1. ¿Xii nga ni riuulaʼdxiʼ guiráʼ binni?

GUXUÍʼLUNU bidxaaganu ti binni ni runibiaʼnu ne runi respetarnu, peru binni ca cadi cayetenalaʼdxiʼ tu lanu ne ni jma feu nga cadi cayunibiaʼbe laanu. ¿Ximodo ñuni sentirnu yaʼ? Zándaca ziuʼnu triste, purtiʼ de guiráʼ binni riuulaʼdxiʼ gunibiáʼcabe laa. Peru qué racaláʼdxinu gunibiáʼsicabe laanu, sínuque gusisácacabe laanu ne ni rúninu (Núm. 11:16; Job 31:6).

2, 3. ¿Xi zanda guizaaca pa guyúbinu gusisaca binni laanu? (Biiyaʼ dibuju ni zeeda ra ruzulú tema riʼ).

² Guiranu nga riuuláʼdxinu gusisaca binni laanu, peru pa qué gápanu cuidadu la? zanda gucaa guidxilayú stiʼ Binidxabaʼ laanu chuuláʼdxinu gácanu famoso o ti binni risaca. Ora rúninu nga cadi cusisácanu Jiobá, Bixhózenu ni nuu guibáʼ, Dios ni caquiiñeʼ gusisácanu ne guni adorarnu (Apoc. 4:11).

³ Tiempu bibani Jesús lu Guidxilayú riʼ, guyuu caadxi xaíque yuʼduʼ nabe guyuuláʼdxicaʼ gusisaca binni laacaʼ. Nga  runi gudixhená Jesús ca discípulo stiʼ né ca diidxaʼ riʼ: «Laguuya gá laatu né ca maistru de ley, purti riulaʼdxi ca gacu ca lari de yanni ñee ca para uluíʼ naca ca tuuxa, ne ugapa diuxi binni laaca luguiaa. Ne riulaʼdxi ca cui ca ndaani yuʼdu ra ribí binni ni jma risaca, ne zaqueca ra endaró». Ne laaca guníʼ Jesús: «Laaca nga jma naná ziaba ná caʼ» (Luc. 20:46, 47). Lugar de ñuni Jesús casi biʼniʼ ca xaíque yuʼduʼ que la? bisisácabe ni biʼniʼ ti viuda pobre ni bisaba chupa monedahuiiniʼ ndaaniʼ caja ra riaba bueltu, lugar de nuyúbibe nusisaca binni laabe (Luc. 21:1-4). Ni bíʼnibe riʼ bisihuinni ni ximodo ruuyaʼ Jiobá ca binni ni ruyubi gusisácabe laa. Tema riʼ zacané laanu guidúʼyanu ca cosa ca casi ruuyaʼ Dios cani.

4. ¿Tu laa jma riuuláʼdxinu gusisaca ni rúninu, ne xiñee?

⁴ ¿Tu laa jma riuuláʼdxinu gusisaca ni rúninu yaʼ? Cadi guyúbinu gusisaca binni laanu, casi rusisácacabe ca binni ni biindaʼ ti carrera, cani napa ti dxiiñaʼ risaca o cani naca famoso. Pablo bisiene tuu nga binni ni caquiiñeʼ guyúbinu gusisaca laanu, ora guníʼ: «Peru yanna ra maʼ runibiaʼtu Dios, o maʼ runibiáʼ Dios laatu, ¿xiñee cayúnitu ca cosa qué iquiiñeʼ stiʼ guidxilayú riʼ sti biaje ne racaláʼdxitu gácatu esclavu stiʼ ca cosa riʼ sti biaje yaʼ?» (Gál. 4:9, TNM). ¡Ti privilegiu guizáʼ galán nga gunibiáʼ Dios laanu, Rey stiʼ universu! Laabe racaláʼdxibe gácanu xhamígube. Sicaríʼ bisiene ti binni ni nanna de Biblia ni, pa gúninu ni ná Dios «zanda chuuláʼdxibe ni rúninu ne zanda gacanebe laanu». Ora gánnanu ruuyaʼ Jiobá laanu casi ti xhamigu la? riénenu xi pur nabáninu ne xi naquiiñeʼ gúninu (Ecl. 12:13, 14).

5. ¿Xi zanda gúninu para gácanu xhamigu Jiobá yaʼ?

⁵ Ngapeʼ nga ni bizaaca Moisés. Dxi gunábabe Jiobá gudii lugar laabe gunibiaʼbe ca neza stiʼ la? sicaríʼ bicabi Jiobá laabe: «Laaca zuneʼ ni canábaluʼ naa ca, purtiʼ riuuladxeʼ ni rúniluʼ, runebiaʼyaʼ lii ne nannaʼ tu laluʼ» (Éx. 33:12-17). Laanu laaca ricaanu ndaayaʼ ora runibiáʼ chaahuiʼ Jiobá laanu. Peru ¿xi zanda gúninu para gácanu xhamigu Dios yaʼ? Gannaxhiinu laabe ne gudiʼnu xquendanabáninu laabe (biindaʼ 1 Corintios 8:3).

6, 7. ¿Xi zándaca gucaa laanu gunítinu amistad galán ni nápanu né Jiobá yaʼ?

⁶ Caquiiñeʼ gápanu amistad ni nápanu né Bixhózenu ni nuu guibáʼ. Cásica gudxi Pablo ca xpinni Cristu de Galacia, laanu laaca cadi naquiiñeʼ gácanu esclavu stiʼ «ca cosa qué iquiiñeʼ stiʼ guidxilayú riʼ», tobi de laani nga guyúbinu gusisaca binni ni rúninu (Gál. 4:9). Ca xpinni Cristu ni bibani dxiqué binibiáʼ Dios laacaʼ. Peru laaca guníʼ Pablo biguetaʼ bíʼnicabe cosa qué iquiiñeʼ sti biaje, ngue runi casi ora ñábibe laacaʼ: «Despué de maʼ biʼniʼ progresartu, ¿xiñee cayúnitu ca cosa qué iquiiñeʼ ne ni qué risaca stiʼ guidxilayú riʼ sti biaje pue?».

⁷ ¿Zanda guizaacanu casi bizaaca ca xpinni Cristu ni bizeeteʼ Pablo riʼ la? Zanda. Dxi binibiaʼnu Jiobá, zándaca bíninu cásica biʼniʼ Pablo, maʼ qué nuyúbinu nusisaca guidxilayú stiʼ Binidxabaʼ laanu (biindaʼ Filipenses 3:7, 8). Zándaca maʼ qué nidúʼndanu ti carrera, maʼ qué nicaanu ti puestu risaca ra rúninu dxiiñaʼ o maʼ qué nuyúbinu  ñuni ganarnu stale bueltu. Ne pa nánnanu guxhídxinu xiixa instrumentu o nánnanu quítenu xiixa deporte la? ñanda ñácanu ricu o famoso, peru bicáʼnanu cani (Heb. 11:24-27). ¿Ñee zaníʼ íquenu cadi jneza bíninu bicáʼnanu ca cosa riʼ la? Coʼ njaʼ. Purtiʼ pa guiníʼ íquenu zacá la? zándaca guibiguetaʼ gusisácanu «ca cosa qué iquiiñeʼ» stiʼ guidxilayú riʼ sti biaje. *

8. ¿Xi zacané laanu gúninu ni riuulaʼdxiʼ Jiobá?

⁸ ¿Xi zacané laanu gúninu ni riuulaʼdxiʼ Jiobá ne cadi ni riuulaʼdxiʼ binni yaʼ? Ni zacané laanu nga cadi gusiándanu guiropaʼ cosa nabé risaca ni chiguzéʼtenu riʼ. Primé, qué rusaana Jiobá de gusisaca ca xpinni ni ruzuubaʼ diidxaʼ (biindaʼ Hebreos 6:10; 11:6). Rusisácabe cada tobi de ca xpínnibe, purtiʼ para laabe cadi jneza nga gusiaandabe ca xpínnibe. Siempre runibiaʼbe ca xpínnibe (2 Tim. 2:19). Rapa Jiobá ca binni ni runi jneza ne nánnabe ximodo gulabe laacaʼ de ca prueba ni cadíʼdicaʼ (Sal. 1:6; 2 Ped. 2:9).

9. Bizeeteʼ caadxi biaje bisihuinni Jiobá riuulaʼdxiʼ ni runi ca xpinni.

⁹ Nuu biaje dede ridxagayaa binni modo rusihuinni Jiobá riuulaʼdxiʼ ni runi ca xpinni (2 Crón. 20:20, 29). Guiníʼ íquenu ximodo bilá Jiobá ca israelita dxi gudíʼdicaʼ nisadóʼ Xiñáʼ dxi canazananda ejércitu stiʼ faraón laacaʼ (Éx. 14:21-30; Sal. 106:9-11). Guizáʼ bidxagayaa binni ora gunna ni bizaaca riʼ, ne neca gudiʼdiʼ cuarenta iza bietenaláʼdxiruʼ binni ni bizaaca que (Jos. 2:9-11). Cumu maʼ gaxha nuu dxi gucaalú Gog de Magog laanu la? guizáʼ riuʼnu gana ora rietenaláʼdxinu modo bisihuinni Jiobá nadxii xquidxi ne modo bilá laacabe dxiqué (Ezeq. 38:8-12). Dxi gulá Jiobá xquidxi, guizáʼ zuni sentirnu nayecheʼ purtiʼ qué nuyúbinu ñúninu ni riuulaʼdxiʼ binni sínuque bíninu ni riuulaʼdxiʼ Jiobá.

10. ¿Gunáʼ nga guiropa cosa ni cadi naquiiñeʼ guiaandaʼ laanu?

¹⁰ Guiropa cosa ni cadi naquiiñeʼ guiaandaʼ laanu nga Jiobá peʼ zanda gusisacaʼ laanu dede nuu biaje nin qué ruxuíʼlunu ximodo gúnibe ni. Qué zaguu Jiobá ndaayaʼ ca binni ni racané xcaadxi para si guʼyaʼ sti binni laa. ¿Xiñee qué rúnibe ni yaʼ? Purtiʼ Jesús guníʼ ora rusisaca binni laacabe la? ngue nga premiu stícabe (biindaʼ Mateo 6:1-5). Peru laaca guniʼbe rusisaca Bixhózebe ni runi ca binni ni racané xcaadxi neca nuu laa qué rusisaca ni rúnicabe. Ruuyaʼ Dios ni rúnicabe ne zaguu ndaayaʼ laacabe, dede nuu biaje rúnibe ni ora cadi cabézacabe ni. Guidúʼyanu caadxi ejemplu.

11. ¿Ximodo bisihuinni Jiobá riuulaʼdxiʼ ni runi María?

¹¹ Dxi mayaca gale Xiiñiʼ Jiobá lu Guidxilayú riʼ la? gulibe ti binnidxaapaʼ humilde ni láʼ María para gapa Xiiñibe. Nabeza María Nazaret, ti guidxihuiiniʼ qué risaca ni nuu zitu de Jerusalén ne de templu stini (biindaʼ Lucas 1:26-33). ¿Xiñee gulí Dios laabe yaʼ? Ora yeganna ángel Gabriel María gudxi laabe gulí Dios laabe purtiʼ guyuulaʼdxiʼ cani rúnibe. Bisihuinni María naca ti gunaa espiritual ora byuiʼné Elisabet diidxaʼ (Luc. 1:46-55). Cumu biiyaʼ Jiobá  pabiáʼ ruzuubaʼ María diidxaʼ ne runi ni jneza la? bisisaca Jiobá laabe de ti modo cadi cabézabe ni.

12, 13. ¿Ximodo bisisaca Jiobá Jesús dxi gule ne dxi yenécabe laa ra templu que?

¹² Dxi gule Jesús, qué ñabi diʼ Jiobá ca funcionariu ne ca gobernante ni risaca stiʼ Jerusalén ne Belén maʼ gule Xiiñiʼ. Ni bíʼnibe nga biseendabe caadxi ángel para gábicaʼ caadxi pastor humilde ni cayapa dendxuʼ fuera de guidxi Belén maʼ gule Xiiñibe (Luc. 2:8-14). Ngue runi yeguuya ca pastor que Jesús dxi gule (Luc. 2:15-17). Nuunu seguru guizáʼ guyuulaʼdxiʼ José ne María ora bíʼyacaʼ modo bisisaca ca pastor que Jesús. Gadxepeʼ ni runi Jiobá de ni runi Binidxabaʼ, purtiʼ dxi biseendaʼ Binidxabaʼ ca astrólogo que chigánnacaʼ Jesús, María ne José la? guyuu ca binni de Jerusalén xizaa ora gúnnacaʼ maʼ gule Jesús (Mat. 2:3). Ra gunna guiráʼ binni de guidxi que maʼ gule Jesús beedachuu ti guendanagana: guti stale baʼduhuiiniʼ ni qué gapa donda (Mat. 2:16).

¹³ Cuarenta dxi despué de gule Jesús, caquiiñeʼ cheʼ María ndaaniʼ templu stiʼ Jerusalén, ni riaana biaʼ gaʼ kilómetru de guidxi Belén para gudii ti ofrenda Jiobá (Luc. 2:22-24). Dxi zeʼ María, José ne Jesús guidxi Jerusalén, zándaca gunabadiidxaʼ María laca laa pa zusisaca sacerdote ni nuu ra templu que Jesús de ti modo especial pur ca cosa galán ni chiguni despué. Ni nánnanu nga bisisácacabe Jesús, peru zándaca qué ñúnicabe ni modo guníʼ ique María. Biquiiñeʼ Jiobá Simeón ti hombre nachaʼhuiʼ ne ni runi adorar laabe ne laaca biquiiñebe Ana ti profetisa viuda ni napa 84 iza para guiniʼcaʼ Jesús nga chigaca Cristu, Mesías ni maca cá chigueeda que (Luc. 2:25-38).

14. ¿Xi ndaayaʼ bidii Jiobá María?

¹⁴ ¿Ñee bisisaca Jiobá María pur gupa ne bisiniisi Xiiñibe la? Bisisácabe pue. Purtiʼ gucuá cani biʼniʼ ne cani guníʼ María ndaaniʼ Biblia. Peru zándaca qué ninándabe Jesús lu chonna iza arondaʼ ni biʼniʼ predicar. ¿Ñee biaanabe Nazaret purtiʼ viuda laabe la? Zándaca. Nga runi, qué nicaabe xcaadxi ndaayaʼ casi gucuaa xcaadxi binni. Peru guyuube gaxha de Jesús dxi gutiʼ (Juan 19:26). Ne laaca guyuube Jerusalén né ca discípulo que caadxi dxi ante gaca saa Pentecostés iza 33, dxi biaba espíritu santu luguiáʼ ca discípulo stiʼ Jesús (Hech. 1:13, 14). Zándaca juntu guca ungir María né ca discípulo que. Pa zacá ni la? gucuaabe oportunidad chebe guibáʼ ne chuʼbe gaxha de Jesús para siempre. ¡Guizáʼ galán ni bidii Dios laabe pur bíʼnibe xhiiñaʼ ne bizuubabe stiidxaʼ!

15. Dxi guyuu Jesús ndaaniʼ Guidxilayú riʼ, ¿ximodo bisihuinni Jiobá rusisaca ni bíʼnibe?

¹⁵ Qué nuyubi Jesús nusisaca ca xaíque yuʼduʼ o ca políticu ni bibani tiempu que laa. Ni biyúbibe nga gusisaca Jiobá laabe. Chonna biaje bisisaca Dios laabe dede guibáʼ, ne nuunu seguru nabé guluu ni gana laabe. Despué de guyuunísabe ndaaniʼ guiiguʼ Jordán la? guníʼ Jiobá ca diidxaʼ riʼ: «Ndi nga Xiiñe ni nadxiee ne ni rusieche naa» (Mat. 3:17). Laaca binadiaga Juan ni Riguunisa ca diidxaʼ que. Ne biaʼ ti iza ante gatiʼ Jesús, binadiaga chonna de ca apóstol stibe ca diidxaʼ guníʼ Dios riʼ: «Ndi nga Xiiñe ni nadxiee ne ni rusieche naa. Laucaa diaga laabe» (Mat. 17:5).  Ne caadxi dxi ante gatiʼ Jesús, guniʼné Jiobá laabe sti biaje de guibáʼ (Juan 12:28).

16, 17. ¿Ximodo bisisaca Jiobá Jesús, ne xiñee cadi cabeza Jesús ñúnibe ni?

¹⁶ Nanna Jesús zandísacabe falsu luguiáʼ ne nabé feu modo guuticabe laa. Neca zaqué, gunábabe gaca ni ná Dios ne cadi ni nabe (Mat. 26:39, 42). Biʼniʼ huantarbe bicaacabe laabe lu ti yaga ne qué nizaaláʼdxibe gátibe zaqué, purtiʼ qué nuyúbibe nusisaca binni laabe sínuque biyúbibe gusisaca Bixhózebe laabe (Heb. 12:2, TNM). ¿Ximodo bisisaca Jiobá laabe yaʼ?

¹⁷ Dxi biuu Jesús lu Guidxilayú riʼ, gunábabe Bixhózebe gusisaca laabe cásica bisacabe dxi guyuube guibáʼ (Juan 17:5). Qué riete diʼ lu Biblia pa guleza Jesús nicaa ti puestu jma risaca. Neca zaqué, ¿xi biʼniʼ Jiobá yaʼ? Bisisaca Jiobá laabe de ti modo cadi cabézabe. Bisibani laabe de lade gueʼtuʼ ne bidii «laabe ti puestu ni jma risaca». Laaca bidii Jiobá laabe xiixa ni qué huayuu dxi guicaa guirutiʼ: ti guendanabani espiritual sin qué chuʼ dxi gátibe o inmortal (Filip. 2:9; 1 Tim. 6:16, TNM). * ¡Guizáʼ ridxagayaanu modo bisisaca Jiobá Jesús purtiʼ bizuubaʼ diidxaʼ ne qué nucheené laabe!

18. ¿Xi zacané laanu cadi guyúbinu gunibiáʼ ne gusisaca binni laanu yaʼ?

¹⁸ ¿Xi zacané laanu cadi guyúbinu gunibiáʼ ne gusisaca binni laanu yaʼ? Ni zacané laanu nga guietenaláʼdxinu siempre runibiáʼ ne rusisaca Jiobá ca xpinni ni ruzuubaʼ diidxaʼ ne runi recompensarbe laacaʼ de ti modo cadi cabézacaʼ. Ne qué gánnanu ximodo guni recompensar Jiobá laanu lu futuro. Peru laga cayuni huantarnu ca guendanagana ni nápanu yanna riʼ, cadi guiaandaʼ laanu maʼ cadi candaa para guinitilú guiráʼ ca cosa risaca ni nuu ndaaniʼ guidxilayú riʼ (1 Juan 2:17). Bixhózenu Jiobá nadxii laanu ne qué ziuu dxi gusiaandabe guiráʼ ni huayúninu pur laabe purtiʼ nadxiinu laabe (Heb. 6:10). Nuunu seguru zusisaca Jiobá ni rúninu, zándaca qué lica ruxuíʼlunu ximodo gúnibe ni.