Hoo Yoo Di Luk tu fi Dairekshan?
“Ai luk tu yoo, yoo hoo di sidong pahn yu chroan da hevn.” —PS. 123:1.
1, 2. Weh ih meen fi luk tu Jehoava?
WI DI liv eena “di laas dayz” weh onli “terabl.” Ahn laif wahn geh haada ahn haada bifoa Jehoava dischrai dis wikid werl ahn bring chroo pees pahn di ert. (2 Tim. 3:1) Soh wi need fi aks wiself, ‘Hoo Ai di luk tu fi help ahn dairekshan?ʼ Rait away, wi wuda seh, “Jehoava,” ahn dat da di bes ansa.
2 Weh ih meen fi luk tu Jehoava? Ahn how wi ku mek shoar dat wi kip wi aiy foakos pahn hihn eevn wen wi di fays difrent chalenj eena laif? Honjridz a yaaz agoa, wahn saamis mi seh dat wi need fi luk tu Jehoava fi help. (Reed Psalm 123:1-4.) * Ih mi seh dat wi need fi luk tu Jehoava di saym way wahn servant luk tu ih maasta. Weh di saamis mi meen bai dat? Wel, wahn servant noh onli luk tu ih maasta fi food ahn protekshan, bot ih haftu stay di luk pan ih maasta fi si if ih waahn eniting els. Wateva ih maasta waahn, hihn haftu du. Jos laik dat, wi need fi stodi di Baibl evri day fi si weh Jehoava waahn wi du ahn den du it. Wen wi du dis, Jehoava wahn ga mersi pahn wi wen wi need help.—Ifee. 5:17.
3. Weh ku mek wi looz wi foakos pahn Jehoava?
3 Eevn doa wi noa dat wi haftu kip wi foakos pahn Jehoava, wi ku mek difrent tingz eena laif dischrak wi. Dis mi hapm tu Jeezas kloas fren, Marta. Shee “mi-di hasl op ihself wid aala di ting dehn weh ih mi ga fi du.” (Look 10:40-42) If dat ku hapm tu wahn faytful persn laik Marta, wen Jeezas mi deh rait deh wid ahn, weh yu tink a wee? Soh den, wat da sohn tingz weh ku dischrak wi ahn mek wi looz wi foakos pahn Jehoava? Eena dis aatikl, wi wahn egzamin how di tingz weh adaz du ku dischrak wi. Ahn wi wahn laan how fi stay foakos pahn Jehoava.
WAHN FAYTFUL MAN LOOZ IH PRIVILIJ
4. Wai ih mait sopraiz wi dat Moaziz mi looz ih privilij fi goh eena di Pramis Lan?
4 Wi noa dat Moaziz da-mi wahn man weh yoostu aalwayz luk tu Jehoava fi dairekshan ahn gaidans. In fak di Baibl seh dat da-mi laik Moaziz kuda mi “si di Gaad weh nobadi kudn si.” (Reed Heebrooz 11:24-27.) Di Baibl tel wi dat “neva agen dehn mi ga wahn prafit laik Moaziz eena Izrel, hoo mi taak wid Jehoava fays-tu-fays.” (Deut. 34:10) Bot eevn doa Moaziz mi ga wahn kloas rilayshanship wid Jehoava, ih mi looz di privilij fi goh eena di Pramis Lan. (Num. 20:12) Weh mi kaaz Moaziz fi sin?
5-7. Weh prablem mi kom op jos afta di Izrelait dehn mi lef Eejip, ahn how Moaziz mi handl di sichuwayshan?
5 Di Izrelait dehn fays wahn big prablem jos too monts afta dehn lef Eejip. Az a mata a fak, dehn neva eevn mi get da Mongt Sainai yet. Di peepl staat komplayn bowt how dehn neva ga no waata. Dehn staat tu komplayn gens Moaziz tu. Di sichuwayshan geh soh seeryos dat Moaziz tel Jehoava: “Wat Ah shuda du wid dis peepl? Dehn wahn soon stoan mi!” (Ex. 17:4) Soh Jehoava gi Moaziz klayr inschrokshanz bowt weh fi du. Ih tel ahn fi tek ih stik ahn schraik di rak da Hoareb, ahn den waata wuda mi poar owta it. Di Baibl seh: “Moaziz mi du egzakli weh Jehoava tel ahn fi du fronta di eldaz a Izrel.” Di Izrelait dehn jrink waata til dehn get inof ahn dehn neva mi ga wahn prablem afta dat.—Ex. 17:5, 6.
6 Di Baibl tel wi dat Moaziz “naym di plays Masa ahn Meriba bikaaz a di kwaaril di Izrelait dehn mi gat. Ahn bikaaz dehn mi put Jehoava tu di tes wen dehn seh: ‘Jehoava deh monks wi er nat?ʼ” (Ex. 17:7) Dehndeh naym da-mi di karek wan dehn fi chroo, kaaz dehn meen “Testin” ahn “Kwaarilin.”
7 How Jehoava mi feel bowt weh mi hapm da Meriba? Ih mi feel dat di Izrelait dehn mi-di goh gens hihn ahn fi hihn atariti, noh jos gens Moaziz. (Reed Psalm 95:8, 9.) * Di Izrelait dehn mi rang, no kweschan bowt it. Pahn da okayzhan, Moaziz mi du di rait ting. Ih mi luk tu Jehoava ahn du egzakli weh ih mi tel ahn fi du.
8. Weh prablem mi kom op tuwaadz di en a dehn 40-yaa chrip chroo di wildanes?
8 Bowt 40 yaaz afta dis mi hapm, di Izrelait dehn mi deh eena di saym sichuwayshan agen. Dehn mi deh tuwaadz di en a dehn chrip chroo di wildanes. Dehn mi deh da wahn neks plays weh dehn kaal Meriba. Ih mi deh kloas tu Kaydesh, kloas tu di boada a di Pramis Lan. * Di Izrelait dehn mi staat komplayn agen bowt no waata. (Num. 20:1-5) Bot dis taim, tingz neva tern owt di saym way fi Moaziz.
9. Weh Jehoava mi tel Moaziz fi du, bot weh ih mi du insted? (Koment pahn di picha da di biginin a dis aatikl.)
9 Weh Moaziz du wen di peepl staat op agen? Wel, ih luk tu Jehoava agen fi dairekshan. Bot dis taim Jehoava neva tel ahn fi schraik di rak. Jehoava tel ahn fi get ih stik, gyada op di peepl fronta di rak, ahn den taak tu di rak. (Num. 20:6-8) Bot Moaziz neva taak tu di rak. Insted, ih gaan aaf pahn di peepl ahn hala op afta dehn di seh: “Lisn op, unu rebl! Wee haftu bring owt waata fahn dis rak fi unu?” Den, ih schraik di rak, noh wan taim, bot too taim.—Num. 20:10, 11.
10. How Jehoava mi feel wen ih si weh Moaziz du?
10 Jehoava mi geh reeli beks wid Moaziz. (Deut. 1:37; 3:26) Wai Jehoava mi geh beks? Ih ku bee fi moa dan wan reezn. Laik weh wi mi menshan erliya, Jehoava mi don tel Moaziz weh fi du, an ih neva fala di nyoo dairekshan. Dat ku bee wan reezn wai Jehoava mi geh beks wid ahn.
11. Wai di Izrelait dehn kuda mi tink dat di waata mi-di kohn fahn di rak ahn noh fahn Jehoava?
11 Wahn nada reezn wai Jehoava mi beks ku bee dat di rak dehn da di fos Meriba da-mi salid granait. Soh noh kay how haad sombadi wuda nak it, nobadi wuda ekspek waata fi kom owt fan it. Bot di rak dehn rong di sekant Meriba mi difrent. Da-mi wahn saafa rak kaal laimstoan. Bikaaz a dat, waata kuda paas chroo it ahn den setl anda di grong. Peepl kuda jos mek wahn hoal eena di rak ahn geh waata. Soh wen Moaziz schraik di rak insteda taak tu it, ih ku bee dat di Izrelait dehn mi tink di waata mi-di kohn fahn di rak ahn noh fahn Jehoava mirakl. * Wi kyaahn seh fi shoar.
HOW MOAZIZ MI GAAHN GENS JEHOAVA
12. Weh ku bee wahn nada reezn wai Jehoava mi geh beks wid Moaziz an Ayron?
12 Wahn nada reezn ku deh wai Jehoava mi geh beks wid Moaziz an Ayron. Noatis dat Moaziz mi tel di peepl: “Wee haftu bring owt waata fahn dis rak fi unu?” Wen Moaziz seh “wee,” ih praabli mi-di rifaa tu ihself an Ayron. Moaziz neva shoa no rispek fi Jehoava, di Wan hoo mi reeli du di mirakl. Di skripcha da Psalm 106:32, 33 agree wid dis tu. Ih seh: “Dehn mi provoak Ahn da di waata a Meriba, an ih neva gaahn gud fi Moaziz bikaaz a dehn. Dehn mi get ahn beks no miks, soh ih tel dehn aaf.” * (Num. 27:14) Wateva da-mi di reezn, weh Moaziz du neva giv aana tu Jehoava. Soh Jehoava tel Moaziz an Ayron: “Di too a unu gaahn gens mi koman.” (Num. 20:24) Dat da-mi wahn seeryos sin fi chroo!
13. Wai ih mi rait ahn fyaa dat Jehoava mi tek akshan gens Moaziz?
13 Bikaaz Moaziz an Ayron mi-di leed Jehoava peepl, Jehoava mi ekspek moa fahn dehn. (Look 12:48) Pahn wahn nada okayzhan bifoa dis, Jehoava neva mek wahn hoal jenarayshan a Izrelait gaan eena di lan a Kaynan bikaaz dehn mi gaahn gens ahn. (Num. 14:26-30, 34) Soh ih mi rait ahn fyaa dat Jehoava wuda mi du di saym ting tu Moaziz wen hihn mi gaahn gens ahn. Jos laik di adaz weh mi ribel gens Jehoava, Moaziz neva did gaahn eena di Pramis Lan
DI KAAZ A DI PRABLEM
14, 15. Weh mi mek Moaziz gaahn gens Jehoava?
14 Weh mi mek Moaziz gaahn gens Jehoava? Noatis weh Psalm 106:32, 33 seh agen: “Dehn mi provoak Ahn da di waata a Meriba, an ih neva gaahn gud fi Moaziz bikaaz a dehn. Dehn mi get ahn beks no miks, soh ih tel dehn aaf.” Aldoa da-mi Jehoava dehn gaahn gens, da-mi Moaziz hoo mi geh beks ahn gaan aaf pahn di peepl dehn. Bikaaz ih neva ga inof self-kanchroal, ih taak widowt tink bowt weh ku hapm afta dat.
15 Moaziz mi mek weh adaz du dischrak ahn. Ih neva mi kip ih foakos pahn Jehoava. Pahn di fos okayzhan, Moaziz mi handl evriting eena di karek way. (Ex. 7:6) Bot, ih pasabl dat afta ih mi-di deel wid dehn stobant Izrelait fi yaaz ahn yaaz, ih mi geh taiyad ahn foschraytid wid dehn. Yu tink dat ih mi-di foakos onli pahn how hihn mi feel insteda bowt how ih kuda mi aana Jehoava?
16. Wai wi fi tink bowt weh Moaziz mi du?
16 If wahn faytful prafit laik Moaziz ku looz ih foakos ahn sin ahn mis owt pahn di apachooniti fi goh eena di Pramis Lan, di saym ting ku hapm tu wee. Di nyoo werl deh kloas; wi noh waahn mis owt pahn dis privilij. (2 Peet. 3:13) Soh wi need fi stay foakos pahn Jehoava an aalwayz chrai fi du weh hihn waahn. (1 Jan 2:17) Weh wi ku laan fahn Moaziz mistayk?
NOH LOOZ YU FOAKOS BIKAAZ A WEH ADAZ DU
17. Weh wahn help wi fi noh shoa wi foschrayshan?
17 Noh looz yu self-kanchroal ahn mek yu foschrayshan shoa. Eevn wen wi di deel wid di saym prablemz oava an oava agen, “mek wi noh geh taiyad a du weh rait, kaa wen di rait taim kohn, wi wahn geh weh joo wi if wi noh giv op.” (Gal. 6:9; 2 Tes. 3:13) Wen wi fays wahn sichuwayshan weh foschrayt wi er wi di deel wid wahn persn weh get pahn wi nervz, wi fi kanchroal wi tong ahn wi tempa. (Prov. 10:19; 17:27; Mach. 5:22) Wen adaz get wi beks, wi fi laan fi wayt pahn Jehoava. (Reed Roamanz 12:17-21.) Wi need fi memba dat Jehoava wahn ak da di rait taim. If wi pay bak bad fi bad insteda luk tu Jehoava, wi noh di shoa rispek fi hihn.
18. Weh wi need fi memba wen ih kohn tu how wi fala dairekshanz?
18 Fala di laytes dairekshanz. Wi need fi fala di laytes dairekshan weh Jehoava gi wi. Wi noh fi kip di du tingz di way wi yoostu du dehn eena di paas. Wi fi kwik fi fala eni nyoo dairekshan Jehoava provaid chroo fi hihn aaganaizayshan. (Heeb. 13:17) Wi fi “fala di rool dehn weh mi rait dong eena di Skripcha ahn notn els.” (1 Kor. 4:6) If wi du dis, wi di kip wi foakos pahn Jehoava.
Weh wi ku laan fahn di way Moaziz gaan aan wen adaz mi mek mistayk? (Paragraaf 19)
19. Weh wi ku du soh dat di mistayk dehn weh adaz mek noh damij wi rilayshanship wid Jehoava?
19 Noh alow di mistayk dehn weh adaz mek damij fi wee rilayshanship wid Jehoava. If wi kip wi aiy dehn foakos pahn Jehoava, wi noh wahn mek weh adaz du foschrayt wi er damij wi rilayshanship wid Jehoava. Espeshali if, laik Moaziz, wi ga lata rispansabiliti eena Gaad aaganaizayshan. Af koars, aala wi need fi werk haad an obay Jehoava fi geh sayv. (Fil. 2:12) Di moa rispansabiliti wi ga, di moa Jehoava ekspek fahn wi. (Look 12:48) Bot if wi reeli lov Jehoava, wi noh wahn mek notn separayt wi fahn fi hihn lov er kaaz wi fi sin.—Ps. 119:165; Roam. 8:37-39.
20. Weh wi waahn du?
20 Dehnya da sohn haad taimz, noh chroo? Soh mek wi aalwayz kip wi aiy dehn foakos pahn di Wan hoo ‘di sidong pan ih chroan da hevn,ʼ soh dat wi ku laan weh hihn waahn wi du. Noh mek weh adaz du damij wi rilayshanship wid Jehoava. Memba weh mi hapm tu Moaziz; tek fi hihn egzampl tu haat. Insteda geh beks bowt di tingz weh wi bradaz du, mek wi “luk tu Jehoava wi Gaad til ih shoa wi dat ih pleez wid wi.”—Ps. 123:1, 2.
^ par. 2 Psalm 123:1-4: “Ai luk tu yoo, yoo hoo di sidong pahn yu chroan da hevn. Di saym way how wahn servant luk tu di han a ih maasta, ahn wahn gyal servant luk tu di han a ih laydi maasta, jos laik dat, fi wee aiy dehn wahn luk tu Jehoava wi Gaad til ih shoa wi dat ih pleez wid wi. Ga mersi pahn wi, Oa Jehoava, ga mersi pahn wi, bikaaz wi don geh nof a peepl di chreet wi wid no rispek. Wi don geh taiyad a di prowd peepl dehn di tek wi mek papishoh ahn prowd peepl di chreet wi laik dert.”
^ par. 7 Psalm 95:8, 9: “Noh mek unu haat geh stobant laik weh mi hapm da Meriba, laik di day da Masa eena di wildanes, wen unu ansesta dehn mi tes mi; dehn chalenj mi eevn afta dehn mi si weh aal Ah mi du fi dehn aredi.”
^ par. 8 Dis da noh di saym Meriba weh mi deh kloas tu Refidim, weh da aalso Masa. Dis wan deh kloas tu Kaydesh. Bot dehn naym di too plays Meriba kaaz a di big kwaaril weh mi hapm deh.—Si di map eena Appendix B3 eena di New World Translation of the Holy Scriptures.
^ par. 11 Wahn Baibl teecha weh naym John A. Beck seh dat akaadn tu wahn Jooish chradishan, di rebl dehn klaym seh dat dis da neva wahn mirakl kaaz Moaziz mi noa dat dis rak mi ga waata eena it. Soh dehn mi waahn hihn du di mirakl agen pahn wahn nada rak. Af koars, dis da jos wahn chradishan.
^ par. 12 Si The Watchtower, October 15, 1987, “Questions From Readers.”
