1, 2. Иеговага кӧрӧри дегени нени темдектейт?

БӰГӰНГИ кӱнде бис коркышту «уур-кӱч ӧйлӧрдӧ» јададыс. Је бу калју телекейдиҥ јоголтыларынаҥ ла јердиҥ ӱстинде чын амыр болорынаҥ озо, јӱрӱм оноҥ кӱч болор (2 Тим. 3:1). Оныҥ учун бойыска: «Мен болушты эмезе јӧпти кайдаҥ бедирейдим? Мениҥ кӧзим Иеговага кӧрӧт пӧ?» — деген сурактар берер керек.

² Је Иеговага кӧрӧри дегени нени темдектейт? Бисте кӱчтер болуп турза, бис Кудайга кӧрӧдис пе? Мыны нениҥ учун эдер керек деп, сарнаачы канча чактар кайра бичип салган. (Сарын 123:1—4 кычырыгар *.) Оныҥ сӧстӧриле болзо, бис Иеговага, кул бойыныҥ ээзине кӧргӧни чилеп, кӧрӱп јадыс. Мыны  канайып оҥдоор? Кул бойыныҥ ээзине, ол оны јаҥыс ла азырап ла корулап турганы учун эмес, је ээзиниҥ кӱӱнин билип аларга ла оныҥ табын капшай ла бӱдӱрерге ого кӧрӧт. Анайып ла бис, Иегова бистиҥ кажыбыстаҥ ла нени сакып турганын билип аларга ла оныҥ табын бӱдӱрерге, Кудайдыҥ Сӧзин кӱнӱҥ ле шиҥдеерге албаданадыс. Ол тушта Иегова кӱч ӧйдӧ болужар деп, бис алаҥзыбас аргалу (Еф. 5:17).

3. Бис Иеговага недеҥ улам кӧрбӧй барардаҥ айабазыс?

³ Бис јаантайын Иеговага кӧрӧр керек деп оҥдоп то турзаас, кезикте ӧскӧ немеге кӧрӱп баштаар болорыс. Мындый учурал, Иисусла јуук таныш, Марфала болгон. Лука 10:40—42-де айдылганыла, ол «јаан кӱндӱ-кӱрее эдерге» шакпырай берген. Иисус јанында да болордо, Кудайга чындык кижиле мындый неме боло берерде, бисле де андый неме боло бербес пе? Бис недеҥ улам Иеговага кӧрбӧй барардаҥ айабазыс? Темдектезе, улустыҥ эдип турган керектеринеҥ улам. Бу јӧрмӧлдӧ мындый айалга канайып боло берердеҥ айабас ла Иеговага оноҥ ло ары кӧрӧргӧ биске не болужар деген сурактар шӱӱжилер.

4. Моисейдиҥ Берер болгон јерге кирбегени бисти нениҥ учун кайкадар болор?

⁴ Моисей Кудайдыҥ табын билерге, Иеговага кӧргӧн. Ол «кӧрӱнбес Кудайды кӧрӱп турган чылап, чыдамкай болгон» (Еврейлерге 11:24—27 кычырыгар.) Агару Бичикте: «Израильде Моисейдий судурчы качан да болбогон. Иегова оны сӱреен јакшы билген» — деп бичилет (Јаҥ. т. 34:10). Моисей Кудайла јуук колбуларлу болгон до болзо, Кудай оны Берер болгон јерге кийдирбеген (Тоол. 20:12). Нениҥ учун?

5—7. Израиль албатыла Египеттеҥ чыккан кийнинеҥ удабай ла не болгон, је Моисей нени этти?

⁵ Израиль албатыныҥ Синай кырга јууктап келгенинеҥ озо, Египеттеҥ чыкканынаҥ бери эки де ай болголокто, улус суу јок болгонынаҥ улам комудап баштаган. Мындый айалга там катулана берерде, Моисей Кудайга: «Бу албатыны канайдайын? База ла эмеш болзо, олор мени ташла шыбалап койор» — деп, јайнап мӱргӱген (Чыг. 17:4). Бу ӧйдӧ Иегова Моисейге чокум јакару берген: Моисейге тайакты алып, Хоривтеги кайа-ташка согуп ийер керек болгон, ол тушта оноҥ суу адып чыгар эди. Агару Бичикте мынайып айдылат: «Моисей Израильдиҥ аксагалдарыныҥ кӧзинче анайып эдип ийерде» израильтяндар суузы канганча ичип, токунай берген (Чыг. 17:5, 6).

⁶ Оноҥ ары Агару Бичикте мындый јетирӱ бичилет: «Моисей бу јерди Масса ла Мерива деп адаган,  нениҥ учун дезе ондо Израильдиҥ уулдары керижип-уружып: „Ортобыста Иегова бар ба, јок по?“ — деп, Иегованы ченеген» (Чыг. 17:7). Бу јерди мынайып адаганы учурыла сӱреен јакшы келижет, нениҥ учун дезе бу эки сӧс «ченелте» ле «кериш-уруш» дегенин темдектейт.

⁷ Меривадагы болгон учуралды Иегова канайып кӧргӧн? Оныҥ кӧрӱмиле болзо, израильтяндар јӱк Моисейге эмес, је Кудайга ла оныҥ јаҥына удура тӱймеен кӧдӱрген. (Сарын 95:8, 9 кычырыгар *.) Бу коркышту јаан јастыра болгон. Је бу учуралда Моисей јастыра этпеген, ол Иегованаҥ башкарту сурап, оныҥ јакарузын чике бӱдӱрип салган.

8. Израиль албатыла 40 јылдыҥ туркунына чӧлдӧ јӱргениниҥ учы јаар не болгон?

⁸ Израильтяндар 40 јылдыҥ туркунына чӧлдӧ јӱргениниҥ учы јаар ойто ло тӱймеен кӧдӱрген. Бу учурал база Мерива деп адалган јерде болгон. Мерива деп јер Берер болгон јердиҥ кыйузында, Кадестиҥ јанында турган *. Бу јерде израильтяндар ойто ло суу јетпей турганына комудап баштаган (Тоол. 20:1—5). Је бу учуралда Моисей јаан јастыра эткен.

9. Моисейге кандый јакару берилген, је ол нени эткен? (Јӧрмӧлдиҥ бажындагы јурукты кӧрӱгер.)

⁹ Моисей бу учуралда нени эткен? Ол, алдында ла чылап, Иегованаҥ болуш сураган. Је бу учуралда ого ӧскӧ јакару берилген. Иегова оны тайак алып, албатыны јууйла, кайага баштанзын деген, је кайа-ташты ого сокпос керек болгон (Тоол. 20:6—8). Моисей кайага баштанбай, сезимдерине салдыртып: «Угугар, тӱймечилер! Не, бис слерге суу чыгарып берек пе?» — деп кыйгырып ийеле, кайа-ташты бир катап эмес, эки катап согуп ийген (Тоол. 20:10, 11).

10. Моисей јаҥы јакаруны бӱдӱрбеген болордо, Иеговада кандый сезимдер болды?

¹⁰ Мынаҥ улам Иегова Моисейге коркышту тыҥ чугулданган (Јаҥ. т. 1:37; 3:26). Нениҥ учун? Баштапкы шылтагы — Моисей Иегованыҥ јаҥы јакарузын бӱдӱрбеген.

11. Кайанаҥ чыккан сууны израильтяндар нениҥ учун кайкал деп кӧрбӧгӧн болор?

¹¹ Экинчи шылтагы мындый болгон болор. Баштапкы Меривадагы кайа-таш кату гранит таштаҥ болгон. Оны канча да кире соксоҥ, оноҥ бир де суу чыкпас. Је экинчи Меривадагы кайа-таштар кӧп сабада јымжак черет таштаҥ болгон. Суу мындый черет ташты ӧткӱре сызылып, јердиҥ алдында јуулып калат. Оны чыгарарга, кайаны ойор керек. Оныҥ учун Моисей кайага  баштанардыҥ ордына, кайаны эки катап согуп ийгениниҥ кийнинде суу чыгып келерде, израильтяндар бу сууны Иегова чыгарган деп бодобогон болор *. Је айалга чынынча кандый болгонын билбезис.

12. Иегова Моисей ле Ааронго база кандый шылтактаҥ улам чугулданган болор?

¹² Иегованыҥ Моисейге ле Ааронго чугулданганыныҥ база бир шылтагын кӧрӱп ийектер. Моисей албатыга: «Угугар, тӱймечилер! Не, бис слерге суу чыгарып берек пе?» — деп айткан. Моисей «бис» деп, бойын ла Ааронды айткан болор. Оныҥ сӧстӧринеҥ кайкал эткен Иегова Кудайды бир де тообогоны кӧрӱнет. Сарын 106:32, 33-те мынайып айдылат: «Олор Иегованы Мериваныҥ сууларыныҥ јанында ачындырган. Оноҥ улам Моисейге Кудайдыҥ чугулы тӱшкен. Олор Моисейди чугулдандырып ийерде, ол јазап сананбаган сӧстӧр айткан» (Тоол. 27:14) *. Је бу шылтактардыҥ кажызы чын деп билбес те болзоос, Моисейдиҥ Иеговага мак јетирбегени јарт. Иегова Моисейге ле Ааронго баштанып, мынайып айткан: «Слер мениҥ јакаруумга удура болдыгар» (Тоол. 20:24). Эйе, олор коркышту јаан кинчек эткен!

13. Иегованыҥ Моисейге чыгарган јаргызын нениҥ учун чындык деп айдарга јараар?

¹³ Моисей ле Аарон Иегованыҥ албатызыныҥ башчылары болгон, айдарда, олор Кудайдыҥ алдында јаан каруулу улус болгон (Лука 12:48). Алдында Иегова тӱймеен кӧдӱрген израильтяндардыҥ бӱдӱн ӱйезин Ханаан јерге кийдирбеген (Тоол. 14:26—30, 34). Оныҥ учун Моисейдиҥ, израильтяндар чылап, кату каруузына тургузылганы, Иегованыҥ јаргылары јаантайын чындык деп кӧргӱзет. Моисей Кудайдыҥ Берер болгон јерине база кирбеген.

14, 15. Моисей недеҥ улам Кудайга удура тӱймеен кӧдӱрген?

¹⁴ Моисей нениҥ учун Иеговага удура тӱймеен кӧдӱрген? Бу сурактыҥ каруузын аларга, Сарын 106:32, 33-ти такып кӧрӱп ийектер: «Олор Иегованы Мериваныҥ сууларыныҥ јанында ачындырган. Оноҥ улам Моисейге Кудайдыҥ чугулы тӱшкен. Олор Моисейди чугулдандырып ийерде, ол јазап сананбаган сӧстӧр айткан». Израильтяндар тӱймеенди Иеговага удура кӧдӱрген, је чугулданып Моисей чыккан. Чугулынаҥ улам ол бойын тудунып болбой, јазап сананбаган сӧстӧр айткан.

¹⁵ Анайып, Моисей улустыҥ керектерине ајару эдип, Кудайга кӧрбӧй барган. Баштапкы учуралда ол  Кудайдыҥ јакарузын буспаган (Чыг. 7:6). Је канча јылдардыҥ туркунына израильтяндардыҥ тӱймеен кӧдӱрип турганын кӧрӱп, арып, чӧкӧй береле, Иегованы мактаардыҥ ордына, бойыныҥ сезимдерине алдыртып ийген болор.

16. Моисейле болгон учуралды биске нениҥ учун шӱӱп сананар керек?

¹⁶ Кудайдыҥ чындык судурчызы, Моисей де, Иегованаҥ кӧзин туура эдип, кинчек эткен болордо, андый неме бисте де боло берердеҥ айабас. Бӱгӱнги кӱнде бис те, Моисей чилеп, Кудай берер болгон «јердиҥ» — јаҥы јӱрӱмниҥ бозогозында турадыс (2 Петр 3:13). Јаҥы јӱрӱмге киретен сӱреен јакшы арганы јылыйтарга, бистиҥ кемибис те кӱӱнзебей јат эмей. Оныҥ учун Иегованаҥ кӧзисти качан да туура албай, оныҥ табын бӱдӱрип јӱректер (1 Иоанн 2:17). Моисейле болгон учуралдаҥ бис неге ӱренедис?

17. Чугулга алдырбаска, биске нени эдер керек?

¹⁷ Чугулга алдырбагар. Кандый бир кӱчтер катап-катап болуп турза,  «јакшыны эдип, јобобойлы. Уйадабазыбыс, бойыныҥ ӧйинде тӱжӱмди јууп аларыс» деген сӧстӧрди ундыбактар (Гал. 6:9; 2 Фес. 3:13). Та кем де эмезе та не де бисти јаантайын кыртыштандырып турза, бис сезимдериске салдыртпай, оозысты тударга албаданадыс па? (Укаа 10:19; 17:27; Матф. 5:22). Бисти кем-кем сӧслӧ чагып турза, нени этсе јакшы болор? Агару Бичикте јакшы јӧп берилет: «Кудайдыҥ чугулына јер беригер». (Римдегилерге 12:17—21 кычырыгар.) Мындый айалгада чугулданбай, керектиҥ аайына бойыс чыгарга албаданбай јадыс, ӧскӧртӧ айтса, Иегованыҥ чугулына јер берип јадыс. Анайып, бис Иеговага кӧрӱп турганысты ла Кудайды тооп турганысты кӧргӱзедис. Бойы учун ӧч аларга албаданганы Иегованы тообой турганына тӱҥей болот.

18. Јаҥы јакарулар берилзе, нени ундыбас керек?

¹⁸ Јаҥы јакаруларды чике бӱдӱригер. Бис Иегова Кудайдыҥ јаҥы јакаруларыла јӱрерге албаданадып турганыс па? Эйе болзо, ӱренишкени аайынча эдердиҥ ордына, бис Иегованыҥ организациязыныҥ јаҥы јакаруларын тургуза ла бӱдӱрерис (Евр. 13:17). Анайда ок, бичилгенинеҥ башка нени де этпеске албаданарыс (1 Кор. 4:6). Ол тушта бистиҥ кӧзибис Иеговага кӧрӱп турган болор.

19. Улустыҥ јастыраларынаҥ улам Иеговала колбуларысты јылыйтпаска нени эдер керек?

¹⁹ Улустыҥ јастыралары слерди Иегованаҥ ыраатпазын. Бис јаантайын Иеговага кӧрӱп турган болзоос, ачуурканбазыс ла оны улустыҥ јастыраларынаҥ улам, анчада ла Кудайдыҥ организациязында, Моисейдий ок, башкаратан молјулу улустыҥ јастыраларынаҥ улам артыргыспазыс. Аргаданарга биске кажыбыска ла кӧп иштенер керек ле Иегова бисти кажыбысты ла бир тӱҥей јаргылабай јат деп ундыбас керек (Флп. 2:12). Анайда ок биске канча ла кире кӧп молјулар берилген болзо, ончо ло кире тем кӧргӱзерге албаданар керек (Лука 12:48). Бис Иегованы акту јӱрегистеҥ сӱӱп турган болзоос, бисти не де бӱдӱрилтпес те, Иегованыҥ сӱӱжинеҥ не де айрып болбос то (Сар. 119:165; Рим. 8:37—39).

20. Биске нени эдерге шӱӱп алар керек?

²⁰ Бӱгӱнги кӱч ӧйлӧрдӧ Иегованыҥ табын билип турарга, кӧзигерди Иегованаҥ, «теҥериде јадып турган Кудайдаҥ», качан да туура албагар! Улустыҥ эдип турган керектери Иеговала колбуларыгарды ӱребезин. Мынайып эдерге Моисейле болгон учуралды шӱӱп сананары болужар. Айландыра улустыҥ јастыраларын кӧрӱп, олорго ачуурканбагар. Оныҥ ордына Сарын 123:1, 2-де айдылган: «Бис те Иегова Кудайыстаҥ јараду аларга, ого кӧрӱп јадыс» — деген сӧстӧрлӧ јӱрерге шӱӱп алыгар.