Sin-o ang Gusto Mo nga Magpadungog sa Imo?
“Ang Dios matarong kag indi niya pagkalimtan ang inyo binuhatan kag ang gugma nga ginpakita ninyo para sa iya ngalan.”—HEB. 6:10.
1. Ano nga handum ang natural sa aton tanan, kag ano ang nalakip sa sini?
ANO ang batyagon mo kon ang isa nga kilala mo kag ginarespeto nalipat sa imo ngalan, ukon nalipat nga kilalahay kamo? Mahimo masubuan ka. Ngaa? Bangod natural sa kada isa sa aton ang handum nga kilalahon sang iban. Pero indi lang aton ngalan ang gusto naton nga makilala sang iban, kundi pati ang aton mga kinaiya kag mga hinimuan.—Num. 11:16; Job 31:6.
2, 3. Paano mangin indi husto ang aton handum nga dayawon? (Tan-awa ang piktyur sa umpisa sini nga artikulo.)
2 Pero bangod indi kita perpekto, ining aton natural nga handum mahimo mangin indi husto. Basi handumon naton ang indi nagakaigo nga pagkilala, pagdayaw, ukon pagpadungog. Ginapasanyog sang kalibutan ni Satanas nga handumon sang mga tawo nga mangin bantog kag dayawon. Bangod sini, indi na si Jehova nga Dios nga aton Amay sa langit ang ginadayaw kag ginasimba.—Bug. 4:11.
3 Sang panahon ni Jesus, indi husto ang pagtamod sang pila ka lider sang relihion parte sa pagdayaw. Ginpaandaman ni Jesus ang iya mga sumulunod: “Mag-andam kamo sa mga escriba nga luyag magdayandayan nga may malaba nga mga bayo kag luyag nila tamyawon sila sang mga tawo sa mga tiendahan kag luyag nila magpungko sa nahauna [“pinakamaayo,” footnote] nga mga pulungkuan sa mga sinagoga kag sa mga pulungkuan nga para sa dungganon nga mga bisita sa mga sinalusalo.” Nagsiling pa sia: “Magabaton sila sing mas mabug-at nga silot.” (Luc. 20:46, 47) Pero, gindayaw ni Jesus ang imol nga balo nga babayi nga nag-amot sing duha lang ka sensilyo, nga mahimo wala gid gintalupangod sang iban. (Luc. 21:1-4) Gani kon parte sa pagdayaw, tuhay gid ang pagtamod ni Jesus sangsa iban. Buligan kita sini nga artikulo nga mahibaluan ang pagtamod ni Jehova nga Dios parte sa husto nga pagdayaw ukon pagpadungog.
ANG PINAKAMAAYO NGA KADUNGGANAN
4. Ano nga kadungganan ang pinakamaayo nga tinguhaan, kag ngaa?
4 Ano nga kadungganan ang pinakamaayo nga tinguhaan? Indi ang kadungganan nga gusto sang mga tawo paagi sa pagkuha sang mataas nga edukasyon, paghimakas sa negosyo, ukon pagtinguha nga mangin bantog nga artista ukon atleta. Sa baylo, hunahunaa ang ginsiling ni Pablo: “Karon nga kilala na ninyo ang Dios, ukon sa baylo kilala na kamo sang Dios, ngaa nagabalik pa kamo sa pagsunod sa wala sing pulos nga mga butang sining kalibutan?” (Gal. 4:9) Dalayawon gid nga ‘kilalahon sang Dios,’ ukon padunggan sang Supremo nga Manuggahom sang uniberso! Gusto niya nga mangin suod kita sa iya, ukon “ginatalupangod niya kita,” suno sa isa ka eksperto sa Biblia. Kon kilalahon kita ni Jehova bilang iya abyan, may katuyuan ang aton kabuhi.—Man. 12:13, 14.
5. Ano ang himuon naton para kilalahon kita sang Dios bilang iya abyan?
5 Ginkilala ni Jehova si Moises bilang iya abyan. Sang nangabay sia kay Jehova nga tudluan sia sang Iya mga dalanon, nagsabat si Jehova: “Himuon ko man ang ginapangabay mo, bangod nahamuot ako sa imo kag kilala ko gid ikaw.” (Ex. 33:12-17) Mabaton man naton ining dalayawon nga mga pagpakamaayo kon kilala gid kita ni Jehova. Ano ang himuon naton para kilalahon kita ni Jehova? Dapat naton sia higugmaon kag idedikar naton ang aton kabuhi sa iya.—Basaha ang 1 Corinto 8:3.
6, 7. Ano ang mahimo mangin rason nga maguba ang aton kaangtanan kay Jehova?
6 Dapat naton pabaloran ang aton kaangtanan sa aton Amay sa langit. Pareho sa mga Cristiano sa Galacia nga ginsulatan ni Pablo, indi naton dapat pagtinguhaan ang “wala sing pulos nga mga butang” sini nga kalibutan, lakip ang pagpadungog nga ginatanyag sini. (Gal. 4:9) Ining mga Cristiano sang unang siglo nag-uswag kag ginkilala sila sang Dios. Pero, nagsiling si Pablo nga ini mismo nga mga kauturan ‘nagbalik’ sa wala sing pulos nga mga butang. Gani daw pareho sini ang pamangkot ni Pablo: “Daku na ang inyo pag-uswag, ngaa nagbalik pa kamo sa wala sing pulos nga mga butang nga ginbiyaan na ninyo?”
7 Mahimo man bala ini matabo sa aton subong? Huo. Sang nakilala naton si Jehova, ginsikway man naton ang kadungganan nga ginatanyag sang kalibutan ni Satanas, pareho sa ginhimo ni Pablo. (Basaha ang Filipos 3:7, 8.) Ayhan wala naton ginbaton ang kahigayunan nga makaeskwela sa unibersidad, magtaas ang posisyon sa trabaho, ukon makaganar sing daku sa negosyo. Puede kuntani kita mangin bantog ukon manggaranon bangod maayo kita sa musika ukon sa sports, pero gintalikdan naton ini. (Heb. 11:24-27) Indi gid maalamon maghunahuna nga may nawasi kita bangod sang aton maayo nga mga desisyon! Kon amo sini ang aton ginahunahuna, mahimo kita magbalik sa “wala sing pulos” nga mga butang sini nga kalibutan. *
PABAKURA ANG IMO HANDUM NGA PADUNGGAN KA NI JEHOVA
8. Paano naton mapabakod ang aton handum nga padunggan kita ni Jehova?
8 Paano naton mapabakod ang aton handum nga padunggan kita ni Jehova kag indi sang kalibutan? Dapat naton dumdumon ang duha ka importante nga kamatuoran. Una, pirme ginapadunggan ni Jehova ang mga matutom sa iya. (Basaha ang Hebreo 6:10; 11:6) “Matarong” sia, gani ginapabaloran gid niya ang kada isa sa iya mga alagad, kag indi gid niya pagkalimtan ang mga matutom sa iya. “Kilala ni Jehova ang mga ginapanag-iyahan niya.” (2 Tim. 2:19) “Nahibaluan [niya] ang dalanon sang matarong” kag nakahibalo sia kon paano sila luwason sa pagtilaw.—Sal. 1:6; 2 Ped. 2:9.
9. Maghatag sing halimbawa sang pagpakita ni Jehova sang kahamuot sa iya katawhan.
9 Kon kaisa, ginapakita ni Jehova ang iya kahamuot sa iya katawhan sa dalayawon nga mga paagi. (2 Cron. 20:20, 29) Halimbawa, binagbinaga ang paagi ni Jehova sa pagluwas sa iya katawhan sa Pula nga Dagat sang ginlagas sila sang mga soldado sang Paraon. (Ex. 14:21-30; Sal. 106:9-11) Makahalawhaw gid ini nga hitabo kay ginaistoryahan gihapon ini sang mga tawo didto pagligad sang 40 ka tuig. (Jos. 2:9-11) Makapalig-on gid kon dumdumon naton ang gugma kag gahom nga ginpakita ni Jehova sadto bangod nagahilapit na ang pagsalakay sa aton sang Gog sang Magog! (Ezeq. 38:8-12) Sa sina nga tion, malipay gid kita kay gintinguhaan naton ang kadungganan nga ginahatag sang aton Dios, indi sang kalibutan.
10. Ano ang dapat naton dumdumon parte sa paghatag ni Jehova sang kadungganan?
10 Dapat man naton dumdumon ang ikaduha nga importante nga kamatuoran: Mahimo kita padunggan ni Jehova sa paagi nga wala naton ginapaabot. Ang mga nagahimo sing maayo para dayawon sang mga tawo ginsilingan nga wala sila sing padya halin kay Jehova. Ngaa? Nabaton na nila ang ila bug-os nga padya sang gindayaw sila sang iban. (Basaha ang Mateo 6:1-5.) Pero, nagsiling si Jesus nga ‘ginatan-aw sang iya Amay sa tago’ ang mga dapat dayawon bangod sang ila ginhimo nga maayo sa iban. Ginatalupangod niya ini nga mga buhat kag ginapadyaan niya ang kada isa. Pero, kon kaisa, ginapadyaan kita ni Jehova sa paagi nga wala naton ginapaabot. Binagbinagon naton ang pila ka halimbawa.
GINPADUNGGAN ANG MAPAINUBUSON NGA BABAYI
11. Paano ginpadunggan ni Jehova si Maria?
11 Ginpili ni Jehova ang mapainubuson nga birhen nga si Maria nga mangin iloy sang iya Anak, nga si Jesus. Nagaistar si Maria sa gamay nga siudad sang Nazaret, nga malayo sa Jerusalem kag sa matahom nga templo sini. (Basaha ang Lucas 1:26-33.) Ngaa si Maria ang ginpili? Ginsilingan sia sang anghel nga si Gabriel nga “nahamut-an [sia] sang Dios.” Mahantop naton nga mabakod ang iya espirituwalidad sa ginsiling niya sa iya paryente nga si Elisabet. (Luc. 1:46-55) Huo, nakita ni Jehova si Maria, kag ginpakamaayo niya ang iya katutom paagi sa paghatag sa iya sang wala ginapaabot nga pribilehiyo.
12, 13. Paano ginpadunggan si Jesus sang ginbun-ag sia kag sang gindala sia sa templo pagligad sang 40 ka adlaw?
12 Sang ginbun-ag ni Maria si Jesus, wala ginhatag ni Jehova sa kilala nga mga opisyal ukon mga manuggahom sa Jerusalem kag Betlehem ang kadungganan nga mahibaluan ining importante nga hitabo. Nagpakita ang mga anghel sa kubos nga mga manugbantay nga nagapahalab sang ila mga karnero sa gua sang Betlehem. (Luc. 2:8-14) Dayon ginkadtuan sini nga mga manugbantay ang bag-ong bun-ag nga bata. (Luc. 2:15-17) Mahimo nga nagdayaw gid sanday Maria kag Jose nga ginpadunggan si Jesus sa sining tumalagsahon nga paagi! Binagbinaga ang kinatuhayan sang paagi ni Jehova kag sang Yawa. Sang ginpakadto ni Satanas ang mga astrologo kay Jesus kag sa iya mga ginikanan, natublag ang tanan nga tawo sa Jerusalem sang mabalitaan nila ang pagkabun-ag ni Jesus. (Mat. 2:3) Bangod sini, madamo nga inosente nga kabataan ang ginpatay.—Mat. 2:16.
13 Pagligad sang 40 ka adlaw pagkabun-ag ni Jesus, dapat maghalad si Maria kay Jehova sa templo sa Jerusalem, nga mga siam ka kilometro halin sa Betlehem. (Luc. 2:22-24) Samtang nagalakbay si Maria upod sanday Jose kag Jesus, mahimo nagapalibog sia kon bala magahatag ang saserdote sing pinasahi nga pahibalo parte sa katungdanan ni Jesus sa ulihi. Ginpadunggan gid man si Jesus, pero sa paagi nga wala ginpaabot ni Maria. Gingamit ni Jehova ang “matarong kag diosnon” nga si Simeon, kag ang 84 anyos nga balo kag manalagna nga si Ana, para ipahibalo nga ini nga bata amo ang ginpromisa nga mangin Mesias, ukon Cristo.—Luc. 2:25-38.
14. Ano nga mga pagpakamaayo ang nabaton ni Maria halin kay Jehova?
14 Kamusta naman si Maria? Padayon bala sia nga ginpadunggan ni Jehova bangod ginpadaku niya sing maayo si Jesus? Huo. Ginsigurado sang Dios nga masulat sa Biblia ang mga ginhimo kag ginhambal ni Maria. Mahimo nga bangod sang kahimtangan ni Maria, wala sia makaupod sa pagministeryo ni Jesus sing tatlo ka tuig kag tunga. Bangod balo na sia, mahimo nga nagpabilin sia sa Nazaret. Pero bisan pa wala niya maeksperiensiahan ang makapalig-on nga mga eksperiensia sang mga nakaupod kay Jesus, ara sia sang napatay si Jesus. (Juan 19:26) Sang ulihi, ara si Maria sa Jerusalem kaupod ang mga disipulo antes ginbubo ang balaan nga espiritu sang Pentecostes. (Binu. 1:13, 14) Gani ginhaplasan si Maria kaupod sang iban. Ginhatagan sia sing kahigayunan nga mangin kaupod ni Jesus sa langit sing wala sing katapusan. Dalayawon gid nga padya bangod sang iya katutom!
GINPADUNGGAN NI JEHOVA ANG IYA ANAK
15. Sang ari si Jesus sa duta, paano sia ginpadunggan ni Jehova?
15 Indi gusto ni Jesus nga padunggan sia sang mga lider sang relihion ukon sang gobierno. Pero tatlo ka beses nga naghambal si Jehova halin sa langit para kilalahon si Jesus. Napalig-on gid sa sini si Jesus! Pagkatapos gid mabawtismuhan si Jesus sa Suba Jordan, nagsiling si Jehova: “Ini ang akon Anak, ang hinigugma, nga ginakahamut-an ko.” (Mat. 3:17) Mahimo nga si Juan nga Manugbawtismo lang ang isa pa ka tawo nga nakabati sini. Dayon, mga isa ka tuig antes sang kamatayon ni Jesus, tatlo sa iya mga apostoles ang nakabati sa ginsiling ni Jehova parte kay Jesus: “Ini ang akon Anak, ang hinigugma, nga ginakahamut-an ko. Magpamati kamo sa iya.” (Mat. 17:5) Sang ulihi, mga pila na lang ka adlaw antes sang kamatayon ni Jesus, may ginhambal liwat si Jehova halin sa langit para sa iya Anak.—Juan 12:28.
Ano ang natun-an mo sa paagi ni Jehova sa pagpadungog sa iya Anak? (Tan-awa ang parapo 15-17)
16, 17. Paano ginpadunggan ni Jehova si Jesus sa paagi nga wala ginpaabot?
16 Nahibaluan ni Jesus nga mangin makahuluya ang iya kamatayon kag tawgon sia nga manugpasipala, pero nangamuyo sia nga ang kabubut-on ni Jehova amo ang matuman kag indi ang iya. (Mat. 26:39, 42) “Ginbatas niya ang usok sang pag-antos, ginbalewala ang kahuluy-an,” bangod gusto niya nga ang iya Amay amo ang magpadungog sa iya, indi ang kalibutan. (Heb. 12:2) Paano sia ginpadunggan ni Jehova?
17 Sang ari si Jesus sa duta, ginpabutyag niya ang iya handum nga mabaton liwat ang himaya nga ara sa iya sadto sa langit upod sa iya Amay. (Juan 17:5) Wala kita sing mabasa nga naghandum si Jesus sing sobra pa sa sini. Wala sia nagpaabot nga hatagan sia sing mas mataas nga posisyon sa langit. Pero ano ang ginhimo ni Jehova? Ginpadunggan niya si Jesus sa paagi nga wala ginpaabot. Ginbanhaw niya si Jesus “sa mataas gid nga posisyon” kag ginhatagan sia sing indi mamalatyon nga espiritu nga kabuhi, kag sia ang una nga ginhatagan sini! * (Fil. 2:9; 1 Tim. 6:16) Dalayawon gid ang pagpadungog kay Jesus bangod sang iya katutom!
18. Paano naton malikawan nga handumon ang pagpadungog sini nga kalibutan?
18 Paano naton malikawan nga handumon ang pagpadungog sini nga kalibutan? Tandai nga pirme ginapadunggan ni Jehova ang iya matutom nga mga alagad kag ginapadyaan niya sila sa paagi nga wala ginapaabot. Ano ayhan nga mga pagpakamaayo nga wala naton ginapaabot ang mabaton naton sa palaabuton? Samtang wala pa ini, kag samtang ginabatas naton ang mga kabudlayan kag pagtilaw sining malaut nga kalibutan, pirme naton dumdumon nga ini nga kalibutan, lakip ang pagpadungog nga ginatanyag sini, magataliwan. (1 Juan 2:17) “Matarong” ang aton mahigugmaon nga Amay nga si Jehova, “kag indi niya pagkalimtan ang [aton] binuhatan kag ang gugma nga ginpakita [naton] para sa iya ngalan.” (Heb. 6:10) Padunggan gid niya kita, ayhan sa paagi nga wala gid naton mahunahuna!
