1, 2. Okukala twa tala kuJehova okwa kwatela mo shike?

OTU LI ‘momathimbo omadhigu okukaliwa mugo,’ nonkalamwenyo otayi ka nayipala noonkondo, manga uuyuni uupe nombili yashili inaayi ya kombanda yevi. (2 Tim. 3:1) Onkee ano, onawa tu ipule tatu ti: ‘Okulye handi pula ekwatho newiliko?’ Otashi vulika tu yamukule tatu ti: “OkuJehova,” ndyoka li li eyamukulo ewanawa kaaku na we.

² Okutala kuJehova okwa kwatela mo shike? Ongiini tatu vulu okushilipaleka kutya otwa tala kuye, uuna twa taalelwa komashongo? Omimvo omathele dha ka pita, omupisalomi okwa li a zimine kutya otwa pumbwa okukaleka omeho getu ga tala kuJehova, uuna twa pumbwa ekwatho. (Lesha Episalomi 123:1-4.) Okwa yelekanitha okutala kwetu kuJehova nankene omupiya ha tala kumwene gwe. Mbela omupisalomi okwa li a hala okutya shike? Omupiya ina pumbwa owala okutala kumwene gwe a pewe iikulya negameno. Ihe okwa pumbwa wo okutala kuye aluhe, opo a mone shoka mwene gwe a hala okuningilwa, opo nduno ta ningi shoka ta pulwa a ninge. Momukalo gwa faathana, otwa pumbwa okukonakona Oohapu dhaKalunga esiku kehe,  opo tu mone kutya okwa hala tu ninge shike, e tatu shi ningi. Ngoka ogwo owala omukalo tagu vulu oku tu kwathela tu mone kutya Jehova ote ke tu kwathela, uuna twa pumbwa ekwatho. — Ef. 5:17.

3. Oshike tashi vulu oku tu piyaganeka kaatu kale twa tala kuJehova?

³ Nonando otu shi esimano lyokutsikila okutala kuJehova, omathimbo gamwe otashi vulika tu piyaganekwe. Shoka osho naanaa sha li sha ningilwa kuume kaJesus kopothingo, Marta. Marta okwa li i “ipyakidhile unene niilonga.” (Luk. 10:40-42) Ngele shoka osha ningilwa omukiintu omudhiginini, Marta, sho a li naJesus, inashi tu kumitha ngele oshinima sha faathana oshe tu ningilwa. Oshike tashi vulu oku tu piyaganeka kaatu kale twa tala kuJehova? Moshitopolwa shika, otatu ka kundathana nkene oonkatu dhayalwe tadhi vulu oku tu piyaganeka? Otatu ki ilonga wo nkene tatu vulu okutsikila okukala twa tala kuJehova.

4. Omolwashike tashi vulika shi tu kumithe sho Moses a kanitha uuthembahenda wokuya mEvi lyEuvaneko?

⁴ Moses okwa li shili ha tala kuJehova e mu wilike. Ombiimbeli otayi tu lombwele kutya “Moses okwa li e na omukumo ongaangoka a mono Kalunga, nando iha monika.” (Lesha Aahebeli 11:24-27.) Otayi tu lombwele wo kutya “kamwa li we omuhunganeki mulsrael a fa Moses; Omuwa a popi naye oshipala noshipala.” (Deut. 34:10) Nonando Moses okwa li e na ekwatathano lyopothingo naJehova, okwa li a kanitha uuthembahenda wokuya mEvi lyEuvaneko. (Num. 20:12) Oshike sha ningitha Moses a yone?

5-7. Uupyakadhi wuni wa holoka po konima sho Aaisraeli ya zi muEgipiti, nongiini Moses a li u ungaunga nonkalo?

⁵ Meni lyoomwedhi mbali konima sho Aaisraeli ya zi muEgipiti, opwa holoka uupyakadhi uunene, nokuli manga inaaya thika pondundu yaSinai. Aantu oya tameke okunyenyeta kombinga yomeya ngoka kaaga li po. Oya tameke wo okungungutulila Moses, nonkalo oya nayipala sigo Moses a kugile Jehova a ti: “Aantu mbano otandi ya ningi ngiini? Oya hala nokuli ya dhipage ndje nomamanya.” (Eks. 17:4) Jehova okwa yamukula Moses moku mu pa omalombwelo ga yela. Okwe mu lombwele a kuthe ondhimbo ye e ta dhenge emanya muHoreb, opo mu ze omeya. Ombiimbeli otayi ti: “Moses nokwe shi ningi montaneho yaawiliki yalsrael.” Aaisraeli oya nu omeya ngoka ya li taya pula, nokungawo uupyakadhi owa li wa kandulwa po. — Eks. 17:5, 6.

⁶ Ombiimbeli oya tsikile ko tayi ti kutya Moses ‘ehala ndyoka okwe li luku Massa naMeriba, molwashoka Aaisraeli oya tamanana noya hindi Omuwa, sho ya pula ya ti: “Omuwa omo tuu e li mokati ketu nenge aawe?”’ (Eks. 17:7) Omadhina ngoka otaga opalele, oshoka otaga ti ‘okuhinda’ nosho wo ‘okutamanana.’

⁷ Shoka sha ningwa puMeriba, Jehova okwa li e shi uvitile ngiini? Okwa li u uvite Aaisraeli ye mu tsila ondumbo nosho wo uunamapangelo we, ihe haMoses owala. (Lesha Episalomi 95:8, 9.) Odhoshili kutya Aaisraeli oya li ya puka. Pompito ndjoka, Moses okwa katuka mondjila, sho a tala kuJehova e ta landula nuukeka omalombwelo ge.

8. Uupyakadhi wuni wa holoka po lwopehulilo lyomimvo 40 ndhoka Aaisraeli ya kala mombuga?

⁸ Oshike sha ningwa po, sho oshinima sha faathana sha holoka konima yomimvo 40 lwaampono, sho Aaisraeli ye li pokuza mombuga? Aaisraeli natango oyi iyadha pehala ndyoka lye ki ithanwa Meriba. Ihe ehala ndika olya li lya yooloka ko kuMeriba ngoka a li  a tegama naKadesh popepi noongamba dhEvi lyEuvaneko. * Aaisraeli oya li natango ya nyenyeta kombinga yomeya. (Num. 20:1-5) Ihe oshikando shika, Moses inashi ke mu endela we nawa.

9. Omalombwelo geni Moses a li a pewa, ihe okwa ningi po shike? (Tala kethano lyopetameko.)

⁹ Mbela oshikando shika Moses okwi inyenge ngiini? Natango okwa tala kuJehova oye e mu wilike. Ihe oshikando shika Jehova ka li e mu lombwele a dhenge emanya. Moses okwa li a lombwelwa a kuthe ondhimbo, e ta gongaleke egongalo alihe, komeho yemanya, opo ihe ta lombwele emanya. (Num. 20:6-8) Nonando ongawo, Moses ka li a popi nemanya. Pehala lyaashono, oku uvu nayi e ta gandagula mboka ya gongala a ti: “Pulakeneni, ne aatangalali! Natu mu kuthile omeya memanya ndika?” Opo nduno, okwa dhenge emanya lwaali, ihe halumwe. — Num. 20:10, 11.

10. Jehova okwi inyenge ngiini kwaashoka Moses a ningi po?

¹⁰ Jehova okwa geyele Moses noonkondo. (Deut. 1:37; 3:26) Omolwashike Jehova i inyenge momukalo ngoka? Otashi vulika sha li sha kwatela mo iinima oyindji. Ngaashi sha popiwa metetekelo, Jehova otashi vulika a li a geye, molwaashono Moses okwa ndopa okulandula omalombwelo omape ngoka e mu pe.

11. Sho Moses a dhenge emanya, ongiini shoka tashi vulika inaashi ulika kutya Jehova oye a longa oshikumithalonga shoka?

¹¹ Opu na ishewe etompelo limwe kutya omolwashike Jehova a li a geya. Emanya ndyoka lyomuMeriba moka ya li tango, olya li lya kola. Kutya omuntu ne li dhenge a dhiginina shi thike peni, kapwa li ngoka a tegelela li ze omeya. Ihe omamanya ngaka ga li muMeriba omutiyali, oga li ga yooloka ko, oshoka ogendji gomugo omapu. Molwaashoka omapu, olundji oga li haga kala ge na omeya okuza mevi, naantu oya li haya vulu oku ga kutha mo ngele oya hoko mo ombululu. Sho Moses a dhenge emanya lwaali e tali zi omeya, mbela Aaisraeli kaya li ye na okudhiladhila kutya Jehova oye e shi ningitha tashi wapa, pehala lyoku shi tala ko shi li paunshitwe? Sho Moses a dhenge emanya pehala lyokupopya nalyo, mbela oshu ulike ngaa kutya Jehova oye a ninga oshikumithalonga shono? * Itatu vulu naanaa kutya osho.

12. Omolwetompelo lini tashi vulika Jehova a li a geyele Moses naAaron?

¹² Otashi vulika natango pu na etompelo limwe kutya omolwashike Jehova a li a geyele Moses naAaron. Ndhindhilika kutya Moses okwa li a pula aantu a ti: “Natu mu kuthile omeya memanya ndika?” Sho Moses a longitha oshitya “natu,” ngiika okwa li ta ulike kuye naAaron. Uutumbulilo mboka owu ulike kutya ina simaneka Jehova e li Onzo yashili yoshikumithalonga shoka. Shoka otashi kolekwa koohapu dhEpisalomi 106:32, 33 ndhoka tadhi ti: “Pomeya gaMeriba aantu oya geyitha Omuwa, naMoses okwa geelwa omolwawo. Oya geyitha [ombepo] yaKalunga, onkee Moses okwe ya nyenyetele itaa fudha po.” * (Num. 27:14) Shoka Moses a ningi kasha li sha simanekitha  Jehova. Okuza mpono, Jehova okwa popi naMoses nosho wo naAaron a ti: “Ne yaali omwa tindi oshipango shandje.” (Num. 20:24) Ndyoka olya li eyono lya kwata miiti!

13. Omolwashike epangulo ndyoka Jehova a ningile Moses lya li tali opalele?

¹³ Jehova okwa li a tegelela Moses naAaron ya ninge oshindji oshiwanawa, oshoka oya li aakwatelikomeho yoshigwana she. (Luk. 12:48) Monakuziwa, Jehova ka li a pitike oshigwana ashihe shaIsraeli shi ye mo mevi lyaKaanan, molwaashoka kasha li sha vulika. (Num. 14:26-30, 34) Onkene osha li shi li nawa nosho opala kuJehova a ningile Moses oshinima sha faathana, molwaashoka naye ina vulika. Ngaashi owala Aaisraeli mbeyaka ya li inaaya vulika, naye ka li e ethwa a ye mEvi lyEuvaneko.

14, 15. Oshike sha ningitha Moses kaa vulike?

¹⁴ Oshike sha li sha ningitha Moses kaa vulike kuJehova? Episalomi 106:32, 33 otali ti: “Pomeya gaMeriba aantu oya geyitha Omuwa, naMoses okwa geelwa omolwawo. Oya geyitha [ombepo] yaKalunga, onkee Moses okwe ya nyenyetele itaa fudha po.” Nonando Aaisraeli kaya li ya vulika kuJehova, Moses oye a li a geye ko. Okwa kanitha eipangelo, naashoka oshe mu ningitha a popye iinima nopwaa na okudhiladhila kiilanduliko.

¹⁵ Moses okwe etha oonkatu dhayalwe dhi mu piyaganeke kaa kale we a tala kuJehova. Oshikando shotango aantu ya nyenyeta kombinga yomeya, Moses okwa ningi shoka shi li mondjila. (Eks. 7:6) Ihe otashi vulika a li a vulwa noku uvite nayi kAaisraeli mboka ya kala itaaya vulika uule womimvo odhindji. Mbela Moses okwa li ta dhiladhila unene kunkene u uvite, pehala lyankene ta vulu okusimanekitha Jehova?

16. Omolwashike tu na okudhiladhila kombinga yaashoka Moses a ningi?

¹⁶ Ngele omuhunganeki omudhiginini ngaashi Moses okwa li a piyaganekwa e ta yono, osha yela kutya natse otatu vulu okuningilwa oshinima sha faathana. Ngaashi Moses, natse otu li pokuya mevi lyopathaneko, ano uuyuni uupe mboka Jehova e tu uvanekela. (2 Pet. 3:13) Kapu na gumwe gwomutse a hala a kanithe uuthembahenda mboka wi ikalekelwa. Opo tu ye muuyuni mboka, otwa pumbwa okukaleka omeho getu ga tala kuJehova, mokukambadhala aluhe okulonga ehalo lye. (1 Joh. 2:17) Oshike tatu ilongo kepuko lyaMoses?

17. Oshike tashi ke tu kwathela tu kale tu na eipangelo, ngele otu uvithwa nayi?

¹⁷ Ngele owu uvithwa nayi, ino kanitha eipangelo. Nokuli nonando otwi iyadhe tatu ungaunga nuupyakadhi wa faathana lwiikando, “inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.” (Gal. 6:9; 2 Tes. 3:13) Ngele oshinima shontumba nenge omuntu gwontumba okwe tu uvitha nayi, mbela ohatu pangele ngaa okupopya kwetu nokugeya kwetu? (Omayel. 10:19; 17:27; Mat. 5:22) Uuna twa hindwa kuyalwe, otwa pumbwa okwiilonga okweethela po “ondjahi yaKalunga,” ano okweethela po Jehova. (Lesha Aaroma 12:17-21.) Ngele otwa tsikile okutala kuJehova, otatu ke mu ulukila kutya otwe mu simaneka moku mu ethela po, twa tegelela neidhidhimiko oye a katuke onkatu, ngele oku wete sha pumbiwa. Ngele otwa kambadhala okukwata onkone pehala lyokukala twa tala kuJehova, kungawo itatu ke mu simaneka.

18. Oshike twa pumbwa okudhimbulukwa, ngele tashi ya pokulandula omalombwelo?

 ¹⁸ Landula nawa omalombwelo ngoka omape. Mbela ohatu landula ngaa omalombwelo omape ngoka Jehova te tu pe? Ngele osho, itatu ka kala aluhe tatu ningi iinima momukalo ngoka twa li hatu yi ningi nale. Pehala lyaashono, otatu ka katuka nziya tu landule omalombwelo gaJehova omape ngoka te tu pe okupitila mehangano lye. (Heb. 13:17) Pethimbo opo tuu mpoka, otatu ka kala twa kotoka kaatu ‘konde shoka shu uthwa.’ (1 Kor. 4:6) Okuninga ngawo, otaku ke tu kwathela tu tsikile okukala twa tala kuJehova.

19. Ongiini tatu vulu okuyanda okweetha omapuko gayalwe ga yone po ekwatathano lyetu naJehova?

¹⁹ Ino etha omapuko gayalwe ga yone po ekwatathano lyoye naJehova. Ngele otwa kala twa tala kuJehova nomeho getu gopathaneko, itatu ka etha oonkatu dhayalwe dhi yone po ekwatathano lyetu naye. Shika osha simana unene tuu ngele otu na iinakugwanithwa oyindji mehangano lyaJehova ngaashi Moses. Odhoshili kutya kehe gumwe gwomutse okwa pumbwa a ‘kale ta longo nokutila nokukakama omolwehupitho lye.’ Manga shi li ngawo, otu na okudhimbulukwa kutya Jehova okwa tegelela tu mu longele nuudhiginini notu vulike kuye, opo e ke tu hupithe. (Fil. 2:12) Ngele otwa kala tu na iinakugwanithwa oyindji, Jehova ota ka kala a tegelela tu ninge oshindji. (Luk. 12:48) Onkee ano, ngele otu hole shili Jehova, kapu na shoka tashi vulu oku tu pundukitha nenge oku tu topola ko kohole ye. — Eps. 119:165; Rom. 8:37-39.

20. Otu na okutokola toko okuninga shike?

²⁰ Otu li momathimbo omadhigu. Onkene otwa pumbwa okutsikila okukaleka omeho getu kwaaNgoka e “li megulu,” opo tu longe ehalo lye. Inatu etha nando oonkatu dhayalwe dhi yone po ekwatathano lyetu naJehova. Okutala kwaashoka sha ningilwa Moses, otatu ilongo ko sha sha simanenena. Pehala lyokwiihumbata nayi, omolwokwaagwanenena kwayalwe, natu kale twa tokola toko ‘omeho getu ga kale ga tala kuJehova, Kalunga ketu, sigo e tu sile ohenda.’ — Eps. 123:1, 2.