Eya go dikagare

Eya go lelokelelo la dikagare

Mahlo a Gago a Lebeletše Kae?

Mahlo a Gago a Lebeletše Kae?

“Ke emišeditše mahlo a ka go wena, wena yo a dulago magodimong.”​—PS. 123:1.

DIKOPELO: 143, 124

1, 2. Go lebelela Jehofa go bolela’ng?

RE PHELA ‘dinakong tše di hlobaetšago’ le tšeo go lego “thata go lebeletšana le tšona.” (2 Tim. 3:1) Bophelo bo sa tlo ba boima le go feta go fihlela Jehofa a fediša mathata gomme go eba le khutšo mo lefaseng. Ka gona, re swanetše go ipotšiša gore: ‘Ke nyaka thušo le tlhahlo go mang?’ Ka moka ga rena re ka no araba kapela ra re re nyaka tlhahlo “go Jehofa,” e bile yeo ke karabo e botse kudu.

2 Eupša go lebelela Jehofa go bolela’ng? Le gona re ka dira’ng gore mahlo a rena a dule a lebeletše Jehofa le ge re na le mathata? Mopsalme o re kgothaleditše gore re lebelele Jehofa ge re nyaka thušo. (Bala Psalme 123:1-4.) O ile a re ge re lebelela Jehofa re swana le mohlanka yo a lebeletšego mong wa gagwe gore a mo thuše. Mopsalme o be a e ra go re’ng? Mohlanka ga a no nyaka gore mong wa gagwe a mo nee dijo le go mo šireletša eupša o swanetše go tseba le gore mong wa gagwe o nyaka a dira eng, gomme a dire seo mong wa gagwe a se nyakago. Ka mo go swanago, le rena re swanetše go ithuta Beibele letšatši le letšatši e le gore re bone seo Jehofa a nyakago re se dira, ke moka re se dire. Ge re ka dira seo Jehofa a se nyakago, o tla re thuša ge re hloka thušo.​—Baef. 5:17.

3. Ke’ng seo se ka dirago gore re se sa lebelela Jehofa?

3 Le ge re tseba gore go bohlokwa gore re dule re lebeletše Jehofa, eupša ka dinako tše dingwe re ka lebala ka baka la ditšhitišo. Mareta e lego mogwera wa Jesu, o ile a ba le bothata bjoo. O ile a “šitišwa ke go dira mediro e mentši.” (Luka 10:40-42) Ge e ba motho yo a bego a botega e bile a phela le Jesu a ile a šitišega, gona le rena re ka šitišega. Eupša ke’ng seo se ka re šitišago go dula re lebeletše Jehofa? Sehlogong se re tlo ithuta kamoo dilo tšeo ba bangwe ba di dirago di ka re šitišago go dula re lebeletše Jehofa. Le gona re tlo ithuta seo se ka re thušago gore re dule re lebeletše Jehofa.

MOSHE O ILE A DIRA PHOŠO E KGOLO

4. Ke ka baka la’ng go makatša gore Moshe o ile a se tsene Nageng ya Kholofetšo?

4 Moshe o be a dula a nyaka tlhahlo le thušo go Jehofa. Beibele e re “o ile a tšwela pele a tiile go etša ge eka o bona Yo a sa bonagalego.” (Bala Baheberu 11:24-27.) E bile e re botša gore “Isiraeleng ga se gwa ka gwa ba le moporofeta yo a etšago Moshe, yoo Jehofa a bego a mo tseba gabotse.” (Doit. 34:10) Le ge Moshe a be a na le tswalano e botse kudu le Jehofa, ga se a ka a tsena Nageng ya Kholofetšo. (Num. 20:12) Bothata e bile eng?

5-7. Go bile le bothata bofe kapejana ka morago ga gore Baisiraele ba tloge Egipita, gona Moshe o ile a bo rarolla bjang?

5 Pele dikgwedi tše pedi di ka fela Baisiraele ba tlogile Egipita, go ile gwa ba le bothata bjo bogolo. Se se diragetše le pele ba ka fihla Thabeng ya Sinai. Batho ba ile ba thoma go balabala ka gore ga ba na meetse. Ba ile ba thoma go ngongoregela Moshe. Boemo bo ile bja mpefala moo Moshe a ilego a llela Jehofa a re: “Ke dire’ng ka setšhaba se? Go se go ye kae se tlo nkgatla ka maswika!” (Ek. 17:4) Jehofa o ile a botša Moshe gore a dire eng. O ile a re a tšee lepara la gagwe ke moka a itie leswika la kua Horebe gomme meetse a be a tla tšwa go lona. Beibele e re: “Moshe a dira bjalo a lebeletšwe ke mahlo a banna ba bagolo ba Isiraele.” Baisiraele ba ile ba nwa meetse ba kgotsofala, gomme bothata bjoo bja rarollega.​—Ek. 17:5, 6.

6 Pego yeo ge e tšwela pele e re Moshe o ile a “reela lefelo leo leina a re ke Masa le Meriba, ka gobane bana ba Isiraele ba ile ba lwa le yena le ka gobane ba ile ba leka Jehofa ba re: ‘Na Jehofa o gona gare ga rena goba ga a gona?’” (Ek. 17:7) Maina ao a be swanela mafelo a ka gobane Masa e ra gore “Teko” gomme Meriba e ra gore “Go Lwa.”

7 Jehofa o ile a ikwa bjang ka seo se ilego sa direga kua Meriba? O ile a bona Baisiraele ba sa lwe le Moshe feela, eupša ba elwa le yena. (Bala Psalme 95:8, 9.) Baisiraele ba be ba dirile phošo e kgolo. Ka nako yeo, Moshe o ile a arabela gabotse. O ile a nyaka tlhahlo go Jehofa ke moka a e latela.

8. Go ile gwa ba le bothata bofe ge Baisiraele ba be ba le kgauswi le mollwane wa Naga ya Kholofetšo?

8 Mengwaga e 40 ka morago, ge Baisiraele ba be ba le kgauswi le go tsena Nageng ya Kholofetšo, go ile gwa ba le bothata bjo bongwe gape. Go ile gwa direga’ng? Ge Baisiraele ba be ba le lefelong leo ka morago le ilego la bitšwa Meriba, * kgauswi le mollwane wa Naga ya Kholofetšo, ba ile ba thoma go balabala gape ka meetse. (Num. 20:1-5) Eupša lekgeng le Moshe o ile a dira phošo e kgolo.

9. Jehofa o ile botša Moshe gore a dire’ng, eupša Moshe yena o ile a dira’ng? (Bona seswantšho seo se lego mathomong a sehlogo.)

9 Moshe o ile a dira’ng ge Baisiraele ba be ba ngongorega? Le mo lekgeng le o ile a kgopela tlhahlo go Jehofa. Eupša lekgeng le Jehofa ga se a re a itie leswika. O ile a botša Moshe gore a tšee lepara la gagwe, a kgoboketše setšhaba pele ga leswika ke moka a bolele le leswika leo. (Num. 20:6-8) Eupša Moshe o ile a se bolele le leswika leo. Go e na le moo, o ile a omanya setšhaba seo a re: “Bjale ekwang, marabele ke lena! Na le nyaka gore re le ntšhetše meetse leswikeng le?” Ke moka a itia leswika leo gabedi.​—Num. 20:10, 11.

10. Jehofa o ile a ikwa bjang ka seo Moshe a se dirilego?

10 Jehofa o ile a galefela Moshe kudu. (Doit. 1:37; 3:26) Ke ka baka la’ng Jehofa a ile a galefa? Go ka ba go na le mabaka a mmalwa ao a ilego a dira gore Jehofa a galefe. A ka ba ile a galefišwa ke gore Moshe o ile a se latele ditaelo tšeo a bego a mo neile tšona.

11. Ka ge Moshe a ile a itia leswika, na Baisiraele ba ka ba ba ile ba dumela gore meetse ao a ntšhitšwe ke Jehofa? Hlalosa.

11 Lebaka le lengwe e ka ba e bile le: Maswika a magolo ao a bego a le Meriba yela ya kgauswi le Rafidima a be a le thata. Le ge motho a be a ka ntšha matla a gagwe ka moka go itia maswika ao, batho ba be ba ka se letele gore meetse a tšwe moo. Eupša maswika a kua Meriba ya Kadeshe a be a se thata kudu. Ka baka leo, a be a na le meetse a mantši ka gare ga ona. Ka gona batho ba be ba ka kgona go phula maswika ao ke moka ba ge meetse go ona. Na go ka direga gore ge Moshe a be a itia leswika leo gabedi go ena le go bolela le lona, Baisiraele ba ile ba nagana gore meetse ao a ile a no itšwela eupša a sa ntšhwe ke Jehofa? * Ga re tsebe.

KAMOO MOSHE A ILEGO A NYATŠA MODIMO

12. Ke lebaka lefe le lengwe leo le ka bago le ile la dira gore Jehofa a galefele Moshe le Arone?

12 Go na le lebaka le lengwe leo le ka bago le ile la dira gore Jehofa a galefele Moshe le Arone. Ela hloko seo Moshe a ilego a se botša setšhaba seo. O itše: “Na le nyaka gore re le ntšhetše meetse leswikeng le?” Ge Moshe a be a re “re,” mohlomongwe o be a bolela ka yena le Arone. Mantšu ao a ile a dira gore batho ba se rete Jehofa ka mohlolo woo. Go ka direga gore taba ye ke nnete ka ge Psalme 106:32, 33 e re: “Ba ile ba baka kgalefo meetseng a Meriba, moo dilo di ilego tša sepelela Moshe gampe ka baka la bona. Gobane ba ile ba galefiša moya wa gagwe gomme a šaetša ka molomo wa gagwe.” * (Num. 27:14) Moshe ga se a ka a dira gore Jehofa a retwe. Ka gona Jehofa o ile a botša Moshe le Arone a re: “Le ile la rabela taelong ya ka.” (Num. 20:24) Ruri ba be ba dirile sebe se segolo kudu!

13. Ke ka baka la’ng re ka re Jehofa o ile a bontšha toka ge a be a ahlola Moshe?

13 Ka ge Moshe le Arone ba be etelela batho ba Jehofa pele, ba be ba na le boikarabelo bjo bogolo kudu. (Luka 12:48) Nakong e fetilego, Jehofa o ile a se dumelele Baisiraele ka moka ba mengwaga e itšego gore ba se tsene Nageng ya kholofetšo, ka ge ba ile ba se mo kwe. (Num. 14:26-30, 34) Ka gona, Jehofa o ile bontšha toka ka go otla Moshe go swana le Baisiraele bao. O ile a se dumelele Moshe go tsena Nageng ya Kholofetšo, go no swana le Baisiraele ba bangwe bao ba ilego ba se mo kwe.

SEO SE ILEGO SA DIRA GORE MOSHE A TSENE BOTHATENG

14, 15. Ke’ng seo se ilego sa dira gore Moshe a se kwe Modimo?

14 Ke’ng seo se ilego sa dira gore Moshe a se kwe Jehofa? Ela hloko gape seo Psalme 106:32, 33 e se bolelago. E re: “Ba ile ba baka kgalefo meetseng a Meriba, moo dilo di ilego tša sepelela Moshe gampe ka baka la bona. Gobane ba ile ba galefiša moya wa gagwe gomme a šaetša ka molomo wa gagwe.” Le ge Baisiraele ba ile ba se kwe Jehofa, go ile gwa galefa Moshe go e na le gore go galefe Jehofa. Moshe o ile a palelwa ke go itshwara ke moka a bolela ntle le go nagana.

15 Moshe o ile a dumelela batho ba mo šitiša go dula a lebeletše Jehofa. Mathomong o ile a kwa Jehofa. (Ek. 7:6) Eupša go ka direga gore ka ge a be a šetše a feditše mengwaga e mentši a bona Baisiraele ba sa kwe Modimo, o be a šetše a lapile. Na Moshe o be a tshwenyegile kudu ka maikwelo a gagwe go ena le go tshwenyega ka gore batho ba rete Jehofa?

16. Ke ka baka la’ng re swanetše go ithuta go Moshe?

16 Ge e ba moporofeta wa go botega wa go swana le Moshe a ile a šitišega gomme a dira sebe, gona le rena seo se ka re diragalela. Go swana le Moshe, le rena re kgauswi le go tsena lefaseng le lefsa leo Jehofa a re tshepišitšego lona. (2 Pet. 3:13) Ka moka ga rena re nyaka go tsena lefaseng le lefsa. Eupša gore re fihle, re swanetše go dula re lebeletše Jehofa, re mo kwe ka dinako tšohle. (1 Joh. 2:17) Re ithuta’ng phošong ya Moshe?

O SE KE WA DUMELELA BATHO BA GO ŠITIŠA

17. Re ka thušwa ke’ng gore re kgone go itshwara ge re galefile?

17 Ithute go itshwara ge o galefile. Ka dinako tše dingwe re ka lebeletšana le bothata bjo bo swanago gantšintši. Lega go le bjalo Beibele e re eletša gore “re se ke ra lapa go dira botse, gobane re tla buna ka nako e swanetšego ge e ba re sa lape.” (Bagal. 6:9; 2 Bathes. 3:13) Ge e ba selo se itšego goba motho yo mongwe a re galefiša gantšintši, na re nagana pele re bolela goba na re kgona go itshwara? (Die. 10:19; 17:27; Mat. 5:22) Ge ba bangwe ba re kgopiša, re swanetše go ithuta go ‘šuthelela kgalefo’ ya Jehofa goba re mo dumelele gore a bontšhe kgalefo ya gagwe. (Bala Baroma 12:17-21.) Seo se ra go re’ng? Se ra gore go ena le gore re galefe, re swanetše go letela Jehofa ka go se fele pelo gore e be yena a rarollago mathata a rena ge e ba a bona go hlokagala. Ge re ka se letele Jehofa gomme ra itefeletša, re tla be re bontšha gore re a mo nyatša.

18. Re swanetše go dula re gopola’ng ge go tliwa tabeng ya go latela tlhahlo?

18 Itlwaetše go latela tlhahlo e mpsha. Na re dula re latela tlhahlo e mpsha yeo e tšwago go Jehofa? Ge e ba re dira bjalo, gona re ka se dire dilo ka tsela ya kgale mola re na le tlhahlo e mpsha. Ga se ra swanela go dikadika go latela tlhahlo e mpsha yeo Jehofa a re neago yona a diriša mokgatlo wa gagwe. (Baheb. 13:17) Eupša re swanetše go ba šedi gore re se ke ra “fetela ka kua ga dilo tše di ngwadilwego.” (1 Bakor. 4:6) Ge re ekwa Jehofa, re bontšha gore re dula re mo lebeletše.

Re ithuta’ng tseleng yeo Moshe a ilego a arabela ka yona ge ba bangwe ba be ba dira diphošo? (Bona serapa 19)

19. Re ka dira’ng gore re se ke ra dumelela diphošo tša ba bangwe di senya tswalano ya rena le Jehofa?

19 O se ke wa dumelela diphošo tša ba bangwe di senya tswalano ya gago le Jehofa. Ge e ba mahlo a rena a dula a lebeletše Jehofa, gona re ka se dumelele diphošo tša batho ba bangwe di senya tswalano ya rena le Jehofa. Taba ye e bohlokwa, kudukudu ge e ba re na le maikarabelo a itšego ka mokgatlong wa Modimo go swana le Moshe. Ke nnete gore yo mongwe le yo mongwe wa rena o swanetše go šoma ka thata gore a kwe Jehofa e le gore a tle a phološwe. (Bafil. 2:12) Eupša gopola gore ge re na le maikarabelo a magolo, go tlo nyakwa mo gontši go rena. (Luka 12:48) Ge e ba re tloga re rata Jehofa, ga go na selo seo se ka re šitišago goba sa re aroganya le lerato la gagwe.​—Ps. 119:165; Baroma 8:37-39.

20. Re swanetše go lwela go dira’ng?

20 Ka ge bophelo bo le boima e bile re welwa ke mathata a mantši mehleng ye, eka ka moka ga rena re ka dula re lebeletše Jehofa “yo a dulago magodimong,” gore re tsebe seo a nyakago re se dira. Anke le ka mohla re se dumelele dilo tšeo ba bangwe ba di dirago di senya tswalano ya rena le Jehofa. Seo se diragaletšego Moshe se re rutile taba ye gabotse. Go e na le go hlwa re galefišitšwe ke mafokodi a ba bangwe, re swanetše go lwela gore “mahlo a rena a [lebelele] Jehofa Modimo wa rena go fihlela a re gaugela.”​—Ps. 123:1, 2.

^ par. 8 Meriba ye ga se Meriba yeo e bego e le kgauswi le Rafidima, yeo e bile e bego e bitšwa Masa. Eupša mafelo a ka moka a ile a bitšwa Meriba ka gobane Baisiraele ba ile ba ngongorega ba le moo.—Bona mmepe go Karolo 7 ka go Tlhahlo ya go Ithuta Lentšu la Modimo.

^ par. 11 Seithuti se sengwe sa Beibele se re go ya ka seo Bajuda ba bego ba se dumela, Baisiraele bao ba bego ba ganetšana le Moshe ba ile ba gana gore meetse ao a tšwele ka mohlolo leswikeng leo ka gobane Moshe o be a tseba gore leswika leo le na le meetse. Ka gona ba ile ba nyaka gore a bušeletše mohlolo woo ka go itia leswika le lengwe. Eupša se e no ba se sengwe sa dilo tšeo Bajuda ba bego ba di dumela.

^ par. 12 Bala Morokami wa October 15, 1987, sehlogong se se rego, “Dipotšišo tše Tšwago go Babadi.”