1. ¿Andiksïsï no májkuenii kʼuiripuecha ka animalicha?

JEOBA no májkueni kueraasti kʼuiripuni ka eska animalichani, jimboka kʼuiripuni konsiensia ma jatsikuska. Adani ka Eba jukasptiksï konsiensia. ¿Nénachi mítiski ini ambe? Jimbokaksï jirikuarhispka engaksï no kumpliripka ambe enga Tata Diosï juramukuapka. I ambe xarhatasïndi eska konsiensia no sési pʼikuastaaxapka.

2. ¿Néna sáno májkueniski konsiensia bolanti ma jingoni? (Exe je dibujuni enga uénakuarhu jaka).

² Konsiensia ambe máesti engachi incharinisï jukaka parachi mítini ambe sési jarhaski ka ambe nómbe ka engajtsïni jarhuatajka juchari irekuarhu. Uákachi konsiensiani ísï terokutantani komueska barkueri bolanti ma. Bolanti ma enga sési marhuani jauaka, jarhuatasïndi barkueri kapitanini para úni jimesï páni barkuni nani enga uéjka nirani. Peru ¿ambe úkuarhisïni enga bolanti no sési ajustadu jauaka? Tarhiata ka marirhu anapu olecha, uátiksï fásili támisï páni barkuni. Sáno májkueni, konsiensia ma enga sési jorhendakata jaka jarhuatasïndijtsïni parachi ambakiti ambe úni, peru konsiensia ma enga no sési jorhendakata jauaka, kánikua peligrosuesti.

3. ¿Ambe uá úkuarhini enga konsiensia no jorhendakata jauaka?

³ Konsiensia ma enga no jorhendakata jaka, nójtsïni arhisïndi ambe  enga no sési jaka nijtsïni arhijki eskachi no uáka imani ambe (1 Tim. 4:1, 2). Astajtsïni uáti ísï exerani eska “no sési jásï ambe, sési jásï ambeska” (Is. 5:20). Jesusi arhiaspti imeri chúxapatichani: “Niáraati jurhiatikua enga nema engaksïni uándikuaka, tantiariaka eska Diosïnisï marhuakuni jauaka” (Juanu 16:2). Ísïksï eratsisïrendi imecha engaksï disipulu Estebanini uándikupka ka májkuenksï eratsisïndi kʼuiripuecha engaksï májkueni ambe újka (Uku. 6:8, 12; 7:54-60). Peru relijiosuecha engaksï ísï jámajka uándikpini ka uandanksï eskaksï Tata Diosïnisï marhuakuni jaka, nóksï kumpliriuaxati Jeobaeri leichani (Éx. 20:13). I ambe xarhatasïndi eska imecheri konsiensia enganiariuaxaka.

4. ¿Ambechi uá úni parajtsïni konsiensia no enganiarini?

⁴ ¿Ambechi uá úni parajtsïni konsiensia no enganiarini? Tata Diosïri Karakatarhu anapu leicha ka prinsipiuechaksï “marhuasïndi para jorhentpini, para jánhastpini, ka para arhistatspini ka para mítitarpini na enga jindeka para jurhimbitku jámani” (2 Tim. 3:16). Ísï jimbo, para jorhendani juchari konsiensiani ísï exeni ambe ma eska Jeoba na exejka ka eskajtsïni sési marhuachiaka, jatsiskachi para tsitini estudiarini Bibliani, eratsintani ambe enga arhijka ka úni ambe engachi jorhenguarhijka. Jimajkani, ju je exeni nénajtsïni jarhuatasïni Jeobaeri leicha ka prinsipiuecha para jorhendani juchari konsiensiani.

5, 6. ¿Nénajtsïni marhuachisïni kumpliriuani Tata Diosïri leichani?

⁵ Parajtsïni Jeobaeri leicha marhuachini, no solu uétarhisïndi arhiantani o mítiani. Jatsiskachi para jukaparharaani ka kumpliriuani. Biblia arhisïndi: “Kurhunhi je no sési jásï ambeni ka uéka je ambakiti ambeni” (Amós 5:15). Ma ambe engajtsïni jarhuataaka ísï úni, jindesti ísï exeni ambe ma eska Jeoba na exejka. Ju je eranhaskani eska sáni ióniskia engachi no újka sési kʼuíni. Doktorijtsïni arhisïndi eskachi dieta ma uáka, ejersisiu úni ka mójtakuni máru ambe engachi uénga. Engachi exejka eskajtsïni marhuachisïnga ima ambe engajtsïni doktori arhipka, ¿no ísïski eskachi jukaparharasïnga doktorini ka imeri konsejuechani?

⁶ Májkuenisti Jeoba jingoni, juchari Kueraajpirijtsïni íntsaasti leichani engajtsïni kuájchakujka parachi no no sési ambe úkuarhinchani pekadu jimbo ka úni eskachi sési irekaaka. Por ejemplu, ju je eratsintani na engajtsïni xáni marhuachijka enga Biblia arhijka eskachi no jatsiska para chkuanderani, enganiarpini, sïpani, ísku jándikua ambe úni, uarhipeni ka sïkuamikua ambe úrani (arhinta je Proverbios 6:16-19; Jaŋ. 21:8). Engachi exejka na engajtsïni xáni marhuachijka kurhajchani Jeobani, juchari uékperakua engachi imani jimbo pʼikuarherajka ka imeri juramukuecha jimbo, sánderu kʼésïndi.

7. ¿Nénajtsïni marhuachisïni arhiantani Bibliaeri ejempluechani ka eratsiantani?

⁷ Kánikuachi no sési nitamakuarhisïnga engachi no kurhajchajka Tata Diosïni, peru nochi jatsiska para inde ambe nitamakuarhini parachi mítini eska inde ambe no sési jarhaska. Uákachi jorhenguarhini indeni ambe arhiantaparini Bibliarhu máru ejempluechani kʼuiripuecheri engaksï no sési jásï ambe úpka ka eratsintani indeni ambe. Proverbios 1:5 arhisïndi: “Kʼuiripu jánhaskati ma kurhaasïndi ka sánderu jorhenguarhisïndi”. I ambe Jeobajtsïni jorhendasïndi ka no jarhasti sánderu ambakiti jorhentperakua. Por ejemplu, ju je eratsintani na enga xáni sufriripka Dabidi enga no kurhajchapka Jeobani ka ísku jándikua ambe niátani Bat-seba jingoni (2 Sam. 12:7-14). Engachi arhintani jauaka ini karakatani, uákachi eratsiantani máru kurhamarhikuechani komu ari: “¿Ambe úpirini Dabidi para no no sési jásï ambe nitamakuarhini? Engani i jásï tsʼéjkukua ma jatsipiringa, ¿ambe úpirini ji? ¿Sïpakuarhipirini ísï eska Jose o ísku jándikua ambe niátapirini eska Dabidi? (Gén. 39:11-15). Engachi eratsintaaka na enga xáni no sési jásï ambe úkuarhijka pekadu jimbo, sánderuchi kurhunhiaka no sési jásï ambeni.

8, 9. a) ¿Para ambe marhuasïni konsiensia? b) ¿Nénaksï jarhuatasïni Jeobaeri prinsipiuecha juchari konsiensiani?

 ⁸ Seguru eskachi iáminduecha jánguarhisïnga no úni imani ambe enga Jeoba kurhunhijka. Peru ménisï jarhasïndi ambe ma enga Biblia no arhijka ambechisï jatsi para úni. Enga ísï úkuarhijka, ¿nénachi uá mítini ambe uékasïni Jeoba eskachi uáka? Enga juchari konsiensia sési jorhendakata jauaka Biblia jimbo, ambakiti ambechi erakuaka úni.

⁹ Jeobajtsïni uékasïndi, jimbojtsïnisï íntsaati prinsipiuechani para konsiensia sési marhuani. Ima mismu uandasïndi: “Ji, Jeoba, chíti Tata Diosïska, Ima engakini jorhendajka parari sési jarhani, Ima engakini arhini jaka nani engari ísï xanharaaka” (Is. 48:17, 18). Engachi eratsiantaska Bibliaeri prinsipiuechani ka jurajkuni eskajtsïni mintsitarhu niárachiaka, uákachi eska juchari konsiensia sánhani arhiaka sánderu sési marhuani. Ísï úparini, uákachi ambakiti ambe erakuni úni.

10. a) ¿Ambeski prinsipiu ma? b) ¿Néna úraaspi Jesusi prinsipiuechani?

¹⁰ Prinsipiu ma, karakata máesti o jurhimbikua ma enga sánderu jukaparhakueka engajtsïni jarhuatajka eratsintani ambe ma o parachi ambakiti ambe úni. Sési kurhanguani Bibliaeri prinsipiuechani, jarhuatasïndijtsïni exeni na enga eratsijka Jeoba ka andisï kararkuarhia máru leichani. Enga Jesusi aianhpini jámani japka, jorhendaaspti imeri chúxapatichani jurhimbikuechani engaksï sánderu jukaparhakueka, para jarhuataani exeni ambe enga niárajka úkuarhini seguni eska na jámaaka nema ka na enga jásïuaka. Por ejemplu, uandaspti eska jatanhetspeni, úsïnga eska uarhiperanhaaka ka ístu, eska no sési jásï ambe eratsini jarhani, úsïnga eska nema ísku jándikua ambe niátaaka (Mat. 5:21, 22, 27, 28). Engachi jurajkuska eskajtsïni Bibliaeri prinsipiuecha jarhuataaka, sésichi jorhendani jauaka juchari konsiensiani ka imani ambechi uáka enga kʼéri ambe arhiaka Tata Diosïni (1 Kor. 10:31).

11. ¿Andichisï uandajki eskachi no iáminduecha májkueni jásï konsiensia ma jatsiska?

¹¹ ¿Jatsiskichi para erokuarhini eskachi iáminduecha méntkisï májkueni ambe erakuaka úni? Nómbe. Jamberiksï tsimani kristianuecha enga imecheri konsiensia Biblia jimbo jorhendakata jaka, nóksï májkueni ambe erakuati úni. Por ejemplu, arhani imani ambe enga alkoli jukaka. Biblia arhisïndi eska kauini ka jukari alkoli arhani no sési jarhaska, peru no proibirisïndi sánisï arhani (Prov. 20:1; 1 Tim. 3:8). Peru engachi exeni jámaaka sinchi aua sánisï alkoli o nómbe, ¿solu uétarhisïni exeni na xántkuchisï aua? Nómbe. Aparti de exeni eskajtsïni juchari konsiensia no no sési pʼikuastasïnga, jatsiskachi para kuentuni máteru erachicheri konsiensiani.

12. ¿Nénajtsïni jarhuasïni ambe enga Roma 14:21 arhijka?

¹² Pablu jorhendaaspti kristianuechani eskaksï jatsispka para kuentuani máteruecheri konsiensiani. Uandaspti: “Jimajkani sánderu sésisti no arhani kʼuiripita ka níjtu binu, ka ni ma ambe engari jimbo pekadu úraaka chíti ermanutini” (Rom. 14:21). Enga erachi ma no arhajka alkoli jimboka imeri konsiensia no jurajkusïnga, ¿a no eskachi juchajtu tsípikua jingoni jiókuarhipiringa no arhani parachi no pekadu ambe úrani? Jo, ísïchi úpiringa. Jarhastiksï erachicha engaksï jukari kauienga ante deksï Testigueni, peru iásïksï jánguarhintaxati méntku no sáni alkoli arhani. Seguru eskachi no uékasïnga eskaksï ménderu uéntaaka kauini ka no sési ambeksï úkuarhinchani (1 Kor. 6:9, 10). Ísï jimbo, engachi kopa ma uékaaka íntskuni erachini ma ka ima no jiókuarhini, nochi uékperakua xarhatakuni japiringa engachi afuersa uékapiringa íntskuni.

13. ¿Ambe úspi Timoteu para jarhuataani máteru kʼuiripuechani paraksï jiókuarhini ambakiti eianhperakuani?

 ¹³ Ju je Timoteueri ejemplu exeni. Enga 20 ísï jatiripkia, jurajkutakuarhispti paraksï sïkuiri pʼikuni jima enga tatakenhaka (circuncisión), ima operasioni kánikua pʼamesïrendi, peru Timoteu úspti indeni ambe jimboka no uékasïrenga no sési pʼikuastaani judiuechani enga predikarikuapiringa. Imani ambe úparini, ísï jámaspti eska apostuli Pablu (Uku. 16:3; 1 Kor. 9:19-23). ¿Ka juchaia? ¿Tsípikua jingonchi uá sakrifisiu ma paraksï máteruecha sési jarhani?

14, 15. a) ¿Ambechi jatsiski para úni parachi kristianu jánhaskati máeni? b) ¿Nénachi xarhatasïni eskachi jánhaskatiiska?

¹⁴ Kristianuechachi no jatsiska para “solu indeni ambe jorhenguarhini jarhani enga jindeka para uénani jámani jorhenguarhini Kristueri ambe”, sino sánhani arhinchi sánderu jánhaskatiini (Ebr. 6:1). Peru no ísku jatini úkuarhisïndi inde ambe. Jatsiskachi para seguirini jarhani jánguarhintani. Parachi kristianu jánhaskati máeni, jatsiskachi para seguirini jarhani sánderu jorhenguarhini ka sánderu mímixetini. Jimbochisï someni pʼímarhinhajka pauani pauani arhintani Bibliani (Sal. 1:1-3). ¿Inde jindeski juchari meta? Pauani pauani arhintani Bibliani, jarhuataatijtsïni sánderu sési kurhanguani Tata Diosïri leichani ka prinsipiuechani.

¹⁵ Para kristianuecha, lei enga sánderu jukaparhakueka, jindesti uékperani. Jesusi arhiaspti imeri chúxapatichani: “Ini jimboksï mítiati iámindu kʼuiripuecha eskajtsï jindeska juchiti jorhenguarhiticha engajtsï uékperaaka máteru ka máteruni jingoni” (Juanu 13:35). Santiagu, Jesusiri mediu ermanu uandaspti eska jindespka ‘lei enga sánderu kʼéri ambeka’ (Sant. 2:8). Ka Pablu uandaspti: “Uékperakua jimbo kumplirikuarhisïndi iámindu mandamientuecha” (Rom. 13:10). Biblia kánikua jukaparharasïndi uékperakuani, jimboka “Diosï jindeska uékperakua” (1 Juanu 4:8). Para Jeoba, uékperakua no solu pʼikuarhinhikua máesti, sino ambe ma enga úkuecha jingoni xarhatajka. Juanu karaspti: “Ini jimbo xarharasïndi na engajtsïni xáni uékajka Diosï, jimboka ima axaska imeri máechakua Uájpani parhakpinirhu paraka jucha jatsipiringa tsípikua imani jimbo” (1 Juanu 4:9). Ísï jimbo, engachi xarhatajka eskachi uékasïnga Jeobani ka imeri Uájpani, ístu juchari erachichani ka máteru kʼuiripuni, xarhatasïngachi eskachi jánhaskatiska (Mat. 22:37-39).

16. Engachi sánderu jánhaskatijkia, ¿andichisï sánhani arhijki sánderu jukaparharaani prinsipiuechani?

 ¹⁶ Sáno méntkisï, lei ma uandasïndi ambe engachi jatsika para úni, peru prinsipiu ma, para mámaru ambejtsïni marhuachisïndi. Ísï jimbo, engachi sánhani arhini jarhajka sánderu jánhaskatiini, sánderuchi jukaparharaasïnga prinsipiuechani. Uákachi terokutantani imani ambe jingoni engaksï sapiicha nitamanchajka. Sapiichaksï no kurhangusïndi andisï peligru máe kúrhiani no ambarhati kʼuiripuechani ka paraksï tátembecha kuájchakuani, reglechanksï jatsikukuasïndi (1 Kor. 15:33). Peru engaksï na kʼuiripeni jarhajkia, sánhani arhisïndiksï sánderu jánhaskani, úrapariani Bibliaeri prinsipiuechani ka jorhenguarhini sési erakuani imeri amiguechani (arhinta je 1 Korintu 13:11; 14:20). Májkuenisti, engachi eratsiantaska Bibliaeri prinsipiuechani, juchari konsiensia sánhani arhisïndi jorhenguarhini ísï exeni ambe ma eska Jeoba na exejka ka ísï úparini, úsïndijtsïni sánderu jarhuatani parachi ambakiti ambe úni.

17. ¿Andichisï uandajki eskachi jatsiska ambe enga xáni uétarhijka para ambakiti ambe úni?

¹⁷ Jatsiskachi ambe enga xáni uétarhijka para imani ambe úni enga Jeoba jeiapanhintajka. ¿Andichisï ísï uandajki? Jimboka leicha ka prinsipiuecha engachi Bibliarhu exeantajka, marhuasïngaksï paraka “Diosïri kʼuiripuecha no ma ambe kueratanchaaka, sino sésiksï jorhendakata jarhani para iámindu ambakiti ambe úni” (2 Tim. 3:16, 17). Peru engachi uéjka “mítini ambe enga juchari Tata [Jeoba] jeiapanhintajka” jatsiskachi para jánguarhintani (Efes. 5:17). Uétarhisïndi eskachi úrauaka erramientechani engachi intsïnhaaka, komu Jarhuajperata paraksï Jeobaeri testiguecha estudiarini, programa Watchtower Library, BIBLIOTEKA INTERNETIRHU Watchtower, ka aplikasioni JW Library. Iámindu i ambejtsïni marhuachisïndi para familiaeri jorhenguarhikua ka para máeri jorhenguarhikua.

18. ¿Náki kóntperatechanchi jatsiaua engachi kumpliriuaska Jeobaeri leichani ka prinsipiuechani?

¹⁸ Engachi kumpliriuaska Jeobaeri leichani ka prinsipiuechani, uánikua kóntperatechanchi jatsiauaka. Salmo 119:97-100 arhisïndi: “¡Xáni engani jukaparharajka chíti leini! Chúskutasïnga méntku pendienti jarhani indeni ambe jimbo. Chíti juramukuarini sánderu jánhaskati úsïndi eska juchiti enemiguecha, jimboka para méntkisï juchitiuaka. Niáraska sánderuni jánhaskakua jatsini ka eska iámindu juchiti maestruecha, jimbokani kánikua eratsintaasïnga chíti jorhentperakuechani. Sánderuni mímixetiini jámasïnga eska kʼuiripuecha engaksï jatirikia jimbokani kumpliriuasïnga chíti juramukuechani”. Tiempu arhutani para eratsiantani Tata Diosïri leichani ka prinsipiuechani, uáti eskachi sánderu mímixetiuaka ka jánhaskatiini. Ka engachi jánguarhintaska jorhendani juchari konsiensiani úrapariani leichani ka prinsipiuechani, ísïuakachi eska tata Jesukristu iámindu ambe jimbo (Efes. 4:13).