 18) Ngeenge otwa diladila moule kombinga yomafinamhango Ombiibeli nokweefa a kume omutima wetu, kungaho ohatu pukulula, hatu wilike nohatu me eliudo letu. Naasho otashi ke tu kwafela tu ninge omatokolo opandunge.

10. Omafinamhango oshike, nongahelipi Jesus a li e a longifa eshi a li ta hongo ovahongwa vaye?

¹⁰ Omafinamhango oshili oyo hai wilike okudiladila kwetu, noku tu kwafela tu ninge omatokolo opandunge. Opo tu ude ko omafinamhango, otwa pumbwa okuuda ko onghedi omo Omuyandjimhango ha diladila nonokutya omolwashike e tu pa eemhango donhumba. Jesus okwa li a honga ovahongwa vaye oshili ya fimana eshi a li ta wanifa po oukalele waye opo e va kwafele va didilike mo oilanduliko yoikala ii ile yeenghatu donhumba. Pashihopaenenwa, okwa li a honga kutya onghone otai dulu okweetifa elongifo leenghono nonokutya okahalu koipala otaka dulu okweetifa oluhaelo. (Mat. 5:21, 22, 27, 28) Opo tu kale tu na eliudo la deulwa nawa, otwa pumbwa okweefa omafinamhango aKalunga e tu wilike nokungaho ohatu ke mu fimanekifa. — 1 Kor. 10:31.

11. Ongahelipi eliudo laumwe tali dulu okukala la yooloka ko ku lamukwao?

¹¹ Ovakriste vavali ovo ve na eliudo la deulwa kOmbiibeli otashi dulika va fike pexulifodiladilo la yoolokafana moshinima shonhumba. Diladila kombinga yokulongifa oikunwa yoikolwifa. Ombiibeli inai tokola elongifo nawa loikolwifa. Ndele oya londwela shi na nokulongifa nai oikolwifa nosho yo oukolwe. (Omayel. 20:1; 1 Tim. 3:8) Ndele mbela osho osha hala okutya shimha ashike Omukriste ta longifa nawa oikolwifa ke na vali okudiladila kombinga yoinima imwe? Hasho nandenande. Nonande otashi dulika eliudo lOmukriste itali mu nyenyetele, oku na yo okukaleka momadiladilo eliudo lavamwe.

12. Ongahelipi eendjovo odo tadi hangwa mOvaroma 14:21 tadi tu linyengifa tu fimaneke eliudo lavamwe?

¹² Paulus okwa ulika kutya otu na okuyavelela eliudo lavamwe, eshi a shanga a ti: “Oshiwa okukala iho li ombelela noiho nu omaviinyu, ndele ho lidilike keshe eshi tashi tondifa omumwaxo, tashi mu pundukifa ile tashi mu fifa oungone.” (Rom. 14:21) Mbela oto ka kala ngoo wa hala okuhenuka oshinima shonhumba nonande ou na oufemba woku shi ninga opo u henuke okupundukifa omumwatate oo eliudo laye la yooloka ko kuloye? Kape na omalimbililo oto ke shi ninga. Ofimbo ovamwatate vamwe inava shiiva oshili, ova li nale hava longifa nai oikolwifa,  ashike paife ova tokola vehe i longife vali. Inatu hala nande okuningifa omumwatate a shune konghedindjikilile yaye yonale. (1 Kor. 6:9, 10) Onghee, itashi ka kala pandunge okufininika omumwatate a nwe oikolwifa ngeenge okwa tokola ehe i nwe.

13. Ongahelipi Timoteus a tula po oshihopaenenwa shiwa mokupitifa komesho Ouhamba?

¹³ Eshi Timoteus a li e na omido omulongo nasha ile omilongo mbali nasha, okwa li a pita etanda opo a henuke okupundukifa Ovajuda ovo a li ta ka udifila. Okwa li e na eenghedi da faafana naado domuyapostoli Paulus. (Oil. 16:3; 1 Kor. 9:19-23) Mbela owa hala okuninga omaliyambo opaumwene ngaashi Timoteus omolwouwa wavamwe?

14, 15. (a) Oshike sha kwatelwa mo mokulalakanena oukulunhu wopamhepo? (b) Omonghedi ilipi ohole yokuhola vamwe ya pambafana noukulunhu wopamhepo?

¹⁴ Ovakriste aveshe ova pumbwa ‘okweefa omahovelolongo aKristus, nokulalakanena oukulunhu.’ (Heb. 6:1) Ndele osho ihashi uya ashike ngahenya. Otwa pumbwa ‘okulalakanena,’ ile tu twikile okuninga eenghendabala opo tu kule pamhepo. Opo tu kule pamhepo, otwa pumbwa okutwikila okukulika eshiivo letu nosho yo eudeko letu. Nomolwaasho hatu ladipikwa lwoikando tu leshe Ombiibeli efiku keshe. (Eps. 1:1-3) Mbela owe litulila po nale elalakano la tya ngaho? Okulesha Ombiibeli otaku dulu oku ku kwafela u ude ko nawa eemhango nomafinamhango aJehova nosho yo u kale u na eudeko lomoule lEendjovo daye.

¹⁵ Omhango ya denga mbada kOvakriste aveshe oyo omhango yohole. Jesus okwa li a lombwela ovahongwa vaye a ti: “Opo tuu opo aveshe tave mu koneke kutya, nye ovalongwa vange, ngeenge mu holafane.” (Joh. 13:35) Jakob, omumwaina waJesus, okwa ti ohole oi li “omhango onghwahamba.” (Jak. 2:8) Paulus okwa ti: “Ohole oyo ewanifo lomhango.” ( Rom. 13:10) Itashi tu kumwifa eshi ohole ya fimana, molwaashi Ombiibeli otai tu lombwele kutya ‘Kalunga oye ohole.’ (1 Joh. 4:8) Ohole yaKalunga ihai hololwa ashike komaliudo. Johannes okwa shanga a ti: “Omo tuu omo ohole yaKalunga ye tu hololelwa, Kalunga eshi a tuma Omona waye Ewifa mounyuni, opo tu kale tu nomwenyo muye.” (1 Joh. 4:9) Ohole yaKalunga ohai mu linyengifa a katuke eenghatu. Ngeenge hatu ulike kutya otu hole Jehova, Omona waye,  ovamwatate meitavelo nosho yo ovanhu vakwetu, ohatu ulike kutya otwa pyokoka pamhepo. — Mat. 22:37-39.

16. Omolwashike omafinamhango haa kala a fimana unene kufye eshi hatu ningi exumokomesho lopamhepo?

¹⁶ Eshi to ende to kulu pamhepo, oto ka mona kutya omafinamhango okwa fimana kwoove. Eemhango ohadi longo koinima yokondadalunde, ofimbo omafinamhango haa longo meenghalo da yoolokafana. Pashihopaenenwa, okaana ka ke shii owii oo hau di mokweendafana nookaume vai, onghee omudali omunaendunge oku na oku ka tulila po eemhango odo tadi ka amene. (1 Kor. 15:33) Ndele eshi okaana taka ende taka kulu, oha ke lihongo okutomhafana taka longifa omafinamhango Ombiibeli. Kungaho, otaka dulu okuninga omatokolo opandunge eshi taka hoolola ookaume. (Lesha 1 Ovakorinto 13:11; 14:20.) Ngeenge otwa kala hatu tomhafana nomafinamhango opakalunga, eliudo letu otali ke tu wilika nawa tuha amuke ko kuKalunga.

17. Omolwashike hatu dulu kutya otu na osho twa pumbwa opo tu ninge omatokolo opandunge?

¹⁷ Mbela otu na keshe shimwe osho twa pumbwa opo tu ninge omatokolo oo taa hafifa Jehova? Heeno. Ngeenge ohatu tula moilonga eemhango nomafinamhango oo taa hangwa mEendjovo daKalunga, ohatu ka kala ‘twa wana notwa wanenena oshilonga keshe shiwa.’ (2 Tim. 3:16, 17) Onghee hano, otwa pumbwa okukonga omafinamhango opaMbiibeli opo tu ‘shiive kutya ehalo lOmwene olilipi.’ (Ef. 5:17) Otwa pumbwa okulongifa nawa oilongifo oyo hatu pewa okupitila meongalo lopaKriste, ngaashi o-Watch Tower Publications Index, o-Research Guide for Jehovah’s Witnesses, o-Watchtower Library, ONGULUMAMBO YOKOINTANETA, nosho yo o-JW Library app. Oilongifo oyo oya nuninwa oku tu kwafela tu lihonge shihapu pekonakono lopaumwene nosho yo loukwaneumbo.

18. Omanangeko noupuna elipi haa di mokudulika keemhango nokomafinamhango aJehova?

¹⁸ Omanangeko noupuna ohaa di mokudulika keemhango nokomafinamhango aJehova, ngaashi Epsalme 119:97-100, olo la ti: “Omhango yoye ondi i hole shi fike peni! Efiku alishe ohandi i dilonga. Oipango yoye otai nongopaleke nge, ndi dule ovatondi vange ounongo, osheshi oyo oyange fiyo alushe. Ovalongi vange aveshe ondi va dule eendunge, osheshi omahepaululo oye oo omadiladilo ange. Ondi dule ovaxungu omayele, osheshi ohandi diinine omalombwelo oye.” Ngeenge otwa kala hatu “dilonga” keemhango nokomafinamhango aKalunga, ohatu ka katuka pandunge nohatu ka kala tu na eudeko lomoule. Ngeenge otwa ningi eenghendabala da mana mo opo ‘tu kule, tu fike kewano louyadi waKristus,’ ohatu efa eliudo letu li deulwe keemhango nokomafinamhango aKalunga. — Ef. 4:13.