Uyanda Kuzibwaani?
“Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe.”—HEB. 6:10.
NYIMBO: 39, 30
1. Nchiichili chiyandisyo nchituli aacho alubo chiswaanizyaanzi?
KUJANA wamvwa biyeni kuti muntu nguzi ngulemeka waluba zina lyako naakuti wakuluba? Kuti muntu wachita oobo zilakonzya kupa kuti ukataazikane. Nkamboonzi? Nkaambo tulengedwe katuli achiyandisyo chakuyandwa abamwi. Kuzibwa nkutuyanda kuswaanizya zyiingi. Tuyanda kuti bantu bazibe mbutubede azintu nzitwakachita.—My. 11:16; Job. 31:6.
2, 3. Niinzi chikonzya kuchitika kuti twaba amaboneno aatali kabotu atala ambutuyanda kuti bamwi batubone? (Langa chifanikisyo chili kumatalikilo achiiyo.)
2 Kuti teetwachenjela, tulakonzya kuba amaboneno aatali kabotu atala ambutuyanda kuti bamwi batubone. Zintu zili munyika yaSaatani zilakonzya kupa kuti tuyande kuba ampuwo. Eezi zilakonzya kupa kuti tukachilwe kupa Taateesu wakujulu Jehova Leza bulemu bumweelede akumukomba.—Ciy. 4:11.
3 Muchiindi chakapona Jesu, bamwi beendelezi bazikombelo kuzibwa bakali kukubona munzila iitali kabotu. Jesu wakachenjezya basikwiiya bakwe kuti: “Amucenjele kubalembi, abayanda kweendeenda balisamide zyakusama zilamfu, abayanda kwaanzigwa muzisambalilo, akukala azyuuno zyabulemu muzikombelo azyuuno zipati mumapobwe.” Alubo wakayungizya kuti: “Aba bazoojana mulandu kwiindilila.” (Lk. 20:46, 47) Jesu wakalisiyene ambabo nkaambo wakalumbayizya mukamufu muchete wakasanga mali nche, yakatabonwa abamwi. (Lk. 21:1-4) Zili antanganana kuti Jesu kuzibwa wakali kukubona munzila iisiyene ambubakali kukubona bamwi. Chiiyo eechi chiyootugwasya kuti tube amaboneno aalikabotu Jehova Leza ngayanda.
KUZIBWA NKUTUYANDA
4. Nkuukuli kuzibwa kupati nkutuyanda alubo nkamboonzi?
4 Nkuukuli kuzibwa kupati nkutuyanda? Kuzibwa nkutuyanda kulisiyene ankubajana bantu akaambo kakuba alwiiyo lwaajulu, kuzwidilila muli zyabbizinesi naakuti muli zyakulikondelezya. Pesi tuyanda ooko Pawulu nkwakaamba kuti tweelede kubaako. Wakati: “Sunu mulizi Leza, na inga ndakonzya kwaamba kuti mulizibidwe kuli-Leza. Lino mupilukilanzi kuzilenge ezyo nzizyonya zitajisi inguzu zyakugwasya? Muyandilanzi kuboola alimwi mubuzike bwakulinzizyo.” (Gal. 4:9) Eechi nchilongezyo chipati loko nkaambo tulakonzya ‘kuzibwa aLeza’ Mweendelezi wazintu zyoonse! Uyanda kuti tuswene afwiifwi anguwe. Umwi sikulanga-langa makani aamuBbayibbele wakati: “Tuba bantu mbayanda.” Kuti Jehova watubona mbuuli beenzinyina zitugwasya kuti tuzibe nchaakatulengela.—Muk. 12:13, 14.
5. Tweelede kuchitaanzi kuti Leza atuzibe?
5 Musa wakali mweenzinyina waJehova. Naakali kuyanda kuziba nzila zyaJehova, Jehova wakamusandula kuti: “Cintu eco nciconya ncoamba ndacicita, nkaambo wajana luzyalo kumeso aangu, alimwi ndizi izina lyako.” (Kul. 33:12-17) Andiswe tulakonzya kujana zilongezyo zyiingi kuti Jehova watuziba kutugama. Pesi tweelede kuchitaanzi kuti Jehova atuzibe? Tweelede kumuyanda akulipeda kulinguwe.—Bala 1 BaKorinto 8:3.
6, 7. Niinzi chikonzya kupa kuti bweenzuma mbutuli aabo aJehova bumane?
6 Tweelede kukkala katuli beenzinyina baTaateesu wakujulu. Mbuuli mbakaamba Pawulu mulugwalo ndwaakalembela maKristu bakuGalatiya, andiswe tatweelede kuba bazike ‘bazilenge zitajisi nguzu zyakugwasya’ zili munyika ziswaanizya kuzibwa anyika. (Gal. 4:9) MaKristu aabo bakalisimide mubukombi zyakuti Leza wakalibazi. Pesi Pawulu wakati maKristu aabo bakali batalika ‘kupiluka naakuti kubweeda’ kuzintu zitagwasyi. Muli amwi majwi, Pawulu wakali kwaamba kuti: “Nkamboonzi nimwabweeda muzintu zitagwasyi nzimwakasiya musule?”
7 Kujana zyachitika na eezi kulindiswe? Zilakonzya kuchitika. Nitwakaziba Jehova, andiswe twakaba mbuuli Pawulu nkaambo twakaleka kuyanda kuba ampuwo munyika yeendelezegwa aSaatani. (Bala BaFilipi 3:7, 8.) Zilakonzeka kuti twakaleka lwiiyo lwaajulu naakuti zyabbizinesi zyakali kukonzya kupa kuti tube amali nyingi. Zipo zyakwiimba naakuti zyakuchijaana zyakali kukonzya kupa kuti tube ampuwo akunota pesi twakazifutatila. (Heb. 11:24-27) Tatweelede kuyeeya kuti kusala nkutwakachita ‘twakasowa chiindi.’ Kuyeeya oobo, kulakonzya kupa kuti tubweedele zintu zili munyika eeyi nzitwakabona kuti ‘tazijisi nguzu zyakugwasya.’ *
SIMYA CHIYANDISYO CHAKUZIBWA AJEHOVA
8. Kujana twachita biyeni kuti chiyandisyo chesu chakuzibwa aJehova chisime?
8 Kujana twachita biyeni kuti chiyandisyo chesu chakuzibwa aJehova chisime kutali kuzibwa aanyika? Tweelede kuziba zintu zibili ziyandikana. Chakusaanguna, Jehova ulibazi bantu bamukomba chakusyomeka. (Bala BaHebrayo 6:10; 11:6) Ulabayanda bakombi bakwe boonse alubo ukubona kakuli ‘kutalulama’ kutabaziba aabo basyomeka kulinguwe. Jehova “ulibezi bakwe.” (2 Tim. 2:19) Ulizi “inzila yabaluleme” alubo ulakonzya kubavuna mumasunko.—Int. 1:6; 2 Pet. 2:9.
9. Amba zikozyano zitondeezya Jehova mbaakatondeezya kuti ulabayanda bakombi bakwe.
9 Jehova wakatondeezya kuti ulabayanda bakombi bakwe munzila zisiyene-siyene. (2 Mak. 20:20, 29) Muchikozyano, tulakonzya kuyeeya nzila Jehova mbaakabavuna bakombi bakwe kuLwizi Lusalala nibakali kutobelwa abasilumamba baFaro bali aamanguzu. (Kul. 14:21-30; Int. 106:9-11) Zyakachitika eezi zyakagambya bantu bamuchiindi eecho zyakuti bakachili kuzyaambuula nikuba nikwakiinda minyaka iili 40. (Jos. 2:9-11) Kulatusimya kubona Jehova mbaakatondeezya kuti ulaaluyando amanguzu nkaambo lino-lino Gogo wakuMagogo uyootulwana. (Ezk. 38:8-12) Muchiindi eecho, tuyoobotelwa nkaambo tunooli twakatondeezya kuti twakali kuyanda kuzibwa aLeza kutali nyika.
10. Nchiichili chimwi chintu nchitweelede kuziba?
10 Chintu chabili nchitweelede kuziba nchakuti: Jehova ulakonzya kutondeezya kuti ulituzi munzila njitutayeeyeli pe. Jehova takabapi bulumbu bantu bachita zintu zibotu kuti balijanine mpuwo kubantu. Nkamboonzi? Nkaambo bulumbu balabujana chiindi nibalumbayizigwa abantu. (Bala Matayo 6:1-5.) Jesu wakati Wisi ‘ubabonena kumbali’ bantu batayandi kulumbayizigwa zyiindilide akaambo kakugwasya bamwi. Ulazibona zyoonse zibotu nzibachita alubo ulabalumbula. Pesi chimwi chiindi Jehova utulumbula munzila njitutayeeyeli pe. Atubone zimwi zikozyano.
MUSIMBI UULIBOMBYA WAKAZIBWA KATAYEEYELEDE
11. Jehova wakatondeezya biyeni kuti ulimuzi Mariya?
11 Nichakasika chiindi chakuti Mwana waLeza azyalwe kali muntu aanyika, Jehova wakasala musimbi nakalindu uutegwa Mariya kuti abe banyina bwamwana ooyu uuyandikana. Mariya wakali kukkala mukadolopo kaniini kuNazareta alubo kwakali kule loko akuJerusalemu kwakali tempele pati. (Bala Luka 1:26-33.) Nkamboonzi nikwakasalwa Mariya? Mungelo Gabbriyeli wakabuzya Mariya kuti “wajana luzyalo kuli-Leza.” Mariya wakatondeezya mbaakasimide mubukombi naakali kwaambuula anzubo yakwe Elizabbeti. (Lk. 1:46-55, NW) Jehova wakali kuzibona zyoonse nzyaakali kuchita Mariya alubo wakamupa mukuli ooyu nkaambo wakali kusyomeka.
12, 13. Jehova wakachitaanzi kuti Jesu azibwe naakazyalwa achiindi naakatolwa kutempele nikwakiinda mazuba aali 40 kazyedwe?
12 Jesu naakazyalwa, Jehova taakabasumpula pe bantu balemekwa abeendelezi bakuJerusalemu abakuBbetelehemu. Bangelo bakabuzya beembezi bakali kweembela mbelele aanze amuunzi waBbetelehemu. (Lk. 2:8-14, NW) Mpawo beembezi aaba bakaswaya Jesu mumazuba ngaakazyalwa. (Lk. 2:15-17) Kulakonzeka kuti Mariya aJosefa bakagamba kubona mbaakalemekwa Jesu. Atubone Dyabbulosi mbasiyene aJehova mukuchita zintu. Saatani naakatuma basikulanga-langa nyenyeezi kuti bakaswaye Jesu abazyali bakwe, bantu boonse muJerusalemu bakakopana mumizeezo. (Mt. 2:3) Eezi zyakapa kuti bana baniini bakatalikwe mulandu bajayigwe.—Mt. 2:16.
13 Nikwakiinda mazuba aali 40 Jesu kazyedwe, Mariya wakeelede kuyoopa chituuzyo kuli Jehova kutempele lyakali kuJerusalemu kwakali musinzo uulampa makkilomita aali 9 kuzwa kuBbetelehemu. (Lk. 2:22-24) Mariya naakali kuyabweenda aJosefa aJesu, kulakonzeka kuti wakali kuyeeyela kuti mupayizi wakali kuyoowambilizya mulimu mupati Jesu ngwaakali kuzoochita. Jesu wakazibwa pesi kutali munzila Mariya njaakali kuyeeyela. Jehova wakabelesya ‘muntu uululeme, wakali kusyoma Leza’ uutegwa Simiyoni amusinsimi mukamufu Ana wakali aminyaka iili 84, kuti batondeezye kuti mwana ooyo wakali kuzooba Mesiya naakuti Kristu wakasyomezegwa.—Lk. 2:25-38.
14. Jehova wakamulongezya biyeni Mariya?
14 Niinzi chakachitika kuli Mariya? Jehova wakachili kumuyeeya na Mariya akaambo kakusyomeka mukukomezya Jesu? Iiyi wakachili kumuyeeya. Leza wakapa kuti nzyaakachita anzyakaamba Mariya zilembwe muBbayibbele. Mariya taakali kukonzya kweenda aJesu chiindi Jesu naakali kukambawuka kwaminyaka iitatu achisela. Kulakonzeka kuti Mariya wakali kukkala kuNazareta nkaambo wakali waba mukamufu. Nikuba kuti taakayibona pe milimu Jesu njaakachita pesi wakaliwo chiindi Jesu naakafwa. (Joh. 19:26) Mariya wakali kuJerusalemu abamwi basikwiiya chiindi nibakatilwa muuya uusalala lyaPentekkoste. (Inc. 1:13, 14) Kweelede kuti wakananikwaamwi abasikwiiya bakaliwo. Kuti kakuli boobo, zyaamba kuti wakajana chilongezyo chakuyoopona kukabe kutamani kujulu kalaamwi aJesu. Mariya wakalumbulwa akaambo kakusyomeka nkwaakatondeezya.
JEHOVA MBAAKAZIBYA MWANAAKWE
15. Jehova wakamulemeka biyeni Mwanaakwe naakachili anyika?
15 Jesu taakali kuyanda kulemekwa abeendelezi bazikombelo abazyatwaambo twanyika bamuchiindi eecho. Pesi Jesu wakasugwaazigwa naakabona Jehova mbaakamulemeka chiindi nakaambuulaawe kwaziindi zitatu. Jesu naakazwa akubbabbatizigwa muMulonga waJordani, Jehova wakati: “Ngooyu mwanaangu uuyandika ngunkondelwa.” (Mt. 3:17) Johane Mubbabbatizi alakwe wakaamvwa majwi aaya. Alubo, kakusyeede munyaka kuti Jesu ajayigwe, baapostolo bakwe batatu bakamvwa Jehova kaamba majwi aatobela atala aJesu. Wakati: “Ngooyu mwanaangu uuyandwa ngwinkondelwa, amuswiilile nguwe.” (Mt. 17:5) Kumamanino kakusyeede mazuba mache kuti Jesu ajayigwe, Jehova wakaambuula lubo aJesu.—Joh. 12:28.
Nzila Jehova njaakazibya Mwanaakwe ituyiisyaanzi? (Langa fuka 15-17)
16, 17. Jehova wakamulemeka biyeni Jesu munzila yakatali kuyeeyelwa?
16 Nikuba kuti Jesu wakalizi kuti wakali kuyoojayigwa munzila yuusisya akubejelezegwa kuti usampawula Leza pesi wakakombela kuti kuyanda kwaJehova kuchitwe kutali kuyanda kwakwe. (Mt. 26:39, 42) “Wakaliyumya acisamu cakupenzyezya, wakaubaula kuusyigwa nsoni” alubo wakayanda kuzibwa aWisi kutali kuzibwa abantu bamunyika. (Heb. 12:2 NW) Jehova wakamuziba biyeni?
17 Naakali anyika, Jesu wakakumbila kuti apegwe bulemu mbwaakali aabo kachili kujulu aWisi. (Joh. 17:5) Bbayibbele talitondeezyi kuti Jesu wakakumbila kuti apegwe zyiinda eezyo. Taakali kulangilila kupegwa bumwi bulumbu “busumpukide” kujulu. Jehova wakachitaanzi? Wakamulemeka Jesu kwiinda mukumuchitila chintu chakatali kuyeeyelwa. Wakamubusya akumupa chuuno ‘chisumpukide’ kujulu. Alubo wakamupa buumi butamani kali chilenge chamuuya, taakwe muntu wakabupedwe pe! * (Flp. 2:9; 1 Tim. 6:6) Kulagambya kubona nzila Jehova njaakalumbula Jesu akaambo kakusyomeka kwakwe.
18. Niinzi chiyootugwasya kuti tutantamuke zintu ziyandwa anyika eeyi?
18 Niinzi chiyootugwasya kuti tutantamuke zintu ziyandwa anyika eeyi? Tweelede kuyeeya kuti Jehova ulibazi bakombi bakwe basyomeka alubo ulabalumbula munzila njibatayeeyeli pe. Tatuzizi pe zilongezyo Jehova nzyayootupa nzitutayeeyeli pe. Pesi tweelede kulisimya kumapenzi ngituswaana munyika eeyi nkaambo nyika eeyi akuyanda kuba ampuwo ziyoomana. (1 Joh. 2:17) Taateesu siluyando Jehova, ‘tali sikampenda uukonzya kuluba milimu yesu aluyando ndututondeezya akaambo kazina lyakwe.’ (Heb. 6:10) Jehova uyootufwida luzyalo munzila njitutayeeyeli pe.
