1, 2. Panon tayon naseguro ya lanang tayon akanengneng ed si Jehova?

MANBIBILAY tayo ed “mapeligro tan mair-irap a panaon,” tan mas lalon oniirap so bilay antis ya onsabi so balon agew tan nipawil so tuan kareenan ed dalin. (2 Tim. 3:1) Kanian maabig no itepet tayod sarili tayo, ‘Siopay kekerewan ko na tulong tan panangigiya?’ Seguradon say ebat tayon tampol et “Si Jehova,” tan atan so sankaabigan ya ebat.

² Antoy labay ya ibaga na inengneng ed si Jehova? Tan panon tayon naseguro ya lanang tayon akanengneng ed sikato legan tayon aarapen iray mairap ya subok ed bilay? Nilasus taon lay apalabas, binidbir na salmista ya kaukolan tayoy ‘ontangay’ ed si Jehova parad tulong diad panaon na pankaukolan tayo. (Basaen so Salmo 123:1-4.) Say inengneng tayo ed si Jehova et inkompara tod paraan na inenengneng na aripen ed katawan to. Antoy labay ya ibaga na salmista? Siempre, aglabat onnenengneng so aripen ed katawan to pian naikdan na naakan tan naproteksionan noagta sikatoy lanang ya akabantay pian naamtaan to no anto ray ipagawa na katawan to, insan tampol ton gawaen iratan. Mipadpara, kaukolan ya inagew-agew tayon aralen so Salita na Dios pian naamtaan tayo no  antoy linawa nen Jehova ed kada sakey ed sikatayo, insan tayo tumboken so panangigiya to. Diad satan tayo labat naseguro so tulong nen Jehova diad panaon na pankaukolan tayo.​—Efe. 5:17.

3. Antoy nayarin rason ya agtayo makapampokus diad inenengneng tayo ed si Jehova?

³ Anggano amta tayo ya importante so tuloytuloy ya inengneng ed si Jehova, no maminsan et nayarin nabalang so pokus tayo. Ontan so agawad si Marta ya maapit a kaaro nen Jesus. Sikatoy nagmaliw ya ‘okupado ed pangaasikaso tod dakel a kimey to.’ (Luc. 10:40-42) No agawa itan ed sakey ya matoor a lingkor anggano kaiba to lay Jesus, agtayo sirin nepeg a pankelawan ya nayarin nagawa met itan ed sikatayo. Anto sirin so rason ya nayarin agtayo makapampokus diad inenengneng tayo ed si Jehova? Diad sayan artikulo, aralen tayo no panon ya nayarin nabalang so pokus tayo lapud gagawaen na arum. Aralen tayo met no panon tayon mansiansian akapokus ed si Jehova.

4. Akin et nayarin makapabigla ya abalang nen Moises so pribilehyo ton makaloob ed Insipan a Dalin?

⁴ Seguradon lanang ya onkekerew na panangigiya si Moises ed si Jehova. Diad tua, sikatoy “nansiansian mabiskeg ed pananisia a singa sankanengneng to imay Sakey ya agnanengneng.” (Basaen so Hebreo 11:24-27.) Ibabaga na Biblia ya “anggapo lan balot so tinmalindeg a propeta ed Israel a miparad si Moises, a kabkabat a maong nen Jehova.” (Deu. 34:10) Balet anggano ontan la kaapit so relasyon nen Moises ed si Jehova, siansia nin abalang to so pribilehyon makaloob ed Insipan a Dalin. (Num. 20:12) Akin et ontan so agawad sikato?

5-7. Antoy linmesan problema ag-abayag kayari intaynan na saray Israelita ed Ehipto, tan panon ya inarap itan nen Moises?

⁵ Ngalngali duay bulan kayari na intaynan na saray Israelita ed Ehipto, wala lay linmesan seryoson problema antis ni ran makasabi ed Palandey Sinai. Ginmapon nanreklamo iray totoo lapud anggapoy danum ya nainum da. Nanmeremere ra sumpad si Moises tan linmoor so situasyon kanian kinmerew na tulong si Moises ed si Jehova, tan inkuan to: “Antoy gawaen kod sarayan totoo? Ta ngalngali da ak la tupaken!” (Exo. 17:4) Inikdan nen Jehova si Moises na saray instruksion no antoy gawaen to. Awiten toy baston to tan ibasig to itan ed bato diad Horeb, insan ompaway so danum ditan. Nabasa tayo: “Ontan so ginawa nen Moises ed pakanengneng na saray mamatatken na Israel.” Inminum iray Israelita tan apenepenek ira, kanian aresolbe so problema.​—Exo. 17:5, 6.

⁶ Nabasa tayod pinuyanan a salaysay ya nginaranan nen Moises ya “Massa tan Meriba iman a pasen lapud impikolkol na saray Israelita tan lapud sinubok da si Jehova diad impangibaga ran: ‘Kasin walad sikatayo si Jehova odino andi?’” (Exo. 17:7) Dugaruga iratan ya ngaran ta say labay ya ibaga na saratan et “Subok” tan “Pankokolkol.”

⁷ Antoy alikna nen Jehova ed samay agawa ed Meriba? Say ginawa na saray Israelita et impasen ton panusubok ed inka-Dios to, aliwa labat lan panagrebelde ed si Moises. (Basaen so Salmo 95:8, 9.) Talagan alingo iray Israelita. Diad saman et duga so ginawa nen Moises ya ninmengneng ed si Jehova parad panangigiya tan tinumbok ton maong itan.

8. Antoy linmesan problema diad bandad sampot na 40 taon ya impanbiahe na saray Israelita ed kalawakan?

⁸ Anto balet so agawa nen linmesa so  parehon problema kayari na 40 taon, diad bandad sampot na pambiabiahe dad kalawakan? Saray Israelita et akasabi ed sakey ya pasen a tinawag met ya Meriba. Balet duma la iyan pasen, asingger iya ed Kades diad bandad ketegan na Insipan a Dalin. * Nanreklamo lamet iray Israelita ta anggapoy danum. (Num. 20:1-5) Balet diad sayan pankanawnawa, duma so impangarap nen Moises ed sayan problema.

9. Anto ran instruksion so inter ed si Moises, balet antoy ginawa to? (Nengnengen so litratod gapo na artikulo.)

⁹ Antoy reaksion nen Moises ed sayan impanrebelde? Sikatoy ninmengneng lamet ed si Jehova parad panangigiya. Balet diad sayan pankanawnawa et ag-imbaga nen Jehova ya pekpeken to so bato. Sikatoy ingganggan nen Jehova ya alaen so baston to, tiponen to ray totoo diad arap na baleg a bato, insan mansalita ed satan. (Num. 20:6-8) Balet, agnansalita si Moises ed saman ya baleg a bato. Imbes, sikatoy sinmanok tan imbaga tod saray nantitipon: “Dengel kayo natan, sikayo ran rebelde! Labay yon mamapaway kami na danum ed sayan baleg a bato parad sikayo?” Insan to pinekpek so baleg a bato ya aliwan aminsan labat noagta amidua.​—Num. 20:10, 11.

10. Antoy reaksion nen Jehova ed ginawa nen Moises?

¹⁰ Sinmanok a maong si Jehova ed si Moises. (Deu. 1:37; 3:26) Akin ya ontan so reaksion nen Jehova? Nayarin wala ray pigaran rason. Singa abitla niman, sinmanok si Jehova lapud agtinumbok nen Moises iray balon instruksion ya inter ed sikato.

11. Lapud pinekpek nen Moises so bato, panon ya nayarin inisip laingen na saray Israelita ya agnanggawa na milagro si Jehova?

¹¹ Walay sakey nin posibilidad. Saray angkabaleg a bato diad kawalaan na unonan Meriba et anawet ya granite. Anggano panon kakasil so pamekpek ed satan, anggapoy danum ya ompaway ditan. Balet, saray klase na angkabaleg a bato ed samay komaduan Meriba et duman maong, maslak et anlemek ya limestone. Lapud wala ray abot-abot na satan, mabetbet et walaan itan na subol na danum a nayarin pangalaan na danum. Kanian nen pinekpek nen Moises so bato imbes ya mansalita ed satan, posible kasin inisip na saray Israelita ya natural labat so impaway na danum tan aliwan lapud nanggawa na milagro si Jehova? * Agtayo segurado ed satan.

12. Anto ni sakey a posiblin rason no akin ya sinmanok si Jehova ed si Moises tan Aaron?

¹² Wala ni sakey ya posiblin rason no akin ya sinmanok si Jehova ed si Moises pati ed si Aaron. Imanoen so imbaga nen Moises ed saray totoo: “Labay yon mamapaway kami na danum ed sayan baleg a bato parad sikayo?” Diad impangusar nen Moises ed salitan “kami,” nayarin say tutukoyen to et balanglan sikato tan si Aaron. Napatnagan ed saman ya imbaga nen Moises ya talagan agto nirespeto si Jehova bilang say tuan Lapuan na saman a milagro. Sayan posibilidad et nayarin pruebaan na samay nabasad Salmo 106:32, 33: “[Say Dios et] pinasanok da diad saray danum na Meriba, tan aliwliway agawad si Moises lapud sikara. Sikatoy apasyodot da, kanian  akapansalita laingen a bengatbengat.” * (Num. 27:14) Antokaman so agawa, lapud ginawa nen Moises et agniiter so galang ya manepeg ed si Jehova. Oniay imbaga nen Jehova ed si Moises tan Aaron: “Nanrebelde kayon dua ed ganggan ko.” (Num. 20:24) Talagan seryoson kasalanan itan!

13. Akin ya duga tan makatunongan labat so impangukom nen Jehova ed si Moises?

¹³ Bilang manangidaulo ed totoo nen Jehova, mas ambelat so responsabilidad nen Moises tan Aaron. (Luc. 12:48) Diad apalabas, ag-inabuloyan nen Jehova so sakey a henerasyon na saray Israelita ya onloob ed dalin na Canaan lapud impanrebelde da. (Num. 14:26-30, 34) Kanian parehon duga tan makatunongan labat ya ontan met so impangukom nen Jehova ed si Moises lapud impanrebelde to. Singa saray arum ya rebelde, sikatoy agnaabuloyan ya makaloob ed Insipan a Dalin.

14, 15. Antoy sengegan na impanrebelde nen Moises?

¹⁴ Antoy sengegan na impanrebelde nen Moises? Imanoen pa lamet so Salmo 106:32, 33: “[Say Dios et] pinasanok da diad saray danum na Meriba, tan aliwliway agawad si Moises lapud sikara. Sikatoy apasyodot da, kanian akapansalita laingen a bengatbengat.” Anggano si Jehova so pinasanok na saray Israelita, si Moises balet so sinmyodot. Lapud agto kinontrol so sarili to, sikatoy nansalita ya agto ninonot no anto ray pansumpalan na satan.

¹⁵ Inabuloyan nen Moises ya lapud kiwas na arum et nabalang toy tuloytuloy ya inenengneng tod si Jehova. Nen unaan et duga so impangarap nen Moises ed problema. (Exo. 7:6) Balet posiblin kayari na dakel a taon ya impangidaulo tod saray rebelden Israelita, sikatoy kinmesaw tan asyodotan lad sikara. Kasin say manunan ninonot nen Moises et say liknaan to imbes ya no panon ton nigloria si Jehova?

16. Akin ya nepeg tayon pannonotan iray ginawa nen Moises?

¹⁶ No say matoor ya propeta a singa si Moises et abalang so pokus to tan alingo, nayarin mainomay met itan a nagawa ed sikatayo. Singa si Moises, asingger tayo lan onloob ed balon mundo ya impromisa nen Jehova ed sikatayo. (2 Ped. 3:13) Labay tayon amin ya naawat itan ya espisyal a pribilehyo. Balet pian makaloob itayo, kaukolan ya tuloytuloy tayon onnengneng ed si Jehova, ya lanang tayon gawaen so panlabayan to. (1 Juan 2:17) Anto ray naaralan tayod lingo nen Moises?

17. Antoy makatulong ed sikatayo pian ag-itayo nadaeg na pansyodot?

¹⁷ Agpadadaeg ed pansyodot. Anggano paulit-ulit tayon aarapen iray parehon problema, “ag-itayo ontutundan manggawa na maabig, ta diad manepeg a panaon et manani itayo no ag-itayo onkesaw.” (Gal. 6:9; 2 Tes. 3:13) No nipaarap tayod makapasyodot iran situasyon odino paulit-ulit ya agpantatalosan, kasin iisipen tayo nin unona no antoy ibaga tayo antis tayon mansalita tan kontrolen tayoy sanok tayo? (Pro. 10:19; 17:27; Mat. 5:22) No makakapasnok tayo la lapud ginawa na arum, kaukolan tayon aralen ya ‘ikdan na pasen so sanok.’ Anto itan a sanok? Say sanok nen Jehova. (Basaen so Roma 12:17-21.) No lanang tayon onnenengneng ed si Jehova, niiter tayod sikato so kanepegan a respeto diad pangiyabuloy ed sikaton ipatnag so sanok to. Maanos tayon alagaren so ikiwas to no parad sikato et kaukolan. Balet no ombawi tayo, ipapanengneng tayon anggapoy respeto tayo ed si Jehova.

18. Antoy kaukolan tayon tandaan no nipaakar ed panumbok ed saray instruksion?

 ¹⁸ Maalwar a tumboken iray sankabaloan ya instruksion. Kasin matoor tayon tutumboken iray sankabaloan ya instruksion ya iiter nen Jehova? No on, agtayo basta gagawaen iray bengatla diad paraan ya apasalan tayo la. Imbes, tampol tayon tumboken so antokaman ya balon instruksion manlapud si Jehova ya itatarya to panamegley na organisasyon to. (Heb. 13:17) Ontan met, kaukolan ya manalwar tayo pian ‘agtayo onlampas ed saray bengatlan nisulat.’ (1 Cor. 4:6) Diad ontan et akapokus so imano tayo ed si Jehova.

19. Antoy gawaen tayo pian agtayo naabuloyan so lingo na arum a maneral ed relasyon tayod si Jehova?

¹⁹ Agtayo aabuloyan so lingo na arum ya maneral ed relasyon tayod si Jehova. No tuloytuloy tayon onnenengneng ed si Jehova, agtayo abuloyan ya lapud gagawaen na arum et onsanok tayo odino naderal so relasyon tayod sikato. Nagkalalon importante iya, no singa si Moises et naikdan tayo na ambelat a responsabilidad ed organisasyon na Dios. Tua, kaukolan ya kada sakey ed sikatayo et ‘itultuloy ton pansagpotan so pakaliktar to tekep na takot tan giwgiw,’ balet nepeg tayon tandaan ya saray estandarte nen Jehova a pangibabasian to na pangukom tod sikatayo et aliwan is-istrikto odino agmakatunongan. (Fil. 2:12) Imbes, no diman mas ambelat so responsabilidad tayo, baleg met so eebatan tayo. (Luc. 12:48) Balet no talagan inaro tayoy Jehova, anggapoy makagapol odino makapangisian ed sikatayo ed panangaro to.​—Sal. 119:165; Roma 8:37-39.

20. Anto so nepeg ya determinasyon tayo?

²⁰ Diad sayan mair-irap a panaon, komon ta tuloytuloy tayon ontangay odino onnengneng ed samay Sakey ya “nitrono ed katawenan,” pian natebek tayoy linawa to. Agtayon balot komon aabuloyan ya naderal so relasyon tayod si Jehova lapud gagawaen na arum. Say alimbawa nen Moises so mangidanet ed kaimportantian na saya ed isip tan puso tayo. Imbes ya masyadon manpaapekto ed kakapuyan na arum ya nakakalimog tayo, komon ta determinado tayon ‘onnengneng ed si Jehova a Dios tayo, anggad kasian to tayo.’​—Sal. 123:1, 2.