1, 2. Iehova baita raraia anina be dahaka baita kara?

ITA na “dina gabedia ai” e varamu “nega dikadia” lalodiai ta nohomu, bona Dirava ese tanobada dikana do se haorea bona maino korikorina do se vara lalonai, mauri na be auka hereamu. (2 Tim. 3:1) Una dainai, siboda baita henanadai: ‘Edeseni ai heduru bona hahekau daladia na tahumu?’ Haraḡa herea baita haeremu “Iehova enai,” bona una na haere maorona.

² Iehova enai heduru baita tahu anina be dahaka baita kara? Bona hekwakwanai ta davarimu neganai, edena dala ai Ienai baita tabekau? Laḡani handred gunadia ai, salamo itorena tauna ese e hahedinaraia heduru ta uramu negadiai Iehova baita raraia na namo. (Salamo 123:1-4 ba duahi.) Salamo itorena tauna ese Iehova baita raraia karana na hesiai tauna ese biaguna e raraiamu karana ida e haheḡereḡerea. Ena hereva anina be dahaka? Hesiai tauna na biaguna enai dia aniani bona hegima karana mo baine noia, to dina ta ta ai biaguna ena hereva baine kamonai, unu amo ena ura ḡaudia baine diba bona karadia baine kara. Una heḡereḡerena, dina ta ta ai Dirava ena Hereva baita stadilaia, unu amo Iehova ena  ura baita diba bona ena hahekau dalana baita badinaia. Unu amo baita diba momokanimu Iehova enai heduru baita tahumu neganai, be durudamu.​—Efe. 5:17.

3. Dahaka ese baine kouda diba Iehova basita laloa bada totona?

³ Ena be mai dibada hanaihanai Iehova ena heduru baita tahua na mai anina bada, to nega haida ḡau haida daidiai baita lalohekwarahimu. Una na Iesu turana namona Mareta enai e vara. Mareta na “vadivadi iabi-daedia karadia e hekwarahilaiva.” (Luka 10:40-42) Bema una abidadama hahinena na e lalohekwarahi ena be Iesu na ia dekenai, ita danu baita lalohekwarahi dibamu. Dahaka ese Iehova baita laloa bada karana baine hadikaia diba? Ina atikol ai, ma haida edia kara ese bae hahekwakwanaida daladia baita herevalaimu. Bona Iehova baita laloa bada dalana baita dibaiamu.

4. Dahaka dainai Mose na Gwauhamata Tanona ai se vareai?

⁴ Mose na Iehova ena sisiba bona hahekau daladia e badinava. Momokani, “ia na e haheauka, asita itaiamu Diravana vada e itaia na heto.” (Heberu 11:24-27 ba duahi.) Baibul na eto: “Una negana ema bona harihari, peroveta tauna ta asine hedinarai Israel ai, Mose heḡereḡerena; ia na Iehova ida e hevaira heheni bona e hahediba heheni.” (Deu. 34:10) Ena be Mose na Iehova ida e hetura namonamova, to Gwauhamata Tanona ai na se vareai. (Num. 20:12) Dahaka ese Mose e hahekwakwanaia?

5-7. Israel taudia ese Aigupto e rakatania murinai dahaka hekwakwanai e vara, bona Mose ese ede e hamaoromaoroa toma?

⁵ Hua rua lalodiai, Israel taudia ese Aigupto e rakatania murinai, bona Sinai Ororona ai do asie kau neganai, hekwakwanai badana ta e vara. Taunimanima na ranu lasi dainai e maumau matama. Idia ese Mose e maumauraia bona e badu dikadika dainai, Mose ese Iehova e tai henia eto: “Ina orea taudia na ede baina karadia toma? Lalodia e hadaimu nadi amo bae hodogu mase e tomu.” (Eso. 17:4) Iehova ese Mose e kamonai henia bona haheḡani haida e heni. E hamaoroa ena itotohi baine abia bona Horeb ai nadi baine botaia, bena ranu baine aru lasi. Baibul na eto: “Bena Mose unu e kara toma, Israel tau-badadia vairadiai.” Bena Israel taudia na ranu e inu, bona hekwakwanai e hamaoromaoroa.​—Eso 17:5, 6.

⁶ Baibul ese e hadibadamu, Mose ese “una gabu ladana e hatoa Masa bona Meriba, badina be Israel taudia e ḡadeḡade, bona Iehova e dibaḡania, eto ‘Iehova na dekedekeda ai eiava lasi?’” (Eso. 17:7) Unu lada mamaoro badina anidia na “Hedibaḡani” bona “Ḡadeḡade.”

⁷ Iehova ese Meriba ai e vara ḡauna be ede e laloa toma? E itaia Israel taudia ese Iena siahu na e dadaraia, dia Mose mo e gwau-edeede henia. (Salamo 95:8, 9 ba duahi.) Israel taudia na e kerere. To, Mose na kara maorona e karaia, badina Iehova enai e tabekau bona ena hahekau dalana e badinaia namonamo.

8. Tano ḡaḡaena laolaona dokona ai dahaka hekwakwanai e vara?

⁸ Laḡani 40 muridiai, tano ḡaḡaena ai edia laolao dokona e lao heniava ai hekwakwanai unu bamona ta ma e vara neganai, dahaka e vara? Israel taudia na gabu ma ta ai e kau, una gabu ladana danu e gwauraia Meriba. To, una  na Kade hanuana badinai, Gwauhamata Tanona hetoana badinai. * Israel taudia na ranu lasi dainai e maumau lou. (Num. 20:1-5) To una negana ai, Mose na kerere badana ta e karaia.

9. Mose be dahaka hahediba herevadia e abi, to dahaka e kara? (Rau 12 ai laulau ba itaia.)

⁹ Ina gwau-edeede karana dainai, Mose be dahaka e kara? Ia ese Iehova ena heduru e tahua lou. To hari, Iehova ese Mose na se hamaoroa nadi baine botaia. A e hamaoroa ena itotohi baine abia, taunimanima baine haboudia, bena vairadiai nadi hagahagana baine hereva henia. (Num. 20:6-8) To, Mose ese nadi hagahagana na se hereva henia. A mai baduna ida taunimanima e gwau henidia, eto: “Gwau-edeede taumui e, a hakala; emui ranu na ina nadi hagahagana amo baia ha-arua lasi a?” Bena ia ese nadi hagahagana na dia nega tamona to nega rua e botaia.​—Num. 20:10, 11.

10. Mose ena kara dainai Iehova be dahaka e kara?

¹⁰ Iehova ese Mose na e badu henia dikadika. (Deu. 1:37; 3:26) Dahaka dainai Iehova na e badu? Badidia na momo. Matamanai ta herevalaia heḡereḡerena, Iehova na e badu dikadika badina Mose ese ena hahediba daladia matamatadia na se badina.

11. Dahaka dainai Mose ese nadi e botaia neganai Israel taudia na e lalo una na dia Iehova ena hoa karana amo?

¹¹ Iehova na badi ma ta dainai e badu. Meriba ginigunana nadidia (eiava granite) na nadi aukadia. Ena be taunimanima ese bae botadia goada, to ranu na basie aru lasi diba. To, Meriba iharuana ena hagahaga nadidia (eiava limestone) na dia nadi aukadia. Ranu na unu nadi lalodiai e vareaiva bona tano henunai e hebouva dainai, taunimanima na unu nadi e hamatudiava ranu bae abi totona. Una dainai, Mose ese nadi hagahagana nega rua e botaia neganai, Israel taudia be e lalo ranu na e aru lasi kava to dia Iehova ena hoa karana amo, a? Mose ese nadi na se hereva henia to e botaia neganai, ia be e ura taunimanima ese ia danu bae imodaia, a? * Asita diba namonamo.

12. Dahaka badi ma ta dainai Iehova ese Mose bona Aaron e badu henidia?

¹² Iehova na badi ma ta dainai Mose bona Aaron e badu henidia. Mose ese taunimanima e hamaorodia, eto: “Emui ranu na ina nadi hagahagana amo baia ha-arua lasi a?” Mose ese ina hereva “baia” e gwauraia neganai, ia na ia bona Iehova eiava ia bona Aaron e hegwaurai. Herevana dahaka, to Mose ena hereva ese e hahedinaraia ia ese Iehova, una hoa karana e karaia Tauna korikorina, na se matauraia. Salamo 106:32, 33 ena hereva ese una e hamomokania, eto: “Meriba ranudia badidiai idia ese e habadua, bona Mose na siriana e reaia, idia daidiai; badina be idia daidiai ia lalona e turiariki, bena hereva kavakavadia e gwaurai.” * (Num. 27:14) Herevana dahaka, to Mose ese ena kara amo Iehova na se hanamoa. Iehova ese Mose  bona Aaron e hereva henidia, eto: “Egu hereva o utua.” (Num. 20:24) Una na kara dika badana!

13. Dahaka dainai Iehova ese Mose e hahemaoro henia na maoro?

¹³ Mose bona Aaron na Iehova ena taunimanima e hakaudiava dainai, edia maduna na bada. (Luka 12:48) Guna, Israel besena na edia gwau-edeede karana dainai Iehova ese e hamaorodia Kanaan tanona ai basie vareai. (Num. 14:26-30, 34) Mose danu ena gwau-edeede karana dainai, Iehova ese unu e hahemaoro henia toma na maoro. Unu gwau-edeede taudia haida heḡereḡeredia, Mose na Gwauhamata Tanona ai se vareai.

14, 15. Dahaka dainai Mose na e gwau-edeede?

¹⁴ Dahaka dainai Mose na e gwau-edeede? Salamo 106:32, 33 aita laloa lou: “Meriba ranudia badidiai idia ese e habadua, bona Mose na siriana e reaia, idia daidiai; badina be idia daidiai ia lalona e turiariki, bena hereva kavakavadia e gwaurai.” Ena be Israel taudia ese Iehova e habadua, to Mose na e turiariki eiava e badu dikadika. Ia na sibona se hebiagu dainai, se lalo namonamo bena e hereva.

¹⁵ Mose na haida edia kara dainai e lalohisihisi bona Iehova na se laloa bada. Mose ese matamanai e vara hekwakwanaina na e hamaoromaoroa. (Eso. 7:6) To, Israel taudia na laḡani momo lalodiai e gwau-edeedeva dainai, ia na e hesiku bona e lalohisihisi. Mose be sibona ena hemami e laloa dainai Iehova iheatolaina daladia na se lalo, a?

16. Dahaka dainai Mose ena kara baita laloa na namo?

¹⁶ Bema mai ena abidadama peroveta tauna Mose, na ma haida edia kara daidiai e lalohekwarahi bona kerere e kara, ita edai danu una na baine vara diba. Mose heḡereḡerena ita danu Iehova ese e gwauhamatalaia tanobada matamatana ai kahirakahira baita vareaimu. (2 Pet. 3:13) Asita uramu una hahenamo namona baita reaia. To baita vareai totona, namona na Iehova baita laloa bada, anina na hanaihanai ena ura baita karaia. (1 Ioa. 2:17) Mose ena kerere amo dahaka ta dibamu?

17. Dahaka ese baine duruda eda badu baita biagua totona?

¹⁷ Emu badu karana ba biagua. Ena be nega haida hekwakwanai tamona ta davaria louloumu, to “kara namo ikarana basita hesikulaia; badina be bema ita basita manoka, bena nega namona ai huahuada baita abi.” (Gal. 6:9; 2 Tes. 3:13) Bema hekwakwanai ta eiava ta ena kara ese e habaduda louloumu, eda hereva nahuadia ta tohomu, eiava eda badu ta biaguamu, a? (Her. 10:19; 17:27; Mat. 5:22) Haida ese e habadudamu neganai, basita badu to Iehova enai baita rakatania bena ia ese baine hamaoromaoroa. (Roma 12:17-21 ba duahi.) Bema Iehova enai baita tabekau hanaihanaimu, baita hahedinaraiamu ita na mai haheaukada bona hemataurai ida Iehova baita nariamu hekwakwanai baine hamaoromaoroa totona. Bema Iehova enai basita tabekaumu bona dika davana baita halouamu, anina na Iehova na asita matauraiamu.

18. Hahekau daladia ibadinadia karana ai, dahaka baita laloatao na namo?

 ¹⁸ Hahekau daladia matamatadia ba badina namonamo. Iehova ese e henimu hahekau daladia matamatadia be ta badina namonamomu, a? Bema oibe, guna ta badina hanaihanaiva daladia na basita badina. To, maoromaoro Iehova ese ena orea amo e henimu hahekau daladia matamatadia baita badina na namo. (Heb. 13:17) Danu, nahuada baita toho “Buka Helaḡa ai e tore herevadia” mo baita badinadia na namo. (1 Kor. 4:6) Unu baita kara tomamu neganai, ita na Iehova ta laloa badamu.

19. Edena dala ai ma haida edia kara ese eda hetura karana Iehova ida basine hadikaia diba?

¹⁹ Ma haida edia kerere ese emu hetura karana Iehova ida basine hadikaia na namo. Bema laulau dalanai Iehova baita raraia, ma haida edia kara dainai basita badumu eiava eda hetura karana Ia ida basita hadikaiamu. Una na mai anina bada, bema ita na Mose heḡereḡerena, Dirava ena orea lalonai maduna haida ta huamu. Momokani, namona na ‘mai garida bona mai heude-heudeda ida ihamaurida baita tahua,’ bona baita helalotao Iehova na dia taravatu aukana tamona ai e hahemaoromu. (Fili. 2:12) To, maduna momo ta huamu neganai, Iehova na e uramu haheitalai namona baita hahedinaraia. (Luka 12:48) Bema Iehova baita lalokau henia momokani, ḡau ta eiava tau ta ese basine hahekwakwanaida eiava iena lalokau amo basine bibida oho diba.​—Sal. 119:165; Roma 8:37-39.

20. Namona na laloda baita hadai dahaka baita kara?

²⁰ Hekwakwanai negadia lalodiai, namona na ‘ena terono ai e helaimu’ Diravana baita raraia eiava baita kamonai henia, unu amo ena ura baita dibaia. Dia namo ma haida edia kara ese eda hetura karana Iehova ida baine hadikaia. Mose enai e vara karana amo una mai anina bada ḡauna ta dibamu. Namona na ma haida edia kerere daidiai basita badu, to laloda baita hadai “Iehova, eda Dirava” baita raraia ela bona ia ese baine bogada hisi.​—Sal. 123:1, 2.