1, 2. ¿Ndáaña kúni̱ kachiña kotoyó nu̱ú Jehová?

TIEMPO yo̱ʼvi̱ní kúú ña̱ ndóoyó, ta kinika ku̱a̱ʼa̱n ndúu ta nda̱a̱ ná ndiʼi-xa̱ʼa ndiʼi ña̱ kini saáví ndakundoo va̱ʼayó (2 Tim. 3:1). Ña̱kán va̱ʼaní ña̱ ná nda̱ka̱tu̱ʼunyó miíyó: “¿Á xíto va̱ʼayó nu̱ú Jehová?” á ¿ndáana kúú na̱ ndúkúyó ndée nu̱ú á ndáana káʼa̱nyó xíʼin ña̱ taxina yichi̱ nu̱úyó? Sana ni kǒo kaka-iniyó ta ka̱ʼa̱nyó: “Jehová kúúra”. Ta ña̱ va̱ʼaní kúúña tá saá káʼa̱nyó.

² ¿Ndáaña kúni̱ kachiña kotoyó nu̱ú Jehová? Ta ¿nda̱chun va̱ʼa kúnda̱a̱-iniyó ña̱ kǒo sándákooyó ña̱ xítoyó nu̱ú Jehová tá va̱xi tu̱ndóʼo nu̱úyó? Xa̱a̱ ku̱a̱ʼání tiempo iin ta̱ ka̱ʼyí salmo ni̱ka̱ʼa̱nra ña̱ xíniñúʼu kotoyó nu̱ú Jehová tá yáʼayó nu̱ú tu̱ndóʼo (kaʼvi Salmo 123:1, 2). * Ta chi̱táʼanra ña̱yóʼo xíʼin ña̱ kéʼé na̱ káchíñu nu̱ú inkana. Na̱yóʼo xíto va̱ʼana ndaʼa̱ na̱ káchíñuna nu̱ú, va̱ása kéʼéna ña̱yóʼo xa̱ʼa ña̱ ndátu kuitína taxina  ña̱ kuxuna á ña̱ kundaanana. Xítona nu̱ú na̱ káchíñuna nu̱ú ña̱ va̱ʼa kunda̱a̱-inina ndáaña kúni̱ na̱yóʼo keʼéna, tasaá sakusi̱ína-inina. Ta saátu miíyó xíniñúʼu kaʼvi ni̱ʼiyó Biblia ña̱ va̱ʼa kunda̱a̱-iniyó ndáaña kúni̱ Jehová keʼéyó, tasaá keʼéyó ña̱ káʼa̱nra. Tá ná keʼéyó ña̱yóʼo saá kúú ña̱ chindeétáʼanra xíʼinyó (Efes. 5:17).

3. ¿Ndáa ña̱ʼa kúú ña̱ kivi kasi nu̱úyó ña̱ va̱ása kotokayó nu̱ú Jehová?

³ Ni xa̱a̱ kúnda̱a̱-iniyó ña̱ ndiʼi tiempo xíniñúʼu kotoyó nu̱ú Jehová soo kivi xa̱a̱yó nandósó-iniyó xa̱ʼaña. Ña̱yóʼo kúú ña̱ ndo̱ʼo ñá Marta ñá xi̱kuu miga ta̱ Jesús. Ni̱xa̱a̱ñá na̱ndósó -iniñá xa̱ʼa Jehová chi chi̱ñukava ni̱ndi̱ʼi̱ní-iniñá xa̱ʼa (Luc. 10:40-42). Tá ña̱yóʼo ndo̱ʼo iin ñá ñaʼá ñá va̱ʼaní xi̱ndasakáʼnu Jehová tá tiempo ni̱xi̱yo ta̱ Jesús nu̱ú ñuʼú yóʼo, saátu kivi kundoʼo miívayó. Tá saá, ¿ndáa ña̱ʼa kúú ña̱ kivi kasi nu̱úyó ña̱ va̱ása kotokayó nu̱ú Jehová? Nu̱ú artículo yóʼo sakuaʼayó ndáaña kivi ndoʼoyó xíʼin ña̱ kéʼé inkana. Saátu sakuaʼayó ndáaña keʼéyó ña̱ va̱ʼa ná kǒo sandákooyó ña̱ kotoyó nu̱ú Jehová.

4. ¿Nda̱chun kivi ndakanda̱-iniyó ña̱ kǒo níki̱ʼvi ta̱ Moisés nu̱ú ñuʼú ña̱ ni̱ka̱ʼa̱n Jehová taxira ndaʼa̱na?

⁴ Ta̱ Moisés xi̱ndukúra yichi̱ nu̱ú Jehová xíʼin ndiʼi ña̱ xi̱keʼéra. Ta̱yóʼo “xi̱kandíxaníra Ndióxi̱ nda̱a̱ táki̱ʼva íyo ta̱ xítora nu̱ú saá ni̱xi̱yora ni kǒo níxinirara” (kaʼvi Hebreos 11:26, 27). * Ña̱ Biblia káchiña “ni iin na̱ profeta ñuu Israel kǒo níxi̱yo táki̱ʼva ni̱xi̱yo ta̱ Moisés chi mií Jehová xi̱ka̱ʼa̱n xíʼin ta̱yóʼo” (Deut. 34:10). Ni va̱ʼaní xi̱táʼanra xíʼin Jehová, kǒo níki̱ʼvira ñuʼú ña̱ ni̱ka̱ʼa̱n Jehová taxira ndaʼa̱na (Núm. 20:12). ¿Ndáaña ku̱u?

5-7. a) ¿Ndáaña ku̱u tá sa̱kán ni̱ya̱ʼa loʼo tiempo ña̱ ke̱e na̱ ñuu Israel chí ñuu Egipto? b) ¿Ndáaña ke̱ʼé ta̱ Moisés?

⁵ Tá xa̱a̱ ni̱ya̱ʼa ki̱ʼva u̱vi̱ yo̱o̱ ña̱ ke̱e ña̱ ñuu Israel ña̱ ñuu Egipto ta xa̱a̱ kuyatin xa̱a̱na chí yuku̱ Sinaí, íyo iin ña̱ ku̱u. Ki̱xaʼána káʼa̱n kúáchina ña̱ kǒo ti̱kui̱í ta káʼa̱nna contra ta̱ Moisés. Ndeéní kini ki̱xaʼá kéʼéna tasaá va̱ʼaka ni̱ka̱ʼa̱n ta̱ Moisés xíʼin Jehová: “¿Ndáaña keʼíi̱ xíʼin na̱ ñuu yóʼo? Tá ná ya̱ʼa loʼoka tiempo nda̱a̱ kanína yi̱ʼi̱ xíʼin yu̱u̱” (Éx. 17:4). Nda̱kuiin Jehová yuʼú ta̱ Moisés ta káxiní ni̱ka̱ʼa̱nra xíʼinra: ña̱ ná kanira yitu̱n tú xi̱kuumiíra nu̱ú yu̱u̱ ña̱ yuku̱ Horeb, tasaá kúú ña̱ kee ku̱a̱ʼá ti̱kui̱í. Ña̱ Biblia káchiña: “Ta̱ Moisés ke̱ʼéra ña̱yóʼo nu̱ú ndiʼi na̱ anciano na̱ ñuu Israel”. Na̱ ñuu Israel xi̱ʼina nda̱saaka mií ti̱kui̱í kúni̱na koʼona ta ndi̱ʼiva ku̱a̱chi (Éx. 17:5, 6).

⁶ Ña̱ Biblia káchiña ta̱ Moisés chi̱núura ki̱vi̱ lugar kán Masah ña̱ kúni̱ kachi “nu̱ú xi̱tondosóna” ta Meribá kúni̱ kachi “nu̱ú na̱túʼun kúáchina”. ¿Nda̱chun chi̱núura ki̱vi̱ña saá? “Xa̱ʼa ña̱ na̱túʼun kúáchi na̱ ñuu Israel xíʼin xa̱ʼa ña̱ xi̱tondosóna Jehová, ta ni̱ka̱ʼa̱nna: ʻ¿Á íyo Jehová xíʼinyó á va̱ása íyora xíʼinyó?ʼ” (Éx. 17:7).

⁷ ¿Nda̱saa ni̱tuvi Jehová xíʼin ña̱ ku̱u chí Meribá? Nu̱ú Jehová su̱ví ta̱ Moisés kuití níka̱ʼa̱nna contra á níya̱ʼandosóna tu̱ʼun, chi mií Jehová ke̱ʼéna saá xíʼin túvira (kaʼvi Salmo 95:8, 9). * Na̱ ñuu Israel ni loʼo va̱ása  va̱ʼa ña̱ ke̱ʼéna. Soo ta̱ Moisés va̱ʼava ña̱ ke̱ʼé ta̱yóʼo: Ni̱ka̱ʼa̱nra xíʼin Jehová ta ke̱ʼéra ña̱ ni̱ka̱ʼa̱n Jehová xíʼinra.

8. ¿Ndáaña ku̱u tá xa̱a̱ ku̱nu̱mí ki̱ʼvi na̱ ñuu Israel ñuʼú ña̱ ni̱ka̱ʼa̱n Jehová taxira ndaʼa̱na?

⁸ Saátu ku̱u tá xa̱a̱ ni̱ya̱ʼa u̱vi̱ xiko ku̱i̱ya̱, tá xa̱a̱ ku̱nu̱mí ki̱ʼvina ñuʼú ña̱ ni̱ka̱ʼa̱n Jehová taxira ndaʼa̱na. Na̱ ñuu Israel ni̱xa̱a̱na iin ñuu ña̱ nda̱kunaní Meribá. Ña̱yóʼo kíndo̱oña yatin chí ñuu Qadés, ta xi̱ndakitáʼantuña xíʼin ñuʼú ña̱ ni̱ka̱ʼa̱n Jehová taxira ndaʼa̱na. * Ta tuku ki̱xaʼá na̱ ñuu Israel káʼa̱n kúáchina xa̱ʼa ña̱ kǒo ti̱kui̱í (Núm. 20:1-5). Soo vitin síínva i̱xaa ta̱ Moisés.

9. ¿Ndáaña ni̱ka̱ʼa̱n Jehová xíʼin ta̱ Moisés keʼéra, soo ndáaña ke̱ʼé ta̱yóʼo? (Koto na̱ʼná ña̱ va̱xi chí xa̱ʼa).

⁹ ¿Ndáaña ke̱ʼé ta̱ Moisés tá ki̱xaʼá nátúʼun kúáchi tuku na̱ ñuu Israel? Tuku ndu̱kúra yichi̱ nu̱ú Jehová. Soo vitin va̱ása níka̱ʼa̱n Jehová xíʼinra ña̱ kanira yu̱u̱ xíʼin yitu̱n. Ña̱ ni̱ka̱ʼa̱nra kúúña ná ndakiʼinra yitu̱n tú xi̱kuumiíra ta ná sandátakara ndiʼi na̱ yiví yatin nu̱ú íyo yu̱u̱ yóʼo ta ná ka̱ʼa̱nra xíʼinña (Núm. 20:6-8). Soo ta̱ Moisés va̱ása níka̱ʼa̱nra xíʼin yu̱u̱ yóʼo. Xa̱ʼa ña̱ xa̱a̱ sáa̱ra ni̱nda̱ʼyi̱ra nu̱ú na̱ ndíta kán: “Kuniso̱ʼo ndóʼó na̱ kǒo kándíxa Jehová. ¿Á kandíka yu̱u̱ yóʼo kúú nu̱ú tavándi̱ ti̱kui̱í koʼondó?”. Tándi̱ʼi ka̱nira yu̱u̱ yóʼo, su̱ví iinlá yichi̱ níkaniraña chi u̱vi̱ yichi̱ ka̱niraña (Núm. 20:10, 11).

10. ¿Ndáaña ke̱ʼé Jehová xa̱ʼa ña̱ kǒo níxindiku̱n ta̱ Moisés yichi̱ra?

¹⁰ Ni̱sa̱a̱ní Jehová xíʼin ta̱ Moisés (Deut. 1:37; 3:26). ¿Nda̱chun ni̱sa̱a̱ra xíʼinra? Sana íyo ku̱a̱ʼá xa̱ʼa ña̱ ni̱sa̱a̱ra. Sana xa̱ʼa ña̱ kǒo níxindiku̱nra ña̱ ni̱ka̱ʼa̱nra xíʼinra kúúña.

11. Tá ka̱ni ta̱ Moisés yu̱u̱ ta ke̱e ti̱kui̱í, ¿nda̱chun kivi ndakanixi̱ní na̱ ñuu Israel ña̱ su̱ví Jehová ni̱keʼé milagro kán?

¹¹ Ná kotoyó ndáa inka xa̱ʼa kúú ña̱ ni̱sa̱a̱ Jehová xíʼin ta̱ Moisés. Yu̱u̱ ña̱ ni̱xi̱yo chí Meribá ña̱ xa̱a̱ ni̱ka̱ʼa̱nyó xa̱ʼa, yu̱u̱ téʼe xi̱kuuña. Ni ndeéní ná kanina yu̱u̱ kán kǒo ni iinna ndakanixi̱ní ña̱ kee ti̱kui̱í chi téʼeníña. Yu̱u̱ ña̱ ni̱xi̱yo nu̱ú ña̱ Meribá ña̱ u̱vi̱, yu̱u̱ vitá xi̱kuuña. Xa̱ʼa ña̱ kúúña yu̱u̱ vitá, sava ndíka̱a̱ ti̱kui̱í iniña chí ma̱á ta na̱ yiví va̱ʼa xíniñúʼunara. Tá ka̱ni ta̱ Moisés yu̱u̱ yóʼo ta va̱ása níka̱ʼa̱nra xíʼinña, sana nda̱kanixi̱ní na̱ ñuu Israel tá ke̱e miíva kúú ti̱kui̱í yóʼo ta su̱ví Jehová níkeʼé milagro yóʼo. *

12. ¿Ndáa inka xa̱ʼa kúú ña̱ ni̱sa̱a̱ Jehová xíʼin ta̱ Moisés xíʼintu ta̱ Aarón?

¹² Sana íyo inka xa̱ʼa ña̱ ni̱sa̱a̱ Jehová xíʼin ta̱ Moisés xíʼin ta̱ Aarón. Ná kotoyó ña̱ ni̱ka̱ʼa̱n ta̱ Moisés xíʼin na̱ ñuu Israel: “¿Á kandíka yu̱u̱ yóʼo kúú nu̱ú tavándi̱ ti̱kui̱í koʼondó?”. Tá ni̱ka̱ʼa̱nra “tavándi̱”, sana ni̱ka̱ʼa̱nra xa̱ʼa miíra xíʼin ta̱ Aarón. Tu̱ʼun ña̱ ni̱ka̱ʼa̱nra ni̱na̱ʼa̱ña ña̱ kǒo ní ixato̱ʼóra Jehová, chi Jehová kúú ta̱ ke̱ʼé milagro kán. Chi saá kúni̱ kachi ña̱ káʼa̱n Salmo 106:32, 33: “Sa̱sáa̱na-ini Ndióxi̱ chí nu̱ú íyo ti̱kui̱í ña̱ Meribá ta xa̱ʼa na̱yóʼo va̱ása va̱ʼa ña̱ níndoʼo ta̱ Moisés. Chi ni̱sa̱a̱ra ta kǒo níndakanixi̱níra xíʼin tu̱ʼun ña̱ ki̱xaʼára káʼa̱nra” * (Núm. 27:14). Xíʼin ña̱ ke̱ʼé ta̱ Moisés va̱ása níndasakáʼnura  Jehová. Mií Jehová ni̱ka̱ʼa̱n xíʼin ta̱ Moisés xíʼin ta̱ Aarón: “Ni̱ya̱ʼandosóndó ña̱ ni̱ka̱ʼi̱n xíʼinndó” (Núm. 20:24). Ña̱ nda̱a̱ kúúña ni̱ki̱ʼvina iin ku̱a̱chi káʼnu nu̱ú Jehová.

13. ¿Nda̱chun nda̱kúní ti̱in Ndióxi̱ ku̱a̱chi xíʼin ta̱ Moisés xa̱ʼa ña̱ ke̱ʼéra?

¹³ Ta̱ Moisés xíʼin ta̱ Aarón kúú na̱ níʼi yichi̱ nu̱ú na̱ ñuu Israel, káʼnuka chiñu xi̱kuumií na̱yóʼo nu̱ú Jehová (Luc. 12:48). Xa̱a̱ ya̱chi̱ loʼoka ni̱ka̱ʼa̱n Jehová ña̱ kǒo ki̱ʼvi na̱ ñuu Israel na̱ na̱túʼun kúáchi nu̱ú ñuʼú ña̱ Canaán (Núm. 14:26-30, 34). Ta saátu i̱xaa Jehová xíʼin ta̱ Moisés xa̱ʼa ña̱ va̱ása va̱ʼa ke̱ʼéra: va̱ása nítaxira ki̱ʼvira ñuʼú ña̱ ni̱ka̱ʼa̱nra taxira ndaʼa̱na.

14, 15. ¿Ndáa xa̱ʼa kúú ña̱ ni̱ya̱ʼandosó ta̱ Moisés tu̱ʼun Jehová?

¹⁴ ¿Ndáa xa̱ʼa kúú ña̱ ni̱ya̱ʼandosó ta̱ Moisés tu̱ʼun Jehová? Ná koto tukuyó ña̱ káchi Salmo 106:32, 33: “Sa̱sáa̱na-ini Ndióxi̱ chí nu̱ú íyo ti̱kui̱í ña̱ Meribá ta xa̱ʼa na̱yóʼo va̱ása va̱ʼa ña̱ níndoʼo ta̱ Moisés. Chi ni̱sa̱a̱ra ta kǒo níndakanixi̱níra xíʼin tu̱ʼun ña̱ ki̱xaʼára káʼa̱nra”. Ni sa̱sáa̱ na̱ ñuu Israel ini Jehová, soo ta̱ Moisés kúú ta̱ ni̱sa̱a̱ka. Xa̱ʼa ña̱ kǒo níxaʼnura-inira kǒo níndakanixi̱níra xa̱ʼa ña̱ kixi nu̱úra xíʼin tu̱ʼun ña̱ ni̱ka̱ʼa̱nra.

¹⁵ Ta̱ Moisés va̱ása níxindaara miíra ta ku̱a̱chi inkana na̱ndósóra ña̱ ndakaʼánra xa̱ʼa Jehová. Ña̱ yichi̱ nu̱ú tá na̱túʼun kúáchi na̱ ñuu Israel xa̱ʼa ti̱kui̱í, va̱ʼava ña̱ ke̱ʼé ta̱ Moisés (Éx. 7:6). Soo sana vitin xa̱a̱ ku̱naavara ta sáa̱vara ña̱ xa̱a̱ ku̱a̱ʼání ku̱i̱ya̱ xíkara xíʼin na̱ ñuu kán xa̱ʼa ña̱ kǒo xíniso̱ʼona. Sana ña̱yóʼova nda̱kanikaxi̱níra xa̱ʼa nu̱úka ña̱ ndasakáʼnura Jehová.

16. ¿Ndáaña sákuaʼayó xíʼin ña̱ ndo̱ʼo ta̱ Moisés?

¹⁶ Ta̱ Moisés iin ta̱ profeta nda̱kúní-ini xi̱kuura ta ndo̱ʼora ña̱yóʼo, ni̱ki̱ʼvira ku̱a̱chi nu̱ú Ndióxi̱, tásaá ndo̱ʼo ta̱yóʼo saátu kivi ndoʼo miívayó. Nda̱a̱ táki̱ʼva ni̱xi̱yo ta̱kán saátu miíyó xa̱a̱ ku̱nu̱mí ki̱ʼviyó ñuyǐví xa̱á ña̱ káʼa̱n Ndióxi̱ taxira ndaʼa̱yó (2 Ped. 3:13). Ni iinyó kǒo kúni̱ kindo̱o chí sa̱tá. Soo tá kúni̱yó ki̱ʼviyó ñuyǐví xa̱á, xíniñúʼu koto va̱ʼayó nu̱ú Jehová ta ndiʼi yichi̱ keʼéyó ña̱ kúni̱ra (1 Juan 2:17). ¿Ndáaña sákuaʼayó xíʼin ña̱ ndo̱ʼo ta̱ Moisés?

17. ¿Ndáaña chindeé miíyó ña̱ kǒo sa̱a̱níyó?

¹⁷ Ná kǒo sáa̱yó xíʼin ña̱ yáʼayó nu̱ú. Sava yichi̱ tuku ta tuku yáʼayó nu̱ú tu̱ndóʼo ña̱ xa̱a̱ ni̱ya̱ʼayó nu̱ú. Soo ña̱ Biblia táxiña consejo yóʼo ndaʼa̱yó: “Ná kǒo sandákooyó keʼéyó ña̱ va̱ʼa, chi ndakiʼinyó ña̱ va̱ʼa tá kǒo kúnaayó” (Gál. 6:9; 2 Tes. 3:13). Tá yáʼayó nu̱ú iin tu̱ndóʼo ña̱ sásáa̱ní miíyó á tá kǒo kútóoyó ña̱ íxaa inkana, ¿á kiʼinyó kuenta xíʼin tu̱ʼun ña̱ ka̱ʼa̱nyó á xíʼin ña̱ keʼéyó? (Prov. 10:19; 17:27; Mat. 5:22). Tá sásáa̱ inkana miíyó, va̱ʼaka ná kundatuyó ña̱ tiin mií Ndióxi̱ ku̱a̱chi xíʼinna (kaʼvi Romanos 12:17-21). * Kéʼéyó ña̱yóʼo ta kúee kúee ndátuyó ña̱ mií Jehová ná ndatiin ku̱a̱chi tá xa̱a̱ va̱ʼa túvi miíra. Chi tá ndi̱ku̱n ná keʼéyó xíʼinna táki̱ʼva kéʼéna  xíʼinyó kúni̱ kachiña kǒo íxato̱ʼóyó Jehová chi kuenta ta̱yóʼo kúú ña̱ ndatiinra ku̱a̱chi xíʼin iin iinyó.

18. ¿Ndáaña xíniñúʼu ndakaʼányó tá táxina yichi̱ nu̱úyó?

¹⁸ Ná kuniso̱ʼoníyó ndiʼi ña̱ káʼa̱nna xíʼinyó. Jehová xíniñúʼura na̱ ñuura ña̱ ndátaxina yichi̱ xa̱á nu̱úyó ña̱ ndáa ki̱ʼva keʼéyó iin chiñu, tá táxina yichi̱ yóʼo nu̱úyó ndi̱ku̱n kama ná keʼéyó ña̱ káʼa̱nna xíʼinyó. Va̱ása kuni̱kayó keʼéyóña táki̱ʼva xi̱keʼéyóña tá ya̱chi̱ (Heb. 13:17). Ta ná kiʼintuyó kuenta ña̱ ná kǒo keʼéyó ña̱ kǒo níka̱ʼa̱nna xíʼinyó (1 Cor. 4:6). Tá ndíku̱nyó ña̱ káʼa̱n Jehová saá náʼa̱yó ña̱ xíto va̱ʼayó nu̱úra.

19. ¿Ndáaña keʼéyó ña̱ va̱ʼa ná kǒo sandákooyó kitáʼanyó xíʼin Jehová xa̱ʼa ña̱ kéʼé inkana?

¹⁹ Ná kǒo sandákooyó kitáʼanyó xíʼin Jehová xa̱ʼa ña̱ kéʼé inkana. Tá xíto va̱ʼayó nu̱ú Jehová, va̱ása taxiyó ña̱ kéʼé inkana sásáa̱ña miíyó ta nda̱a̱ xa̱a̱yó keʼéyó ña̱ʼa ña̱ kǒo kútóo Jehová ta saá va̱ása kutáʼankayó xíʼinra. Ña̱yóʼo kúú ña̱ xíniñúʼuní ndakaʼán na̱ kúúmií iin chiñu ti̱xin ñuu Ndióxi̱, nda̱a̱ táki̱ʼva ni̱xi̱yo ta̱ Moisés. Ña̱ nda̱a̱ kúúña tá iin iin miíyó xíniñúʼu chika̱a̱yó ndée ña̱ kandíxayó ña̱ káʼa̱n Jehová ña̱ va̱ʼa ka̱kuyó. Soo xíniñúʼu ndakaʼányó tá tíin Ndióxi̱ ku̱a̱chi xíʼin iin iinyó viíníva tíinraña (Filip. 2:12). Tá ku̱a̱ʼáka chiñu kúúmiíyó nu̱ú Ndióxi̱, viíka ndátura keʼéyó ña̱yóʼo (Luc. 12:48). Tá ndixa kúʼvi̱-iniyó xíniyó Jehová kǒo ni iin ña̱ʼa sakuxíka miíyó nu̱úra (Sal. 119:165; Rom. 8:37-39).

20. ¿Ndáaña xíniñúʼu chika̱a̱-iniyó keʼéyó?

²⁰ Tiempo ña̱ yo̱ʼvi̱ní ndóoyó vitin, ná koto va̱ʼayó nu̱ú Jehová chí nu̱ú níndúʼúra chí ndiví ña̱ va̱ʼa kunda̱a̱-iniyó ndáaña kúni̱ra keʼéyó. Ná kǒo sandákooyó kitáʼanyó xíʼin Jehová xa̱ʼa ña̱ kéʼé inkana. Ña̱yóʼo kúú ña̱ sákuaʼayó xíʼin ña̱ ndo̱ʼo ta̱ Moisés. Nu̱úka ña̱ sa̱a̱yó xa̱ʼa ña̱ kéʼé inkana xíʼinyó va̱ʼaka ná kotoyó “nu̱ú Jehová ña̱ chindeéra miíyó nda̱a̱ ná taxira ña̱ va̱ʼa ndaʼa̱yó” (Sal. 123:1, 2).