1, 2. Jehovaba ǃoa kōsa tae-e ǃkhōǂgā hâ?

“ǀUNI TSĒDI” hîna a “ǃgom” di ǃnâ da ge ûi hâ tsî i ge ûiba ǁgaiǂoas ǀguisa nî dī ǂkhîb nî hās kōse. (2Tim. 3:1) Dîsen da ge nî, ‘mâpa ta huib tsî daoǁgaus tsîna ra ôa?’ Sida ǃereams ga “Jehovaba xu” di ga ra hâ o, os ge nēsa kaise ǃgâi ǃeream.

² Jehovaba ǃoa kōsa tae-e ǃkhōǂgā hâ? Tsî tae-e da nî dī î di sida mûde Jehovab ai ǀgui kō nē ǁkhōǁkhōsa ǃhūbaib ǃnâ da ûi hâ hîna? Kurigu ǃkharu hâseb ge psalmdi xoa-aoba ge ǁgau tae-i ǃaroma î a ǂhâǂhâsasa Jehovaba ǃoa kōsa. (Khomai re Psalmdi 123:1-4.) ǁÎb ge sida Jehovaba ǃoa kōsa, ǃgā-i hîna ǁî-i ǀhonkhoeba ǃoa ra kō i ǀkha ge ǀgopeǀnō. Nē psalmdi xoa-aoba tae-e gere ǂâibasen? ǃGā-i ge ǁî-i ǀhonkhoeba ǂû-i tsî ǁkhaubahes ǃgao ǀgui kō tama hâ xawe hoaǁae ǀhonkhoeb tae-e ǁî-e xu ra ǂgaosa mûǂan tsî ǁnāsa ra dī. ǁKhās ǁnās khami da ge sida tsîna Elobmîsa hoaǁae nî ôaǃnâ tsî Jehovab ǂâis a taesa nî ǂan tsî ǁÎb daoǁgausa nî sao. ǁNās ǀkhab ge Jehovaba sida ǃnâ ǃgâiǃgâibasensa nî ūhâ ǃgomsiga da ga ra hōǃâ o.—Efe. 5:17.

3. Tae-e Jehovab ai kōsa xu a ǂhani da ǁkhā?

 ³ Jehovab ai kōs di ǂhâǂhâsasiba da ga ra ǂan xawe da ge ǀnî ǁaeb ai ra ǂâiǂhansen. Nēs ge Jesub ǀgū ǀhōsas Martas ǀkha ge ī. ǁÎs ge “sîsenba bis ǀkha ge ǂhansen” (Luk. 10:40-42) ǁNās ge ǂgomǂgomsa khoes hîna ge Jesub ǀkha ge hâǀhaos ǀkha ge ī. Nēs ge sida ǀkhas tsîna a ī ǁkhā. Tae-e Jehovab ai kōsa xu a ǂgōsen kai da ǁkhā? Nē ǁkhāǁkhāǃâs ǃnâ da ge nî mû mati i nau khoen dī xūna a ǂgaeǂhapu da ǁkhāsa. Tsî da ge nî mû mati da Jehovab ai nî kōsa.

4. Tae-i ǃaroma da nî buru Moseb ge mîmâisa ǃhūb ǃnâ ǂgâ tama hâ i ǃkhaisa?

⁴ Moseb ge hoaǁae Jehovaba ǃoa daoǁgauhes ǃgao gere kō. “Mûheǁoasab tawab ge mû bib ras axase ge ǃkhōǀgaipesen xui-ao.” (Khomai re Hebreǁîn 11:24-27.) Elobmîs ge ra mî “tsî ǀnî kēbo-aob ge ǃaruǀî Israeli ǃnâ khâi tama ge hâ i, Moseb khami ge ī iba, ǃKhūb [Jehovab, NW] xa ge ǂanhe hâ iba aisa xu ais ǃoa.” (Deu. 34:10) Moseb ge ǃgâi ǀhōsagusisa Jehovab ǀkha ūhâ i xaweb ge mîmâisa ǃhūb ǃnâ ǂgâs di aiǂhanuba ge ǂoaǃnâ. (Num. 20:12) Tae-e Moseba ge ǃnôasen kai?

5-7. Israelǁaesa Egipteba xun ge ǂoa o, o tae-i ǃgomsina ge hōǃâ tsî Moseba tae-e ge dī?

⁵ ǀGam kurigu ǃkharu hâses ge Israelǁaesa Egipteba xu a ǂoa o, on ge ǃgomsiba ge hōǃâ Sinaiǃhommi tawan nî sīs aiǃâ. Khoen ge ǁgammi a ǀkhai ǃkhais ǃgao ge ǁaixa hâ i. ǁÎn ge Moseb ǃoagu ge ǁaixa hâ i tsî î ge nē mâsiba ge ǁgaoǂoa Moseb Jehovaba ǃoa nî ǀgores kōse: “Tare-e ta nî nē ǁaes ǀkha dī? ǂKhari ǁaerob ǀguib kōse, on ge nî ǀuiǁhom [ǀuin ǀkha ǂnoa] te.” (Eks. 17:4) Jehovab ge Moseba ǃamku ǁgaraga mās ǃnâ-ū ge ǃeream. ǁÎb ge ǁîb ǃhôasa Horeb ǃhommi ai ge ǂnau tsî î ge ǁnāpaxū ǁgam-e ge ǂoaxa. Nēti da ge ra khomai: “Ob ge Moseba Israeli kaigu [ǀhaohâb ǃûi-aogu] di ais aiǃâ ǁnāti ge dī.” Israelǁaes ge ǁgamme ge ā tsî î ge ǂkhîba ge hâ.—Eks. 17:5, 6.

⁶ Xoadi ge ra mî: “Ob ge ǁnā ǃāsa Masa tsî Meriba ti ge ǂgai Israeli ôan di ǂnoagus ǃaroma, tsî ǃKhūba [Jehovaba, NW] ǃâitsâ tsîn ge ǃKhūba [Jehovaba, NW] hâba sida ǁaegu, tamas ka io ǀkhaib a?” (Eks. 17:7) Nē ǀondi ge ge ǃgâi i “ǃâitsâ” tsî “ǂnoagus” didi gere ǂâibasen amaga.

⁷ Jehovaba Meribas tawa ge hâ ǃnaeǃkhais xa mati gere tsâ? ǁÎb ge Israelǁaes tanisen ǀgauba ǃgomsib ase gere mû ǁÎb Gaosib ǃoagu, Moseb ǃoagu ǀguis ose. (Khomai re Psalmdi 95:8, 9.) Israelǁaes ge ǃgâi tama tanisen ǀgauba ge ūhâ i. Moseb ge ǁnā ǃnaeǃkhais tawa Jehovab ǃoa kō tsî ǁÎb daoǁgausa ge sao.

8. Tae-i ǃgomsinan ge Israelǁaesa hōǃâ 40 kurigu ǃkharu hâsen ge ǃgaroǃhūba xu gere ǂoa ǁaeb ǃnâ?

⁸ Tae-e 40 kurigu ǃkharu hâse ge ī Israelǁaes ge ǃgaroǃhūba xu gere ǂoa ǁaeb ǃnâ? Israelǁaes ge ǁkhawa Meriba di ǀon hâ ǃās ǃnâ ge hâ i. Xawe nēs ge ge ǀnî hâ ǃā i Kades tsî mîmâisa  ǃhūb tsîn ǀgūse. * Israelǁaes ge ǁkhawa ǁgammi a ǀkhai ǃkhais ǃgao ge ǁaixa hâ i. (Num. 20:1-5) Xawe î ge nē ǃnāsa xūna ge ǀkhara Moseb ǀkha.

9. Moseba tae-i ǁgaraga ge hō xaweb ge tae-e dī? (Tsoatsoas ǃnâ hâ ai-īsiba mû re.)

⁹ Moseba nēs xa tae-e ge dī? ǁÎb ge Jehovaba ǃoa ge kō îb daoǁgauhe. Xaweb ge Jehovaba nē ǃnāsa ge mîba bi tama hâ i îb ǁîb ǃhôasa ǀuib ai ǂnau. Moseb ge ge mîbahe îb ǃhôasa ū, khoena ǀuib ais ai ǀhaoǀhao tsî ǀuib ǀkha ǃhoa. (Num. 20:6-8) Moseb ge ǀuib ǀkha ge ǃhoa tama hâ i. Tsî ǁîb ǁaiba ǁnāpa ge ǀhao hâ i khoen ai ge ūǂui: “ǃGâ ǁnâi re, sa ǁnâuǁoado, ǁgam-e xare ūǀkhība du khom nî?” Tsî ǁnāpaxū ǃhôasa ge ǂnau ǀgui tama i tsî ǀgam ǃnādi kōse.—Num. 20:10, 11.

10. Jehovaba tae-e ge dī Moseb tanisen ǀgaub xa?

¹⁰ Jehovab ge kaise Moseb ǀkha ge ǁaixa. (Deu. 1:37; 3:26) Jehovaba tae-i ǃaroma nēti ge tanisen? ǂGui xūn ge ge ǃkhōǂgāsa i. Jehovab ge ǀnîsi Moseb ǀkha ge ǁaixa hâ i, ǁÎb ǁgaragab ge sao tama hâ i amaga.

11. Moseb di dība mati Jehovab di buruxa dība khaoǃhūs ǃnâ ge mâi?

¹¹ ǀNî hâ xū-i ge hâ. Meribas ǂnamipe hâ ǀuidi ge kaise ge ǃgari i. Khoe-i ga ǁnā ǀuide ga ra ǂnau tsâ xawes tsîna i ge ǁgam-e ǁnāpaxū ǂoa hō tide. Xawe î ge ǀgamǁî Meribas ǂnamipe hâ ǀuide ge ǀkhara i, ǁnādi ge kaise ge tsaura i. Nē ǀuidi ge ǂgui ǁgam-e ge ūhâ i tsîn ge khoen tsîna ǁnāpaxū ǁgam-e gere sîsen-ū. Moseb ge nē ǀuiba ǀgam ǃnāra a ǂnau o, ob ge ge ǁgau ǁgammi ge Jehovaba xu hā tama hâ xawe nē ǀuiba xu ra hāsa. Moseba ǀuiba ǂnaus ǃnâ-ū ge ǁgau ǁîb ge ǂgomǃgâsiba nau buruxa dī-e xu a hōsa? * Khoe-i ge a ǀū.

12. Jehovaba tae-i ǃaroma Moseb tsî Aronni tsîn ǀkha ge ǁaixa hâ i?

¹² ǀNî hâ ǃaromas ge hâ Jehovab ge Moseb tsî Aronni tsîn ǀkha ǁaixa hâ isa. Moseb ge khoen ǃoa ge mî: “ǁGam-e xare ūǀkhība du khom nî?” Moseb ge “khom” di hâ mîsa sîsen-ūs ǃnâ-ū ǁîb tsî Aronni tsîn xa gere ǃhoa. ǁNā mîdi ge Jehovaba ǃgôasiba ge ǁgau tama hâ i hîna ge nē buruxa dība a ī ǁkhā kaiba. Nēs ge Psalmdi 106:32, 33 ǃnâ a xoasa mîdi xa ra ǂkhâǃnâhe: “Tsîn ge Eloba ǁkhāti kaise ge ǁaixa kai Meribas ǁgamgu tawa, ob ge Moseba ǁîn ǃaroma tsūse ge ībahe; ǁîb di gagasan ge mâǃoa xui-ao, ob ge ǂâi tamase amǁgaukha âb ǀkha ge ǃhoa.” * (Num. 27:14) Moseb tanisen ǀgaub ge Jehovaba ǃgôasiba ge ǁgau tama hâ i tsî ǁÎba gere ǃgôaǁnâ. Moseb tsî Aronni tsîn ǀkhab gere ǃhoa o, ob ge Jehovaba  ge mî: “Sakho ge ti mîmāsa ǁnâuǀnam tama” go hâ i. (Num. 20:24) Nē ǁoreb ge kaise ge kai i.

13. Jehovab ge Moseba a ǀgoraǃgâ ǀgauba tae-i ǃaroma a ǂhanu?

¹³ ǂGaeǂgui-aokha ase kha ge Moseb tsî Aronni tsîna kai ǃereamsa ge ūhâ i. (Luk. 12:48) Jehovab ge ǃkharu ge ǁaeb ǃnâ ge ǂgao tama hâ i în ǁîb khoena Kanaanni ǃnâ ǂgâ ǁîn ǁoren ǃgao. (Num. 14:26-30, 34) Nēs ǃaromab ge Jehovaba Moseba Israelǁaes khami ge ǀgoraǃgâ ǁÎb ǁoreb ǃgao. Moseb ge nau ǁore-aon khami mîmâisa ǃhūb ǃnâ ǂgâsa ge mā-amhe tama hâ i.

14, 15. Tae-e ge ǃaroma îb Moseba ǁore?

¹⁴ Moseba tae-i ǃaroma nēti i tanisen ǀgauba ge omkhâi? Psalmdi 106:32, 33 ge ra mî: “Tsîn ge Eloba ǁkhāti kaise ge ǁaixa kai Meribas ǁgamgu tawa, ob ge Moseba ǁîn ǃaroma tsūse ge ībahe; ǁîb di gagasan ge mâǃoa xui-ao, ob ge ǂâi tamase amǁgaukha âb ǀkha ge ǃhoa.” Israelǁaes ge Jehovaba a ǁaixa kai xaweb ge Moseba tsūse nēs xa ge ībahe. ǁÎb ge ǃkhō-oasen tama hâ i amagab ge ǂâi tamase ge ǃhoa.

¹⁵ Moseb ge nau khoen dī xūna ge mā-am îb tā Jehovab ai kō. Moseb ge ǂguro ǃnaeǃkhaisa ǃgâi ǀgaub ǃnâ ge sîsenǂam. (Eks. 7:6) Ī ǁkhā as ge ǁîb ge ǀnîsi ǂgui kuriga ǁnâuǀnamoǃnâ Israelǁaes ǀkha ge hâ tsî ǁnās ǀkha tsau tsî ge ǁaixa hâ i, ǁîn ǀkha. Moseba ǁîb tsâsigu xa ǀgui gere ǂâi, Jehovabab mati ǂhaisiba nî mās xa ǂâi tama i tsî?

16. Tae-i ǃaroma da Moseb dī xūn ǀkha nî ǁaeǁasen?

¹⁶ Moseb hîna ge ǂgomǂgomsa îb ge ǁore tsî a ǃnôa khami da ge sida tsîna ǁore tsî a ǃnôa ǁkhā. Moseb khami da ge sida tsîna ǀae Jehovab xa da mîmâibahe hâ ǀasa ǃhūbaib ǃnâ nî ǂgâ. (2Pet. 3:13) Hoa da ge ǁnā ǀkhaeba ra hōǃâ ǂgao tsî ǂoaǃnâ bi ǂgao tama hâ. Nēsa dīǀoaǀoas ǃgao da ge hoaǁae Jehovab ai nî kō tsî ǁîb ǂâisa nî dī. (1Jhn. 2:17) Moseb aiǁgausa xu da tae-e ra ǁkhāǁkhāsen?

17. Tae-e nî hui da î da tā ǁaib ǃnâ māǁnâsen?

¹⁷ Tā ǁaib ǃnâ mâǁnâsen re. ǀGui ǃgomsiba da ga ǁaeba xu ǁaeb ǀkha ga ra hōǃâ xawe da ge ǃgâidīsa tā nî tsau Elob ra “mûǂuibasen ǁaeb ai da nîra ǃgaobasen xuige, tsau tama da ga io.” (Gal. 6:9; 2Tes. 3:13) ǃGomsina da ga ra hōǃâ o, sida mîde ǃkhō-oa î da ra? (ǂKhm. 10:19; 17:27; Mat. 5:22) Khoe-i xa da ga ǁaixa kaihe o, o da ge nî ǁkhāǁkhāsen î da “ǁaixasiba ǃkhai-e mā.” Ham-i di ǁaiba? Jehovab ǁaiba. (Khomai re Romeǁîn 12:17-21.) Jehovab ǃoa da ga ra kō o, o da ge ǁîba ǃgôasiba a ǁgau ǁkhā ǁîb ai xūna māǁnâs ǃnâ-ū. ǃNūǃnâxase da ge ǁîba nî ǃâu îb ǂhanu ǁaeb ai xū-e dī. ǀNî hâ xū-e da ga ra dī ǂgao tsî aitsama ǀkhaobasen o, o da ge Jehovaba ǃgôasiba ǁgau tide.

18. Tae-e da ǂâis ǃnâ nî ūhâ daoǁgaude saos tawa i ga ra hā o?

¹⁸ ǀAsa daoǁgaude ǃamkuse sao re. ǂGomǂgomsase da Jehovab ra mā  da daoǁgaude ra sao? ǁNāti i ga ra ī o, o da ge ǃkharu ge ǁaeb ǃnân ge xūna gere dīhe ǀgauba sao tide. Xawe da ge ǃhaese ǀasa daoǁgaude nî sao Jehovab ra ǁîb ǀapeǂhumis ǃnâ-ū mā da de. (Heb. 13:17) Xawe da ge nî ǂanbasen î da tā “xoahe hâs ǂamai” xūna dī. (1Kor. 4:6) ǁNāsa dīs ǃnâ-ū da ge Jehovab ai ra kōǀgara.

19. Mati da sida ǀhōsagusisa Jehovab ǀkha ǁgaiǁgai tide nau khoen dīsādi ga ra ǂâiǂhansen kai da xawe?

¹⁹ Tā mā-am re în nau khoen di dīsāde sada di ǀhōsagusis Jehovab ǀkha da ūhâsa ǁgai kai. Jehovab ai da ga ra kōǀgara o, o da ge nau khoen dīsāde tā nî mā-am în ǁaixa kai da tamas ka io sida ǀhōsagusis Jehovab ǀkha da ūhâsa ǁgaiǁgai. Nēs ge kaise a ǂhâǂhâsa ǀō-aisase da ga Moseb khami aiǂhanuga Jehovab di ǀapeǂhumis ǃnâ ga ra ūhâ o. Xawe ama as ge hoa da ge ‘ǃaob tsî ǀkhūb tsîkha ǀkha sida ǃgâiǃōsiba nî sîsenǂam.’ ǂÂis ǃnâ da ge nî ūhâ Jehovab ge karoǂgaoxa tsî ǃgaridana ǀgaub ǃnâ ǀgoraǃgâ da tama hâ. (Fil. 2:12) ǂGui aiǂhanuga da ga ra ūhâ o, os ge sida ǃereamsa ra kai. (Luk. 12:48) Xawe Jehovaba da ga ra ǀnam o, o î ge xū-e sida Jehovab ǀnamma xu ūbē tide.—Psa. 119:165; Rom. 8:37-39.

20. Tae-e da nî mîǁgui dīsa?

²⁰ Nē ǃgom ǁaeb ǃnâ da ge ‘ǀhommi ǃnâ ǂnôab ǃoa’ nî kō, î da ǁîb ǂâis a taesa ǂan. Sida ǀhōsagusis Jehovab ǀkha da ūhâsa da ge tā nau khoen dīsādi ǃgao nî ǁgaiǁgai. Moseb ǀkha ge ī aiǁgaus ge ǂhâǂhâsasiba ra ǁgau da sida ǂgaob tsî ǂâis tsîn ǃnâ da nî ūhâsa. Nau khoen dīsādi ge tā nî ǂkhabuǂâi kai da xawe î ge ‘ǁnās ǁkhās khami  . . . sida mûde ǃKhūb [Jehovab, NW] sida Elob ai nî hâ, ǀkhomxa dab nîs kōse.’—Psa. 123:1, 2.