1. Ke’ng seo se dirago gore re fapane le diphoofolo?

SE SENGWE sa dilo tšeo di dirago gore re fapane le diphoofolo ke gore re na le matswalo. Batho ba pele e lego Adama le Efa le bona ba be ba na le matswalo. Re tseba seo bjang? Ka morago ga gore ba tshele molao wa Jehofa, ba ile ba ikuta. Se se bontšha gore matswalo a bona a be a ba tshwenya.

2. Re ka swantšha matswalo a rena bjang le khamphase? (Bona seswantšho se se lego ka mo godimo.)

² Batho bao ba nago le matswalo ao a sego a tlwaetšwa gabotse ba ka swantšhwa le sekepe seo se sepetšwago ke khamphase * yeo e sa šomego gabotse. Go sepela ka sekepe se bjalo seo se nago le khamphase e sa šomego gabotse go ka ba kotsi. Diphefo tša ka lewatleng di ka dira gore sekepe seo se timele gabonolo. Matswalo a rena a ka swantšhwa le khamphase yeo e šomago gabotse. Letswalo ke maikwelo a ka gare a go kgethologanya se se nepagetšego le se se fošagetšego  ao a re hlahlago go dira dilo tše dibotse. Eupša e le gore matswalo a rena a kgone go re hlahla gabotse, re swanetšwe go a tlwaetša ka tsela ya maleba.

3. Go ka direga’ng ge motho a se a tlwaetša letswalo la gagwe gabotse?

³ Ge motho a se a tlwaetša letswalo la gagwe gabotse, ga le mo thibele go dira selo se se fošagetšego. (1 Tim. 4:1, 2) Le gona letswalo leo le sego la tlwaetšwa gabotse le ka dira gore re dumele gore “botse ke bobe.” (Jes. 5:20) Jesu o ile a lemoša balatedi ba gagwe gore: “Nako e a tla ge yo mongwe le yo mongwe yo a le bolayago a tlago go nagana gore o diretše Modimo tirelo e kgethwa.” (Joh. 16:2) Batho bao ba ilego ba bolaya morutiwa Stefano ba be ba nagana bjalo. Go bjalo le ka ba bangwe bao ba tlaišago batho ba Modimo. (Dit. 6:8, 12; 7:54-60) Sa go makatša ke gore bona batho ba bao ba bolayago, ba ipolela gore ba rapela Modimo eupša ba tshela melao ya gagwe! (Ek. 20:13) Go molaleng gore matswalo a bona ga a ba hlahle gabotse!

4. Re ka dira’ng gore matswalo a rena a dule a šoma gabotse?

⁴ Re ka dira’ng gore matswalo a rena a dule a šoma gabotse? Melao le melao ya motheo yeo e lego ka Lentšung la Modimo e “hola ka go ruta, go kgala, go phošolla le go laya ka toko.” (2 Tim. 3:16) Ka baka leo, ge re ka ithuta Beibele ka mehla, ra naganišiša ka seo re ithutago sona ke moka ra se diriša maphelong a rena, re tla tlwaetša matswalo a rena go dira dilo ka tsela yeo Modimo a e nyakago. Ka go re’alo matswalo a rena a tla re hlahla gabotse. Anke re boneng kamoo melao ya Jehofa le melao ya gagwe ya motheo e ka re thušago go tlwaetša matswalo a rena.

5, 6. Re holega bjang ge re latela melao ya Modimo?

⁵ E le gore melao ya Modimo e re hole, ga se ra swanela go no e bala goba go e tseba ka hlogo. Re swanetše go e rata le go e hlompha. Lentšu la Modimo le re: “Hloyang se sebe le rate se se botse.” (Amose 5:15) Eupša re ka dira seo bjang? Re swanetše go ithuta go lebelela dilo ka tsela yeo Jehofa a di lebelelago ka yona. Ka mohlala: A re re ga o kgone go robala gabotse. Ke moka ngaka ya gago e go botša dijo tšeo o swanetšego go di ja, kamoo o ka itšhidullago ka gona le mekgwa yeo o swanetšego go e fetoša. Ka morago ga go leka go dira dilo tšeo a go boditšego tšona, wa kgona go robala. Ga go pelaelo gore o tla leboga ngaka ya gago ka ge e go thušitše.

⁶ Ka mo go swanago, Mmopi wa rena o re neile melao yeo e ka re šireletšago go ditlamorago tšeo di kwešago bohloko tša sebe. Ge re latela melao yeo re tla kgona go phela ka tsela e kaone. Nagana kamoo re holwago ke go latela melao ya Beibele ya mabapi le go se bolele maaka, go se be baradia, go se utswe, go se itshware ka tsela e gobogilego, go se dire bošoro gotee le go se dirišane le batemona. (Bala Diema 6:16-19; Kut. 21:8) Re thoma go rata Jehofa le melao ya gagwe kudu ge re bona e re hola.

7. Go bala dipego tša ka Beibeleng le go naganišiša ka tšona go ka re thuša bjang?

⁷ Ga go hlokagale gore re ithute lebading gore re tsebe gore melao ya Modimo e bohlokwa. Re ka ithuta go ba bangwe bao diphošo tša bona di ngwadilwego ka Lentšung la Modimo. Diema 1:5 e re: “Motho yo bohlale o tla theetša a hwetša thuto e ntši.” Ke therešo gore re hwetša tlhahlo e kaonekaone go Modimo ka go bala dipego tša ka Beibeleng gotee le go naganišiša ka tšona. Ka mohlala, nagana kamoo Kgoši Dafida a ilego a kwa bohloko ka gona ka morago ga gore a se kwe molao wa Jehofa gomme a dire bohlotlolo le Batseba. (2 Sam. 12:7-14) Ge re dutše re bala pego ye le go naganišiša ka yona, re ka ipotšiša gore: ‘Kgoši Dafida a ka ba a ile a dira’ng gore  a pheme bohloko bjo a ilego a bo kwa ka baka la go dira bohlotlolo le Batseba? Ge nka lebeletšana le teko e swanago, na ke tla kgona go e ganetša? Na ke tla swana le Josefa gomme ka tšhaba, goba ke tla swana le Dafida gomme ka dira bohlotlolo?’ (Gen. 39:11-15) Ge re ka naganišiša ka ditlamorago tša sebe, re tla ikemišetša go dira sohle se re ka se kgonago go ‘hloya se sebe.’

8, 9. (a) Matswalo a rena a re thuša bjang? (b) Matswalo a rena a dirišana bjang le melao ya motheo ya Jehofa?

⁸ Re swanetše go ralokela kgole le dilo tšeo Modimo a di hloilego. Eupša re swanetše go dira’ng maemong ao Mangwalo a sa bolelego ka go lebanya seo re swanetšego go se dira goba go se se dire? Maemong a bjalo re ka tseba bjang seo Modimo a se amogelago le seo a sa se amogelego? Ditabeng tše bjalo re tlo thušwa ke matswalo a rena ao a tlwaeditšwego ka Beibele.

⁹ Ka ge Jehofa a re rata, o re neile melao ya motheo yeo e hlahlago matswalo a rena. O re: “Nna, Jehofa, ke Modimo wa lena, Yo a le rutago gore le holege, Yo a le sepedišago tseleng yeo le swanetšego go sepela ka yona.” (Jes. 48:17, 18) Re ka kgona go phošolla matswalo a rena le go a hlahla ka go naganišiša ka melao ya motheo ya Beibele. Seo se tla re thuša go dira diphetho tše dibotse.

10. Melao ya motheo ke’ng, gona Jesu o ile a e diriša bjang ge a be a ruta?

¹⁰ Molao wa motheo ke therešo e sa fetogego yeo e re thušago go nagana ka tsela e nepagetšego le go dira diphetho tše dibotse. Go kwešiša molao wa motheo go akaretša go kwešiša tsela yeo Jehofa a naganago ka yona le go kwešiša mabaka ao a dirago gore a re nee melao e itšego. Jesu o ile a diriša melao ya motheo go ruta barutiwa ba gagwe gore ba tsebe gore mekgwa le ditiro tše itšego di na le ditlamorago. Ka mohlala, o rutile gore kgalefo e ka dira gore motho a dire bošoro gomme dikgopolo tše di gobogilego di ka dira gore motho a dire bootswa. (Mat. 5:21, 22, 27, 28) E le gore re be le matswalo ao a tlwaeditšwego gabotse, re swanetše go hlahlwa ke melao ya motheo ya Modimo gomme seo se tla dira gore Modimo a retwe.​—1 Bakor. 10:31.

11. Matswalo a rena a ka fapana bjang?

¹¹ Bakriste ba babedi bao matswalo a bona a tlwaeditšwego ka Beibele ba ka dira diphetho tše di sa swanego ditabeng tše itšego. Nagana ka taba ya go nwa bjala. Beibele ga e gane ge re enwa bjala gabotse. Lega go le bjalo, e re lemoša gore re se ke ra nwa ka tsela e feteletšego goba ra tagwa. (Die. 20:1; 1 Tim. 3:8) Na se se ra gore ga go na dilo tše dingwe tšeo Mokriste a swanetšego go nagana ka tšona ge feela a enwa gabotse? Aowa. Gaešita le ge letswalo la gagwe le ka se mo tshwenye, o swanetše go naganela le matswalo a batho ba bangwe.

12. Mantšu ao a lego go Baroma 14:21 a ka re thuša bjang go hlompha matswalo a batho ba bangwe?

¹² Paulo o ile a bontšha gore re swanetše go hlompha matswalo a batho ba bangwe. O itše: “Ke mo gobotse go se je nama, go se nwe beine goba go se dire selo le ge e le sefe seo ka sona ngwaneno a kgopišegago.” (Baroma 14:21) Na o tla tlogela go dira dilo tšeo o nago le tshwanelo ya go di dira e le gore o se ke wa kgopiša ngwaneno yoo letswalo la gagwe le fapanago le la gago? Ga go pelaelo gore o tla tlogela go dira dilo tšeo. Ba bangwe ba bana babo rena ba be ba enwa kudu pele ba ka tseba therešo, eupša gona bjale ba ikemišeditše go se sa kgwatha bjala. Ruri ga go le o tee wa rena yo a ka nyakago go dira gore ngwanabo a boele tseleng yeo e tlago go mo gobatša! (1 Bakor. 6:9, 10) Ka gona, ge ngwanabo rena a ka re a re etetše gomme ra mo gapeletša go nwa bjala mola a boletše gore a ka se nwe, re tla ba re bontšha gore ga re mo rate.

13. Timotheo o beile mohlala o mobotse bjang tabeng ya go etiša Mmušo wa Modimo pele?

 ¹³ Ge Timotheo e be e sa le lesogana o ile a dumela go bolotšwa le ge go be go le bohloko, feela gore a se ke a kgopiša Bajuda bao a bego a tlo ba ruta Lentšu la Modimo. Ka go swana le moapostola Paulo, Timotheo o be a sa nyake go kgopiša motho. (Dit. 16:3; 1 Bakor. 9:19-23) Na o tla swana le Timotheo ka go se dire dilo tše itšego e le gore o hole ba bangwe?

14, 15. (a) Go gola moyeng go akaretša’ng? (b) Go bontšha ba bangwe lerato go tswalana bjang le go ba Bakriste bao ba godilego moyeng?

¹⁴ Bakriste ka moka ba swanetše go “[tlogela] thutatumelo ya pele mabapi le Kriste” gomme ba ‘phegelele kgolong.’ (Baheb. 6:1) Se ga se no itiragalela. Re swanetše go ‘phegelela’ goba re tšwele pele re šoma ka thata gore re gole moyeng. Go gola moyeng go akaretša go ba le tsebo e oketšegilego le kwešišo. Ke ka baka leo ka mehla re kgothaletšwago go bala Beibele letšatši le letšatši. (Ps. 1:1-3) Na o ipeetše pakane ya go bala Beibele letšatši le letšatši? Go bala Beibele go tla go thuša go tseba melao ya Jehofa le melao ya gagwe ya motheo le go kwešiša Lentšu la Gagwe ka mo go tseneletšego.

¹⁵ Molao o mogolo woo Bakriste ba swanetšego go o latela ke molao wa lerato. Jesu o boditše barutiwa ba gagwe gore: “Bohle ba tla tseba ka se gore le barutiwa ba ka, ge e ba le ratana.” (Joh. 13:35) Jakobo e lego ngwanabo Jesu o itše lerato ke “molao wa bogoši.” (Jak. 2:8) Paulo o itše “lerato ke phethagatšo ya molao.” (Baroma 13:10) Ga re makale ge lerato le gatelelwa ka tsela ye ka gobane Beibele e re “Modimo ke lerato.” (1 Joh. 4:8) Modimo o bontšha lerato la gagwe ka ditiro. Johane o ngwadile gore: “Re utolletšwe lerato la Modimo ka se, gobane Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena.” (1 Joh. 4:9) Re bontšha gore re Bakriste bao ba godilego moyeng ge re rata Jehofa le Morwa wa gagwe, re rata bana babo rena ba Bakriste gotee le batho ba bangwe.​—Mat. 22:37-39.

16. Ke ka baka la’ng melao ya motheo e eba bohlokwa kudu ge re dutše re gola moyeng?

¹⁶ Ge o dutše o gola moyeng, o tla lemoga gore melao ya motheo e ba bohlokwa kudu go wena.  Go bjalo ka gobane melao e šoma maemong a itšego, mola melao ya motheo e šoma maemong a fapafapanego. Ka mohlala, ngwana yo monyenyane a ka se kwešiše dikotsi tša go ba le bagwera ba babe, ka gona batswadi ba swanetše go mmeela melao gore ba mo šireletše. (1 Bakor. 15:33) Eupša ge ngwana a dutše a gola, o ithuta go naganišiša ka melao ya motheo ya Beibele. Ka gona, a ka kgona go dira diphetho tše dibotse tabeng ya go kgetha bagwera. (Bala 1 Bakorinthe 13:11; 14:20.) Ge re naganišiša ka melao ya motheo ya Modimo, matswalo a rena a ka kgona go re hlahla gabotse ka ge re kwešiša seo Modimo a se nyakago.

17. Ke ka baka la’ng re ka re re na le dilo tšeo re di hlokago gore re dire diphetho tše dibotse?

¹⁷ Na re na le dilo ka moka tšeo re di hlokago gore re dire diphetho tše dibotse tšeo di kgahlišago Jehofa? Ee. Ge re ka diriša gabotse melao le melao ya motheo yeo e lego ka Lentšung la Modimo, re tla ‘swanelega ka botlalo, gomme ra hlangwa ka mo go feletšego bakeng sa modiro o mongwe le o mongwe o mobotse.’ (2 Tim. 3:16, 17) Ka baka leo, tsoma melao ya motheo ya Mangwalo e le gore o “[hlathe] seo thato ya Jehofa e lego sona.” (Baef. 5:17) Diriša dilo tša go ithuta tšeo re nago le tšona, tše bjalo ka puku ya Tlhahlo ya go Dira Nyakišišo ya Dihlatse tša Jehofa, BOKGOBAPUKU BJA INTHANETENG le lenaneo la JW Library. Didirišwa tše di re thuša gore re holwe kudu ke thuto ya motho ka noši le thuto ya lapa.

18. Re ka hwetša ditšhegofatšo dife ge re latela melao ya Jehofa le melao ya gagwe ya motheo?

¹⁸ Jehofa o tla re šegofatša ge re latela melao le melao ya gagwe ya motheo. Psalme 119:97-100 e re: “Molao wa gago ke o rata gakaakang! Ke nagana ka wona letšatši ka moka. Taelo ya gago e ntlhalefiša go feta manaba a ka, gobane ke tla e latela go iša mehleng ya neng le neng. Ke na le temogo e ntši go feta bohle bao ba nthutago, gobane ke tshwenyega ka dikgopotšo tša gago. Ke dira dilo ka kwešišo go feta banna ba bagolo, gobane ke latetše ditaelo tša gago.” Re ka dira dilo ka tsela yeo e bontšhago gore re na le bohlale, temogo le kwešišo ge e ba re ipha nako ya go “tshwenyega” goba go naganišiša ka melao ya Modimo le melao ya gagwe ya motheo. Ge re ka dira sohle seo re ka se kgonago, re ka fihlelela “tekanyo ya boemo yeo e lego ya botlalo bja Kriste” ge re dumelela melao ya Modimo le melao ya gagwe ya motheo e hlahla matswalo a rena.—Baef. 4:13.