1, 2. Uno kutala kuli Yehova chalumbununa kulinga ika?

TULI nakuyoyela ‘mulwola lwalukalu,’ kaha nawa chiyoyelo chili nakupihilako lika hakumbi hakumbi, mukaye nawa kamweshi kuunda chamwenemweneko. (Chimo. 2, 3:1) Shikaho twatela kulihulisa ngwetu, ‘Uno nge nguli muukalu, ngweji kutalanga kuli iya mangana angukafwe?’ Pamo munahase kukumbulula ngwenu, mweji kutalanga “Kuli Yehova.” Nge mukiko, kaha muli nakulinga kanawa.

² Uno kutala kuli Yehova chalumbununa ika? Vyuma muka twatela kulinga mangana tutwaleho lika kutala kuli Yehova chamokomoko naukalu natumona? Kushikulu, muka-kwimba jisamu asonekele mazu aze asolola nge chapwa chachilemu kwandula meso etu nakutala kuli Yehova mangana atukafwe nge tuli muukalu. (Tangenu Samu 123:1-4.) Ambile ngwenyi kutala chetu kuli Yehova chalifwana nachize changamba uze eji kutalanga kuli kaka yenyi. Uno mazu asonekele ou muka-kwimba jisamu alumbunwine vyuma muka? Ngamba katela kaha kutala kuli kaka yenyi nge ali nakusaka vamuhane vyakulya chipwe vamukingeko, oloze atela  kutalanga kuli ikiye lwola lwosena mangana atachikize vyuma asaka kaka yenyi nakukavangiza vyuma kana. Nayetu nawa, twatela kukekesanga Mazu aKalunga hakumbi hakumbi mangana tutachikize vyuma ajina Yehova hali etu nakufwila kukavangiza vyuma mwatulweza. Nge natulinga ngocho, kaha Yehova mwatwivwila uselewa nakutukafwa nge tuli muukalu.—Efwe. 5:17.

3. Vyuma muka vinahase kutuhonesa kutwalaho lika kutala kuli Yehova?

³ Numba tuhu twatachikiza kulema chakutwalaho lika kutala kuli Yehova, oloze lwola lumwe tunahase kutangukila kuvyuma vyeka. Chuma kana chikiko chasolokele kuli Malita, sepa lyaYesu. Mbimbiliya yamba ngwayo “Malita ahungukile namilimo yayivulu.” (Luka 10:40-42) Shikaho, kachi nge Malita mutu wakushishika atangukile oku naYesu natwame, kaha twatela kutachikiza ngwetu ukalu woumwe unahase kutusolokela nayetu. Jino vyuma muka vinahase kutangula meso etu nakuhona kutwalaho lika kushishika kuli Yehova? Muchihande chino, natushimutwila omu vilinga vyavakwetu vinahase kutuhukanyisa navyuma navitukafwa tutwaleho lika kutala kuli Yehova.

4. Mwomwo ika tunahase kulikomokela hakwivwa ngwavo Mose kengilile muLifuchi lyaLushikoko?

⁴ Mose atalilenga kuli Yehova mangana amulweze vyakulinga nakumutwaminyina. Mbimbiliya yamba ngwayo “azaminenga lika mbe kwijiva nge ali nakumona Uze vahona kumona.” (Tangenu WavaHepeleu 11:24-27.) Kaha nawa yatulweza ngwayo “muli vaIsalele kamwakatukile kapolofweto weka wakufwana nge Mose, uze vatachikijile chikuma kuli Yehovako.” (Lushi. 34:10) Numba tuhu Mose apwile nausoko wakukola naYehova, oloze ajimbalishile kutokwa apwile nacho chakwingila muLifuchi lyaLushiko. (Kula. 20:12) Vyuma muka vyahukanyishile Mose?

5-7. Ukalu muka wepukile omu vaIsalele vafumine muEjipitu, kaha Mose aukumishile ngachilihi?

⁵ Omu mwahichile kafwe tukweji vavali kufuma haze vaIsalele valovokele muEjipitu, kwepukile ukalu shimbu kanda vahete nakuPili yaShinai. Vatu vaputukile kuyayavala mwomwo yakuhona kupwa nameya. Vayayavalile chikuma ngocho echi chalingishile Mose atambakane kuli Yehova ngwenyi: “Uno nangulinga ngachilihi navatu kanava? Hanasale hahandende kaha navangwasa malolwa.” (Kulo. 17:4) Yehova amukumbulwile nakumulweza hatoma vyuma atelelele kulinga. Vamulwezele ambate mbwechi yenyi nakuveta kulilolwa lize lyapwile muHoleve mangana kufume meya. Mbimbiliya yamba ngwayo: “Mose alingile vene ngocho kumeso avakulwane javaIsalele.” Ngocho vaIsalele vosena vanwine meya, kaha ukalu wosena wakumine.—Kulo. 17:5, 6.

⁶ Mbimbiliya yamba nawa ngwayo Mose “alukile chihela kana ngwenyi Masa naMeliva, mwomwo kukiko vaIsalele vamukokojweselele, kaha kukiko nawa vesekelele Yehova hakwamba ngwavo: ‘Uno Yehova ali nayetu tahi, nyi nduma?’” (Kulo. 17:7) Chapwile chakutamo chihela kana kuchiluka awa majina mwomwo alumbununa “Kweseka” chipwe “Kulikokojwesa.”

⁷ Yehova evwile ngachilihi havyuma vyasolokele kuMeliva? Yehova kamwene ngwenyi vatu kana vanalikange kuli Moseko, oloze ngwenyi vapwile nakumweseka. (Tangenu Samu 95:8, 9.) Chakuzeneka kukakasana, vaIsalele valimbenjele. Halwola kana, Mose alingile chuma chakwoloka hakutala kuli Yehova nakukavangiza vyuma vyosena vize amulwezele.

8. Ukalu muka wasolokele omu vaIsalele vahetele kusongo yaungeji wavo wamyaka 40?

 ⁸ Omu mwahichile myaka 40, ukalu woumwe wasolokele cheka omu vapwile kwakamwihi nakwingila muLifuchi lyaLushiko. VaIsalele vapwile hachihela chikwavo chize valukile ngwavo Meliva. Chihela kana chapwilile kwakamwihi naKateshe chize chalihachile nangiza yaLifuchi lyaLushiko. * VaIsalele vaputukile cheka kuyayavala mwomwo yakuhona kupwa nameya. (Kula. 20:1-5) Oloze halwola kanelu, Mose vyuma vyamwalumukilile.

9. Mose vamuhanyine jindongi muka, oloze ikiye alingile vyuma muka? (Talenu muvwimbimbi wakulivanga.)

⁹ Uno Mose alingile ngachilihi halwola kanelu? Ngana muze alingile hakavanga, atalile cheka kuli Yehova mangana amutwaminyine. Oloze halwola kana, Yehova kamulwezele avete kulilolwako. Mose vamulwezele ambate mbwechi nakukungulula vatu mangana vemane kulilolwa, kaha kufumaho jino numba ahanjike kulilolwa. (Kula. 20:6-8) Oloze chaluvinda, Mose kahanjikile kulilolwako. Hakuwana nge apihililile, ngocho atambakanyine ngwenyi: “Ivwenu jino, enu vaka-kulikanga! Uno munasake ngwenu tumilowele meya kulilolwa lino nyi?” Kufumaho ambachile mbwechi nakuveta kulilolwa mapapa kavali.—Kula. 20:10, 11.

10. Uno Yehova evwile ngachilihi havyuma alingile Mose?

¹⁰ Yehova apihililile chikuma naMose. (Lushi. 1:37; 3:26) Mwomwo ika? Pamo kwapwile vyuma vyavivulu vize vyamulingishile apihilile. Nganomu tunavuluka lyehi, Yehova pamo apihililile mwomwo Mose kakavangijile jindongi jajihya jize amuhanyineko.

11. VaIsalele vashinganyekele ika omu Mose avetele kulilolwa?

¹¹ Kuli chuma chikwavo chize chalingishile Yehova apihilile. Malolwa akuMeliva yakuMasa apwile akola chikuma. Ngocho numba tuhu mutu mwavetako ngachilihi, oloze chapwile chachikalu kulovola meya kumalolwa kana. Chipwe ngocho, malolwa akuMeliva yakuKateshe apwile auluulu. Ngocho kakavulu malolwa kana atwama natuselwoke twameya kwishi. Omu Mose avetele kulilolwa kana pamo vatu vashinganyekele ngwavo meya kana kawalovokele mungolo jaKalungako. Kaha nawa hakuwana nge Mose kahanjikile kulilolwa ngana muze vamulwezeleko, ngocho vaIsalele pamo vashinganyekele ngwavo Yehova keshi ikiye alingile chakukomwesa kanako. *

12. Vyuma muka vikwavo vyalingishile Yehova apihilile naMose naAlone?

¹² Kuli cheka chuma chikwavo chize chalingishile Yehova apihilile naMose naAlone. Tuchitalenu hamazu ahanjikile Mose. Ambile ngwenyi: “Uno munasake ngwenu tumilowele meya kulilolwa lino nyi?” Hakuwana nge Mose azachishile lizu “tumilowele” ngocho pamo apwile nakulumbununa ikiye naAlone. Mazu ahanjikile Mose kawanehele kavumbi hali Yehovako mwomwo asolwele nge keshi Kalunga ikiye alingile chakukomwesa kanako. Chuma kana chasoloka kupwa chamuchano mwomwo yamazu aze tweji kutanganga hali Samu 106:32, 33 ngwawo: “Vasangumwine cheka Kalunga kumeya akuMeliva, ngocho vahichikishilemo Mose. Vamupihishile kumuchima,  ngocho alusukile kuhanjika namivumbo yenyi.” * (Kula. 27:14) Numba tuhu katwatachikiza vyuma vyalingishile Mose apihilileko, oloze twejiva ngwetu kavumbikile Yehovako. Ngocho Yehova ahanjikile kuli Mose naAlone ngwenyi: “Muvosena muvavali mwalikangile kumazu ami.” (Kula. 20:24) Chikupu vene, valingile mulonga waunene.

13. Mwomwo ika jila yize Yehova azangamishililemo Mose yapwilile yakutamo?

¹³ Hakuwana nge Mose naAlone vapwile namulimo wakutwaminyina vatu jaYehova, ngocho vatelelele kukilikita nangolo. (Luka 12:48) Hakavanga Yehova ketavishile vaIsalele kwingila mulifuchi lyaKananeko mwomwo valikangile kuli ikiye. (Kula. 14:26-30, 34) Ngocho chapwile chakutamo Yehova kuzangamisa Mose mujila kaneyi mwomwo naikiye alikangile. Ngana muze chapwile kuli vaIsalele, Mose naikiye kavamwitavishile kwingila muLifuchi lyaLushikoko.

14, 15. Vyuma muka vyalingishile Mose alikange kuli Yehova?

¹⁴ Vyuma muka vyalingishile Mose alikange? Tuchitalenu cheka hamazu ahali Samu 106:32, 33, ngwawo: “Vasangumwine cheka Kalunga kumeya akuMeliva, ngocho vahichikishilemo Mose. Vamupihishile kumuchima, Ngocho alusukile kuhanjika namivumbo yenyi.” Numba tuhu vaIsalele vevwishile Yehova kupihya, oloze Mose ikiye akwachile matoto. Muchima wenyi wakuhona kulikanyisa wamulingishile ahanjike mazu chakuzeneka kushinganyeka ukalu naufumamo.

¹⁵ Mose echelele vilinga vyavakwavo vimuhonese kupwa wakushishika kuli Yehova. Hakavanga Mose alingile vyuma amulwezele Yehova mujila yakwoloka. (Kulo. 7:6) Oloze pamo azeyele nakwivwa chikuma matoto mwomwo yavaIsalele vaze valikangilenga hatando yayisuku. Mose pamo ahakile chikuma mangana kuvyuma vize vyamulingishile apwenga namatoto muchishishisa chakufwila kuvumbika Yehova.

16. Mwomwo ika twatela kushinganyeka havyuma alingile Mose?

¹⁶ Hakuwana nge Mose kapolofweto wakushishika vamuhukanyishile nakumulingisa alikange, ngocho ukalu woumwe unahase kutusolokela nayetu. Ngana muze chapwile kuli Mose nayetu kalinwomu twingile mulifuchi lyalihya lize Yehova atushika. (Petu. 2, 3:13) Tuvosena twafwila kukapwa mulifuchi kana. Hakusaka tukapwe mulifuchi kana, twatela kutwalaho lika kutala kuli Yehova nakulinga mwaya muchima wenyi. (Yowa. 1, 2:17) Vyuma muka natulinangula kuli Mose?

17. Vyuma muka navitukafwa tuhonese muchima wamatoto?

¹⁷ Kanda kupwanga namuchima wamatotoko. Shimbu jimwe tunahase kutwalaho kulipika naukalu woumwe mukuyoya. Oloze Mbimbiliya yamba ngwayo: “[Katwatela kuzeya] kulinganga vyuma vyamwazako, mwomwo kachi nge katweshi kuzeyako, kaha halwola lwakwaha natukaha vene.” (Ngale. 6:9; Teso. 2, 3:13) Kachi nge mutu chipwe vyuma vimwe vinatwivwisa kupihya kumuchima, kaha twatela kulihenda kukukwata washi matoto nakushinganyekanga kanawa shimbu kanda tuhanjike. (Vishi. 10:19; 17:27; Mateu 5:22) Kaha nawa nge vakwetu vanatulingi mwamupi, katwatela kukwatanga washi utenuko. (Tangenu Loma 12:17-21.) Uno echi chili nakulumbununa ika? Muchishishisa chakukwata washi utenu, twatela kuvandamina Yehova olole vyuma halwola  lwakutamo. Shikaho kulinga sambanjinga muchishishisa chakutala kuli Yehova, nachisolola nge katwamuvumbikako.

18. Vyuma muka twatela kwanuka hakukavangiza jindongi?

¹⁸ Twatela kukavangizanga kanawa jindongi jajihya. Kutala tuli nakukavangiza kanawa jindongi jajihya jize ali nakutuhana Yehova tahi? Nge tuli nakujikavangizanga, kaha katweshi kufwila kulinga vyuma ngana muze twalingilenga hakavangako. Oloze natufwila kukavangiza jindongi jajihya jize Yehova ali nakutuhana kuhichila muliuka lyenyi. (Hepe. 13:17) Kaha nawa katweshi kuhasa kulinga vyuma “kuhambakana havyuma vasonekako.” (Koli. 1, 4:6) Kulinga ngocho nachitukafwa tutwaleho lika kupwa vakushishika kuli Yehova.

19. Vyuma muka navitukafwa tuhone kwechelela vilinga vyavakwetu vyenyeke usoko wetu naYehova?

¹⁹ Kanda kwechelela vilinga vyavakwenu vyenyeke usoko wenu naYehovako. Kachi nge meso etu achifwanyisa nawatwalaho lika kushishika kuli Yehova, kaha katweshi kwechelela vilinga vyavakwetu vituhukanyise chipwe kwenyeka usoko wetu naYehovako. Chishina chachilemu chikumanyi shina kutachikiza ngwetu tukwechi milimo muliuka lyaKalunga ngana muze chapwile kuli Mose. Shikaho tuvosena twatela kukilikita nangolo nakwononoka Yehova mangana akatulwile. (Fwili. 2:12) Hakuwana nge tukwechi mulimo waunene muliuka ngocho Yehova asaka tukilikitenga. (Luka 12:48) Kuzanga Yehova nachitukafwa tuhone kwechelela kala chuma chituhukanyise nakuhona kulitwamina kumuzanga.—Samu 119:165; Loma 8:37-39.

20. Vyuma muka twatela kufwila kulinga?

²⁰ Hakuwana nge tuli nakuyoyela mumakumbi akukuminyina, ngocho twatela kutwalaho lika kutala kuli Yehova ou “[atwama] halitanda mwilu,” mangana tulinge mwaya muchima wenyi. Katwatela kwechelela vilinga vyavakwetu vyavipi vyenyeke usoko wetu naYehovako. Vyuma vyasolokele kuli Mose vinatunangula chishina chachilemu. Muchishishisa chakwechelela vilinga vyavipi vili muno mukaye vituhukanyise, tutwalenuho lika “kutalanga kuli Yehova Kalunga ketu palanga nomu mwatwivwila uselewa.”—Samu 123:1, 2.