1. Chumanyi chaletesha antu kwambuka nawatunyama?

CHUMA chimu chaleteshaña antu kwikala ambuka chikupu nawatunyama, muloña antu ayileña nachinleji. Chumichi chinamwekani hatooka kufuma tuhu mpinji yamuleñeliwu muntu. Chelili aAdama naEva afumpi lushimbi lwaYehova, aswamini. Chumichi chamwekeshaña nawu chinleji chawu chayikabishileña.

2. Chinleji chetu tunateli kuchesekeja ñahi nakampasi? (Talenu mwevulu wakutachikilahu.)

² Antu abulaña kudizisha chinleji chawu tunateli kuyesekeja nambopolu yikweti kampasi kafwa. Kwenda lwendu nakampasi kafwa munateli kufuma wubanji. Mpepela nimankanda ahakaluñalwiji anateli kutwala mbopolu kwacheñi. Kampasi kanakuzata chiwahi kanateli kukwasha ñendeshi wambopolu kwenda chiwahi nakuya kwiluña kunakuyayi. Chinleji chetu tunateli kuchesekeja nakampasi kamuyitoñojoka yetu. Himaana akwiluka nachu yayiwahi niyatama anateli kutulombola munjila yaloña. Ilaña hakwila nawu chinleji chetu chizatikeña chiwahi, chatela kwikala chadizishewa hela chakufumba chiwahi.

3. Yumanyi yafumañamu neyi chinleji chakudizisha chiwahi wanyi?

 ³ Neyi chinleji chamuntu chakudizisha chiwahi wanyi, hichinateli kumukwasha kutondolwela yuma yatamaku. (1 Tim. 4:1, 2) Chinleji chamuchidiwu chinateli kutuleja yuma “yatama nawu yayiwahi.” (Isa. 5:20) Yesu wayisoñamishili akwakumulondela nindi: “Mpinji yinakwinza hakatoñojokawu antu ejima ayijahaña nawu amuzatilaña Nzambi mudimu wajila.” (Yow. 16:2) Chumichi chamwekeni kudi antu amujahili kambanji Stefwanu, nawa chamwekeni cheñi nikudi wena. (Yilw. 6:8, 12; 7:54-60) Awa akwansakililu afumpileña nshimbi yaMuntu iyelileñawu nawu adifukwileñaku kuhitila mukwila yuma yatama yidi neyi kujahañana. (Kwid. 20:13) Mwamweni, yinleji yawu diyayidimbaña!

4. Tunateli kukiña ñahi chinleji chetu kulonda chibuli kufwa?

⁴ Tunateli kukiña ñahi chinleji chetu kulonda chibuli kufwa? Nshimbi niyishina yekala Mwizu daNzambi “yawahila kudizisha nachu, kuzuwila nachu, kwolola nachu, nikubabesha nachu munjila yakuloña.” (2 Tim. 3:16) Dichi, kuhitila mukudiza Bayibolu mafuku ejima, kutoñojoka chikupu chiyahosha nikuyizatisha muchihandilu chetu, kunateli kudizisha chinleji chetu kulonda chitukwasheña kutoñojoka neyi chatoñojokañayi Nzambi nawa chitulomboleña. Tushinshikenu nshimbi niyishina yaYehova chiyinateli kutukwasha kudizisha chinleji chetu.

5, 6. Yumanyi yayiwahi yafumaña mukulondela nshimbi jaNzambi?

⁵ Hakwila nawu nshimbi jaNzambi jitukwashi, Bayi tukuminaña hohu dakujitaña nikujilukaku. Twatela kujikeña nikujilemesha. Izu daNzambi dahosha nawu: “Helenu yatama, mukeñi yayiwahi.” (Amosa 5:15) Hanu dinu tunateli kwila ñahi mwenimu? Twatela kumona yuma neyi chayimonañayi Yehova. Chakutalilahu: Fwikijenu munakukamaña wanyi. Ndotolu yayileja nindi mudeña yakuda yayiwahi, kwolola mujimba nikuhimpa yuma yimu muchihandilu. Hanyima yakulondela yuma yinayilejiyi ndotolu, nawa mumona nenu yinazatiki, chakadi nikujina mukumusakilila ndotolu hakuyikwasha kuwahishaku chihandilu chenu.

⁶ Munjila yoyimu, Nleñi yetu watwinka nshimbi jinateli kutukiña kuyuma yinateli kutuluwañesha yafumaña kunshidi nawa yinateli kuwahishaku chihandilu chetu. Toñojokenu yuma yayiwahi yafumaña mukulondela nshimbi yamuBayibolu yahosha hakutwamba, kufwila yatama, wukombi, yilwilu yawuvumbi, madombu nikupanda.(Tañenu Yishimu 6:16-19; Chim. 21:8 ) Neyi tumona yuma yayiwahi yafumaña mukwila yuma yakeñañayi Yehova twaswejaña kumukeña Yehova ninshimbi jindi.

7. Kutaña nikutoñojoka hansañu yawantu ashimunawu muBayibolu kunateli kutukwasha kwiladi?

⁷ Tunakukeña wanyi kumona kukala kwafumaña mukufumpa nshimbi jaNzambi kulonda tudiziliku. Twatela kudizila kudi antu aluwañesheli asonekawu nshidi yawu Mwizu daNzambi. Yishimu 1:5 yahosha nawu: “Mukwamaana atiyi, asweji kudiza.” Mwamweni, twatambwilaña kufumba kwakuwahi kufuma kudi Nzambi, neyi tutaña nikutoñojoka nsañu yawantu ashimunawu muBayibolu. Chakutalilahu, toñojokenu chichamukatili Mwanta Davidi chafumpiliyi nshimbi jaYehova nakwila wuvumbi naBatisheba. (2 Sam. 12:7-14) Hampinji yitunakutaña nikutoñojoka haniyi nsañu, twatela kudihula netu: ‘Mwanta Davidi wadi kutondolwela ñahi kutiya kutama kwatiyiliyi hamuloña wakwila wuvumbi naBatisheba? Neyi yami namweni kweseka  kwamuchidiwu, nadi kwikala nañovu yakutondolwela kukoña nshidi? Nadi kutemuka neyi cheliliyi Yosefu tahindi nadi kukoña nshidi neyi cheliliyi Davidi?’ (Kutach. 39:11-15) Neyi tutoñojoka hayuma yatama yafumaña mukwila nshidi, tukudikasa mumuchima wetu ‘nakuhela yatama.’

8, 9. (a) Chinleji chetu chazataña mudimwinyi? (b) Yishina yaYehova nichinleji chetu jazatilaña ñahi hamu?

⁸ Tunateli tuhu kubula kwila yuma yahelayi Nzambi. Ilaña, kudi yuma yikwawu yamuchihandilu yabula kushaku nshimbi yamuNsona yitwatela kulondela. Muyuma yamuchidiwu, tunateli kwiluka ñahi yuma yetejayi Nzambi nawa yamutiyishaña kuwaha? Hayuma yamuchidiwu dihakeñekaña kuzatisha chinleji chetu chadizishewa naBayibolu.

⁹ Yehova watwinka yishina yazatilaña hamu nachinleji chetu chadizishewa naBayibolu. Yomweni wahosha nindi: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi.” (Isa. 48:17, 18) Twafumbaña, kuyuula nikuwumba chinleji chetu kuhitila mukuzatisha yitoñojoka nimuchima wetu kutoñojoka hayishina yamuBayibolu. Chumichi nichena chatukwashaña kufuukula mwamaana.

10. Yishina hiyumanyi, nawa Yesu wayizatishileña ñahi chiwahi?

¹⁰ Chishina hichuma hashindamena chikuma chalala chalema hela ntañishilu yazatikaña hashindamena kutoñojoka hela chuma chatukwashaña kufuukula mwamaana. Kutiyishisha mwatalisha chishina mwabombela kwiluka chatoñojokañayi Mukwakuhana nshimbi nikwiluka chuma chacheni chaletesha yahani nshimbi. Mumudimu windi wakushimwina wejima, Yesu wadizishileña chalala chapela kulonda yakwashi atumbanji twindi kwiluka kukala kwafumaña muyilwilu yikwawu hela mukwila yuma. Chakutalilahu, wadizishili nindi ndulu yinateli kuleta ndombu nawa kufwila yuma yatama kunateli kuleñela muntu kwila wuvumbi. (Mat. 5:21, 22, 27, 28) Hakwila nawu twikali nachinleji chakudizisha chiwahi, twatela kwiteja yishina yaNzambi kutulombola nawa chumichi chikuletesha kumulemesha Nzambi.—1 Kor. 10:31.

11. Yinleji yinateli kwambuka ñahi?

¹¹ Hansañu jikwawu, akwaKristu ayedi akweti yinleji yadizishewa naBayibolu anatela kukunkulula mwambuka. Shinshikenu hakunwa walwa. Bayibolu yakaanisha wanyi kunwa walwa nakwesekeja. Ilaña yakaanisha kusweja kunwa nikusheta. (Yish. 20:1; 1 Tim. 3:8) Komana chinatalishi mukwila nawu mukwaKristu nateli kushinshikahu wanyi yuma yikwawu chakala hohu nakunwa walwa mukwesekeja? Hichinatalishi imuku. Hela chakwila chinleji chindi chikumukabisha wanyi, mukwaKristu watela kutoñojokelaku yinleji yawakwawu.

12. Mazu ekala haAroma 14:21 anateli kutukwasha ñahi kulemesha yinleji yawakwetu?

¹² Pawulu wasonekeli kutalisha hadi mukwaKristu kutoñojokelaku yinleji yawakwawu nindi: “Chikuwaha eyi kubula kuda mbiji hela kunwa vinyu hela kukoña chuma chidi chejima chikuhukesha manakweyi.” (Rom. 14:21) Komana mukuleka kwila chuma chimunamoni nenu chidi chiwahi kuchila muloña wakutondolwela kuhukesha chinleji chamanakwenu chinambuki nachinleji chenu? Dichuma chimunateli kwila. Amanakwetu amakwawu henohu kanda adizi chalala adiña nakunwa walwa chatama, ilaña ichi aleka dehi kunwa. Kwosi hakachi ketu wukukeña nindi manakwetu yatachiki kwila chuma chalekayi dehi chikumuletela kukalaku. (1 Kor. 6:9, 10) Dichi, hikumwekesha kukeña wanyi  neyi manakwetu yamukanjikija mukwawu wunenzi kwitala dindi kunwa walwa neyi nakukeña wanyi.

13. Timotewu wamwekesheli ñahi chitunateli kutwala Wanta hambidi?

¹³ Timotewu hadiñayi nayaaka yakukumishaku yawukampululu hela yaaka 20, wetejeli kumwalamisha kuchina kuhukesha aYudeya ayileñayi nakushimwina. Wadiña nayilwilu neyi yakapostolu Pawulu. (Yilw. 16:3; 1 Kor. 9:19-23) Kufwana Timotewu, munakufwila kudihana kulonda mwileña yuma yikutiyishaña akwenu kuwaha?

14, 15. (a) Yumanyi yabombela mukupama? (b) Munjilanyi kumwekesha kukeña mukwendelaña hamu nakupama kwawakwaKristu?

¹⁴ AkwaKristu ejima chelukawu “ntañishilu yatachi yahosha hadi Kristu” atela ‘kufwila kupaminaku.’ (Heb. 6:1) Chumichi hichadinjilaña chacheniku. Twatela ‘kuchifwila’ hela kuzata nañovu. Kupaminaku kwabombelamu kusweja kwiluka nikashinshi. Dichuma chacheni chatukonkomwenañawu kutwalekahu kutaña Bayibolu mafuku ejima. (Mas. 1:1-3) Komana dichimwafwilaña? Neyi mutañaña Bayibolu mafuku ejima chikuyikwasha kwikala nakashinshi kakwiluka nshimbi jaYehova, yishina nikwiluka chikupu Izu daNzambi.

¹⁵ Lushimbi lwasweja kulema hadi akwaKristu hilushimbi lwakukeña. Yesu walejeli atumbanji twindi nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:35) ManakwaYesu wakuwanamu Yakoba wateneni kukeña nindi “lushimbi lwawanta.” (Yak. 2:8) Pawulu wahosheli nindi: “Kukeña dikwashikijaña nshimbi.” (Rom. 13:10) Hitunateli kuhayama nanichi chakonkomweneniwu hakukeñaku, muloña Bayibolu yatulejaña nawu “Nzambi hikukeña.” (1 Yow. 4:8) Kukeña kwaNzambi hikwamwekenaña hohu muyilwiluku. Yowanu wasonekeli nindi: “Muloña wachumichi, Nzambi wamwekesheli kukeña kwindi hadi etu hakutemesha mukaayi Mwanindi wumu hohu kulonda tukatweshi kwikala nawumi kuhitila mudi yena.” (1 Yow. 4:9) Kukeña kwaNzambi dikwamuletesheli yakoñimu. Twamwekeshaña netu tudi akwaKristu apama, chitwamwekeshaña kukeña kutwamukeña Yehova  niMwanindi, kukeña kutwakeña amanakwetu akwaKristu nikukeña antu amakwawu.—Mat. 22:37-39.

16. Neyi tunakupama kuspiritu, muloñadi chitukuswejela kukeña yishina?

¹⁶ Chimwekala mukwaKristu wapama, mukusweja kukeñesha nakashi yishina. Muloña mukuzatishaña nshimbi muyuma yantesha, ilaña yishina yikuzatikaña muyuma yayivulu. Chakutalilahu, mwana wanyanya welukaña wanyi wubanji wafumaña mukudikunda nawantu atama, dichi nvwali wukweti kashinshi nateli kushaku nshimbi jakukiña mwanindi. (1 Kor. 15:33) Ilaña mwana neyi nakuli dehi, wekalaña nayitoñojoka yakwiluka nawa nateli kutoñojoka hayishina yashindamena haBayibolu. Dichi nateli kufuukula mwamaana hakutonda amabwambu. (Tañenu 1 Akorinda 13:11; 14:20.) Neyi tutoñojokaña hayishina yaNzambi, tukusweja kushindamena hachinleji chetu kulonda chitulomboleña kwesekeja nachatoñojokañayi Nzambi.

17. Muloñadi chitukuhoshela netu tukweti yuma yikutukwasha kufuukulahu chiwahi?

¹⁷ Komana tukweti yuma yayivulu yinateli kutukwasha kufuukulahu chiwahi kulonda tumutiyisheña Yehova kuwaha? Eña yidi kwoku. Kuhitila mukuzatisha chiwahi nshimbi niyishina yekala Mwizu daNzambi, tukwikala muntu “washikilamu chikupu, wadiloñesha chikupu kuzata nyidimu yayiwahi yejima” (2  Tim. 3:16, 17) Dichi, keñakeñenuña yishina yamuNsona kulonda ‘mwilukeña chidi nkeñelu yaYehova.’ (Efwe. 5:17) Zatishenuña chiwahi yuma yakudiza nachu yatuloñeshelañawu kuhitila muchipompelu chawakwaKristu, yidi neyi Watch Tower Publications Index, Chitwa Chakukwasha aYinsahu jaYehova Hakusandujola Nsañu, Watchtower Library, LAYIBULALI YAHAINTANETI niJW Library app. Iyi yitwa ayiloñesha kulonda yitukwasheña hakudiza kwankawetu nihakudiza kwachisaka.

18. Yumanyi yayiwahi yafumañamu neyi tuzata kwesekeja nanshimbi jaYehova niyishina yindi?

¹⁸ Yuma yayiwahi yafumaña mukulondela nshimbi niyishina yaYehova neyi chitwatañaña haMasamu 119:97-100 Nawu: “Nshimbi jeyi o chinajikeña! Najitoñojokaña mwaana wejima. Kuleja kweyi kunanleji maana akubadika awayilumbu jami, nidi nawu hefuku hefuku. Ami nashinshika chakubadika anlejaña ejima; muloña muwashimunaña natoñojokañamu. Ami neluki kashinshi chakubadika tushinakaji, muloña nahembi muwafumbaña.” Tunateli kusweja kwila mwamaana, mwakashinshi, nikwiluka neyi twikala nampinji ‘yakutoñojokaña’ Hezu daNzambi niyishina. Neyi tuzata nañovu, nikwiteja nshimbi niyishina yaNzambi kudizisha chinleji chetu, tunateli kwikala muntu “wapama neyi chapamayi Kristu.”—Efwe. 4:13.