1. Kuzê ki nos tudu nu ta krê?

MODI ki bu ta xintiba si un algen ki bu konxe i ki bu ta ruspeta skese bu nómi? Ô más piór inda, pa el ka lenbra di bo? Óras ki kel-li kontise nu ta fika dizanimadu. Pamodi? Pamodi nu ta krê pa otus algen da-nu valor. Alén di nu ta krê pa otus algen lenbra di nos, nu ta krê pa es odja nos kualidadis i pa es da valor pa kuzas ki nu ta faze. — Núm. 11:16; nóta di rodapé; Jó 31:6.

2, 3. Kuzê ki pode kontise ku kel dizeju ki nu ten pa otus algen da-nu valor? (Odja dizenhu na komésu di studu.)

² Má nu debe toma kuidadu. Sima otus dizeju ki nu ten, kel vontadi ki nu ten pa otus algen da-nu valor, pode prujudika-nu pamodi nos inperfeson. Mundu di Satanás ta faze di tudu pa pô-nu ku dizeju di ten fama i susésu. Kel-li é un manera di inpidi-nu di adora sô nos Pai Jeová. — Apo. 4:11.

³ Na ténpu di Jizus, alguns xéfi di relijion ta gostaba di ser inportanti. Jizus aviza se sigidoris: ‘Nhos toma  kuidadu pa nhos ka faze kes kuza ki dotoris di lei ta faze. Es ta gosta di bisti ropa karu na lugar undi tudu algen pode odja-s. Es ta gosta pa algen fla-s mantenha ku ruspetu na rua. Es ta skodje kes midjór lugar pa es xinta na kaza di orason di judeus. Es ta gosta tanbê di ser tratadu sima konvidadu inportanti na fésta.’ Tanbê el fla: ‘Ses julgamentu ta ser más duru.’ (Lúkas 20:46, 47, Bíblia na Prugrésu di Traduson pa Lingua Kabuverdianu, BPK ) Má Jizus ilôjia un viúva póbri ki faze un kontribuison di poku valor ki talvês ningen ka odja. (Lucas 21:1-4 ) Kel-li ta mostra ma kuzas ki Jizus ta da valor é diferenti di otus algen. Pur isu, kel studu li ta ben djuda-nu pensa sima Jeová na es asuntu.

4. Kenha ki nu debe krê pa konxe-nu i pamodi?

⁴ Modi ki bu ta krê ser konxedu? Pa un algen ki ten bon skóla, ten un bon nogósiu ô un artista famozu? Apóstlu Polu splika pa kenha ki nu debe krê ser konxedu: ‘Gósi ki nhos konxe Deus, ô midjór, ma Deus konxe nhos, modi ki nhos ta torna bai pa kes kuza ki nhos ta fazeba antis, ki é fraku i sen valor, i nhos krê ser skravu di kes kuza otu bês?’ (Gál. 4:9) Dja bu pensa na kel-li? Kel Algen más Grandi di Séu ku Téra konxe-nu! El krê pa nu ten amizadi fórti ku el. Obijetivu prinsipal di nos vida é ser amigu di Jeová. — Ecl. 12:13, 14.

5. Kuzê ki nu ten ki faze pa nu ser konxedu pa Jeová?

⁵ Muizes tevi xansi di ser konxedu pa Deus. Kantu el pidi Jeová pa kuida di nason di Israel, Jeová responde-l: ‘N ta faze kel ki bu sta pidi, pamodi N sta kontenti ku bo i N konxe-u pa bu nómi.’ (Êxo. 33:12-17) Nos tanbê nu pode ser konxedu pa Jeová. Modi? Nu ten ki ama-l i da nos vida pa el. — Lé 1 Coríntios 8:3.

6, 7. Kuzê ki pode pô-nu ta perde nos amizadi ku Jeová?

⁶ Má nu ten ki kontinua ta da valor pa nos amizadi ku Jeová. Sima apóstlu Polu aviza kes kriston na Galásia, nu ten ki toma kuidadu pa nu ka ser skravu di kuzas di mundu ki é fraku i sen valor, sima fama i ser algen inportanti. (Gál. 4:9) Kes kriston na Galásia dja staba na verdadi i és éra konxedu pa Deus. Má Polu fla ma kes irmon staba ta bai pa kuzas ki ka tinha valor. Éra sima ki Polu staba ta fla-s: ‘Dja nhos faze txeu prugrésu, pamodi ki gósi nhos sta ta torna bai pa kuzas ki ka ten valor ki dja nhos dexa pa tras?’

⁷ Má pode kontise mésmu kuza ku nos oji? Pode sin. Txeu di nos kantu nu konxe Jeová, nu faze sima Polu. Nu tinha xansi di ser algen inportanti, má nu dexa pa tras kes kuza di mundu di Satanás. (Lé Filipenses 3:7, 8.) Talvês nu dizisti di faze un kursu ô nu ka seta novu responsabilidadi na trabadju ki nu ta ganhaba monti dinheru. Ô talvês alguns di nos podia ser famozu ô inportanti pamodi don ki nu ten pa múzika ô  disportu. (Heb. 11:24-27) Má nunka nu ka debe pensa ma nu perde xansi na vida pamodi disizons ki nu toma. Pensa si, pode pô-nu ta xinti gana di torna bai pa kes kuza ki nu dexa pa tras ô kes kuza fraku i ki ka ten valor. *

8. Kuzê ki ta djuda-nu mante nos disizon di krê ser algen inportanti pa Jeová?

⁸ Si nu sta disididu na ser algen inportanti pa Jeová nu ka ta buska manera pa nu ser algen inportanti pa mundu. Pa djuda-nu faze kel-li nu meste lenbra di dôs kuza inportanti: Primeru, Jeová sénpri ta da valor pa kes algen ki é fiel pa el. (Lé Hebreus 6:10; 11:6 ) Jeová ta da txeu valor pa kada un di se sérvus. El ta atxa ma é un injustisa skese di kalker un di es. Jeová sénpri ta ‘konxe kes ki é di sel’. (2 Tim. 2:19) El ‘konxe kaminhu di kes algen justu’ i el sabe modi ki el ta libra-s di provason. — Sal. 1:6; 2 Ped. 2:9.

9. Da izénplus ki ta mostra ma Jeová ta da valor pa se povu.

⁹ Alguns bês, Jeová mostra ma el ta da se povu valor di manera ki nunka es ka ta imajinaba. (2 Crón. 20:20, 29) Un izénplu é manera ki Jeová salva se povu na Mar Burmedju, kantu trópas di Faraó staba ses tras. (Êxo. 14:21-30; Sal. 106:9-11) Jeová salva-s di un manera ki ningen ka ta speraba. Mésmu dipôs di 40 anu, pesoas ki ta viveba na kel párti di mundu inda ta papiaba di el. (Jos. 2:9-11) Lenbra modi ki Jeová mostra se amor i puder ta da-nu koraji, pamodi ka ta dura Gogi di Magogi ta ben ataka povu di Jeová. (Eze. 38:8-12) Óras ki kel-li kontise, nu ta fika kontenti di odja ma bale péna ser algen inportanti pa Jeová, envês di ser algen inportanti na mundu.

10. Ki otu kuza nu debe lenbra si nu krê ser algen inportanti pa Jeová?

¹⁰ Tanbê nu meste lenbra di un otu kuza inportanti: Jeová pode mostra ma el ta da-nu valor di un manera ki nu ka sta ta spéra. Kes ki ta faze kuzas dretu sô pa otus algen odja-s, ka ta ganha nada di Jeová. Pamodi? Pamodi dja es ganha ónra di kes algen ki ta odja-s. (Lé Mateus 6:1-5.) Má Jizus fla ma se Pai ta odja kes algen ki ka ta dadu valor pa kuzas dretu ki es ta faze pa otus. Jeová ta odja kuza ki kes algen ta faze i el ta abensua-s. Má kes benson pode ben di un manera ki nen es ka ta imajina. Nu ben odja alguns izénplu.

11. Modi ki Jeová mostra ma Maria éra inportanti pa el?

¹¹ Kantu txiga ténpu pa Jizus ben pa Téra, Jeová skodje Maria, ki éra un jóven umildi i vírjen pa ser mai di se Fidju. Maria ta moraba na un sidadi pikinoti ki txomaba Nazaré. El ta fikaba lonji di Jiruzalen ki éra un sidadi inportanti ki tinha un ténplu bunitu. (Lé Lúkas 1:26-33, BPK.) Pamodi ki Jeová skodje Maria? Anju Gabriel fla Maria: ‘Bo é filís dianti di Deus.’ Maria mostra ma el éra un  algen ki tinha amizadi ku Deus kantu el bai pâpia ku Elizabeti, ki éra se família. (Lucas 1:46-55 ) Jeová sta ta odjaba Maria, ma el éra un algen fiel i pur isu, el da-l responsabilidadi inportanti ki nunka el ka ta imajinaba.

12, 13. Modi ki Jizus resebe ónra kantu ki el nase i kantu Maria leba-l pa ténplu dipôs di 40 dia?

¹² Kenha ki Jeová fla primeru ma Jizus dja nase? El ka dexa ninhun di kes governanti di Jiruzalen i di Belén sabe kuzê ki kontise. Má el manda anjus pa aviza kes pastor umildi ki staba ta kuida di ses ovelha na kanpu fóra di Belen. (Lucas 2:8-14 ) Kes pastor bai vizita kel mininu ki nase. (Lucas 2:15-17 ) Juzé ku Maria talvês fika kontenti di odja Jizus ta resebe ónra di un manera ki es ka sta speraba. Má odja diferénsa entri manera di Jeová faze kuzas i manera di Diabu. Kantu Satanás manda astrólugus pa bai vizita Jizus i se mai ku se pai, Jiruzalen interu fika ta pâpia di kel notísia. (Mat. 2:3) I pamodi kel notísia, txeu mininu matadu. — Mat. 2:16.

¹³ Dipôs di 40 dia ki Jizus nase, Maria bai oferese Jeová un sakrifisiu na ténplu na Jiruzalen ki ta fikaba uns 9 km lonji di Belen. (Lucas 2:22-24 ) Timenti es staba na viaji pa Jiruzalen, talvês Maria fika ta pensa ma saserdóti ta flaba algun kuza ki Jizus ta fazeba na futuru. Má ka kontise sima Maria sta speraba. Jeová uza Simion, un ómi ki éra ‘justu i ki ta ruspetaba lei di Deus’, i profetiza Ana, ki éra un viúva di 84 anu, pa mostra ma kel mininu éra kel Misías ô Kristu, kel ki staba pa binha. — Lúkas 2:25-38, BPK.

14. Ki bensons Maria resebe di Jeová?

¹⁴ Tanbê Jeová kontinua ta da Maria valor pamodi el kria se Fidju. El faze manera pa alguns kuza ki Maria fla i faze pa fika skrebedu na Bíblia. Ta parse ma Maria ka konsigi kunpanha Jizus na se pregason duránti três anu i meiu. Talvês el éra viúva i el tinha ki fikaba na Nazaré. Pur isu, el ka odja txeu di kes kuza inportanti ki Jizus faze. Má el staba djuntu ku Jizus kantu el móre. (João 19:26 ) Poku ténpu dipôs, Maria staba na Jiruzalen djuntu ku disiplus di Jizus antis di es resebe spritu santu na Pentikósti. (Atos 1:13, 14 ) Talvês el skodjedu ku spritu santu djuntu ku kes otu disiplu. Si el staba la, el ganha xansi di sta na Séu ku Jizus pa tudu ténpu. Jeová abênsua Maria pamodi se trabadju fiel!

15. Kantu Jizus staba na Téra, modi ki Jeová mostra ma el ta da se Fidju valor?

¹⁵ Jizus ka kreba pa xéfis di relijion i pulítikus di se ténpu daba el ónra. Má el fika kontenti kantu Jeová na três situason pâpia ku el la di Séu. Dipôs ki Jizus batizadu na Riu Jurdon, Jeová fla: ‘Kel-li é nha Fidju ki N ta ama, ki ta da-m txeu alegria.’ (Mat. 3:17) Nton úniku algen ki obi kuzê ki Jeová fla Jizus foi Juan Batista. Dipôs, un anu antis di Jizus móre, três apóstlu obi Jeová ta fla: ‘Kel-li é nha Fidju ki N ta ama, ki ta da-m txeu alegria. Nhos obi-l.’ (Mat. 17:5) Poku dia antis di Jizus móre, Jeová torna  pâpia ku se Fidju la di Séu. — João 12:28.

16, 17. Kuzê ki Jizus resebe di se Pai ki el ka sta speraba?

¹⁶ Jizus sabeba ma es ta akuzaba el di mostra falta di ruspetu pa Deus i ma el ta moreba sima un kriminozu. Má simé el ora Jeová: ‘Pa ka kontise sima N krê, má sima bu krê.’ (Mat. 26:39, 42) Jizus ka kreba ser algen inportanti pa mundu, má pa Jeová. Pur isu, ‘el aguenta mórti na un staka di tortura, ta dispreza vergónha’. (Heb. 12:2) Modi ki Jeová abensua-l?

¹⁷ Kantu Jizus staba na Téra, el fla ma el krê voltaba pa Séu i ten otu bês kel glória ki el tinha djuntu ku se Pai. (João 17:5 ) Ka ten nada na Bíblia ki ta mostra ma el kreba algun kuza más ki kel-li. Jizus ka ta speraba ten un ‘puzison grandi’ na Séu pamodi el faze vontadi di Jeová. Má kuzê ki Jeová faze? El da se Fidju valor di un manera ki el ka sta speraba. Kantu el resusita Jizus, Jeová da-l un puzison supirior na Séu i el da-l un kuza ki ningen ka resebeba antis, ki é un vida ki ka ta kaba! * (Fil. 2:9; 1 Tim. 6:16) Jizus kontinua sénpri fiel i Jeová abensua-l di un manera ki el ka sta speraba!

18. Kuzê ki pode djuda-nu ivita ser algen inportanti na es mundu?

¹⁸ Kuzê ki ta djuda-nu ivita ser algen inportanti na es mundu? Lenbra ma Jeová sénpri ta da valor pa kes algen ki é fiel i el ta abensua-s di un manera ki nunka es ka ta imajinaba. Deus tene txeu benson pa nos na futuru. Timenti kel dia ka txiga nu debe aguenta firmi i lida ku prubléma di es mundu mau. Má nu debe lenbra ma falta poku pa kes kuza ki kel mundu li pode oferese-nu kaba. (1 João 2:17 ) Nos Pai ki ta ama-nu ‘é ka injustu pa skese di nos óbra i di amor ki nu mostra pa se nómi’. (Heb. 6:10) Nu ten sertéza ma Jeová ta abensua-nu di un manera ki nunka nu ka ta imajina!