1. ¿Tlenon tikpiyaj tejuamej tlen yolkamej xkipiyaj?

JEHOVÁ otechmakak tinochimej akin titlaltikpakchanejkej itlaj tlen yolkamej xkipiyaj: totlamachilis. Adán niman Eva kipiayaj intlamachilis. ¿Tleka tikmatij yejon? Pampa, sakin ika xokitlakamatkej itlanauatil toTajtsin, oniyankej. Yejuin okiteititi ika intlamachilis kinpasolouaya.

2. ¿Tleka totlamachilis yeskia kentla se brújula? (Xkita tlaixkopinajli kampa peua tlen tomachtijtokej).

² Totlamachilis techijlia tlenon kuajli niman tlenon xkuajli, niman techpaleuiya matoyekanakan ipan tonemilis. Uelis tikijtoskej ika yeskia kentla se brújula. * Se brújula tlen kuajli, kipaleuiya akin kiyekana barco niman ijkon makuika kampa noneki yas. San ika ¿tlenon panoua tla yoijtlakauj? Ajakatl niman mar uelis oksekan kuikaskej barco. Noijki ijkon, ijkuak totlamachilis kuajli tekiti pampa kuajli yotikmachtijkej, uelis kuajli techyekanas, san ika, ijkuak totlamachilis xkuajli tikmachtiaj uelis techuikas kampa uelis topan nochiuas tlen xkuajli.

3. ¿Tlenon uelis panos tla xkuajli tikmachtiaj totlamachilis?

 ³ Tla xkuajli tikmachtiaj totlamachilis, xtechijlis ijkuak itlaj xkuajli niman ika xkipiya tikchiuaskej (1 Tim. 4:1, 2). Hasta uelis techtlaneltokiltis ika “tlen xkuajli yejon tlen kuajli” (Is. 5:20). Jesús okimijli inomachtijkauan: “Ajsis on tonajli ijkuak san akinon mechmiktis kinemilis ika kitekipanoua Dios” (Juan 16:2). Yejon tlen kinemiliayaj akin okimiktijkej Esteban, se inomachtijkauj Cristo, niman noijki yejon tlen yokinemilijkej akin yokichiujkej ken yejuamej (Hech. 6:8, 12; 7:54-60). Miyekej akin kijtouaj ika tlaneltokaj itech toTajtsin niman yotemiktijkej, kijtouaj ika kitekichiuiliaj toTajtsin, san ika, yejuamej xkitlakamatstokej itlanauatiluan toTajtsin (Éx. 20:13). Kuajli nestika ika intlamachilis kinkajkayaujtika.

4. ¿Tlenon uelis tikchiuaskej niman ijkon maka matechkajkayaua totlamachilis?

⁴ ¿Tlenon uelis tikchiuaskej niman ijkon maka matechkajkayaua totlamachilis? Itlanauatiluan niman itlajtolyekanalisuan toTajtsin “techmachtia on tlen melauak, techchikajkanotsa, kiyektlalia on tlen xkuajli, niman temachtia ken ijki onyas se nemilistli melajki” (2 Tim. 3:16). Ika yejon, tla tiknekij ika totlamachilis kuajli matechyekana niman matechpaleui matitlanemilikan ken toTajtsin, kuakon, noneki kuajli tomachtiskej Biblia, tiknemiliskej tlen kijtoua niman tikchiuaskej tlen techmachtia. Aman tej, matikitakan kenon itlanauatiluan niman itlajtolyekanalisuan toTajtsin techpaleuiya matikmachtikan totlamachilis.

5, 6. ¿Kenon techpaleuiya tla tiktlakamatij itlanauatiluan toTajtsin?

⁵ Tla tiknekij ika itlanauatiluan toTajtsin matechpaleui, xsan noneki tikpouaskej noso tikixmatiskej. Noneki tomachtiskej tikintlasojtlaskej niman tikintlakaitaskej. iTlajtol toTajtsin kijtoua: “Xtlauelitakan tlen xkuajli, niman xtlasojtlakan tlen kuajli” (Amós 5:15). Tla tomachtiaj titlanemiliskej ijkon ken Jehová tlanemilia, kuakon uelis tiktlasojtlaskej niman tiktlakaitaskej tlen technauatia. Matiknemilikan ika ikipiya seki tonaltin ika xtiuelij kuajli tikochij. Kuakon, se tepajtiketl techijlia tlenon xkipiya tijkuaskej, technauatia matikchiuakan ejercicio niman matikpatlakan seki tlen tikchiuayaj. Tla tikitaj ika kuajli tomachiliaj pampa tikchiuaj tlen otechnauati, ¿xmelak ika melak tiktlakaitaskej yejon tepajtiketl niman noijki tlen techijlia?

⁶ Noijki ijkon, toTajtsin akin otexchijchiuj yotechmakak tlanauatiltin tlen techpaleuiyaj maka matitlajyouikan ipampa tlajtlakojli niman noijki kichiua kuajli matinemikan. Se neskayotl, matiknemilikan kenon melak techpaleuiya tiktlakamatiskej Biblia ijkuak techijlia ika xkipiya tikijtoskej tlen xmelauak, titekajkayauaskej, titlachtekiskej, tiauilnemiskej, titeixnamikiskej nion tiktejtemoskej naualyotl (xpoua Proverbios 6:16-19; * Apoc. 21:8). Ijkuak tikitaj kenon melak techpaleuiya tiktlakamatiskej Jehová, ueyiya ken tiktlasojtlaj niman tikpatiojkaitaj yejua niman itlanauatiluan.

7. ¿Kenon techpaleuiya tikpouaskej niman titlanemiliskej itech tlen inpan onochiuj sekimej akin Biblia kinteneua?

⁷ Xnoneki tikmachiliskej tlen xkuajli panoua ijkuak se xkitlakamati toTajtsin niman ijkon tiueliskej se ueyi tlamachtijli. Uelis tomachtiskej yejon tla tikpouaj ipan Biblia kenon onopopolojkej oksekimej niman tla titlanemiliaj itech yejon. Proverbios 1:5 kijtoua: “Se akin tlamachilise tlakaki niman kajsi okseki tlamachtijli”. Yejuin tlamachtijli ualeua itech toTajtsin, niman xonka okse tlen ijkon  ma kuajli. Se neskayotl, matiknemilikan kenon melak otlajyoui David ijkuak xokitlakamat toTajtsin niman oauilnen iuan Bat-seba (2 Sam. 12:7-14). Ijkuak tikpouaskej tlen ipan onochiuj, uelis titlanemiliskej ipan yejuin tlajtoltilistin: “¿Tlenon ueliskia kichiuas David niman ijkon xtlajyouiskia? Tla nejua nikixnamikiskia itlaj ken yejon, ¿tlenon nikchiuaskia? ¿Nicholoskia, ijkon ken okichiuj José, noso nikchiuaskia yejon tlajtlakojli ijkon ken okichiuj David?” (Gén. 39:11-15). Tla titlanemiliaj itech tlen xkuajli panoua ijkuak se tlajtlakoua, kichiuas maueyiya ken tiktlauelitaj tlen xkuajli.

8, 9. a) ¿Kenon techpaleuiya totlamachilis? b) ¿Tlenon panoua iuan totlamachilis ijkuak titlanemiliaj ipan itlajtolyekanalisuan toTajtsin?

⁸ Tikmatij ika tinochimej tikmapeuaj tlen toTajtsin kitlauelita. Maski ijkon, kemantika tikixnamikij itlaj tlen Biblia xtlaj kijtoua itech yejon. Ijkuak ijkon panos, ¿kenon tikmatiskej tlenon kineki Jehová matikchiuakan? Tla kuajli yotikmachtijkej totlamachilis ika tlen kijtoua Biblia, kuakon, tiktlapejpeniskej tlen kuajli.

⁹ Jehová techtlasojtla, ika yejon, yotechmakak tlajtolyekanalistin tlen kiyekanaj totlamachilis. Niman yejua techijlia: “Nejua, Jehová, moTajtsin, Akin mitsmachtia kuajli xnemi, Akin mitsyekana ipan ojtli kampa noneki tinejnemis” (Is. 48:17, 18). Ijkuak titlanemiliaj ipan itlajtolyekanalisuan Biblia niman tikchiuaj ika maajsikan ipan toyojlo, kuakon, tikmachtijtokej, tikmelajkatlalijtokej niman tikyektlalijtokej totlamachilis. Niman ijkuak ijkon tikchiuaj, totlamachilis techpaleuiya matiktlapejpenikan tlen kuajli.

10. a) ¿Tlenon kijtosneki se tlajtolyekanalistli? b) ¿Kenon Jesús okintekitilti tlajtolyekanalistin?

¹⁰ Ijkuak titlajtouaj itech se tlajtolyekanalistli, tikteneujtokej se tlamachtijli tlen melauak tlen kiyekana tlen tiknemiliaj niman noijki tlen tikchiuaj. Tikasikamatiskej itlajtolyekanalisuan Biblia, techpaleuiya matikasikamatikan kenon tlanemilia Jehová niman tleka okintlali seki tlanauatiltin. Ijkuak Jesús otenojnots ipan tlaltikpaktli, okimititi inomachtijkauan tlamachtiltin tlen melajkej niman ijkon makitakan tlenon inpan nochiuaskia tla itlaj kichiuayaj noso tla itlaj kinemiliayaj. Se neskayotl, okimijli ika tla titetlauelita kichiuas xtlaixnamiki, niman tla tiknemilia tlen xkuajli, kichiuas xauilnemi (Mat. 5:21, 22, 27, 28, TNM). Tla tokauiliaj matechyekanakan itlajtolyekanalisuan toTajtsin, kuakon, kuajli tikmachtijtoskej totlamachilis niman tiktlapejpeniskej tikchiuaskej tlen kiueyichiuas toTajtsin (1 Cor. 10:31).

11. ¿Tleka totlamachilis xsan noijki?

¹¹ ¿Tikchiaskiaj ika maka manopatla tlen tejuamej niman oksekimej tiktlapejpeniskej? Ka. Kanaj omemej tokniuan akin yokimachtijkej intlamachilis ika tlen kijtoua Biblia xsan noijki tlen kitlapejpeniskej itech se tlemach. Matitlanemilikan itech tikonis alcohol. Biblia kuajli kijtoua maka matitlauanikan niman maka ueyi matikonikan, san ika, kijtoua ika uelis tikonis san achijtsin (Prov. 20:1; 1 Tim. 3:8). Aman tej, ijkuak tiktlapejpeniskej tla tikoniskej noso ka, ¿san tiknemiliskej ika san achijtsin tikoniskej? Ka, xsan yejon. Noneki matikchiuakan tlen xkipajsolos totlamachilis, niman noijki noneki matiktlakaitakan ken tlanemiliaj oksekimej.

12. ¿Kenon techpaleuiya tlen kijtoua Romanos 14:21?

¹² Pablo okiteititi ika akin tikchiuaj ken Cristo noneki titlanemiliskej ipan intlamachilis oksekimej. Okijto: “Kuajli tikchiuas tla xtikuas nakatl, nion tikonis vino, nion tikchiuas itlaj yejuan ika najantikisas mokniu” (Rom. 14:21). Tla se tokniuj xkoni alcohol pampa xkikauilia itlamachilis, maski technamikiskia tiktlapejpeniskej tikoniskej alcohol, ¿xmelak ika xtikchiuaskiaj pampa xtiknekij ika tokniuj oksejpa ompa mauetsi? Kema, ijkon tikchiuaskiaj. Nemij tokniuan akin melak tlauaniyaj ijkuak xkitekichiuiliayaj Jehová, san ika,  aman kuajli yokijtokej ika nion achijtsin xkoniskej alcohol. Tikmatstokej ika xtiknekij tikchiuaskej oksejpa mapeua makoni alcohol niman matlajyoui (1 Cor. 6:9, 10). Ika yejon, tla tiktekiuiltiliaj alcohol se tokniuj niman xkiselia, xtikititiskiaj ika tiktlasojtlaj tla tikchiualtiaj makoni.

13. ¿Tlenon okichiuj Timoteo niman ijkon kinpaleuis oksekimej makiselikan kuajli tlajtoltin?

¹³ Matikitakan ineskayo Timoteo. Ijkuak kipiaya 20 xiuitl, pampa xkinekiya kintlajkalis judíos akin kinnojnotsaskia, okinek kinochiuilis circuncisión, itlaj tlen melak tekoko. Ijkon okiteititi ika noijki tlanemiliaya ken Pablo, itlatitlankauj Cristo (Hech. 16:3; 1 Cor. 9:19-23). ¿Niman tejuamej? ¿Noijki tiknektokej tikchiuaskej tlen ouijtika niman ijkon tikinpaleuiskej oksekimej?

14, 15. a) ¿Tlenon noneki kichiuas akin kinekij kipiyas chikauak intlaneltokil? b) ¿Tleka tikpiyas chikauak motlaneltokil kichiua xtetlasojtla?

¹⁴ Tinochimej akin tikchiuaj ken Cristo kipiya ika tiknekiskej tikpanauiskej “on tlen más xouijtikaj itemachtiluan Cristo” niman tikpiyaskej chikauak totlaneltokil (Heb. 6:1). San ika, yejuin xsan ijkon panos. Noneki mojmostla tokojtilijtiaskej. Uelis tikpiyaskej chikauak totlaneltokil tla xtijkajkauaj okseki tikixmatiskej niman tla tokojtiliaj okseki tikasikamatstiaskej. Ika yejon, nochipa techyoleuaj mojmostla matikpouakan Biblia (Sal. 1:1-3). ¿Tokojtilijtokej tikchiuaskej yejon? Tikpouaskej mojmostla Biblia techpaleuis kuajli matikasikamatikan itlanauatiluan niman itlajtolyekanalisuan toTajtsin.

¹⁵ Tlasojtlalistli, yejua tlanauatijli tlen melak ueyi kijtosneki intech akin kichiuaj ken Cristo. Jesús okimijli akin kitokayaj: “Tla nemotlajsojtlaj semej iuan oksekimej, nochi tlakatl kitas ika nennotemachtijkauan” (Juan 13:35). Santiago akin itlakpaikniuj katka Jesús, okitokayoti yejon tlanauatijli ken “yejuan más ueyi kijtosneki” (Sant. 2:8). Niman Pablo okijto: “Tla se tlakatl tetlajsojtla, yejua kichiua nochi tlen tlanauatia on tlanauatijli” (Rom. 13:10). Ipan Biblia tlasojtlalistli melak ueyi kijtosneki, pampa “Dios yejua tetlajsojtlalistli” (1 Juan 4:8). Jehová xkita tlasojtlalistli ken itlaj tlen san tikmachilis, yejuin itlaj tlen noteititia ika tlen tikchiuas. Juan okijkuilo: “Dios okipantlantij ken techtlajsojtla ijkuak okuajtitlan isenteKonetsin ipan tlaltikpaktli para itechkopa iKonetsin ma tikpiakan nemilistli para nochipa” (1 Juan 4:9). Ijkon tej, ijkuak tikteititiaj ika tiktlasojtlaj Jehová niman iKoneuj, noijki tokniuan niman oksekimej tlaltikpakchanejkej, tikteititiaj ika chikauak totlaneltokil (Mat. 22:37-39).

16. Ijkuak chikaujtias totlaneltokil, ¿tleka ueyixtias ken tikinpatiojkaitaj tlajtolyekanalistin?

 ¹⁶ Tlanauatiltin kemantika san itech se tlemach techyekana, san ika, tlajtolyekanalistin melak miyekan kampa techpaleuiya. Ika yejon, ijkuak chikaujtias totlaneltokil, ueyixtias ken tikinpatiojkaitaj tlajtolyekanalistin. San noijki ken tlen inpan nochiua kokonej. Ijkuak pitentsitsintin, xkasikamatij ika mitsijtlakos timouikas imiuan akin kichiuaj tlen xkuajli, niman tajtin noneki kinnajnauatiskej niman ijkon kintlajpiyaskej (1 Cor. 15:33). San ika, ijkuak ueyixtiuej, yolik peuaj tlanemiliaj niman noyekanaj ika tlajtolyekanalistin tlen onka ipan Biblia, niman yejon tlen kinpaleuiya ijkuak kitlapejpeniaj akinomej inuan nouikaskej (xpoua 1 Corintios 13:11; 14:20). Noijki ijkon, ijkuak titlanemiliaj ipan itlajtolyekanalisuan toTajtsin, totlamachilis peua tlanemilia ken tlanemilia toTajtsin niman kuakon totlamachilis noyektlalia niman kuajli techyekana.

17. ¿Tleka uelis tikijtoskej ika tikpiyaj tlen techpaleuis matiktlapejpenikan tlen kuajli?

¹⁷ Tikpiyaj nochi tlen techpaleuis matiktlapejpenikan tlen kiyolpaktia Jehová. ¿Tleka ijkon tikijtouaj? Pampa tlanauatiltin niman tlajtolyekanalistin tlen onokej ipan Biblia kipaleuiyaj akin kichiua ken Cristo “ma ueltiu niman ma noyektlalijtiu para kichiuas nochi tlen kuajli” (2 Tim. 3:16, 17). Aman tej, tla tiknekij tikasikamatiskej tlen kineki Jehová, kipiya ika tokojtiliskej (Efes. 5:17). Noneki kuajli tikintekitiltiskej nochi tlen techmakaj ika matomachtikan, ken Tlen kinpaleuiya ika nomachtiaj iteixpantijkauan Jehová, BIBLIOTECA IPAN INTERNET Watchtower, Índice de las publicaciones Watch Tower, programa Watchtower Library, niman aplicación JW Library. Nochi yejuin techpaleuis melak miyek matiuelikan ijkuak toselti tomachtiskej niman ijkuak tomachtiskej inuan tochanejkauan.

18. ¿Kenon techpaleuiya tikchiuaskej tlen techmachtiaj itlanauatiluan niman itlajtolyekanalisuan toTajtsin?

¹⁸ Tla tikintlakaitaj itlanauatiluan niman itlajtolyekanalisuan Jehová, miyek ken techpaleuis. Salmo 119:97-100 kijtoua: “¡Melak niktlasojtla motlanauatil! Itech nitlanemilia nochi tonajli. Motlanauatil kichiua manitlamachilise xijkon ken notlauelikniuan, pampa nochipa nouan onka. Nikpiya miyek asikamatilistli xijkon ken nochimej akin nechmachtiaj, pampa nitlanemilia itech motlalnamikilisuan. Ninoyekana ika ueyi asikamatilistli xijkon ken akin iuejueyimej tlakamej, pampa niktlakamati motlanauatiluan”. Tla tikxelouaj tiempo niman ijkon titlanemiliaj itech itlanauatiluan toTajtsin niman itlajtolyekanalisuan, kichiuas matitlamachilisejkej, kuajli matitlanemilikan, niman matikpiyakan asikamatilistli. Niman, tla tokojtiliaj tikmachtiskej totlamachilis ika itlanauatiluan niman itlajtolyekanalisuan toTajtsin, kuakon “tikojtitiaskej ipan tonemilis, niman tichikajtiaskej no ijki ken Cristo” (Efes. 4:13).