1. Anong natural na pagmawot an igwa kita gabos, asin ano an kaiba diyan?

ANO daw an mamamatian mo kun an saro na bisto mo asin iginagalang malingawan an pangaran mo, o mas grabe, dai ka pa ngani mabisto? Puwedeng makadisganar iyan na marhay sa saimo. Taano? Huling an kada saro sa sato igwang natural na pagmawot na akuon kan iba. An pagmidbid na gusto tang makamtan bako lang basta idtong mabisto kita kan iba; gusto ta man na midbidon kita sa kun siisay kita asin sa kun ano an naisagibo ta.—Bil. 11:16; Job 31:6.

2, 3. Paano puwedeng magin biribid an pagmawot na apresyaron kan iba? (Hilingon an ritrato sa itaas.)

² Pero arog kan iba pang natural na mga pagmawot, puwedeng magin biribid an satong pagmawot na apresyaron kan iba huli sa satong pagkabakong perpekto. Tibaad mawuton na niyato an bako tamang pagmidbid. Pinapagrabe kan kinaban ni Satanas an pagmawot nin mga tawo na magin sikat asin midbidon kan iba kaya nairarayo an atensiyon ninda sa saro na talagang maninigo na midbidon asin sambahon, an satong Ama sa langit, an Diyos na Jehova.—Kap. 4:11.

 ³ Kan panahon ni Jesus, igwang mga lider nin relihiyon na may salang pagmansay kun dapit sa pagmidbid. Pinatanidan ni Jesus an saiyang mga parasunod: “Mag-ingat kamo sa mga eskriba na gustong naglalakaw na nakasulot nin haralabang bado asin gustuhon na tinatawan nin galang sa mga pampublikong lugar saka gustuhon na tumukaw sa inutan na mga tukawan sa mga sinagoga asin sa mga puwesto sa bangkete na nakareserba sa espesyal na mga bisita.” Sinabi pa niya: “An mga ini maako nin mas magabat na paghukom.” (Luc. 20:46, 47) Sa kabaliktaran, kinomendaran ni Jesus an sarong dukhang babaying balo na an sadit na kontribusyon posibleng marhay na dai narisa kan iba. (Luc. 21:1-4) Malinaw na lain na marhay an pagmansay ni Jesus kun dapit sa pagmidbid. Tatabangan kita kan artikulong ini na mapagdanay an tamang pagmansay, an pagmansay na inuuyunan kan Diyos na Jehova.

4. Ano an pinakanangungurog na klase nin pagmidbid, asin taano?

⁴ Kun siring, ano an pinakanangungurog na klase nin pagmidbid na puwede niyatong hinguwahon na makamtan? Bako iyan an atensiyon na gustong makamtan kan mga tawo sa langtad nin edukasyon, negosyo, asin entertainment. Imbes, iyan an klase nin pagmidbid na sinambit ni Pablo: “Ngunyan na namidbid na nindo an Diyos, o puwede man sabihon na, namidbid na kamo nin Diyos, ano ta binabalikan nindo giraray an maluya saka daing serbing mga bagay asin gusto nindo giraray magpauripon sa mga ini?” (Gal. 4:9) Pambihirang pribilehiyo nanggad na ‘mamidbid nin Diyos,’ an Supremong Tagapamahala kan uniberso! Gusto niyang magkaigwa nin haraning relasyon sa satuya. Arog kan pagkasambit nin sarong iskolar, kita “magigin mga resipiyente kan saiyang pag-uyon.” Kun minimidbid kita ni Jehova bilang saiyang mga amigo, nauutob ta an pinakang katuyuhan kan satong pag-eksister.—Par. 12:13, 14.

5. Ano an kaipuhan niyatong gibuhon tanganing mamidbid kita ni Jehova?

⁵ Naeksperyensiyahan ni Moises an arog kaiyan na pribilehiyo. Kan nakiulay siya ki Jehova na ipaaram sa saiya nin mas urog pa an Saiyang mga dalan, nagsimbag si Jehova: “Gigibuhon ko man an bagay na ini na hinahagad mo, huling nawiwilihan taka saka midbid takang marhay.” (Ex. 33:12-17, NW) Puwede man kitang mag-ako nin marahayon na mga bendisyon kun midbid kita personalmente ni Jehova. Pero, ano an kaipuhan niyatong gibuhon tanganing mamidbid kita ni Jehova? Kaipuhan niyatong mamutan siya asin idusay an satong buhay sa saiya.—Basahon an 1 Corinto 8:3.

6, 7. Ano an puwedeng magin dahilan na maiwara ta an satong marahay na relasyon ki Jehova?

⁶ Pero, kaipuhan niyatong pagdanayon na makusog an satong mahalagang marhay na relasyon sa satong Ama sa langit. Arog kan mga Kristiyano sa Galacia na sinuratan ni Pablo, kaipuhan man niyatong likayan na magpauripon sa “maluya saka daing serbing mga bagay” kan kinaban na ini, kaiba na an paghihinguwang makamtan an pag-umaw kan kinaban. (Gal. 4:9) An mga Kristiyanong idto kan inot na siglo nag-uswag na sagkod sa puntong namidbid na sinda nin Diyos. Alagad, sinabi ni Pablo na “binabalikan” kan mismong mga tugang na iyan an daing halagang mga bagay. Garo man sana sinasabi sa sainda ni Pablo: “Pagkatapos kan gabos na paghihinguwa nindo, taano ta babalikan pa nindo an daing kamanungdanan na mga bagay na binayaan na nindo?”

⁷ Posible man daw iyan na mangyari sa sato ngunyan? Iyo. Kan mamidbid ta si Jehova, arog ni Pablo, tibaad tinalikdan ta na an pagkaprominente sa kinaban ni Satanas. (Basahon an Filipos 3:7, 8.) Tibaad sinayumahan ta an oportunidad na magkaigwa nin halangkaw na edukasyon, o an alok na magkaigwa nin halangkaw na posisyon sa trabaho o an oportunidad na mas makaganar sa negosyo. Kun matibay kita sa musika  o may potensiyal na magin matibay na atleta, puwede kutang nagin sikat asin mayaman kita huli kaiyan, pero tinalikdan ta iyan gabos. (Heb. 11:24-27) Kaya bako nanggad madunong kun ibibilang tang ‘nasayang na mga oportunidad’ an madunong na mga desisyon na iyan! An kaisipan na iyan puwedeng magin dahilan na hinguwahon tang makamtan an mga bagay na ibinilang ta nang “maluya saka daing serbing mga bagay” kan kinaban na ini.

8. Ano an makakapakusog kan satong determinasyon na hinguwahon na makamtan an pagmidbid ni Jehova?

⁸ Paano ta mapapakusog an satong determinasyon na hinguwahon na makamtan an pagmidbid ni Jehova, bako an pagmidbid kan kinaban? Tanganing magibo iyan, kaipuhan niyatong girumdumon an duwang mahalagang bagay. Inot, pirming tinatawan ni Jehova nin pagmidbid an maimbod na mga naglilingkod sa saiya. (Basahon an Hebreo 6:10; 11:6) Pinapahalagahan niyang marhay an lambang lingkod niya, asin para sa saiya ‘kabikuan’ na baliwalaon an mga maimbod sa saiya. Pirming “midbid ni Jehova kun sairisay an saiya.” (2 Tim. 2:19) ‘Aram niya an dalan nin mga matanos’ asin aram niya kun paano sinda ililigtas sa kasakitan.—Sal. 1:6; 2 Ped. 2:9.

9. Magtao nin mga halimbawa kun paano ipinahiling ni Jehova sa mga lingkod niya an saiyang pag-uyon.

⁹ Kun minsan, ipinapahiling ni Jehova sa pambihirang mga paagi an pag-uyon niya sa saiyang mga lingkod. (2 Cron. 20:20, 29) Halimbawa kaiyan an pagligtas ni Jehova sa saiyang banwaan sa Dagat na Pula kan linalapag sinda kan makusog na hukbo ni Paraon. (Ex. 14:21-30; Sal. 106:9-11) Talagang makangangalas an pangyayaring ini kaya dawa pakalihis nin 40 taon, pinag-uurulayan pa man giraray iyan kan mga tawo. (Jos. 2:9-11) Mapapakusog nanggad kita kun gigirumdumon ta an arog kaiyan na pagpahiling nin pagkamuot asin kapangyarihan ni Jehova huling madali na an ihinulang pag-atake sa sato kan Gog nin Magog! (Ezeq. 38:8-12) Sa panahon na iyan, lalo niyatong ipagpapasalamat na hininguwa tang makamtan an pagmidbid kan satong Diyos, bako an pagmidbid kan kinaban.

10. Anong paagi nin pagmidbid ni Jehova an dapat niyatong isaisip?

¹⁰ Kaipuhan man niyatong isaisip an ikaduwang mahalagang bagay: Puwede kitang tawan nin pagmidbid ni Jehova sa dai nanggad niyato inaasahan na mga paagi. Sinabi sa mga tawong naggigibo nin marahay tangani sanang magpasikat sa mga tawo na mayo sindang aakuon na balos hali ki Jehova. Taano? Huling nakukua na ninda an bilog nindang balos pag tinatawan sinda nin pag-umaw kan iba. (Basahon an Mateo 6:1-5.) Pero sinabi ni Jesus na an saiyang Ama “nakakahiling kan gabos na bagay,” kaya aram Niya kun sairisay an mga dai natatawan nin maninigong pagmidbid para sa marahay na mga bagay na ginigibo ninda sa iba. Naririsa Niya an mga gibong iyan asin binabalusan Niya an lambang indibidwal sigun diyan. Pero kun minsan, binabalusan kita ni Jehova sa dai inaasahan na mga paagi. Pag-ulayan ta an pirang halimbawa.

11. Paano si Jehova nagpahiling nin pagmidbid sa hoben na babaying si Maria?

¹¹ Kan nag-abot na an tamang panahon tanganing mamundag an Aki nin Diyos bilang tawo, pinili ni Jehova an mapakumbabang birhen na si Maria para magin ina kan espesyal na aking ini. Nakaistar si Maria sa sadit na siyudad nin Nazaret, na harayo sa Jerusalem asin sa magayunon na templo kaini. (Basahon an Lucas 1:26-33.) Taano ta si Maria an pinili para sa pribilehiyong ini? Sinabi sa saiya ni anghel Gabriel na ‘nawiwilihan siya nin Diyos.’ Maririsa ta an makusog na espirituwalidad ni Maria sa mga sinabi  niya sa pinsan niyang si Elizabeth. (Luc. 1:46-55) Iyo, pinagmamasdan ni Jehova si Maria, asin tinawan niya ini nin dai inaasahan na pribilehiyo huli sa kaimbudan kaini.

12, 13. Sa anong paagi tinawan nin maninigong pagmidbid si Jesus kan siya mamundag asin kan darahon siya sa templo pakalihis nin 40 aldaw?

¹² Kan ipangaki na ni Maria si Jesus, dai itinao ni Jehova sa siisay man na prominenteng opisyal o tagapamahala sa Jerusalem asin Betlehem an onra na maaraman kun ano an nangyari. Nagpahiling an mga anghel sa mga pastor na nag-aataman nin mga karnero sa kalangtadan sa luwas kan Betlehem. (Luc. 2:8-14) Dangan dinumanan kan mga pastor na ini an bagong mundag na umboy. (Luc. 2:15-17) Siguradong nasurpresa si Maria asin Jose na mahiling na tinawan nin onra si Jesus sa arog kaiyan na paagi! Pag-isipan an pagkakalain kan mga pamamaagi ni Jehova asin kan Diyablo. Kan magsugo si Satanas nin mga astrologo tanganing bisitahon si Jesus asin an saiyang mga magurang, nagkariribok an mga taga Jerusalem sa bareta dapit sa pagkamundag ni Jesus. (Mat. 2:3) An hayagan na pagpaising ini kan pagkamundag ni Jesus an nagin dahilan kan kagadanan kan dakul na inosenteng aki.—Mat. 2:16.

¹³ Kuwarentang aldaw pagkamundag ni Jesus, kahagadan na magtao si Maria nin dulot ki Jehova sa templo sa Jerusalem, na mga siyam na kilometro hali sa Betlehem. (Luc. 2:22-24) Mantang nasa dalan kaiba ni Jose asin Jesus, posibleng iniisip ni Maria kun baga matao an naglilingkod na saserdote nin espesyal na pagmidbid sa magigin papel ni Jesus sa maabot na panahon. Igwa man nanggad nin nangyaring pagmidbid, pero bako sa paaging inaasahan ni Maria. Imbes, ginamit ni Jehova an “matanos saka maki-Diyos” na lalaking si Simeon, asin an 84 anyos na balong si Ana, tanganing ipamidbid na an aking ini iyo an magigin ipinanugang Mesiyas, o Cristo.—Luc. 2:25-38.

14. Anong mga bendisyon an inako ni Maria hali ki Jehova?

¹⁴ Kumusta si Maria? Padagos daw siyang tinawan ni Jehova nin maninigong pagmidbid huli sa responsableng pag-ataman asin pagpadakula sa saiyang Aki? Iyo nanggad. Iiniba nin Diyos sa Bibliya an saiyang mga ginibo asin sinabi. Minalataw na mayo sa kamugtakan si Maria tanganing umiba ki Jesus durante kan tulo may kabangang taon na ministeryo kaini. Posibleng bilang sarong balo, kinaipuhan ni Maria na magdanay sa Nazaret. Pero dawa dakul siyang napalampas na mga pribilehiyo, yaon siya kan oras na nagadan si Jesus. (Juan 19:26) Saka pag-abot nin panahon, nasa Jerusalem si Maria kaiba kan mga disipulo kan mga aldaw bago an Pentecostes kan ibubo an banal na espiritu. (Gibo 1:13, 14) Posibleng marhay na linahidan siya kaiba kan iba pang yaon duman. Kun iyo, nangangahulugan iyan na natawan siya kan oportunidad na makaiba si Jesus sa langit sagkod lamang. Marahayon nanggad na balos sa saiyang maimbod na paglilingkod!

15. Kan si Jesus nasa daga, paano ipinahiling ni Jehova an pag-uyon niya sa saiyang Aki?

¹⁵ Dai minawot ni Jesus na tawan siya nin onra kan mga lider nin relihiyon o pulitika kan yaon siya sa daga. Pero siguradong napakusog nanggad siya kan tinawan siya ni Jehova nin pagmidbid sa tulong pagkakataon paagi sa direktang pagtaram hali sa langit. Pagkatapos mismong mabawtismuhan si Jesus sa Salog nin Jordan, sinabi ni Jehova: “Ini an sakuyang Aki, an namumutan, na sakong inuuyunan.” (Mat. 3:17) Minalataw na si Juan Bautista sana an ibang tawong yaon duman na nakadangog kan mga tataramon na idto. Dangan, mga sarong taon bago magadan si Jesus, tulo sa mga apostol niya an nadangog si Jehova na nagsabi ki Jesus: “Ini an sakuyang Aki, an namumutan, na sakong inuuyunan. Maghinanyog kamo sa saiya.” (Mat.  17:5) Ultimo, mga pirang aldaw na sana bago magadan si Jesus, nakipag-ulay giraray si Jehova sa saiyang Aki.—Juan 12:28.

16, 17. Paano tinawan ni Jehova nin onra si Jesus sa dai inaasahan na paagi?

¹⁶ Dawa ngani aram ni Jesus na ibibilang siyang paralanghad asin makakaeksperyensiya siya nin makasusupog na kagadanan, ipinamibi niya na lugod an kabutan ni Jehova an mautob bako an sa saiya. (Mat. 26:39, 42) “Tinagalan niya an hariging pasakitan, na dai iniintindi an kasusupgan,” na dai minawot na makua an pagmidbid kan kinaban, kundi an pagmidbid kan saiyang Ama. (Heb. 12:2) Paano ipinahiling ni Jehova an pagmidbid na iyan?

¹⁷ Mantang nasa daga, ipinahiling ni Jesus na mawot niyang makabalik sa kamurawayan na yaon sa saiya kaidto sa langit kaiba kan saiyang Ama. (Juan 17:5) Mayo kitang mababasa na nagmawot si Jesus nin labi pa diyan. Dai siya naglalaom na ilalangkaw an posisyon niya sa langit. Pero ano an ginibo ni Jehova? Tinawan niya nin onra si Jesus sa dai inaasahan na paagi. Binuhay niya liwat si Jesus tanganing tawan nin “sarong mas halangkaw na posisyon” asin tinawan siya nin sarong bagay na dai pa naitatao sa siisay man kan panahon na idto—an imortal na buhay bilang espiritu! * (Fil. 2:9; 1 Tim. 6:16) Pambihirang pagmidbid nanggad iyan sa kaimbudan na ipinahiling ni Jesus!

18. Ano an makakatabang sa sato na dai pagmawuton an pag-uyon kan kinaban na ini?

¹⁸ Ano an makakatabang sa sato na dai pagmawuton an pag-uyon kan kinaban na ini? Tandaan na pirming tinatawan ni Jehova nin pagmidbid an saiyang maimbod na mga lingkod asin na sa parati binabalusan niya sinda sa dai inaasahan na mga paagi. Mayong nakakaaram kun anong dai inaasahan na mga bendisyon an naghahalat sa sato sa maabot na panahon. Pero ngunyan, mantang tinatagalan ta an mga kasakitan asin pagbalo sa maraot na kinaban na ini, pirmi lugod niyatong tandaan na mapapara an kinaban na ini, kaiba an ano man na pagmidbid na tibaad ialok kaiyan. (1 Juan 2:17) An satong mamumuton na Ama, si Jehova, ‘bakong biko para malingawan an satong ginibo asin an pagkamuot niyato para sa saiyang ngaran.’ (Heb. 6:10) Iyo, papahilingan niya kita nin pag-uyon—tibaad sa mga paagi pa nganing dai ta lamang maiisip ngunyan!