1, 2. Ida luba wíchuguni warihin luagu Heowá?

WAWINWANDUÑA lidan dan hénrenguti ani éibutima lásügürün dan hénrengutimabei ibagari lubaragiñe ñein lanya darangilaü Ubouagu (2 Tim. 3:1). Ligía lunti lubéi wálügüdagun woungua: “Ka umoun nidin áluaha ídemuei luma adundehani?”. Másiñati aba lan wóunabun lau lóufudagun luma lan Heowá. Ani ligía óunabagüleibei le buídutimabei.

² Ida luba wíchuguni warihin luagu Heowá? Ani ida luba wachoururuni wíchuguñein lan warihin luagun dan le wagagibudagun luma lénrengunga? Ariñagati aban abürühati sálumu saragu sígulu guentó, mosu lan wíchuguni warihin luagu Heowá lun líderaguniwa dan le wagagibudagun luma lénrengunga (aliiha huméi Sálumu 123:1-4). Genegeguagüda lumuti katei le luma le ladügübei aban musu. Dan le lariñagubei iñura lumuti lan musu larihin luagun lúhabu labureme, mámarügü layanuhaña luagu chouru lani líchuguba lan labureme éigini lun ani lóunigirubei lan. Layanuhaña meha giñe luagu lunti lan letenirun musu lun labureme súnwandan lun lasubudiruni ka lan labusenrunbei luma lun lagundaaragüdüni. Ítarameme, mosu waturiahanu Lererun  Bungiu sagü weyu lun gunfuranda wamani ka lan labusenrunbei Heowá lun wadügüni falá wameime ladundehan. Ítara luba gayara lan líderaguniwa (Efe. 5:17).

3. Ka gayaraabei ladügün lun wadireiruni warihin luéi Heowá?

³ Lau sun subudi wamani súdini lan lun wíchuguni warihin luagu Heowá súnwandan, anihein dan ladügüba somu katei lun wadireiruni warihin luéi. Ligía asuseredubei tun aban lumada Hesusu gíritu Marta. Dan le lídinbei túbiñe, metenitu lun le larufudahabei ladüga weiri lan tetenirun lun tuberesegun (Luk. 10:40-42). Anhein susere lubéi le tun aban gürigia úaraguatu dan le ñein lubéi Hesusu tuma, moun lumuti taweiridun wanigi anhein asusereda ligiaméme woun. Kati gayaraabei ladügün lun wadireiruni warihin luéi Heowá? Lidan arütíkulu le, warihibei ida liña gayara lan ladügün le hadügübei amu lun míchugun wamani warihin luagu Heowá. Wafurendeiruba giñe luagu le lunbei wadügüni lun madireirun lan warihin luéi Heowá.

4. Ka uagu gayara lubéi laweiridagüdünün wanigi mebelurun lan Moisesi lidoun Fulasu Füramasewati?

⁴ Chóuruti áluaha lumuti lan meha Moisesi ladundehan Heowá. Le linarün katei, “rédeiti deregüdagu lidan laritagun kamá hamuga aríagu liña lun Bungiu le marihínbei” (aliiha huméi Ebüréu 11:24-27). Ariñagatu Bíbülia luagu “úadigiaali bugaha amu profeta Ísüraeli kei Moisesi le úmati ladimureha Bungiu gagibugu” (2 Lur. 34:10). Gama lumoun, lau sun meha buidu lan lumadagua Moisesi luma Heowá, féridi lumuti chansi lun lebelurun lidoun Fulasu Füramasewati (1 Lur. 20:12). Ka uagu mebelurun lubéi Moisesi lidoun Fulasu Füramasewati?

5-7. a) Ka asuseredubei murusun dan lárigiñe háfuridun ísüraelina Ehiptugiñe? b) Ida liña lahandilihani Moisesi turobuli le?

⁵ Kei burí yarafa lun bián hati lárigiñe háfuridun ísüraelina Ehiptugiñe ani íbini lubaragiñe hachülürün luagu wübü Sinaí, aba liabin aban turobuli wéiriti. Aba hagumeserun adimureha wuriba luagu Moisesi ladüga uá lan duna. Ábatima laribadun turobuli le darí lun lariñagun Moisesi lun Heowá: “Kaba san nadüga hau gürigia ha? Málübaña ánhaña busén hachamuragun dübü nuagu lun háfarunina!” (Afu. 17:4). Óunaba lumuti Heowá Moisesi lau líchuguni adundehani le lun: lunti lan lagayuahan luagu dübü le Orebübei lau lubadun, ítara luba lésehan duna ñéingiñe. Sigimémeti abahüdaguni le ariñaga: “Aba ladügüni Moisesi ítara hagibugiñe wéiyaaña mutu Ísüraelina”. Guratiña ísüraelina duna ani ítara liña laranserún turobuli ligía (Afu. 17:5, 6, TNM).

⁶ Ariñagatu Bíbülia wati lan Moisesi lun fulasu ligía Masá ani mini lan dimurei le “Óuchawaguni”, luma Meribá, mini lan “Sigenei”. Ka uagu gadüna lubalin iri le? “Ladüga buga hóuchaguni [ísüraelina] Bungiu lau hariñagun: ‘Anihein san Bungiu wama odi úati?’” (Afu. 17:7).

⁷ Ka lasaminarubei Heowá luagu le asuseredubei Meribá? Barǘ lumuti lun lan hebedaagua ísüraelina luma lun lilurudun, mámarügüñein lun Moisesi hebedaagua (aliiha huméi Sálumu 95:8, 9). Furanguti wuriba lan le hadügübei ísüraelina. Ánheinti Moisesi buiti le ladügübei: áluahati ídemuei luma Heowá ani falá lumuti ladundehan ítara kei lariñaguni lun lun ladügüni.

8. Ka turobuli asuseredubei dan le gumumémeeli lan haweiyasuhan ísüraelina lidan fulasu mageirawati?

⁸ Kéiburi 40 irumu lárigiñe, dan le gumumémeeli lan meha haweiyasuhan ísüraelina  lidan fulasu mageirawati, aba lasuseredun aban katei libe le meha asuseredubei Meribá. Chülühaña meha ísüraelina lidoun aban fulasu le giñe gíribei Meribá. Gama lumoun, yarafañein meha fulasu le lun Kadesi, yarafa lun fadaguaü lun Fulasu Füramasewati. * Ábaya hekeharun ísüraelina luagu lilouguan duna (1 Lur. 20:1-5). Lídanti ókaasion le, madügün lumuti Moisesi katei kei ladügüni furumiñe.

9. Ka lariñagubei Heowá lun Moisesi lun ladügüni, ani ka ladügübei? (Ariha huméi dibuhu le lídanbei lagumeseha arütíkulu).

⁹ Ida liña lóunabun Moisesi lun ebedaaguni le? Ábaya lamuriahan ídemuei luma Heowá lun lariñaguni Heowá lun le lunbei ladügüni. Lídanti ókaasion le, mariñagunti Heowá lun lun lagayuahan luagu dübü. Ariñagarügüti lun lun lárügüdüni lubadun, lóundaruniña gürigia ligibugiñe dübü luma lun layanuhan lun dübü (1 Lur. 20:6-8). Gama lumoun, mayanuhanti Moisesi lun dübü ligía. Safaguarügüti, ligía aban lubéi lagúaragun houn ha ñéinbaña: “Aganba humá, maganbaditiña huguya le: Wasagaruba funagia duna lídangiñe dübü le lun hatun?”. Lárigiñe aba lagayuahan luagu dübü ani mámarügü aban wéiyaasu, biámañein wéiyaasu ladügüni (1 Lur. 20:10, 11).

10. Ida liña lasandiragun Heowá lungua luagu le ladügübei Moisesi?

¹⁰ Aba lagañidun Heowá saragu luma Moisesi (2 Lur. 1:37; 3:26). Ka uagu? Másiñati ladüga lan ámuñegueinarügü katei. Másiñati aba lan lagañidun luma ladüga mafalarun lani ladundehan lidan ókaasion le.

11. Dan le lagayuahanbei Moisesi luagu dübü lun láfuridun duna ñéingiñe, ka uagu gayara lubéi meha hasaminarun ísüraelina mama lan aban milaguru?

¹¹ Ariha wamá ámuya katei háfuga le adügübei lun lagañidun Heowá luma Moisesi. Óunwenbu burí dübü-ageigu le lídanbei Meribá, le uágubei layanuhóua furumiñe, aban luwuyeri dübü le dereti. Meberesenga anhein agayuaha aban gürigia luagu dübü le magurabunbei lun láfuridun duna ñéingiñe. Ánheinti lidan le aban Meribá, mítaranti dübü le ñeinbei, madereti burí dübü ligía. Kei furufuru lan dübü le, liibe-agei dan, lidan fulasu ñein lubéi ladarirúa dübü le anihein burí duna guribini le gayaraabei hadariruni gürigia. Dan le lagayuahanbei Moisesi luagu dübü ligía lubaragiñe hamuga layanuha lun másiñati aba lan hasaminarun ísüraelina éseha lan duna ñéingiñe ladüga gayara lan láfuridun duna lídangiñe dübü ligía ani mama luagu adüga lan Heowá aban milaguru. *

12. Ka ámuya katei háfuga ligía lan lébubei lagañidun Heowá luma Moisesi luma Aarón?

¹² Anihein giñe ámuya katei háfuga ligía lan lébubei lagañidun Heowá hama bián íbirigu ha, Moisesi luma Aarón. Ariha waméi le lariñagubei Moisesi houn gürigia: “Wasagaruba funagia duna lídangiñe dübü le lun hatun?”. Dan le lariñagunbei Moisesi, “wasagaruba” másiñati layanuhaña lan meha luougua luma luagu Aarón. Arufudati le lariñagubei menebenehabuni lun Heowá, le adügübalin milaguru le. Genegeti úara lan katei le luma le lariñagubei Sálumu 106:32, 33: “Gáñigüda hamuti giñe Bungiu  laru duna Meribá, ábati lidin wuriba lun Moisesi ladüga sun lira, gífigüda hamuti luguraasun, aba ladimurehan masaminarunga ka lan lariñagubei” * (1 Lur. 27:14). Lau le ladügübei Moisesi, míchugun lumuti uéiriguni le yuubei lun Heowá. Ariñagati Heowá lun Moisesi luma lun Aarón: “Lugundun hadüraaguni le nubeibei” (1 Lur. 20:24). Chóuruti adüga hamá aban figóu wéiriti.

13. Ka uagu richá lubéi lasiadiruni Heowá Moisesi?

¹³ Moisesi meha luma Aarón alidihabaliña lumutuniña Bungiu, ligía wéiritima lubéi meha hani buligasion ligibugiñe (Luk. 12:48). Lubaragiñe turobuli le asuseredubei Meribá, mígirunti meha Heowá lun hebelurun hádangiñe ísüraelina ha ebedaagubaña Kanáun (1 Lur. 14:26-30, 34). Ligía richá lubéi lasiadiruni giñe Heowá Moisesi lun mebelurun lan lidoun Fulasu Füramasewati ladüga lebedaagun lun.

14, 15. Ka adügübei lun lebedaagun Moisesi?

¹⁴ Ka adügübei lun lebedaagun Moisesi? Arihaya waméi le lariñagubei Sálumu 106:32, 33: “Gáñigüda hamuti giñe Bungiu laru duna Meribá, ábati lidin wuriba lun Moisesi ladüga sun lira, gífigüda hamuti luguraasun, aba ladimurehan masaminarunga ka lan lariñagubei”. Gáñigüda hamuti ísüraelina Heowá, ánheinti Moisesi féridi lumuti luguraasun. Adügati márügüdagun lan lungua lun layanuhan masaminarunga luagu le gayaraabei lasuseredun.

¹⁵ Adügati le hadügübei amu lun ladireiruni Moisesi larihin luéi Bungiu. Buiti meha lóunabun Moisesi lun turobuli dan le hekeharunbei ísüraelina furumiñe luagu lilouguan duna (Afu. 7:6). Gama lumoun, másiñati aba lan labuchadun luagu ani aba lagañidun lárigiñe lawanduniña ísüraelina maganbaditiña luagu saragu irumu. Másiñati saminatima lan luagu le lasandirubei lubaragiñe líchugun uéiriguni lun Heowá.

16. Ka uagu lunti lubéi wetenirun lun le ladügübei Moisesi?

¹⁶ Anhein digí lubalin aban profeta úaraguati kei Moisesi larihin luéi Bungiu ani aba lafigouhan, gayaraati giñe lasuseredun ligiaméme woun. Ítara kei Moisesi, chülümémeeli dan lun webelurun lidoun iseri ubóu le füramase laalibei Bungiu woun (2 Fe. 3:13). Mabusenruntiwa lun weferidiruni lubuidun chansi le. Ánheinti busén wabéi wibihini lunti wakipuruni warihin luagu Heowá, áfaagua wagíame lun wadügüni lugundan súnwandan (1 Huan 2:17). Ka gayaraabei wafurendeiruni lídangiñe lichara Moisesi?

17. Kaba íderaguawa lun mígiraguagüdün wamá woungua lun igañi?

¹⁷ Mígiraguagüda wamá woungua lun igañi. Anihein dan, wagagibudaguba luma ligiaméme turobuli lóugiñe aban wéiyaasu. Gama lumoun, ariñagatu Bíbülia woun: “Moun lumuti lubeiti labuchadun wawagu adügei katei le buídubei, lugundun ánhawa ítarameme, walubahaba buiti danme le lachülürün dan lun weresibiruni” (Gal. 6:9; 2 Tes. 3:13). Danme le wagagibudagun luma katei le adügübei lun wagañidun o dan le gaturobulin wamá hama amu sagü dan, wárügüdaguba san woungua? (Ari. 10:19; 17:27; Mat. 5:22, TNM). Ánhaña adüga amu lun wagañidun, máguyuguagüda wamá wuribani, ígira wamá lun Heowá ban lan “afayeigüda luagu” (aliiha huméi Rómana 12:17-21). Adüga wamuti le dan le wíchuguni warihin luagu Bungiu, agurabaha wagía lau gurasu lun laransehani katei danme larihin mégeiwa lan. Ánhawa hamuga adüga amu katei ani fáyeigüda wagía wuribani  luagu wuribani ítara liña hamuga keisi warufuduña lan menebenehabuni lun Heowá.

18. Ka lunbei waritaguni dan le weresibirun adundehani?

¹⁸ Falá waméi adundehani létima iserigilitimabei buidu. Dan le líchugun Heowá iseri adundehani woun tidan lóundarun mosu wafalaruni adundehani ligía lau lóufudagun. Málugunbadiwa wadügüni katei kei meha wadügüni (Ebü. 13:17). Ani wáfaaguba “lun midin [wamá] yagürounméme luéi le bürüwañubei” (1 Ko. 4:6). Ánhawa adügei ítara, warufuduba wíchuguñein lan warihin luagu Heowá.

19. Ka lunbei wadügüni lun meferidirun wamani wamadagua luma Heowá ladüga hachara amu?

¹⁹ Mígira wamá lun lagadeirun wamadagua luma Heowá ladüga hadurun amu. Ánhawa akipurei warihin luagu Heowá mígirunbadiwa lun ladügün le hadügübei amu lun weferidiruni waguraasun o lun wadügün somu katei le gayaraabei ladügün lun wagadeiruni wamadagua luma Heowá. Lunti gabaroun hamani le hátima gánibaña somu buligasion tidan lóundarun Bungiu, ítara kei meha Moisesi. Inarüni lunti lan láfaagun kada aban wádangiñe lun gaganbadi lan lun Heowá lun gayara lan lesefurun. Lau sun lira, mosu waritaguni maguseragüdün lumutiwa lan Heowá lau aban lúrudu le siñati lasansirúniwa (Fil. 2:12). Éibutima lagibedagun wani buligasion lagurabahatimaba Heowá saragu wámagiñe (Luk. 12:48). Anhein inarüni lubéi hínsiñe lan Heowá woun, úabei ni kata adügüti lun wachugeragun ni lun lafanreinraguniwa luéi línsiñehabu (Sal. 119:165; Rom. 8:37-39).

20. Ka lunbei wáfaagun lun wadügün?

²⁰ Lidan dan hénrenguti le, kipu waméi warihin luagu le añuurubei luagu lálana larúeihan sielu lun wasubudiruni ka lan lugundanbei. Mígira wamá lun ladügün le hadügübei amu lun lagadeirun wamadagua luma Heowá. Adügati le asuseredubei lun Moisesi lúntima warihini lisudinin katei le luma lun wakipuruni lidan wasaminan luma tidan wanigi. Lubaragiñe wuriba lan wóunabun lun hachara amu, áfaagua wamá lun wíchuguni warihin luagu Heowá “aguraba gudemehabu lan woun” (Sal. 123:1, 2).