Eho roye ri tara pi?
“Muhona, ami me tara kOve, me tara keyuru Ove ku u honaparera.”—EPS. 123:1.
1, 2. Okutara ku Jehova ku kamburira mo ye?
TU HUPA momayuva omasenina ‘wotuveze otuzeu,’ nu ehupo mari ri ririre ko ezeu ngunda ouye oupe au hi ye ya, ouye mu ma mu kara ohange ya tjiri kombanda yehi. (2 Tim. 3:1) Okutja ohepero okuripura oveni kutja, ‘Hapo eho randje ri tara pi kokupaha ombatero nomuhunga omusemba?’ Eziriro ndi mape ya atu kara na ro tjimanga ma rire, “Ku Jehova,” nu indi tjiri eziriro esemba.
2 Okutara ku Jehova ku kamburira mo ye? Matu tjiti vi kutja eho retu tu zike mu Ye uriri, otja tji matu tuurunga omarorero aehe wouye mbwi? Omaserewondo nga kapita, omutjange wepsalme wa raisa ounanḓengu wokuyera omeho nokutara ku Jehova kombatero moruveze rouzeu. (Lesa Epsalme 123:1-4.) Eye wa sasaneka omuano eṱe mbu tu tara ku Jehova ku nomuano omukarere mbwe tara komuhona we. Omutjangere wepsalme a hee ye? Mape hee kutja omukarere ka tara komuhona we okupewa ovikurya poo ondjeverero uriri, nungwari u hepa okutara komuhona we aruhe okutjiwa imbi mbi ma vanga nokuungura otja konḓero yomuhona we aruhe. Momuano tjingewo, tu hepa okulesa Embo ra Mukuru aruhe okutjiwa kutja ovikeṋa Jehova mbi ma vanga kutja tu tjite kourike wetu nu tu kongorere omuhunga mbo. Imbo oomuano mbu matu yenene okukara nouatjiri wokutja Jehova me tu vatere moruveze rouzeu wina.—Ef. 5:17.
3. Ovikwaye mbi mavi yenene okututeya ombango yokutara ku Jehova?
3 Nandarire kutja matu tji wa ounanḓengu wokutara ku Jehova aruhe, povikando mape ya atu pandjara ombango yetu. Nu itjo otjiṋa tji tja tjitwa kepanga ra Jesus roposengo, Marta. Eye “we rikendera oviungura avihe mbye sokuungura.” (Luk. 10:40-42) Tjinangara iho tja tjitwa komundu omuṱakame ngwa ri pu na Jesus omuini, okutja ka tu sokutemwa iho tji tja tjitwa ku eṱe. Nambano ovikwaye mbi mape ya a vi tu teya ombango yokutara ku Jehova? Morupa ndwi, matu ka konḓonona omuano ovitjitwa vya varwe mu mavi yenene okutupandjarisa ombango. Nu wina matu ke rihonga omuano mu matu yenene okuzika omeho wetu mu Jehova.
OMURUMENDU OMUṰAKAME WA PANDJARA OMERIZIRIRA
4. Ongwaye tji mape ya atu temwa kutja Moses ka hitire mEhi rOruyano?
4 Moses tjiri aa tara ku Jehova okupewa omuhunga nomirari. Mouatjiri, “eye wa kakaterere ku Ingwi ngu ha munika tjimuna aayo iye Mu munu.” (Lesa Ovaheberi 11:24-27.) Ombeibela i tu raera kutja “okuzambo ngamba kapeya penduka omuprofete rukwao moIsrael otja Moses ngwa munasana na Muhona omurungu nomurungu.” (Deut. 34:10) Nandarire kutja Moses wa kara noupanga oupame puna Jehova, eye wa pandjara ondjingonekero yokukahita mEhi rOruyano. (Num. 20:12) Otjikwaye tji tja putarisa Moses?
5-7. Ovaisrael tji va za moEngipte, pa sekama ouzeu waye ounene, nu Moses wa tjinda vi otjiṋa ho?
5 Omieze mangara vivari Ovaisrael tji va za moEngipte, pa sekama ouzeu ounene, nandarire ngunda ave hi ya vaza pOndundu Sinai. Ovandu va uta okunaunina ouhepe womeva. Va uta okuposisa Moses, nu otjiṋa hi tja rira ongendo tjinene ku ye nga tja uta okuravaera ku Jehova ama kumbu ku tja: “Hi tjite vi notjiwaṋa hi? Tjapo ngaatji ndji zepa nomawe!” (Eks. 17:4) Jehova wa yandja omuhunga omukahu ku Moses. Eye aa sokutoora okati ma tone oruuwa rOndundu Horeb, kokutja omeva ye pite. Ombeibela i tja: “Moses wa tjita nao momurungu wovanane vOvaisreal.” Ovaisrael va nwa omeva ngo nu ka pa ri ouzeu rukwao.—Eks. 17:5, 6.
6 Ombeibela i tu raera kutja Moses “we pe ruka Masa, okutja omarorero, na Meriba, okutja oviposa. Orondu Ovaisrael va tjita otjiposa na Muhona, na ve mu roro amave tja: ‘Hapo, Muhona u ri mokati ketu po indee?’” (Eks. 17:7) Omana ngo ye hitasana na imbi mbya tjitwa mbo, orondu pa ri “Omarorero” “nOviposa.”
7 Hapo ihi tji tja tjitwa po Meriba tja ṱuna vi ku Jehova? Eye wa vara ongaro yOvaisrael otjomuano wokupirukira ouhonapare poo ounane we, nungwari ka ku pirukira Moses uriri (Lesa Epsalme 95:8, 9.) Ovaisrael va tataiza tjiri. Nu otjikando ho, Moses wa raisa ongaro ombwa mokutara ku Jehova nokuṱakamisa imbi mbya raerwa okutjita.
8. Komaandero wozombura 40 indu Ovaisreal tji va ri mokuti onguza pa tjitwa tjike?
8 Pa tjitwa tjike, indu ouzeu tjimuna mbo tji we ya rukwao kombunda yozombura 40, ape ve mane ouyenda wawo mokuti onguza? Ovaisrael va kotoka po Meriba rukwao. Posiya ka po Meriba pu va ri rutenga, imbo ya ri meṋe ya Kades, popezu nEhi rOruyano. * Ovaisrael va unauna okuhina omeva rukwao. (Num. 20:1-5) Nu otjikando hi, oviṋa vya rara navi ku Moses.
9. Moses wa raerwa kutja nga tjite vi, nu eye wa tjita vi? (Tara kotjiperendero pomautiro worupa ndwi.)
9 Moses wa tjita vi ohunga nongaro ndjo? Moses wa tara ku Jehova rukwao kombatero. Nu otjikando hi Jehova ke mu raerere okutona oruuwa. Moses wa raerwa okutoora okati ke nu ma woronganise otjiwaṋa koruuwa nu ma hungire koruuwa momurungu wa wo. (Num. 20:6-8) Nungwari Moses ka hungirire koruuwa. Eye wa uta okutoora omazenge na utu okurokohera movandu: “Arikaneye purateneye, vanahanḓu oweṋe! Indu matu mu pupisire omeva moruuwa ndwi are?” Moses okuzambo wa tona oruuwa povikando vivari nungwari ka tonene otjikando tjimwe.—Num. 20:10, 11.
10. Oviṋa Moses mbya tjita vya ṱuna vi ku Jehova?
10 Jehova wa pindikira Moses tjinene. (Deut. 1:37; 3:26) Omena raye? Pe noviṋa ovingi mbi mape ya oripurire ko. Tjimuna tji twa munu, Jehova mape ya wa pindika mena rokutja Moses ka kongorerere omirari mbya pewa.
11. Ongaro Moses ndja tjita ya i sako vi ombango kotjihimise Jehova tja tjita?
11 Wina pe noviṋa vyarwe mbi mape ya oripurire ko. Oruuwa ndwa ri poMeriba indjo ondenga rwa ri orukukutu. Nandarire kutja omundu wa kondjo okutona nomasa pu pe ṱa pi, ka ma yenene okupitisa omeva mu rwo. Posi yokutja, otuuwa poMeriba oitjavari twa pangukire nomasa, otwo twa ri otutaazu kaṱiṱi. Mena rokutja oruveze ndwo rwa ri nomawe omataazu, po ṋa mbo pa ri omeva omengi wokehi yehi ngo tjo yenena okuteka uriri. Mape ya kutja indu Moses tja tona oruuwa povikando vivari, wa raisa kutja omeva ngo ya zu mokupupa oyeni uriri, nungwari ka ye zire ku Jehova? Hapo Moses, wa raisa otjihimise motjihimise tjarwe, indu tja tona oruuwa pendje nokuhungira ku ro? * Ka tu nokutjiwa nawa.
OMUANO MOSES MA PIRUKIRA
12. Mape ya omapu yeṋe warwe Jehova nga pindikira Moses na Aron?
12 Jehova mape ya u nepu rarwe nda pindikira Moses na Aron wina. Tara ku imbi Moses mbya hungira kotjiwaṋa: “Matu mu pupisire omeva moruuwa ndwi are?” Mokuungurisa embo ndi “Matu,” Moses mape ya aa hungire ohunga naye omuini na Aron. Omambo ngo ye raisa okuhina ondengero ku Jehova otja ngwa tjiti otjihimise ho. Otjitjitwa atjihe hi tja raisiwa oukahu mEpsalme 106:32, 33: “Pomeva waMeriba otjiwaṋa tja pindikisa Muhona, nu Moses wa muna ouzeu tjinene mena rawo. Owo va tetarisa Moses tjinene, nga tjiya hungire omambo nokuhinokuripura.” * (Num. 27:14) Omuano auhe mbwa kara po, omukambo Moses mbwa toora wa isako ondjozikiro ku Jehova. Jehova wa raera Moses na Aron, kutja: “Eṋe amuyevari tjinga amwa pirukira omarakiza wandje.” (Num. 20:24) Imbo tjiri wa ri ourunde ounene!
13. Ongwaye tji ya ri ohepero ku Jehova okuyeta omberero ku Moses?
13 Otjovahongorere vovandu va Jehova, Moses na Aron va pewa omberero onene. (Luk. 12:48) Nu wina oruveze ndwa kapita, Jehova wa nakaurire ozondekurona zotjiwaṋa tja Israel okukahita ehi ra Kanaan mena romapirukiro wawo. (Num. 14:26-30, 34) Okutja Jehova wa ri nawa okuyeta omberero ndjo ku Moses mena romapirukiro we. Tjimuna ovapirukire varwe mbo, eye ka yandjererwe okuhita mEhi rOruyano.
OTJIYETE TJOUMBA
14, 15. Otjikwaye tji tja tjita kutja Moses ma pirukire Mukuru?
14 Otjikwaye tji tja tjita kutja Moses ma kare nongaro yokupirukira Mukuru? Epsalme 106:32, 33 ri tja: “Pomeva waMeriba otjiwaṋa tja pindikisa Muhona, nu Moses wa muna ouzeu tjinene mena rawo. Owo va tetarisa Moses tjinene, nga tjiya hungire omambo nokuhinokuripura.” Nandarire kutja Ovaisrael va pindikisa Jehova, Moses omuini wina wa hara omazenge. Omapindi nga ri mu ye ya tjita kutja ma ute okuhungira oviṋa nokuhina okuripura kutja mavi eta ye.
15 Moses wa yandjera ozongaro za varwe okutjita kutja eho re ari ha tara ku Jehova. Moses wa tjinda ouzeu imbo outenga nawa. (Eks. 7:6) Posi yokutja, kombunda yokukara pu notjiwaṋa tjOvaisrael ovehinonḓuviro ozombura ozengi mape ya tja tjita kutja Moses ma urwe. Hapo ouripura wa Moses wa ri komapindi nomazenge we, moruveze rokuyandja ondjozikiro ku Jehova?
16. Oviṋa Moses mbya tjita vi notjikwaye na eṱe?
16 Ndovazu omuprofete omuṱakame tjimuna Moses wa yenena okupandjara ombango na putara, otjiṋa ho matji yenene okutjitwa kweṱe wina. Tjimuna Moses, eṱe tu ri pokuhita mouye oupe, Jehova mbwe tu kwizikira. (2 Petr. 3:13) Ka pe na umwe wetu ngu ma vanga okupandjara ondjingonekero onene ndji ṱa mbo. Kutja tu yenenise ondando yetu ndji, matu hepa okuzika eho retu mu Jehova, okukondja okutjita ombango ye aruhe. (1 Joh. 2:17) Ovikwaye mbi matu sokurihongera kondataiziro ya Moses?
O YANDJERE OZONGARO ZA VARWE OKUKUPANDJARISA OMBANGO
17. Otjikwaye tji matji tu vatere kutja a tu ha pindike?
17 O pindike. Nandarire kutja tu muna kutja varwe ve tu pa ouzeu okuza keyuva nga keyuva, “atu ṱotjirweyo mokutjita ouwa, orondu tji tu ha urirwe, matu kondo omakondero moruveze orusemba.” (Gal. 6:9; 2 Tes. 3:13) Indu tji twa pindikisiwa i ovikaro vya varwe mbi ve tjita aruhe, hapo tu ritjaera komazenge wetu? (Omiano. 10:19; 17:27; Mat. 5:22) Indu tji twa tjitwa i varwe navi, matu hepa okuyandja “oruveze komazenge.” Omazenge wa uṋe? O wa Jehova. (Lesa Ovaroma 12:17-21.) Tji twa tara ku Jehova, matu mu raisire ondengero mokuyandja oruveze komazenge we, a matu undju nomuretima ku ye okutoora omikambo tje ri ohepero. Okuyarura ongore mena rouvi mbwa tjitwa kweṱe maku raisa kutja katu nondengero ku Jehova.
18. Matu sokuzemburuka ye tji pe ya kokukongorera omirari?
18 Kongorera omirari omipe nawa. Hapo tu kongorera omirari omipe okuza ku Jehova? Tji pe ri nao, okutja ka maa tu ungura oviṋa omuano mbwaa tu vi ungura rukuru. Moruveze rwa nao, matu sokukara kamwaha okukongorera omirari omipe okuza kotjira tja Jehova. (Hebr. 13:17) Nu wina ngunda a matu tjiti nao, matu sokuṱakamisa kutja atu ha “katuka ko omaraerero Ndjambi nga zikamisa” poo okuuta okuweza oviṋa vyetu oveni ku imbi mbya tjangwa. (1 Kor. 4:6) Mokutjita nao, tu zika eho retu mu Jehova.
Matu rihongere ko tjike kongaro Moses ndja raisa kozondataiziro za varwe? (Tara koparagrafa 19)
19. Matu tjiti vi kutja oupanga wetu na Jehova au ha teka, nandarire kutja matu kondjo nozondataiziro za varwe?
19 Ozondataiziro za varwe a ze hiti pokati koupanga woye na Jehova. Tji twa siririke omeho wetu mu Jehova, eṱe ka maa tu yandjere ozondataiziro novikaro vya varwe okuṱuna koupanga wetu kuna Jehova. Nu ihi ohepero tjinene tji tu nomerizirira motjira tja Jehova, tjimuna Moses. Ngunda auhe wetu a ma hepa ‘okuungurira ondjamo ye mondjozikiro nondira ku Ndjambi,’ ngatu zemburuke kutja Jehova ke tu pangurire pondondo imwe atuhe. (Fil. 2:12) Otja pu tu nomerizirira omengi, o pu tu karera novingi okupangurirwa. (Luk. 12:48) Posi yokutja tji twa suvera Jehova komitima tjiri, ka pe notjiṋa tji matji tu pora korusuvero rwe.—Eps. 119:165; Rom. 8:37-39.
20. Matu sokurimanena okutjita tjike?
20 Moruveze rouzeu mu tu ri ndwi, ngatu yere omeho wetu ku Ingwi ngu “honaparera” meyuru, kokutja tu tjiwe imbi mbi ma vanga kutja tu tjite. Atu yandjere oupanga wetu kuna Jehova okupandjara mena rouvi mbu twa tjitwa i varwe. Imbi mbya tjitwa ku Moses vye tu hongo oukahu kutja matu sokutjinda vi ozongaro nḓo. Pendje nokuritoorera oveni omikambo momazenge mena rovandu varwe, ngatu kare a matu tara “ku Muhona, Ndjambi wetu, nga tji me tu tjariparere.”—Eps. 123:1, 2.
^ par. 8 Indji ka ya ri Meriba ndja ri popezu na Refidim. Merib oitjavari ndji ya ri meṋe ya Kades, nungwari ka Masa. Posi yokutja, otuveze atu yevari two twa rukirwe Meriba orondu pa kara ozombata pu two atuyevari.—Tara mokambo nga Okambo kokukonḓonona Embo raMukuru pomuk. 37,38, orupa 7.
^ par. 11 Onongo John A. Beck wa tja nai ohunga nehungi ndi: “Otja kombazu imwe yOvajuda, ovapirukire va hungira Moses omambo nga: ‘Moses ma tjiwa nawa kutja oruuwa ndwi rwa ungurwa pu ye! Ndovazu ma yenene okutjita otjihimise, nga raise omasa we nai, nge tu pitisire omeva mu indwi oruuwa.’” Indji ya ri ombazu ya wo uriri.
^ par. 12 Lesa Oruhungu, Oktoba 15, 1987, “Omapuriro okuza kovalese.”
