1. Ano mapawanay ko tao kitaanan hano mamasomad kita hani?

O CECAY kafanaˈan ato kangodoan iso a tamdaw, mapawan to ngangan iso, anca cowato ka fanaˈ tisowanan, wa samaan ko harateng iso hani? Maedeng mamasomad kiso, samanen misaali to sakafanaˈ no tao, o nanaman ita koni, hanaca o tokel ita cowa ko kafanaˈ aca no tao to o cima kita, mihaydaho to waywayan ato nano demak no mita.​—Saˈosi 11:16; Yopu 31:6.

2, 3. O sapilifokaw to pihayda no tao a harateng, hano wa pakidem a mararaw hani? (Nengnengen ko satapangan coka.)

² Soˈlin makalimay kita haydaen no tao, kawra o hatiniay harateng pakayni ka eca kalefot wa pakidem a mararaw, satapangay sapaˈdilaw to niyah. Miowingay ko hekal ni Satan to tamdaw micangacang to saka cinganganaw, samacay sanay ko tamdaw milifok to sahayda no tao, mapawanto paˈdil ato midoko to Kawas ci Yihofaan.​—Paˈarawan 4:11.

³ Itini romiˈad ni Yis, o ˈaˈideman no pihakelongan pakayni pihayda no tamdaw, mararaway ko pinengneng. Mihaenay,  palimoˈotan ni Yis ko nisawawaan: “Pinaˈon kamo to pasifanaˈay to Rikec a tamdaw. Maolah cangra a cirikoˈ to kakayaˈay a misarakarakat. Maolah cangra a mataˈong i kalaliˈacaan. O romasato, maolah cangra a maroˈ i tadamaanay a kamaroˈan i kasaˈopoan a lomaˈ ato tadamaanay a kamaroˈan i pitahkaan.” Somowalay ci Yis: “Caay ko sasamadahen no Kawas ko nipitefoc i cangraan.” (Luka 20:46, 47) O roma i, o mimingay a sapakiyaho no cecay manikaway maponengay, cowa ka samaan ko pinengneng no tao, kawra pakahemekan ni Yis cingra. (Luka 21:1-4) Mahapinangay, pakayni picada to pihayda no tao, cowa ka hecad ko pinengneng ni Yis to roma tamdaw. Oniya lalakaw wa padama kitaanan tano harateng ni Yihofa a minengneng to pihayda a demak.

4. Misaˈicel kita milifok to pihayda no nima hani? Misamaanay hani?

⁴ Misaˈicel kita milifok to pihayda no nima hani? O kalo a tamdaw saheto sapilifokaw to pihayda no ˈakawangay picudadan, misasingdiay, ato lawla a hekal, kawra cowa ka hecad ko Krisciyang. Pakayni tonini, sowal ni Pawlo: “Mafanaˈto kamo to Kawas anini. Ikaka ko nika fanaˈ no Kawas i tamowanan. Nawiro pasayra haca kamo i [malonayay cangoˈotay a mararaway harateng,] awaay ko epoc a lekakawa no lisin saw? Nawiro mangalay kamo a miliyaw a malakoli nangra saw?” (Kalatiya 4:9) Ano ngaˈay malo kafanaˈan no saˈakawangay Tatapangan a tamdaw tada kalikoanto! Makahiyay ci Yihofa malo ngaˈayay widang no mita, o cecay mikingkiway mihayay tonini, sowal ningra wa ngaˈay ko tamdaw ‘milifok to sadipot no Kawas’. Micada kita to sahayda no Kawas, malo widang Ningra, wa ciepocto ko kaˈorip.​—Patnakay 12:13, 14.

5. Sasamaan ko hademak ita ho mafanaˈ ci Yihofa kitaanan hani?

⁵ Iti:yaho, o mihaydaan no Kawas a tamdaw ci Mosi. Tiya milongoc ci Mosi to sapitongalaw a mafanaˈ to pakayraan ni Yihofa a dademak i, pacaˈofan ni Yihofa cingra: “Tona o kafanaˈan Ako kiso ato nika o karahkeran Ako kiso saka, o lalahecien Ako a midoedo ko nilongocan iso.” (Kasadakan 33:12-17) Anini, ano mafanaˈ ci Yihofa to ngangan no mita, wa milifok kita to adihayay sapalemed. Sasamaan ko hademak ita ho mafanaˈ ci Yihofa kitaanan hani? O mamaolah kita Cingranan ato patafang to hakelong noˈ orip dademak i Cingranan.​—ˈOsien ko 1 Korinto 8:3.

6, 7. O Krisciyang alatek pakayni to maanan a lalangian, malahdaw ko kalawidang ci Yihofaan hani?

⁶ Sasamaan kita padadotoc mitafo to ngaˈayay kalawidang to kakarayan a Wama hani? Tengilen ko limoˈot ni Pawlo, palimoˈotan ni Pawlo ko Kalatiyaay a Krisciyang aka a masolot no ‘malonayay cangoˈotay a mararaway harateng’, mahaopay ko picangacang to pihayda no hekal. (Kalatiya 4:9) Sowal ni Pawlo macakatay to koniya Krisciyang i noˈadingoan, malo kafanaˈan no Kawas a tamdaw, kawra ‘patatikolay micada to’ mamahorac a demak. Tatodong no sowal ni Pawlo: “Ano matenesay a tamdaw kamo, hano patikolho midemak to mafolaay awaay ko epoc a demak hani?”

⁷ Wa hatira kita to Kalatiyaay a Krisciyang, pasiikor a romakat han? Mafanaˈto kita ci Yihofaan, ikor mahecaday ci Pawloan cato ka mikitini i hekal ni Satan a mikilim to pihayda. (ˈOsien ko Filipi 3:7, 8.) Misawadan ita ko ˈakawangay picudadan halatek, minaˈay to saka cakat anca adihay ko mietanan payci. Inanengay kita to radiw anca miontoay, na ngangaˈay cingangan anca adihay ko hafay, kawra sawad hananay koni kihecod.  (Hipray 11:24-27) Ano limelaan ko Krisciyang toniya demak, tada o mafolaayto, samanen o papatikol cingra micangacang to ‘malonayay cangoˈotay’ a demak no hekal alatek. *

8. Sasamaan kita paˈicel a micangacang to pihayda ni Yihofa a misaˈosian hani?

⁸ Sasamaan kita paˈicel to misaˈosian, micangacang to pihayda ni Yihofa hani? Haratengen ita ko tosa kalimelaan a demak. Saka cecay: Tatahadaˈoc ci Yihofa miharateng ato masemer to madimadiay mihodop Cingranan a tamdaw. (ˈOsien ko Hipray 6:10; 11:6) O “moecelay” ci Yihofa, cowa ko mamapawan to madimadiay a sikawdan Ningra ato madimadiay a demak nangra. Mafanaˈay ci Yihofa to cima ko ‘tamdaw Ningra’, ‘mafanaˈay’ Cingra toniya tamdaw. (2 Timoti 2:19) ‘Mafanaˈay Cingra to lalan no moecelay tamdaw,’ mafanaˈay to sasamaan milidong cangranan paliyas to sapalifet.​—ˈOlic 1:6; 2 Pitiro 2:9.

9. Tano maanan a pakayraan ko paihkal ni Yihofa to kafanaˈ Ningra to finawlan no Niyah hani? Tinakoen.

⁹ Latekay tano mikiriwiˈay a pakayraan ko paihkal ni Yihofa to kafanaˈ Ningra to finawlan no Niyah. (2 Rayray 20:20, 29) Haratengen, samanay ci Yihofa itini Kahngangay a Riyar milidong to finawlan paliyas to pilood no sofitay ni Falaw. (Kasadakan 14:21-30; ˈOlic 106:9-11) O midemakan ni Yihofa a kafahkaˈan tangongolay ko pilingat to tamdaw, ikor no 40 miheca iraayho ko milengoay toniya kafahkaˈan a demak. (Yosuwa 2:9-11) Paˈayaway ko Fangcalay Cudad to lalooden no Makok a pala ci Kok ko finawlan no Kawas, ano maharatengay ita to dadipoten ni Yihofa ko kafanaˈan Ningra a tamdaw, wa tanektekto ko pasoˈlin a misiˈayaw toniya sapalifet. (Icikil 38:8-12) Ano misiˈayaw kita to sapalifet no ikor i, wa mahemek kita, o micangacangan no niyah o pihayda ni Yihofa, cowa ko pihayda noniya hekal.

10. Haharatengen ita ko maanan a saka tosa kalimelaan demak?

¹⁰ O haharatengen ita saka tosa kalimelaan i: Ci Yihofa tano cowa ka harateng ita a pakayraan mihayda kitaanan. Midemak ko roma tamdaw to ngaˈayay o sapaˈaraw aca to tamdaw, kawra, sowal no Fangcalay Cudad cowa ko mamalifok nangra ko sapalifon ni Yihofa, samanen tiya pakahemeken no tamdaw cangra i, malifokayto nangra ko polong a sapalifon. (ˈOsien ko Matay 6:1-5.) O roma tamdaw terep sanay a midemak to ngaˈayay, ˈarawhan cowa ka haydaen no tamdaw, kawra, sowal ni Yis o Wama ningra wa ‘milonok a mihapinang’, mitoor to ngaˈayay waywayan a palifon cangranan. Kawra, latekay tano cowa ka harateng ita a pakayraan ko pipalifon ni Yihofa kitaanan. Nengnengen ita ko pina tinakoan.

11. Samaanay ci Yihofa paihkal to pihayda ci Mariyaan?

¹¹ Tiya pataynien ni Yihofa ko wawa Ningra i hekal i, mipiliˈay toya misapoeneray a limecedan ci Mariya malo wina no wawa. Itiniay i Nacali ko kitiraan ni Mariya, oniya mimingay niyaroˈ mira:ayay to Yirusalim ato fangcalay sefi. (ˈOsien ko Luka 1:26-33.) Hano pakalifok ci Mariya toniya sakaliko hani? O coyoh ci Kapriil miˈaraway ci Mariyaan, somowal cingranan “tada o kaolahan no Kawas kiso.” O roma i, mikitini i sowal ni Mariya to salawina ci Ilisapican ngaˈay mahapinang, o matenesay i noˈadingoan cingra. (Luka 1:46-55) Halafinayto ci Yihofa mihapinang ci Mariyaan, mafanaˈ to madimadiay  a tamdaw cingra, hanaca tano cowa ka harateng a pakayraan a palifon cingranan.

12, 13. Hofochanho ci Yis ato ikor no hofocen cingra a 40 romiˈad, samaanay ci Yihofa mifanaˈ toha saaroˈan ni Yis?

¹² Hofocento ci Yis, cowa ka pasayra i ˈaˈideman no Yirusalim ato Piclihim ci Yihofa a milasil toniya demak, tano kafahkaˈan a pakayraan mifanaˈ to tamdaw to mihofocanto ci Yis. Itiya, iraay ko pakaenay to siri a tamdaw itini Piclihim mihimaw to siri, miocoran ni Yihofa ko coyoh paˈaraw koniya sasafaay tamdaw. (Luka 2:8-14) Ikor, oya pakaenay mikilimay toya hofochanho a Yisan. (Luka 2:15-17) Cowa ka harateng ni Yosif aci Mariya, o milasilay to kahofoc ni Yis oyaan pakaenay to siri a tamdaw! Cowa ka hecad ko demak ni Akoma, papilisoˈan ningra koya matanengay tono fuˈis a tamdaw to kitiraan ni Yis, polong no Yirusalim a tamdaw pakayni kahofoc ni Yis a marawraw. (Matay 2:3) Tano hatiniay pakayraan ko pifanaˈ ni Satan to kahofoc ni Yis, telocto adihayay ko mapatayay a wawa.​—Matay 2:16.

¹³ Ikor no hofocen ci Yis 40 romiˈad, ci Mariya aci Yosif mitooray to saˈosi no sarikec, miˈorong to mimingayho a Yis tayra i maedeng 9 kongli ko raay a Yirusalim patafang. (Luka 2:22-24) Itini katayraan i fangcalay sefi a lalan miharatengay ci Mariya alatek, wa ira ko pakahapinangay a tamdaw to mikiriwiˈay koniya wawa han? Wa tano mikiriwiˈay pakayraan a misalisin ko saysi, milasil toha saaroˈan ni Yis noikor han? Soˈlinay mahapinangay ci Yis, kawra cowa ka haen o milongocan ni Mariya ko mifekaday a demak. Sowal no Fangcalay Cudad, oyaan ‘moecelay mangodoay to Kawas’ a Simiyong ato 84 ko mihecaan a fafahiyan ci Anna hananay a pairasolay ko pahapinangan ni Yihofa ci Yisan, o cangrato ko milasilay to tamdaw, o mamalo Misiya a wawa masadakayto.​—Luka 2:25-38.

14. O maanan ko sapafeli ni Yihofa ci Mariyaan a sapalemed hani?

¹⁴ Ikor, pakayni ka madimadi ni Mariya midimokos ato palahad ci Yisan, padotocay ci Yihofa a mihayda cingranan hokira? Soˈlinay mihaen ko demak ni Yihofa, mitilidan Ningra ko nano demak ni Mariya i Fangcalay Cudad. Itini pitosil ni Yis to tolo miheca ira ko kalitosa, maponengayto ci Mariya, mansa materekay i Nacali a maˈorip. Soˈlin awa ko toki ni Mariya kalacafay ci Yisan a talacowacowa mitosil, kawra tiya patayen ci Yis i, padotocay ci Mariya i tatihi ni Yis. (Yohani 19:26) Mapatayto ci Yis, malacafayay ci Mariya to romaroma nisawawaan itini Yirusalim tahira a Kocinsic. (Dmak 1:13, 14) Toya romiˈad, matefaday ko fangcalay saocor i tireng no nisawawaan, maedeng mapasimalay no fangcalay saocor ci Mariya, ano mahaenay i, ira ko toki ningra itini kakarayan tahadaˈoc a malacafay ci Yisan. Hakelong no ˈorip ni Mariya madimadiay, o hatiniay a sapalifon cingranan tada o taˈangayay sakaliko!

15. Itiniho i hekal ci Yis i, samaanan ni Yihofa mihayda cingra hani?

¹⁵ Itiniho i hekal ci Yis i, cowa ka ciharateng to sapihaydaaw no ˈaˈideman no pihakelongan ato tapang no mirikecay. Kawra, mahemekay ci Yis milifok to pihayda ni Yihofa, sowal no Fangcalay Cudad, kina toloay ci Yihofa nai kakarayan a pasowal to mihaydaay ci Yisan. Sakina cecay itiniay picada ni Yis to inoˈ i Yorotan ˈAlo, sowal ni Yihofa: “O kakaolahan Ako a wawa konini. O kakahemekan Ako Cingra.” (Matay 3:17) Coko ci Yis aca, pakatengilay ko painoˈay a Yohani toniya sowal. Sakina tosa itiniay iˈayaw no kinafalah ci Yis to ˈorip to cecay miheca, tatoloay tarokos pakatengilay to sowal ni Yihofa: “O kakaolahan Ako a wawa  konini. O kakahemekan Ako cingra.” (Matay 17:5) Sakina tolo itiniay iˈayaw no kinafalah ci Yis to ˈorip pina romiˈad, miliyaway ci Yihofa nai kakarayan pasayra ci Yisan a somowal.​—Yohani 12:28.

16, 17. Samaanan ni Yihofa tano cowa ka harateng ni Yis a pakayraan mihayda cingra hani?

¹⁶ Mafanaˈay ci Yis to mamapaoraf no tamdaw cingra to pakaditay to Kawas sanay a demak, mapakangodo misemsem a mapatay, kawra kamayanayho cingra mitolon micangacang to mamalaˈosi ko araaw ni Yihofa. (Matay 26:39, 42) Sowal no Fangcalay Cudad, ci Yis ‘sakahemaw to pisamsam, hadidi han ningra ko nika pacek ningra i hecek,’ o pihayda no kakarayan Wama ko micangacangan ningra, cowa ko pihayda no hekal. (Hipray 12:2) Mihaenay, samaanan ni Yihofa a mihayda ko wawa Ningra hani?

¹⁷ Itiniho ci Yis i hekal na pasowalay, ciharatengay cingra itini tatihi no kakarayan Wama milifok to saˈayaway a ˈdil. (Yohani 17:5) Ano nengnengen, cowa ka ciharateng ci Yis ano patikol i kakarayan, milifok to mikikakaay ˈakawang a saaroˈan. Kawra tano cowa ka harateng ni Yis a pakayraan ko pihayda ni Yihofa cingranan. Patikolan ni Yihofa ci Yis a paˈorip, pacakat cingranan ‘pala saˈakawangay a saaroˈan’, halo pafeli cingranan to cowa ko mamapatay a ˈorip *, onini a sakaliko cowaho kalifok no romaroma masangaˈay a pinaˈorip. (Filipi 2:9; 1 Timoti 6:16) Madimadiay ci Yis to kakarayan Wama, o hatiniay a sapalifon pakayni ci Yisan tada o taˈangayay a pihayda!

18. Sasamaan a miliyas to sapicangacangaw to pihayda no hekal hani?

¹⁸ Sasamaan a miliyas to sapicangacangaw to pihayda no hekal hani? Haratengen ita oha mamasemer ato papalifon ci Yihofa to madimadiay a sikawdan Ningra, hanaca tatano kafahkaˈan ita a pakayraan a palifon kitaanan. Noikor, wa ira ko cowa ka harateng ita a sapalemed. Anini, soˈlin wa mihadidi kita to masakenaay a roray ato sapalifet, hamaan mapawan o pihayda no hekal ato nini a ciraraway hekal wa malahdaw maemin. (1 Yohani 2:17) O kakarayan Wama ci Yihofa o moecelay, cowa ko mamapawan to nano demak ita ato paihkalan a olah pakayni i ngangan Ningra. (Hipray 6:10) Wa pakayni ko pihayda ni Yihofa kitaanan—ora sapalemed mamataˈlif to maharatengay no mita!