1, 2. Wa samaan ko demak ita ngaˈ misamacay ko minengnengan ci Yihofaan hani?

ITINIAY kita i ‘pasangaray siˈayawen a ˈawaled’ maˈorip, ˈayaw no ira ko faelohay hekal, miliyaw a dipayal koniya cikiw, wa matongal ko pasangar no kaˈorip no mita. (2 Timoti 3:1) Mihaenay, lalicayen ita ko niyah: “Pasayra kako cimaanan micangacang to sadama ato sakayat hani?” Alatek wa tangsol kita pasowal: “Ci Yihofa,” tada o ngaˈayay a caˈof konini.

² Hatiraay, halamham ci Yihofaan macapiday ko maanan hani? Ano misiˈayaw kita to pasangaray a sapalifet i nokaˈorip i, sasamaan misamacay ko minengnengan ci Yihofaan hani? ˈAyaw no pina patek miheca, cecay mitiliday to ˈOlic mihayay, ano tahalifa ko tamdaw to pasangaray i, o hahalamham ci Yihofa. (ˈOsien ko ˈOLIC 123:1-4.) Masowalay no mitiliday to ˈOlic, o pihalamham ita ci Yihofaan mahecaday o pihalamham no koli to tawki sanay, hano mihaen ko sapatinako ningra hani? Mihalamham ko koli to tawki cowa ko sapilifokaw aca to kakaenen ato sadipot, wa padotoc cingra misinanot to harateng no tawki, hanaca mitoor to harateng no tawki a midemak. Mahecaday, wa micekiw kita to Fangcalay Cudad to romiˈamiˈad, cipinang to o  maanan ko araaw ni Yihofa kitaanan, hanaca midoedo to sakayat Ningra. Mihaen ko demak ita, itini pisaalian ita a toki wa padama ato midipot ci Yihofa kitaanan.​—Ifiso 5:17.

3. O maanan a demak ko saka ecato padotoc ita misamocek a minengneng ci Yihofaan hani?

³ Soˈlin mafanaˈay kita padotoc a halamham ci Yihofaan tada kalimlaan, kawra latekay makalisangaay ko pisamocek no harateng ita. O tinakoan oya ngaˈayay a widang ni Yis ci Marta. Sowal no Fangcalay Cudad ci Marta, ‘adihayay ko demak, makalisangaay ko falocoˈ.’ (Luka 10:40-42) Mahaenay ci Martaan a madimadiay sikawdan, itini kalacafay ci Yisan makalisangaho ko falocoˈ, cowa pisamacay to noˈadingoan a demak, ano kitato wa makalisanga ko falocoˈ i noˈadingoan alatek. Mihaenay, o maanan a demak ko saka ecato padotoc ita misamocek a minengneng ci Yihofaan hani? Oniya lalakaw wa milengo to sasamaan mikalisanga ko waywayan no tao to falocoˈ ita, wa milengoho to sasamaan kita padotoc a mihalamham ci Yihofaan.

4. Ci Mosi caka ngaˈay micomod i Mikiˈokan a Pala, hano o kafahkaˈan konini hani?

⁴ Ci Mosi o mihalamhamay to sakayat ni Yihofa a madimadiay sikawdan, sowal no Fangcalay Cudad cingranan “matiya o pakaˈaraway to caay ka ˈaraw a Kawas ko nika kodait no falocoˈ ningra.” (ˈOsien ko Hipray 11:24-27.) Sowal i Limoˈot 34:10 sanay: “Naitiya a tahanini, itini i Israil a finawlan i, awaayho ko matiyaay ci Mosian a [pairasolay]. Nawhani nano masasiˈayaway ci Mosi [aci Yihofa] a masasowal.” Soˈlin tangongolay ko kalawidang ni Mosi aci Yihofa, kawra malahdaway ko lemed ningra micomod i Mikiˈokan a Pala. (Saˈosi 20:12) Misamaanay hani?

5-7. (1) Caka halafin miliyas ko Israil tamdaw to Icip ikor, mafekaday ko maanan a pakidemay demak hani? (2) Samaanay misaysay ci Mosi toniya demak hani?

⁵ Miliyas ko Israil tamdaw to Icip caka tosa folad, ˈayaw no tahira i Sinay Lotok cangra, mifekaday ko pakidemay a demak. Ngaliwngiway ko Israil tamdaw to kaawa no nanom. Tada maketeray cangra, ngaliwngiwayho ci Mosian, mansa pasayra ci Mosi ci Yihofaan a micangacang: “Samaanen ako konini a finawlan? Sapitekolan sa cangra i takowanan to fakeloh a mipatay”! (Kasadakan 17:4) Pacaˈofan ni Yihofa ci Mosi, pafeli cingranan to ihkalay a sakayat. Papitatiwan ni Yihofa ci Mosi to cokor, misetiˈ to fakeloh no Horip a lotok, powal sanayto ko nanom nai fakeloh. Sowal no Fangcalay Cudad: “Doedo han ni Mosi konini a demak a paˈaraw i kakrikridan no finawlan.” Irato ko nanom no Israil i, masaysayayto koniya demak.​—Kasadakan 17:5,6.

⁶ Ikor somowal ko Fangcalay Cudad ci Mosian, sanay: “Orasaka, Masa ano eca i, Miripa han koya pipasadakan to nanom a ˈongcoy. Nawhani ngaliwngiw ko finawlan no Israil a mipakaketer [ci Yihofaan.] ‘Mikapotay [ci Yihofa] i titaanan saw?’ Saan cangra a milifet.” (Kasadakan 17:7) Matatodongay koniya sapangangan, samanen o tatodong no Masa ato Miripa i milifetay ato ngaliwngiway, sanay.

⁷ Mifekaday i Miripa a demak samanay ko piharateng ni Yihofa hani? O waywayan no Israil tamdaw cowa ko palifet aca to sapikayat a fadangalan ni Mosi, o misafelitay to Kawas a waywayan koni. (ˈOsien ko ˈOlic 95:8, 9.) Pakidemay ko raraw no Israil tamdaw. Kawra, matatodongay ko demak ni Mosi, samanen mihalamhamay cingra ci Yihofaan, misongilaˈ a midoedo to sakayat.

8. Salikoray no kalafel no Israil i kohkoh i, mafekaday ko maanan a demak hani?

⁸ Nikawrira, mataˈlif ko 40 miheca, tahirato  salikoray no kalafel no Israil i kohkoh i, mifekaday aca ko maanan a demak hani? Tahiraay i ngata no Katis a pala ko Israil a tamdaw, mangataayto ko Mikiˈokan a Pala. * Ora pala ikor panganganan to Miripa, samanen miliyaway aca ko Israil tamdaw itini a ngaliwngiw to kacangoˈot no nanom. (Saˈosi 20:1-5) Kawra, cowa ka hecad ko pakayraan ni Mosi a misaysay toniya demak.

9. (1) Pafelian ni Yihofa ci Mosi to maanan a sakayat hani? (2) Kawra samaanan ni Mosi misaysay koniya demak hani? (Nengnengen ko satapangan coka.)

⁹ Samanan ni Mosi a misaysay koniya misafelitay a waywayan no Israil tamdaw hani? Miliyaway cingra mihalamham ci Yihofaan, micangacang to sakayat Ningra. Kawraan, cowa ka ocoren ni Yihofa ci Mosi a misetiˈto fakeloh, misaaliay ci Mosian pasowal toya fakeloh. (Saˈosi 20:6-8) Kawra cowa ka pasowalen ni Mosi koya fakeloh, pasayraay cingra i finawlan a mihadak to keter, miowaw cangranan: “Kamo o maliyangay a tamdaw, pitengil to sowal ako. O nipaciecian namo kami a milongoc saka, pakayni han niyam tonini a ˈongcoy ko pipasadak to nanom a pananom i tamowanan,” sanay. (Saˈosi 20:10, 11) Dotocto, tano cokoran ni Mosi misetiˈ ko fakeloh, hanaca kinatosaay a misetiˈ.

10. Pakayni i demak ni Mosi, samanay ko harateng ni Yihofa hani?

¹⁰ Tada maketeray ci Yihofa, pasayra ci Mosian a mangolaw. (Limoˈot 1:37; 3:26) Misamaanay hano ira ko hatiniay a harateng ni Yihofa hani? O cecay a lalangian pakayniay ka eca pitengil ni Mosi to sakayat ni Yihofa alatek.

11. Misamaanay hano cisasa ko Israil tamdaw to demak ni Mosi i ikoray a Miripa, o cowa ko kafahkaˈan koni?

¹¹ Mangolaw ci Yihofa iraay ko roma a lalangian alatek. Isalakatay a panganganen a Miripa a pala, itiraay a ˈongcoy, o tada ˈatekakay a ˈongcoy, ano saˈicelento a misetiˈ kora ˈongcoy, cowa ko papakasoˈlin ko tamdaw to mamasadak ko nanom mikitira i ˈongcoy. Kawra, ikoray a Miripa a pala, cowa ka hecad ko ˈongcoy itira. Cowa ko ˈatekakay a ˈongcoy. Samanen adihayay ko ofang, mansa adihayay ko nanom, wa ngaˈay ko tamdaw miofang toniya ˈongcoy miradom to nanom. Ano mahaenay i, tiya kinatosaen ni Mosi a misetiˈ koya ˈongcoy a eca ka pasowalen i, o mamahadahadak aca ko nanom sanay ko harateng no Israil, cowa ko pakayniay i pidemak ni Yihofa to kafahkaˈan a demak wa saan hokira? * Awaay ko pinang no mita.

12. Alatek o maanan a lalangian ko sakaketer ni Yihofa ci Mosian hani?

¹² Maketer ci Yihofa ci Mosian aci Aronan iraay ko roma lalangian halatek. Itiya, pasowal ci Mosi to Israil tamdaw: “Pakayni han niyam tonini a ˈongcoy ko pipasadak to nanom a pananom i tamowanan”? Tiya pasowal ci Mosi to “niyam” i, o niyah aci Yihofa anca o niyah aci Aron ko mitoroˈan ningra. Ano samanayto ko tatodong ni Mosi, ora sowal ningra paihkalay to cowa ka ngodo ko niyah ci Yihofaan, samanen cowa panokayen ningra ci Yihofaan koniya sapidemak to kafahkaˈan a ˈicel. Itini ˈOlic 106:32, 33 sanay:  “Pakaketeren haca no finawlan . . . i tatihi no Miripa a nemnem, saka, halo ci Mosi a mapakaroray to nano demak nangra. Tona tada [mapakangolaw] nangra ci Mosi saka, pasowal sato cingra to caay ko sasowalen a sowal.” * (Saˈosi 27:14) Cowa panokayen ni Mosi ko ˈdil ci Yihofaan. Ikor, pasowalan ni Yihofa ci Mosi aci Aron: ‘Safelitay kamo to limoˈot Ako.’ (Saˈosi 20:24) Tada o pakidemay a raraw konini!

13. Hano masadafdafay ko sawkit ni Yihofa ci Mosian hani?

¹³ Mikeriday ci Mosi aci Aron to finawlan ni Yihofa, taˈangayay ko ˈinorong nangra ci Yihofaan. (Luka 12:48) Iˈayaw, na misaˈosiay ci Yihofa to cowa ko papacomoden ko Israil tamdaw i Kanan pala, samanen misafelitay cangra to Kawas. (Saˈosi 14:26-30, 34) Mihaenay, mahecaday ko pisawkit ni Yihofa to pisafelit ni Mosi, o masadafdafay konini. Mahecaday ci Mosi toya misafelitay a Israil tamdaw, cowa ka ngaˈay micomod i Mikiˈokan a Pala.

14, 15. Hano paihkal ci Mosi to misafelitay a waywayan hani?

¹⁴ Hano paihkal ci Mosi to misafelitay a waywayan hani? Itini ˈOlic 106:32, 33 sanay: “Pakaketeren haca no finawlan . . . i tatihi no Miripa a nemnem, saka, halo ci Mosi a mapakaroray to nano demak nangra. Tona tada [mapakangolaw] nangra ci Mosi saka, pasowal sato cingra to caay ko sasowalen a sowal.” Soˈlin paketeren no Israil tamdaw ci Yihofa, kawra mapakangolaway ci Mosi. Cowa pakaˈimer cingra, telocto somowalay to cowa ko sasowalen a sowal.

¹⁵ Mafiyoray no waywayan no tao ci Mosi, telocto cowa ka padotoc mihalamham ci Yihofaan. Sakinacecay no Israil tamdaw a ngaliwngiw i, tano matatodongay a pakayraan ko pisaysay ni Mosi to pasangaray. (Kasadakan 7:6) Kawra, pinaayto poloˈ miheca ci Mosi mikerid to misafelitay a Israil tamdaw, palidlid sanay malahdaw ko mihadidiay a falocoˈ cangranan, maketerayto a matoled. Hato misamacayay ci Mosi to harateng no niyah, mapawanto a paˈdil ci Yihofaan hokira?

16. Misamaanay hano sasinanoten ita ko nalifetan ni Mosi?

¹⁶ O mahaenay ci Mosian madimadiay a pairasolay makalisangaayho ko falocoˈ a mapolin, ano kitato wa mahecad a mararaw alatek. Mangataayto micomod ci Mosi i Mikiˈokan a Pala, kita anini mangataayto micomod i mikiˈokan no Kawas a faelohay hekal. (2 Pitiro 3:13) Cowa sakalahdawaw kita noniya sapalemed. Sapilifokaw to sapalifon no Kawas, wa padotoc kita halamham ci Yihofaan, padotoc a midofdof to araaw Ningra. (1 Yohani 2:17) Mikitini mararaway a milifetan ni Mosi wa mananam ita ko maanan hani?

17. Ano mamaketer kita i, sasamaan ngaˈ mitafo to pakaˈmet to niyah hani?

¹⁷ Ano maketer i, tafoen ko miˈimeray. Soˈlin saliyaliyaw saan kita misiˈayaw to mahecaday pasangaray, haratengen ko sapatalipaˈelal no Fangcalay Cudad: “Aka ka rarima kita to ngaˈayay a demak. Ano caay ka toled kita, ano maraodto ko romiˈad i, o mamalayap ita ko tatodong no ngaˈayay a demak ita.” (Kalatiya 6:9; 2 Tisalonika 3:13) Ano o manan a demak, anca o roma a tamdaw saliyaliyaw saan paketer kitaanan, songilaˈay kita a miˈmet to keter, misinanot to sasamaan a somowal hokira? (Taneng 10:19; 17:27; Matay 5:22) Ano pakangolaw ko tao kitaanan i, nanamen ita mitadiˈec ci Yihofa, ‘paiken han ko keter i Kawas.’ (ˈOsien ko Loma 12:17-21.) Ano padotoc kita halamham ci Yihofaan, wa mikangodo kita ci  Yihofaan halo paiken to keter Cingranan, mihadidi a mitala Cingranan itini matatodongay toki a midemak. Ano tano niyah a pakayraan ko pisaysay to demak eca ka halamham ci Yihofaan, mihaen o cowato kangodo ci Yihofaan.

18. Itini pitengil to sakayat, haharatengen ita ko maanan hani?

¹⁸ Songilaˈen mitengil ko safaelohay a sakayat. Mitengilan ita ko safaelohay a sakayat ni Yihofa han? Ano mihaen ko demak ita, cowato ko mamitoor to nanaman no niyah a misaysay to demak, wa tangsol mitengil to safaelohay a sakayat no likakawa no Kawas. (Hipray 13:17) Wa misinanotho kita to ‘mitaˈlifay to sowal no Fangcalay Cudad’ ko niyah hokira. (1 Korinto 4:6) Songilaˈen ita midoedo ko sakayat ni Yihofa, wa paihkalayto padotocay kita a halamham Cingranan.

19. Samaan kita miliyas to pakayni i raraw no tao a mapalak ko kalalaˈed ci Yihofaan hani?

¹⁹ Hamaan pakayni i raraw no tao a mapalak ko kalalaˈed no niyah aci Yihofa. Ano padotoc kita halamham ci Yihofaan, cato ka pakayni i waywayan no tao a maketer, hato mapalak ko kalalaˈed no niyah aci Yihofa. Ano mahecad kita ci Mosian, itini likakawa no Kawas ira ko kalimlaan a ˈinorong, ngangalefen ko pisinanot tonini. Soˈlin kita o cecacecay tamdaw o mamisinanot, padotoc misaˈicel milaheci to sakalidong no niyah a demak, haratengenho ita cowa ka tano koˈicaway a palinian ko sapisawkit ni Yihofa kitaanan. (Filipi 2:12) Kawraan, ano matongal ko ˈinorong ita, wa ikaka ko haˈinorong ita ci Yihofaan. (Luka 12:48) Ira ko soˈlinay a olah ita ci Yihofaan, wa awato ko maanan a demakan to ngangaˈay pakapolin ato miketon to olah no Kawas kitaanan.—ˈOlic 119:165; Loma 8:37-39.

20. Samaanto ko saˈosi no falocoˈ iso?

²⁰ Itini i pasangaray siˈayawen a ˈawaled maˈorip, nanay padotoc kita halamham to ‘maroˈay i kakarayan a Tatapangan’, misaˈicel cipinang to araaw Ningra. Nanay tahadaˈoc eca ka pakayni waywayan no tao a mapalak ko kalalaˈed no niyah aci Yihofa. Haratengen ita ko milifetan ni Mosi, hamaan pakidem ko harateng to raraw no tao, saˈosien ko falocoˈ ‘halamham to Kawas ita ci Yihofaan, tahira i pasidaˈitan Ningra kitaanan.’—ˈOlic 123:1, 2.