1, 2. Ges a Zeova wã rat n yeelame tɩ bõe?

TÕND bee tood wakate, hal tɩ vɩɩmã pa nana ye. (2 Tɩm. 3:1) La d miime tɩ nand t’a Zeova sãam nin-wẽnsã la a kɩt tɩ laafɩ zĩnd tẽngã zugu, vɩɩmã na n maneg n lebgda toog n paasdẽ. Rẽ n so tɩ d segd n sok d meng yaa: ‘Ãnd la mam geta, n dat t’a sõng-m la a wilg-m sore?’ Tõe tɩ d na n leoka zĩig pʋgẽ tɩ yaa “a Zeova.” Sɩd me, yẽ la d segd n teege.

² La ges a Zeova wã rat n yeelame tɩ bõe? D sã n wa tar zu-loeese, bõe n na n sõng-d tɩ d ket n get-a? Pĩnd wẽndẽ, yɩɩn-gʋlsd a ye wilgame tɩ d sã n wa rat sõngre, yaa a Zeova la d segd n gese. (Karm-y Yɩɩn-sõamyã 123:1-4.) A yeelame tɩ tõnd geta a Zeova wa tʋm-tʋmdb sẽn get b zu-soaba. A gomdã võor yaa bõe? Tʋm-tʋmd pa get a zu-soab n na n paam rɩɩb la koglg bal ye. A segd n get-a-la wakat fãa sẽn na yɩl n bãng a sẽn datã, n maane. Tõnd ned kam fãa me segd n zãmsda Biiblã neer daar fãa, n paam n bãng a Zeova sẽn dat t’a maanã, la a maan rẽ. Yaa d sã n maand a woto bal la d tõe n bas d yam tɩ d sã n wa rat sõngre, a Zeova na n sõng-d lame.—Efɛ. 5:17.

3. Bõe n tõe n wa tiis-d tɩ d pa le get a Zeova?

 ³ Baa tõnd sẽn mi tɩ d segd n geta a Zeova wakat fãa wã, bũmb kẽer n tõe n wa tiis-du. A buud paama a Mart sẽn da yaa a Zeezi zoa wã. Daar a ye, a basame tɩ ‘rɩɩbã seglg yɛl toay-toayã soog a tagsgã.’ (Luk 10:40-42) A Mart tẽebã ra tara pãnga. Sẽn paase, a Zeezi mengã ra bee b zakẽ wã baraarã. La ne rẽ fãa, a basame tɩ yɛl kẽer tiis-a. Woto wilgdame t’a buud tõe n paama tõnd me. Yaa bõe n tõe n tiis tõnd tɩ d pa kell n ges a Zeova? Sõs-kãnga pʋgẽ, d na n yãame tɩ d sã n pa gũusi, d taabã manesem tõe n tiis-d lame tɩ d pa le get a Zeova ye. D leb n na n yãa bũmb nins sẽn na n sõng-d tɩ d ket n get a Zeova wã.

4. Bõe yĩng t’a Moyiiz sẽn pa paam n kẽ kãabg tẽngẽ wã tõe n ling-du?

⁴ A Moyiiz yɩɩ ned sẽn da nong n get a Zeova, t’a wilgd-a sor la a kõt-a saglse. (Karm-y Ebre-rãmb 11:24-26.) Sɩd me, Biiblã yeelame t’a “talla tẽeb kãn-kãe wa a yãa nebã nin sẽn ka tõe n yã a soabã.” (Ebre. 11:27, Wẽnnaam Sebre, 1983) Biiblã yeelame me tɩ ‘Wẽnnaam no-rɛɛs a to ka leb n zĩnd Israyɛll nebã sʋka, tɩ Sẽn-Ka-Saab mi-a neng ne neng wa b sẽn mi a Moyiizã ye.’ (Tõo. 34:10) La baa a sẽn da tar zood sõma ne a Zeova wã, bũmb la a maan-yã, tɩ rẽ kɩt t’a pa paam n na n kẽ kãabg tẽngẽ wã ye. (Sõd. 20:12) Bõe la a maan-yã?

5-7. Israyɛll nebã sẽn yi Eziptã poor bilfu, bõe n maane, la a Moyiiz manesem yɩɩ wãna?

⁵ Israyɛll nebã sẽn wa n yi Eziptã, la nand meng tɩ b ta Sinayi tãngẽ wã, yel-kãseng n maane. Rẽ tɩ b Ezipt yiibã pa ta kiuug a yiib ye. Nin-buiidã sɩnga yẽgengo, koom sẽn da pa be wã yĩnga. B sũyã yikame tɩ b yẽgem ne a Moyiizi, hal t’a Moyiiz kong n yeel a Zeova yaa: “Mam na n maana bõe ne nin-kãensã? Ketẽ-la bilfu, tɩ bãmb lob maam ne kuga.” (Yik. 17:4) A Zeova leoka a Moyiizi, n wilg-a a sẽn segd n maane. A yeel-a lame t’a rɩk a dasaarã n wẽ pĩigã sẽn be Horɛɛbã, tɩ koom n na n yi. Ad Biiblã sẽn yeele: ‘A Moyiiz maana woto Israyɛll nebã kãsem-dãmbã nifẽ.’ Israyɛll nebã paama koom n yũ tɩ seke, tɩ yellã kell n sa.—Yik. 17:5, 6.

⁶ Biiblã yeelame t’a Moyiiz “pʋda zĩigã yʋʋr tɩ Masa, sẽn dat n togs tɩ ‘no-baoodem’, la Meriba, sẽn dat n togs tɩ ‘zabre.’” Bõe yĩnga? Bala, “Israyɛll nebã zaba ne Sẽn-Ka-Saabo, la b bao bãmb noor n yeele: ‘Rẽ yĩnga, Sẽn-Ka-Saab bee tõnd sʋk bɩ, bɩ b ka be?’” (Yik. 17:7) Yʋ-kãensã sɩd zemsame.

⁷ A Zeova sũur yɩɩ noog ne bũmb ning Israyɛll nebã sẽn maan Meriba wã bɩ? Ayo! A ra getame tɩ pa a Moyiiz la b pa rat t’a yɩ b taoor soab ye. Yaa yẽ naamã me la b pa rata. (Karm-y Yɩɩn-sõamyã 95:8, 9.) B sẽn maanã yaa wẽng wʋsgo. La a Moyiiz yẽ maana sẽn segde. A gesa a Zeova, n paam t’a wilg-a a sẽn tog n maanã, la a maag a yĩng n tũ a sẽn yeelã.

8. Israyɛll nebã yeebgã we-raoogẽ wã sẽn wa n kolg sɛɛbã, bõe n maane?

⁸ Na maan yʋʋm 40 poore, yell a woto buud n le maane. Wakat kãngã, a Moyiiz manesem yɩɩ wãna? Rẽ tɩ keta bilf tɩ Israyɛll nebã yeebgã we-raoogẽ wã ta a tɛka. B wa n taa zĩig  sẽn pẽ Kadɛɛse, kãabg tẽngã noore. B boonda zĩ-kãng me tɩ Meriba. * Israyɛll nebã le yẽgmame, koom sẽn da ka be yĩnga. (Sõd. 20:1-5) La so-kãnga wã, a Moyiiz maana bũmb sẽn pa segde.

9. Bõe la a Zeova yeel a Moyiiz t’a maane, la bõe la a maan-yã? (Ges-y sõsgã sɩngrẽ fotã.)

⁹ Israyɛll nebã sẽn yẽgmã, a Moyiiz manesem yɩɩ wãna? A le gesa a Zeova, sẽn na yɩl t’a wilg-a a sẽn tog n maane. La so-kãnga, a Zeova pa yeel-a t’a wẽ pĩigã ye. A yeel-a lame t’a rɩk a dasaarã, la a tigim nin-buiidã pĩigã taoore, n gom ne pĩigã. (Sõd. 20:6-8) La a Moyiiz sẽn tigim nin-buiidã, a pa gom ne pĩigã ye. A sũurã ra puuda ne nin-buiidã, hal t’a tãs-ba, n yeel yaa: “Tõatbã, kelg-y-yã. Yãmb datame tɩ tõnd kɩt tɩ koom yi kug-kãngã pʋgẽ n kõ yãmb bɩ?” Rẽ poore, a wẽe pĩigã. A pa wẽ vugr bal ye. Yɩɩ hal naoor a yiibu.—Sõd. 20:10, 11, Wẽnnaam Sebre, 1983.

10. A Zeova manesem yɩɩ wãn ne a Moyiizi?

¹⁰ A Zeova sũurã puuga wʋsg ne a Moyiizi. (Tõo. 1:37; 3:26) Bõe yĩng t’a sũurã puugi? D pa mi fãa ye. La tõe t’a sẽn pa maan wa a Zeova sẽn yeelã naagame.

11. A Moyiiz sẽn wẽ pĩigã, bõe yĩng tɩ ra tõe n kɩt tɩ Israyɛll nebã tags tɩ pa a Zeova n maan yel-solemd tɩ koomã yi?

¹¹ La tõe tɩ yaa bũmb a to me yĩng la a Zeova sũur sẽn yik ne a Moyiizã. Pĩis nins sẽn da be pipi Meriba wã yaa kãn-kãe. Baa f wɩsg f meng n wẽ pĩig a woto, ned pa na n tags tɩ koom na yi be ye. La pĩis nins sẽn da be yiibẽ Meriba wã ra yaa toore. Yaa pĩis sẽn yaa bus-busi, n tõe n fõog koom. Dẽnd koom n wae n be pĩis a woto wã pʋgẽ. Ned sã n tuk bok be, a tõe n paama koom. Woto wã, a Moyiiz sẽn pa gom ne pĩigã wa a Zeova sẽn yeelã, n wẽ pĩigã naoor a yiibã, rẽ yĩnga, pa kɩt tɩ Israyɛll nebã tags tɩ koomã yii a toore, la tɩ pa a Zeova n maan yel-solemd sɩda? * D pa mi ye.

12. Tõe tɩ yaa bõe yĩng me la a Zeova sũur sẽn puug ne a Moyiiz la a Aarõ wã?

¹² A Zeova sũur sẽn puug ne a Moyiiz la a Aarõ wã, tõe tɩ yaa bũmb a to me yĩnga. A Moyiiz soka nin-buiidã yaa: ‘Yãmb datame tɩ tõnd kɩt tɩ koom yi kug-kãngã pʋgẽ n kõ yãmb bɩ?’ A sẽn yeel tɩ ‘tõndã’, tõe t’a ra rat n yeelame tɩ yẽ ne a Aarõ. A gomdã paooga a Zeova wʋsgo. Bala, pa wilgd tɩ yaa a Zeova n maan yel-solemdã ye. Yɩɩn-sõamyã 106:32, 33 yetame: ‘Bãmb sẽn wa n be Meriba koomã noorã b yika Sẽn-Ka-Saab sũurã, la bãmb manesmã waa ne yell a Moyiiz zugu. Bala, bãmb maaname t’a Moyiiz sũurã yiki, t’a gom n ka yals n tags ye.’ * (Sõd. 27:14) Sẽn yaa a soab fãa, a Moyiiz sẽn maan to-to wã kɩtame t’a Zeova ka paam waoogr wa sẽn segdã ye. A Zeova yeela a Moyiiz ne a Aarõ yaa: “Yãmb kɩɩsa mam noorã.” (Sõd. 20:24) Ad sɩd yaa yel-wẽn-kãsenga!

13. Bõe yĩng t’a Zeova sẽn sɩbg a Moyiiz to-to wã yaa bũmb sẽn segde?

 ¹³ A Moyiiz ne a Aarõ n da lʋɩt nin-buiidã taoore. Dẽnd a Zeova sẽn kõ-b tʋʋm wʋsgã, a na n sok-b-la wʋsg n yɩɩd me. (Luk 12:48) A Zeova ra zoe n sɩbga Israyɛll nebã zãmaan a ye tõre, n yeel tɩ b kõn kẽ kãabg tẽngã pʋga, b sẽn kɩɩs-a yĩnga. (Sõd. 14:26-30, 34) Dẽnd a Moyiiz me sẽn kɩɩs a Zeova, t’a yeel t’a kõn kẽ kãabg tẽngẽ wã yaa bũmb sẽn segde. Wa tõatb a taabã, a Zeova ka bas yẽ me t’a kẽ kãabg tẽngẽ wã ye.

14, 15. Bõe n kɩt t’a Moyiiz kɩɩs a Zeova?

¹⁴ Bõe n wa n kɩt t’a Moyiiz kɩɩs a Zeova? D tẽeg Yɩɩn-sõamyã 106:32, 33 goamã. B yeelame yaa: ‘Bãmb sẽn wa n be Meriba koomã noorã b yika Sẽn-Ka-Saab sũurã, la bãmb manesmã waa ne yell a Moyiiz zugu. Bala, bãmb maaname t’a Moyiiz sũurã yiki, t’a gom n ka yals n tags ye.’ Yaa a Zeova la Israyɛll nebã kɩɩs-yã, la yaa a Moyiiz n deeg n yik a sũuri. A sẽn pa tõog a mengã, a gomame n pa reng n tags rẽ sẽn tõe n wa ne zu-loees ninsã ye.

¹⁵ A Moyiiz ra pa le get a Zeova, bala, a basame tɩ neb a taabã manesmã tiis-a. Nebã sẽn da yẽgem koomã poorẽ pipi wã, a Moyiiz talla yam-sõngo. (Yik. 7:6) La tõe tɩ Israyɛll nebã sẽn tall a Zeova kɩɩsg yʋʋm wʋsgã, wa n lebga yaams ne a Moyiizi, la sũ-toogo. Tõe tɩ yaa rẽ la a ra bas n getẽ, n pa le tagsd a sẽn na n maan to-to t’a Zeova paam waoogr ye.

16. Bõe yĩng tɩ d segd n bʋgs a Moyiiz kongrã zugu?

¹⁶ A Moyiiz yɩɩ no-rɛɛs sẽn da sakd a Zeova ne a sũur fãa. Baasgo, a wa n basame tɩ bũmb tiis-a, hal t’a kɩɩs a Zeova. Woto wilgdame t’a buud tõe n paama tõnd me nana-nana. Ra keta ka ne ka t’a Moyiiz kẽ kãabg tẽngẽ wã. Woto me, keta bilf tɩ tõnd kẽ dũni-paalgã pʋgẽ. (2 Pɩy. 3:13) Tõnd ned baa a ye pa rat tɩ bũmb kɩt t’a pa tõog n kẽ ye. Dẽnd yaa tɩlɛ tɩ wakat fãa bɩ d get a Zeova sẽn na yɩl n bãng a sẽn datã, n maane. (1 Zã 2:17) Yam-bʋg la d tõe n dɩk a Moyiiz kongrã pʋgẽ?

17. Bõe n na n sõng-d tɩ d ra bas tɩ sũ-toog kɩt tɩ d pa tõog d menga?

¹⁷ D ra bas tɩ sũ-toog kɩt tɩ d pa tõog d meng ye. Baa yaa hal sẽn kaoos la d maood ne zu-loɛɛg ninga, d tẽeg Biiblã gomd a ye. Ad b sẽn yeele: “Bɩ d da yɛ ne tʋʋm-sõama maaneg ye. Bala, wakat sã n ta, tõnd na n tigsame, a sã n yaa tɩ tõnd ka bas n vʋʋs ye.” (Gal. 6:9; 2 Tes. 3:13) Yell ning sã n sãamd d sũuri, wall yaa d to manesem n nong n sãamd tõnd sũuri, d gũusda ne d no-goamã bɩ? D modgd n tõogda d sũurã bɩ? (Yel. 10:19; 17:27; Mat. 5:22) Ned sã n bao d noore, segdame tɩ d ‘bas tɩ sũ-yikrã maan a tʋʋmde,’ rat n yeel tɩ d gũ t’a Zeova wa wilg a sũ-yikri. (Karm-y Rom-dãmb 12:17-21.) Yellã pʋgẽ, d sã n kell n ges a Zeova, d na n basa sũ-yikri, n maag d yĩng n gũ t’a wa welg-a tɩ zems a wakate. Rẽ, d wilgdame tɩ d waoogd-a-la wa sẽn segdã. D sã n pa gũ, n bao n na n dok d sũur d toore, yaa a Zeova la d paoogda.

18. A Zeova noyã la a saglsã tũub wɛɛngẽ, bõe la d pa segd n yĩmi?

 ¹⁸ Noor bɩ saglg sã n toeem bɩ d tũ ne d sũur fãa. Bũmb ning pʋgẽ, a Zeova sã n wa toeem d sẽn segd n maan to-to wã, d sakd n tũu ne d sũur fãa bɩ? D sã n sakd n tũudẽ, d pa na n dat n ket n maand wa d sẽn da minim n maandẽ wã ye. Tao-tao bala, d na n sak n tũu toeengã a Zeova sẽn wilg ne a siglgã maasmã. (Ebre. 13:17) La d na n gũusame me, “n da wa n maan tɩ yõsg bũmb ning sẽn gʋlsã ye.” (1 Kor. 4:6) D sã n tũud a Zeova sẽn wilg bũmb ninsã kɛpɩ, wilgdame tɩ yaa yẽ la d geta.

19. Bõe n na n sõng-d tɩ d ra bas tɩ tõnd ne a Zeova zoodã sãam d taabã kongr yĩnga?

¹⁹ D ra bas tɩ tõnd ne a Zeova zoodã sãam d taabã kongr yĩng ye. D sã n get a Zeova wakat fãa, d pa na n bas tɩ tõnd ne a Zeova zoodã sãam d to manesem yĩnga, wall d bas tɩ kɩt tɩ d lebg sũ-to-ned ye. D sã n tara tʋʋm Wẽnnaam siglgã pʋgẽ wa Moyiizi, yaa tɩlɛ tɩ d gũus ne rẽ n yɩɩda. Yaa sɩd tɩ tõnd ned kam fãa segd n ‘tʋma fãagrã tʋʋm ne rabeem la rigbu,’ la d pa segd n yĩm t’a Zeova sẽn na n kao ned kam fãa bʋʋd to-to wã pa yembr ye. (Fili. 2:12) A sã n kõ ned tʋʋm wʋsgo, a na n sok-a-la wʋsg n yɩɩda. (Luk 12:48) La d sã n sɩd nong a Zeova, bũmb baa a ye pa na n tõog n lub-du, wall n welg tõnd ne a nonglmã ye.—Yɩɩn. 119:165; Rom. 8:37-39.

20. Bõe la d segd n mao n maane?

²⁰ Rũndã vɩɩmã pida ne zu-loeese. Rẽ n so tɩ yaa tɩlɛ tɩ d ket n get a Zeova ‘sẽn be a naamã geer zug saasẽ wã,’ n paam n bãng a sẽn dat tɩ d maanã sõma. D ra wa saag n bas tɩ tõnd ne a Zeova zoodã sãame, neb a taab manesem yĩng ye. A Moyiiz kibarã wilgdame tɩ d segd n tẽegda woto wakat fãa. Bɩ d mao n ket n get a Zeova ‘sẽn yaa tõnd Wẽnnaamã, n gũud t’a zoe d nimbãanega,’ la d ra basdẽ tɩ d taabã pãn-komsem yikd d sũur ye.—Yɩɩn. 123:1, 2.