1. Bantu mbapite nyama ku tshinyi?

BANTU mbapite nyama bualu badi ne kondo ka muoyo. Yehowa uvua mufuke muntu ne kondo ka muoyo. Adama ne Eve bamane kushipa mukenji wa Yehowa, bakasokoma. Bualu ebu budi buleja ne: kondo kabu ka muoyo kavua kabalumbuluisha.

2. Kondo ka muoyo nkafuanangane ne volan ku tshinyi? (Tangila tshimfuanyi tshia ntuadijilu tshia tshiena-bualu.)

² Bantu badi kabayi ne kondo ka muoyo kalongesha bimpe badi anu bu mazuwa adi enda pa mâyi mikale ne yende anyi volan munyanguke. Kuenza luendu mu mazuwa a nunku nkubi be! Mpepele ne muenji wa mâyi bidi mua kuatuma kua tshianana bipepele. Kadi volan yeye muimpe, udi mua kuambuluisha muendeshi wa mazuwa bua kualudika bimpe pa mâyi. Kondo ka muoyo mbukole budi munda muetu budi butuleja tshidi tshimpe ne tshidi tshibi budi mua kutulombola mu njila muimpe. Nkafuanangane ne volan. Bua koku kutulombola bimpe, tudi ne bua kukalongesha bimpe.

3. Kondo ka muoyo kadi kakayi kalongesha bimpe kadi mua kufikisha muntu ku dienza tshinyi?

³ Kondo ka muoyo kadi kakayi kalongesha bimpe, kakena mua  kukanda muntu bua kuenza malu mabi to. (1 Tim. 4:1, 2) Kondo ka muoyo ka nunku kadi mua kufikisha muntu ku diangata “bualu bubi ne: mbuimpe.” (Yesh. 5:20) Yezu wakadimuija bayidi bende ne: “Dîba didi dilua dikala muntu yonso udi unushipa wela meji ne: mmuenzele Nzambi mudimu wa tshijila.” (Yone 16:2) Ke muvua bantu bavua bashipe Stefano bela meji, ne ke mudi bakuabu bela meji anu bu bobu. (Bien. 6:8, 12; 7:54-60) Katshia ku kale, bena mu bitendelelu bia bungi mbenze malu mabi a dikema, bu mudi dishipa bantu bakuabu, bamba muvuabu baenza bua Nzambi. Kadi mu bulelela, bavua bashipa mikenji ya Nzambi. (Ekes. 20:13) Bushuwa, kondo kabu ka muoyo kadi kabadinga!

4. Ntshinyi tshitudi mua kuenza bua kondo ketu ka muoyo katulombole bimpe?

⁴ Ntshinyi tshitudi mua kuenza bua kondo ketu ka muoyo katulombole bimpe? Mikenji ne mêyi manene bidi mu Dîyi dia Nzambi bidi ‘biambuluisha bua kulongesha, bua kubela, bua kululamija malu, bua kunyoka mu buakane.’ (2 Tim. 3:16) Patudi tulonga Dîyi dia Nzambi bikole, tuelangana meji a malu adimu, ne tuatumikila, tudi tulongesha kondo ketu ka muoyo bua kikale kalonda meji a Nzambi, nunku nekatulombole bimpe. Tumonayi mudi mikenji ya Yehowa ne mêyi ende manene mua kutuambuluisha bua kulongesha kondo ketu ka muoyo.

5, 6. Mmunyi mudi ditumikila mikenji ya Nzambi dituambuluisha?

⁵ Bua mikenji ya Nzambi kutuambuluisha, kabiena bikengela anu kuyibala anyi kuyimanya patupu to. Tudi ne bua kuyinanga ne kuyitumikila. Dîyi dia Nzambi didi diamba ne: “Kinayi malu mabi, nangayi malu mimpe.” (Amo. 5:15) Mmunyi mutudi mua kuenza nunku? Bualu bunene butudi mua kuenza nkulonga mua kumona malu mudi Yehowa uamona. Fuanyikijabi ne: mbikukolele bua kumona tulu. Doktere udi ukufundila amue malu a kulonda bu mudi kudia biakudia bidi bimpe, kuibidija mubidi, ne kushintulula bimue bibidilu. Mpindieu dilonda malu aa ndikuambuluishe bua kumona tulu! Kakuyi mpata, newikale ne dianyisha dia bungi kudi doktere au bua mudiye mukuambuluishe.

⁶ Bia muomumue, Mufuki wetu mmutuelele mikenji idi itukuba ku ntatu idi kuenza mpekatu kukebesha bua tuikale ne nsombelu muimpe. Anji elabi meji bua mudi kutumikila mibelu ya mu Bible kutuambuluisha mu malu bu mudi dishima, dilukakaja meji mabi, masandi, tshikisu, ne malu a mîdima. (Bala Nsumuinu 6:16-19; Buak. 21:8) Patudi tupeta masanka bua mutudi tuenza malu mudi Yehowa musue, tudi tumunanga yeye ne mikenji yende bikole ne tumuanyisha.

7. Kubala malu avua bantu benze adi mu Bible ne kuelela meji kudi mua kutuambuluisha bua kuenza tshinyi?

⁷ Diakalenga, kabiena bikengela bua tuetu kuanji kupeta bipeta bibi bia dibenga kutumikila mikenji ya Nzambi bua tushishe kupeta kalasa to. Bilema bivua bantu bakuabu benze bidi bifunda mu Dîyi dia Nzambi bidi bituambuluisha bua kutapa ntala kudimuka. Nsumuinu 1:5 udi wamba ne: “Muena meji udi uteleja ne udi upeta malongesha.” Bushuwa, tudi tupetela malongesha matambe buimpe kudi Nzambi patudi tubala malu avua bantu benze adi mu Bible. Difuanyikijilabi kanyinganyinga kavua mukalenge Davidi mumvue pavuaye mubenge kutumikila mukenji wa Yehowa ne muende masandi ne Beta-sheba. (2 Sam. 12:7-14) Patudi tuenda tubala muyuki eu ne tuwelela meji, tudi mua kudiebeja ne: ‘Ntshinyi tshivua mukalenge Davidi mua kuikala muenze bua kuepuka ntatu ivuaye mupete bua dienda masandi  ne Beta-sheba? Meme mutuilangane ne diteta dia buena adi, nenkokeshe bua kudinyema anyi? Nenyeme bu Jozefe anyi nenkuluke bu Davidi?’ (Gen. 39:11-15) Patudi tuela meji ku bipeta bibi bia mpekatu, tudi tupeta bukole bua ‘kukina malu mabi.’

8, 9. a) Kondo ketu ka muoyo kadi katuambuluisha bua kuenza tshinyi? b) Mmunyi mudi mêyi manene a Yehowa alombola kondo ketu ka muoyo?

⁸ Tudi mua kubenga kuenza malu adi Nzambi mukine. Kadi kudi malu anyi nsombelu mikuabu idi Bible kayi muleje patoke tshia kuenza to. Mu nsombelu eyi, mmunyi mutudi mua kujadika tshidi Nzambi wanyisha? Ke muaba udi kondo ka muoyo kalongesha kudi Bible kabuelela mu tshialu au.

⁹ Bua dinanga, Yehowa mmutupeshe mêyi manene bua alombole kondo ketu ka muoyo. Yeye nkayende udi wamba ne: “Meme, Yehowa, ndi Nzambi webe, Yeye udi ukulongesha bua diakalenga diebe, Yeye udi ukulombola mu njila uudi ne bua kuendela.” (Yesh. 48:17, 18) Patudi tuelangana meji a mêyi manene a mu Bible, tudi tuakaja kondo ketu ka muoyo, tukaludika, ne tukafumba. Kuenza nanku kudi kutuambuluisha bua kuangata mapangadika mimpe.

10. Mêyi manene ntshinyi? Mmunyi muvua Yezu muenze nawu mudimu bua kulongesha bantu?

¹⁰ Mêyi manene mmalu malelela a nshindamenu anyi mmalongesha manene adi atulombola bua kuela meji bimpe ne kuangata mapangadika mimpe. Kumanya tshidi mêyi manene kudi kukongoloja kumvua meji a Muedi wa mikenji ne tshidiye muyelele. Pavua Yezu pa buloba, wakalongesha malu malelela a nshindamenu bua kuambuluisha bayidi bende bua bajingulule bipeta bia imue ngelelu ya meji anyi bia bimue bienzedi. Tshilejilu, wakalongesha ne: dilaminangana munda didi mua kufikisha ku tshikisu, ne dialakana didi mua kufikisha ku dienda masandi. (Mat. 5:21, 22, 27, 28) Tudi ne bua kulekela mêyi manene a Nzambi atulombola bua tuikale ne kondo ka muoyo kalongesha bimpe, nunku netutumbishe Nzambi.​—1 Kol. 10:31.

11. Mmunyi mudi kondo ka muoyo ka muntu mua kushilangana ne ka mukuabu?

¹¹ Mu amue malu, bena Kristo babidi badi ne kondo ka muoyo kalongesha kudi Bible badi mua kuangata mapangadika mashilangane. Tuangate tshilejilu tshia dinua maluvu. Bible ki mmukandike kunua maluvu pa nnuinu to. Kadi udi ukandika kunua kupitshisha ne kukuatshika. (Nsu. 20:1; 1 Tim. 3:8) Bidiku bileja ne: muena Kristo kena ne malu makuabu adiye ne bua kutabalela anu bualu udi unua maluvu pa nnuinu anyi? Tòo. Nansha mudi kondo kende ka muoyo kakayi pamuapa kamulumbuluisha, udi ne bua kunemeka kondo ka muoyo ka bakuabu.

12. Mmunyi mudi Lomo 14:21 utusaka bua kunemeka kondo ka muoyo ka bakuabu?

¹² Paulo wakaleja mudibi bikengela bua muena Kristo anemeke kondo ka muoyo ka bakuabu, wamba ne: “Mbitambe buimpe bua kubenga kudia munyinyi anyi kunua mvinyo anyi kuenza bualu buonso bukuabu budi bulenduisha muanenu.” (Lomo 14:21) Newitabaku bua kulekela malu audi ne bukenji bua kuenza adi mua kulenduisha muena Kristo nebe udi ne kondo ka muoyo kashilangane ne kebe anyi? Kakuyi mpata ke tshiwenza. Bamue bena Kristo netu bavua bakanuayi kumpala kua kumanyabu bulelela, kadi lelu mbadisuike bua kulekela maluvu. Bushuwa, kakuena muntu wa kutudi udi mua kujinga bua kupingaja muanetu wa nunku mu tshikadilu tshiende tshia kale tshidi mua kumufikisha kubi menemene to! (1 Kol. 6:9, 10) Nunku, kusumisha bua muena Kristo netu utudi babikile kuetu anue maluvu padiye kayi musue kuanua, kakuena kuleja mutudi bamunange to.

13. Ntshilejilu kayi tshimpe tshidi Timote mutushile tshia dituma malu a Bukalenge kumpala?

 ¹³ Pamuapa patshivua nsonga Timote ne bidimu bitue ku 20 anyi bipite apu, wakitaba bua bamutengule nansha muvuabi mua kumusama bikole, anu bua kubenga kulenduisha bena Yuda bavuaye ne bua kuyisha. Uvua ne meji a buena a mupostolo Paulo. (Bien. 16:3; 1 Kol. 9:19-23) Anu bu Timote, udiku witaba bua kudipangisha amue malu bua diakalenga dia bakuabu anyi?

14, 15. a) Kukola mu nyuma kudi kulomba tshinyi? b) Mmunyi mudi bena Kristo bakole mu nyuma benzela bakuabu malu?

¹⁴ Bena Kristo bonso badi ne bua ‘kushiya malongesha a ntuadijilu adi atangila Kristo panyima, baya batangile ku dikola.’ (Eb. 6:1) Kadi kabiena bidienzekela to. Tudi ne bua ‘kuya batangile ku dikola,’ anyi kutungunuka ne kudienzeja bua kukola. Kukola mu nyuma kudi kulomba kutungunuka ne kuvudija dimanya ne kupeta busunguluji bua bungi. Ke bualu kayi batu batukankamija misangu yonso bua kubala Bible dituku dionso. (Mis. 1:1-3) Ukadi mudifundile tshipatshila atshi anyi? Kubala Bible dituku dionso kudi mua kukuambuluisha bua kumvua mikenji ya Yehowa ne mêyi ende manene bimpe menemene ne kumvua Dîyi diende mu buondoke.

¹⁵ Mukenji mutambe bunene wa bena Kristo mmukenji wa kunangangana. Yezu wakambila bayidi bende ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.” (Yone 13:35) Yakobo, muanabu ne Yezu, wakabikila dinanga ne: “mukenji wa bumfumu.” (Yak. 2:8) Paulo pende wakamba ne: “Dinanga ndikumbajibua dia mikenji.” (Lomo 13:10) Kabiena bikemesha bua mudi Bible wela kashonyi pa dinanga to, bualu “Nzambi udi dinanga.” (1 Yone 4:8) Nzambi kena umvua anu patupu ne: mmutunange to. Yone wakafunda ne: “Mu bualu ebu dinanga dia Nzambi diakamueneshibua bua bualu buetu, ne: Nzambi wakatuma Muanende mulela umuepele pa buloba bua tupete muoyo ku butuangaji buende.” (1 Yone 4:9) Eyowa, dinanga dia Nzambi diakamusaka bua kuenza bualu kampanda. Patudi tuleja mutudi banange Yehowa ne muanende, banange bena Kristo netu, ne bantu bakuabu, tudi tuleja mutudi bakole mu nyuma.​—Mat. 22:37-39.

16. Bua tshinyi patudi tuenda tukola mu nyuma, netumone mudi mêyi manene a mu Bible alua ne mushinga wa bungi kutudi?

 ¹⁶ Paudi wenda ukola mu nyuma, neumone mudi mêyi manene a mu Bible alua ne mushinga wa bungi kuudi. Bidi nanku bualu mikenji idi itangila nsombelu musunguluke, kadi mêyi manene adi atangila nsombelu ya bungi. Tshilejilu, muana mutekete ki mmumanye njiwu ya kuikala ne balunda babi to, nunku muledi wa meji udi umuelela mikenji bua kumukuba. (1 Kol. 15:33) Kadi padiye wenda ukola, udi utuadija kunana lungenyi bikole, nunku udi ukumbana bua kuelangana meji bua mêyi manene a mu Bible. Dîba adi, neasungule balunda bimpe. (Bala 1 Kolinto 13:11; 14:20.) Patudi tuelangana meji a mêyi manene a Nzambi, kondo ketu ka muoyo nekikale katulombola bimpe mu diumvuangana ne meji a Nzambi.

17. Bua tshinyi tudi mua kuamba ne: tudi ne bintu bidi bikengedibua bua kuangata mapangadika mimpe?

¹⁷ Tudiku ne bionso bidi bikengedibua bua kuangata mapangadika adi mua kusankisha Yehowa anyi? Eyowa. Mu Bible mudi mikenji ne mêyi manene bidi mua kutuambuluisha bua kuikala ‘bakumbane menemene, bikale ne bionso bidi bikengedibua bua mudimu wonso muimpe.’ (2 Tim. 3:16, 17) Nunku, enza makebulula bua kupeta mêyi manene adi mu Bible bua “kujingulula tshidi disua dia Yehowa.” (Ef. 5:17) Enza mudimu bimpe ne bintu bia kulonga nabi bidi bulongolodi buetu bupatule bu mudi Index des publications des Témoins de Jéhovah, Mukanda wa makebulula wa Bantemu ba Yehowa, programe wa Watchtower Library ne wa JW Library, ne TSHIBUTSHILU TSHIA MIKANDA TSHIA KU ENTERNETE. Bintu ebi mbienza bua kutuambuluisha bua kudilongela bimpe pa nkayetu anyi mu dîku.

18. Mmasanka kayi atudi tupeta patudi tuenza malu mu diumvuangana ne mikenji ya Yehowa ne mêyi ende manene?

¹⁸ Patudi tutumikila mikenji ya Yehowa ne mêyi ende manene, tudi tupeta masanka. Misambu 119:97-100 udi wamba ne: “Ndi munange mikenji yebe be! Ndi ngelangana meji ayi dituku dijima. Dîyi diebe didi dimvuija muena meji kupita bena lukuna banyi, bualu diodi didi nanyi kashidi. Ndi ne busunguluji bua bungi kupita balongeshi banyi bonso, bualu ndi ngelangana meji a mavuluija ebe. Ndi ngenza malu ne dijingulula dia malu dia bungi kupita bantu bakulumpe, bualu meme ndi ntumikila mêyi ebe matuma.” Netutambe kuenza malu ne meji, ne busunguluji, ne dijingulula dia malu, tuetu ‘tuelangana meji a’ mikenji ya Nzambi ne a mêyi ende manene. Tuetu tudienzeja bikole, tudi mua kufika ku “tshipiminu tshia dikola tshia tshiuwidi tshia Kristo” bualu tudi tuenza bua mikenji ya Nzambi ne mêyi ende manene bilongeshe kondo ketu ka muoyo.​—Ef. 4:13.