1, 2. Anni i kayà kagian na agga-fokus i mata tam kani Jehova?

MATTOLETAM ngana ta tiempo na “ziga-riga” anna mas mazziga paga i pattolay nige na paddattal na bagu nga aggaw anna nige metoli i imammo taw ta davvun. (2 Tim. 3:1) Makasta gafu nu iyavu tam ta baggi tam, ‘Sinni i pakalegakku tu uffun anna direksion?’ Puede nga insigida nga kagiattam, “Si Jehova”, anna yatun i kapianan nga tabbag.

² Anni i kayà kagian na agga-sinnattam si Jehova? Kunnasi tam masiguradu nga agga-fokus i mata tam sa durante nga arubangattam i problema ira ta pattolay? Piga siglo ngana i nappasa, anugutan na tadday nga salmista i pakawagattam nga tumangag kani Jehova para ta uffun nu egga i problema. (Bibbigan i Salmo 123:1-4.) Nikumparana i pattangag tam kani Jehova ta pagawag na doroban ta allo na pakiyafuanna. Anni i kayà kagian na salmista tatun? Bueno, ari laman nga mattangag i aripan ta yafuna para ta makan anna proteksion, nu ari, mawag tu kanayun nga agga-singan ta yafuna tapenu mammuan nu anni i kawaganna ira tapus kuanna yatun. Kunnatun gapa, mawag nga inaggaw nga usitakkattam i Uvovug na Dios tapenu mammuan i uray ni Jehova nittam mismu tapus tuttulan yatun nga direksion. Tatuttam  laman masiguradu nga faboran ittam ni Jehova ta tiempo na pakawagattam.​—Efe. 5:17.

3. Anni i makalsa ta fokus tam kani Jehova?

³ Maski ammu tam nga importante nga agga-sinnattam si Jehova, baka malsa nu mittan i fokus tam. Yatun mismu i nesimmu ta kofun ni Jesus nga si Marta. ‘Nagaburidu yayya [“nawawan i fokusna,” NW] ta karu na trabahu na.’ (Luc. 10:40-42) Nu nesimmu yatun ta kunna nga matalo nga tolay nga nakavuluna mismu si Jesus, ariattam gafu makaddagan nu mesimmu gapa nittam yatun. Anni gafu i makalsa ta fokus tam nga agga-sinnan si Jehova? Taw nga artikulo, gigiammuattam nu kunnasi alsan na annangngua na tanakuan i fokus tam. Ammuattam gapa nu kunnasi mattalupaddian nga nakafokus kani Jehova.

4. Ngatta ariattam ekspektan nga nawawan ni Moises i pribilehiona nga makatallung ta Nepromesa nga Davvun?

⁴ Siguradu nga agga-singan ni Moises si Jehova para ta direksion anna giya. Kakuruganna, “masikan i nono na ta kagitta na masingan na i Dios nga ari nga masingan.” (Bibbigan i Hebreo 11:24-27.) Mabibbig tam ta Biblia nga “awan paga vuluvuga tu limittuag nga profeta ta Israel nga gitta ni Moises, nga makammammu kani Jehova tu muka-ta-muka.” (Deut. 34:10) Maski paga madukko i relasion ni Moises kani Jehova, nawawanna lagapa i pribilehiona nga makatallung ta Nepromesa nga Davvun. (Num. 20:12) Ngatta nesiddukal si Moises?

5-7. Anni nga problema i limittuag ta pappanaw na Israelita ira ta Ehipto, anna kunnasi inasikasu yatun ni Moises?

⁵ Awan paga tu dua vulanna kabalin nga nanaw i Israelita ira ta Ehipto, limittuag i serioso nga problema​—nigeda paga nakadde ta Vukig Sinai. Marreklamo ngana i magili ta kawan tu danum. Naddala-dalimudum onu magananibig ngana ira kontra kani Moises, anna naggrabe yatun nga situasion yatutta nakikurag si Moises kani Jehova: “Anni i kuakku taw nga magili? Baddi ngana laman ay baraggaddà ngana!” (Ex. 17:4) Simibbag si Jehova kani Moises gukaban na manawag ira nga instruksion. Mawag tu tammikanna i bastonna anna ipaluna ta dakal nga batu ta Horeb, tapus mavvanomvor i danum tatun. Mabibbig tam: “Kingngua yatun ni Moises ta pagararubangan na mannakam na Israel.” Minimum i Israelita ira adde ta namidung ira, tapus nasolba ngana i problema.​—Ex. 17:5, 6.

⁶ Mabibbig paga ta nainspiran nga rekord nga “ningaganan [ni Moises] yatun tu Masa anna Meriba megafu ta paddarama na Israelita ira anna megafu ta pinuruebadda si Jehova gukaban na pakkagida: ‘Si Jehova kari ay egga ta nallatanattam onu awan?’” (Ex. 17:7) Mepangngo danatun nga ngagan megafu ta i kebalinadda ay “Pamurueba” anna “Paddarama.”

⁷ Anni i natageno ni Jehova ta nesimmu tari ta Meriba? Minammatanna nga pamurueba ta pakka-Diosna i kikkingngua na Israelita ira, ari laman tu basta rebelyon kontra kani Moises. (Bibbigan i Salmo 95:8, 9.) Manawag nga nakaliwa i Israelita ira. Tatun nga situasion, fustu i kingngua ni Moises gukaban na paningan kani Jehova tapus memmugug nga panuttul ta direksionna.

8. Anni nga problema i limittuag ta ultimo na 40-dagun nga pabbiahe ta katanapan?

⁸ Ngem anni i nesimmu turi ta egga i parehu nga situasion nga limittuag ma-40 dagun i nappasa, ta ultimo na pabbiaheda ta katanapan? Egga mangana i Israelita ira ta lugar nga magalan tu Meriba. Ngem tanakuan yaw nga lugar, aranni ta Kades, aranni ta pagaddetan na Nepromesa nga  Davvun. * Narreklamo mangana i Israelita ira ta kawan tu danum. (Num. 20:1-5) Ngem taw nga situasion, tanakuan ngana i kingngua ni Moises.

9. Anni ira nga instruksion i nalawà ni Moises, ngem anni i kingnguana? (Innan i letratu ta gafu na artikulo.)

⁹ Anni i reaksion ni Moises taw nga rebelyon? Agga-singan mangana yayya kani Jehova para ta giya. Ngem taw nga tiempo ari kinagi ni Jehova sa nga palukanna i batu. Nebilin kani Moises nga tammikanna i bastonna, parannianna i magili ta batu, tapus kiyuvovuganna i batu. (Num. 20:6-8) Ngem ari kiniyuvovug ni Moises i batu. Lallagu, ta patu na uluna kinullekanna i naggarammammung tatun: “Ginnannu yaw sikamu nga rebelde! Mawag kari tu mangilawakkami tu danum para nikamu maggafu taw nga batu?” Kabalinna, pinaluna i batu ari laman tu mittan, nu ari, namiddua.​—Num. 20:10, 11.

10. Anni i reaksion ni Jehova ta kingngua ni Moises?

¹⁰ Napporay si Jehova, anna nallussaw paga kani Moises. (Deut. 1:37; 3:26) Ngatta kunnatun i reaksion ni Jehova? Aru nga gannug i nelagum tatun. Gitta na nakagi ta gafu, awayyana nga napporay si Jehova megafu ta ari sinuttul ni Moises i bagu nga instruksion nga nalawana.

11. Gukaban na pamalu ta batu, ngatta gittana pinalawan ni Moises ta Israelita ira nga ari nammilagro si Jehova?

¹¹ Egga paga i tadday nga posibilidad. I batu ira ta pallevu na ollu nga Meriba ay matagga nga batu [granite]. Maski anni paga i sikan na pamalu na tolay tatun, awan tu magekspekta nga egga danum nga mallawan. Ngem, tanakuan i bata-batu ta mekadua nga Meriba, nga maruddu nga mas malapo i klasena [limestone]. Megafu ta malapo yatun nga batu, maruddu nga umatto i danum tatun tapus puede nga makolekta. Yari tu makala tu danum i totolay gukaban na pabbatta ta batu. Posible kari nga megafu ta namiddua nga pinalu ni Moises i malapo nga batu nga nanono na Israelita ira nga normal nga mallawan i danum, ari tu gafu ta milagro ni Jehova yatun? Gukaban na pamalu ta batu imbes nga pakiyuvovug tatun, pinalawan kari ni Moises nga ari tu milagro yatun? * Ariattam masiguradu.

12. Anni paga i posible nga rason nu ngatta napporay si Jehova kani Moises anni Aaron?

¹² Egga paga i tadday nga rasonable nga rason nu ngatta napporay si Jehova kada Moises anni Aaron. Sifutan i kinagi ni Moises ta magili: ‘Mawag kari tu mangilawan kami tu danum para nikamu maggafu taw nga batu?’ Gukaban na pakkagi tu “kami,” puede nga tukuyan ni Moises i baggina anni Aaron. Ipasingan na kinagi ni Moises i kuruga kawan tu pangirespeto kani Jehova nga kurug nga Naggafuan natun nga milagro. Mapakurug yaw na mabibbig tam ta Salmo 106:32, 33: “I YAFU ay pinallussaw da mangana ta kegga da ta latua ta Meriba, ay napaliwa si Moises megafu nira. Ta taki na nono ni Moises nira, naguvovug yaya nga arian na bi pinanono i kinagi na.” * (Num. 27:14) Maski anni paga tatun, nalsa na kingngua  ni Moises i mepangngo nga dayaw para nakuan kani Jehova. Kunni Jehova kani Moises anni Aaron: “Parehu kamu nga narrebelde kontra ta bilikku.” (Num. 20:24) Talaga madammo nga liwa!

13. Ngatta mepangngo anna patas i pangukum ni Jehova kani Moises?

¹³ Megafu ta da Moises anni Aaron i mangirollu ta ili ni Jehova, mas dakal i tattabbagadda. (Luc. 12:48) Ta nappasa, nigamma ni Jehova i interu henerasion na Israelita ira nga makatallung ta davvun na Canaan megafu ta rebelyoso ira. (Num. 14:26-30, 34) Yatutta parehas nga mepangngo anna patas si Jehova ta kunnatun nga pinangukumna kani Moises ta parrebeldena. Kagitta na karuan nga rebelde, ari nepamavulun nga makatallung yayya ta Nepromesa nga Davvun.

14, 15. Ngatta narrebelde si Moises?

¹⁴ Anni i rason nu ngatta napeggan si Moises tu kunnatun nga rebelyoso nga ugali? Sifutan mangana i Salmo 106:32, 33: “I YAFU ay pinallussaw da mangana ta kegga da ta latua ta Meriba, ay napaliwa si Moises megafu nira. Ta taki na nono ni Moises nira, naguvovug yaya nga arian na bi pinanono i kinagi na.” Maski paga nu si Jehova i pinallussaw na Israelita ira, si Moises i nattaki i nonona. Megafu ta awan tu pangifugagna ta baggina, naguvovug yayya nga arianna bi pinanono i resulta natun ira.

¹⁵ Nipamavulun ni Moises i annangngua na tanakuan nga mangalsa ta fokusna kani Jehova. Fustu i pinangasikasu ni Moises ta ollu nga insidente. (Ex. 7:6) Ngem, posible gapa nga kabalin na piga dekada nga parrebelde na Israelita ira, napannuan ngana yayya anna napporay. I mataga-tageno laman kari ni Moises i agga-nonona imbes nga nu kunnasina medayaw si Jehova?

16. Ngatta interesadu ittam ta kingngua ni Moises?

¹⁶ Nu i kunnatun nga matalo nga profeta gitta ni Moises ay malsa i fokusna anna mesiddukal, posible nga mesimmu gapa yatun nittam. Kagitta ni Moises, aranni tam ngana makatallung ta simboliko nga davvun, i napabagu nga mundo nga nipromesa nittam ni Jehova. (2 Ped. 3:13) Awan tu maski sinni nittam i kayàna nga malonan yatun nga espesial nga pribilehio. Ngem tapenu madde i gakkag tam, mawag nga agga-singan i mata tam kani Jehova, anna kanayun nga karagatan nga kuan i urena. (1 Juan 2:17) Anni ira i magigiammu tam ta kamali ni Moises?

17. Anni i makoffun nittam tapenu ari mappaffu ta poray?

¹⁷ Ari mappaffu ta poray. Maski nu para-parehu i problema nga keparubangattam, “ari ittam nga molang nga mangngua ta mapia; ta nu ari nga makkafi i nono tam, gatabat-tam i balo tam noka nu duttal i tiempo na.” (Gal. 6:9; 2 Tes. 3:13) Nu meparubang ta kappoporay onu makatotoli nga ari pakkarantindian megafu ta nadduruma nga personalidad, kontrolattam kari i simu tam anna i patu na ulu tam? (Prov. 10:19; 17:27; Mat. 5:22) Nu pallussawan ittam na tanakuan, mawag nga magigiammu tam nga ‘pagurayan tu i poray na Dios i mangibalo.’ Sinni i mangibalo? Si Jehova. (Bibbigan i Roma 12:17-21.) Nu agga-singattam si Jehova, mepasingattam i mepangngo nga respeto nu ipamavuluttam nga yayya i mangibalo, anna mapasensia nga innaggan i pagguyuna sonu kawagan. Nu ariattam kuan yatun tapus sittam lagapa i mangibalo, kawan tu respeto yatun kani Jehova.

18. Anni nakuan i daddammattam meyannung ta panuttul ta direksion ira?

 ¹⁸ Memmugug nga tuttulan i pinakabagu ira nga direksion. Matalo tam kari nga tuttulan i pinakabagu ira nga direksion nga niyawa ni Jehova nittam? Nu kunnatun, ariattam nakuan mattalo ta kanayun nga pangngua ta ganna-gannug gittana pinagangngua tam ta nappasa. Insigida lallagu nga tuttulattam i maski anni nga bagu nga direksion nga niyawa ni Jehova gukaban na organisasionna. (Heb. 13:17) Kunne na gapa, siguraduattam nga “tuttulan i kagian na dob” ngem ari sobran i kagian natun. (1 Cor. 4:6) Nu kuattam yatun, agga-sinnattam si Jehova.

19. Kunnasi nga ariattam ipamavulun nga daralan na kamali na tanakuan i relasiottam kani Jehova?

¹⁹ Ari ipamavulun i kamali na tanakuan nga manaral ta relasiottam kani Jehova. Nu agga-fokus i figuratibo nga mata tam kani Jehova, ariattam ipamavulun nga mattaki i nono tam onu madaral i relasiottam sa megafu ta annangngua na tanakuan. Importante yaw netallugaring nu egga i tattabbagattam ta organisasion na Dios, gitta ni Moises. Kurug tu mawag na kada tadday nittam nga ‘talakkurugan nga ibalin i kapaliag tam—ta kurug nga agganassing anna ammakakua ta Dios,’ ngem daddammattam nga ari tu sobra ka-istrikto na estandarte nga paggukuran ni Jehova nittam. (Fil. 2:12) Nu mas aru lallagu i responsibilidad tam, mas dakal i meddanaman nittam. (Luc. 12:48) Ngem nu talaga dakal i pangaya tam kani Jehova, awan tu maski anni nga mangisiddukal onu mangigungay nittam ta ayana.​—Sal. 119:165; Roma 8:37-39.

20. Anni nakuan i determinasiottam?

²⁰ Taw nga mariga nga tiempo, agga-tangag ittam nakuan kanayun ta Dios nga egga ta ‘langi i pammagurayanna,’ tapenu makannammuattam i urena. Kattam nakuan vuluvuga nga ipamavulun nga mafektan na annangngua na tanakuan i relasiottam kani Jehova. I nesimmu kani Moises i mangipatalatto nittam ta importansia naw ta nono anna futu tam. Imbes nga insigida nga mapporay ta kina-imperfekto danuri kakavvulu tam, determinadu tam nakuan nga ‘agga-sinnan i YAFU nga Dios tam, adde tu iyawa na i allo na nittam.’—Sal. 123:1, 2.