1-2. Waut bediet daut, Jehova em Uag to hoolen?

WIE läwen en “jreslich schwoare Tieden” un daut woat noch schwanda woaren, ea Jehova dise schlajchte Welt venichten woat un oppe Ieed werkjlich Fräd brinjen woat (2. Tim. 3:1). Doawäajen wudd daut goot sennen, doaräwa notodenkjen: “Wua kjikj ekj han, wan mie Help un Rot fält?” Veleicht saj wie fuaz: “No Jehova”, un soo saul daut uk sennen.

² Waut bediet daut, no Jehova to kjikjen? Un woo kjenn wie secha moaken, daut wie am em Uag hoolen, wan wie Schwierichkjeiten derchgonen? Lang trigj läd een Psalmenschriewa ut, daut wie no Jehova kjikjen motten, wan ons Help fält (läs Psalm 123:1-4). Hee säd, wie sullen krakjt soo no Jehova kjikjen, aus een Kjnajcht no sienen Harn kjikjt. Waut meend dee doamet? Een Kjnajcht kjikjt no sienen Harn, daut dee am to äten jeft un beschizt. Oba hee mott uk emma wada no sienen Harn kjikjen toom seenen, waut dee von am velangt, un daut dan uk doonen. Biejlikj soo es daut needich, daut wie jieda Dach en Gott sien Wuat forschen, om to seenen, waut Jehova von ons velangt, un daut uk doonen. Bloos  dan kjenn wie ons secha sennen, daut Jehova ons halpen woat, wan ons daut fält (Efs. 5:17).

3. Waut kaun ons doavon auflenkjen, Jehova em Uag to hoolen?

³ Wie weeten, daut wie Jehova emma em Uag hoolen sellen, oba doawäajen kjenn wie ons eenjemol auflenkjen loten. Krakjt daut passieed Marta, waut eent von Jesus siene Frind wia. See “leet sikj von aul daut hannämen [ooda auflenkjen], waut doa reedtomoaken wia” (Luk. 10:40-42). Wan soon trua Mensch aus Marta sikj auflenkjen leet, soogoa aus Jesus doa wia, kunn ons daut uk leicht passieren. Waut kaun ons bat doa brinjen, daut wie Jehova nich mea em Uag hoolen? En disen Artikjel woa wie seenen, woo daut, waut aundre doonen, ons auflenkjen kaun. Un wie woaren uk seenen, woo wie daut väabieejen kjennen.

4. Wuarom kunn ons daut wundren, daut Moses nich en daut vesproakne Launt nengonen kunn?

⁴ Moses wull werkjlich haben, daut Jehova am fieren un leiden sull. “Hee hilt sikj aun dän, dän hee nich sach, soo aus wan hee am sach” (läs Hebräa 11:24-27). De Schreft sajcht: “Doa es no Moses, nich noch een Profeet en Israel oppjekomen, dee soo aus Moses wia. De HAR räd met am aus unja vea Uagen” (5. Mo. 34:10). Wan Moses uk soon groota Frint met Jehova wia, vespäld hee doch waut besondret – hee kunn nich en daut vesproakne Launt nengonen (4. Mo. 20:12). Woo kjeem daut bat doa?

5-7. (a) Waut fa een Trubbel kjeem opp, aus de Israeliten noch nich lang von Ägipten wajch wieren? (b) Waut deed Moses met dän Trubbel?

⁵ Nich mol twee Moonat lota aus de Israeliten Ägipten veloten hauden un noch ea dee batem Sinai-Boajch wieren, kjeem een groota Trubbel opp. De Menschen grunzten, wäajen see nich Wota hauden. Dee fungen aun jäajen Moses to räden un daut wort soo oajch, daut Moses to Jehova säd: “Waut doo ekj met dit Volkj? Wan daut soo wieda jeit, dan woaren see mie noch steenjen” (2. Mo. 17:4). Jehova säd to Moses krakjt, waut hee doonen sull. Hee sull sienen Stock nämen un bie Horeb jäajen eenen Steen schlonen. Dan wudd doa een deel Wota rutschälen. De Schreft sajcht: “Moses deed daut, soo daut aul de israelitische Leidasch daut sagen.” De Israeliten hauden äwajenuach to drinkjen un de Trubbel wia jeleest (2. Mo. 17:5-6).

⁶ De Schreft sajcht, daut Moses de Städ Massa nand, waut “aufproowen” bediet, un uk Meriba, waut “grunzen” bediet, “wiels de Israeliten doa grumsaujden un däm HARN aufproowden. See säden: Es de HAR bie ons ooda nich?” (2. Mo. 17:7).

⁷ Woo docht Jehova äwa daut, waut doa bie Meriba aunjinkj? Hee tald daut soo, daut de Israeliten sikj jäajen am aus hechsten Harscha jestalt hauden un nich bloos jäajen Moses (läs Psalm 95:8-9). Waut de Israeliten deeden, wia sea orrajcht. Oba Moses deed daut rajchte. Hee veleet sikj opp Jehova un deed krakjt daut, waut hee am säd.

8. Waut von Trubbel kjeem opp, aus de Israeliten äare Reis derche Wiltnis meist to Enj wia?

⁸ Oba waut passieed ojjefäa 40 Joa lota, aus wada ernoa soon Trubbel oppkjeem? De Israeliten äare Reis derche Wiltnis wia meist to Enj. Dee kjeemen no eene Städ dicht bie Kadesch, waut nich wiet auf von daut vesproakne  Launt wia. Dise Städ wort lota uk Meriba jenant. * Doa bekloagden de Israeliten sikj wada, daut see nich Wota hauden (4. Mo. 20:1-5). Oba ditmol deed Moses nich daut rajchte.

9. Waut sull Moses doonen, oba waut deed hee? (See daut Bilt aum Aunfank.)

⁹ Waut deed Moses, aus daut Volkj jäajenaun wia? Hee socht wada bie Jehova Help. Oba ditmol säd Jehova nich, daut hee dän Steen schlonen sull. Hee säd to Moses, hee sull sienen Stock nämen un daut Volkj bie dän Steen vesaumlen un to dän Steen räden (4. Mo. 20:6-8). Oba Moses räd nich to dän Steen. Hee wia soo doll, daut hee to daut Volkj säd: “Nu horcht, jie Ojjehuarsome! Sell wie junt ut disen Steen Wota veschaufen?” Dan schluach hee dän Steen nich bloos eemol, oba tweemol (4. Mo. 20:10-11, NW).

10. Woo feeld Jehova sikj äwa daut, waut Moses deed?

¹⁰ Jehova wort sea doll äwa Moses (5. Mo. 1:37; 3:26). Wuarom? Daut kunn wäajen miere Sachen jewast sennen. Veleicht wia daut, wäajen Moses de niee Aunwiesungen nich nokjeem, waut Jehova am jejäft haud.

11. Wuarom hauden de Israeliten kunt denkjen, daut daut nich een Wunda von Jehova wia, aus Moses dän Steen schluach?

¹¹ Jehova kunn uk noch eene aundre Uasoak jehaut haben, doll to sennen. De Steena dicht bie daut ieeschte Meriba sent hoade Graniet-Steena. Endoont woo sea eena doa wudd noppschlonen, doa wudd kjeena opp räakjnen, daut doa wudd Wota rutkomen. Oba de Steena bie daut tweede Meriba sent gaunz aundasch. De mieeschte von dee sent Kaulkjsteena. Wäajen dee wieekja sent, trakjt doa foaken Wota nenn un blift doabennen. Un wan eena doa een Loch nenmoakt, dan kaun eena doa Wota rutkjrieen. Dochten de Israeliten opplatst, daut daut Wota doa von veselfst rutkjeem un nich derch een Wunda, aus Moses dän Steen schluach enne Städ daut hee to dän räd? * Wäa weet.

12. Waut kunn noch eene Uasoak sennen, wuarom Jehova äwa Moses un Aaron doll wort?

¹² Daut jeft woomäajlich noch eene Uasoak, wuarom Jehova doll wort äwa Moses un Aaron. Moses haud je to daut Volkj jesajcht: “Sell wie junt ut disen Steen Wota veschaufen?” Doamet wull Moses woomäajlich sajen, daut hee un Aaron daut Wota veschaufen wudden. Doaderch wees hee nich Respakjt fa Jehova, von dän daut Wunda kjeem. Daut paust met daut toop, waut Psalm 106:32-33 sajcht: “See vezoajden am uk bie daut Wota von Meriba, un Moses kjeem äat haulwen en Trubbel, wiels see muaken een Opprua jäajen sienen Jeist, un Moses jlepten kjrasche Wieed äwa de Leppen” (4. Mo. 27:14). * Moses jeef Jehova nich de Iea, waut hee vedeent  haud. Jehova säd to Moses un Aaron: “Jie [haben] miene Wieed nich jehorcht” (4. Mo. 20:24). Daut wia eene groote Sind.

13. Wuarom wia de Strof jerajcht, waut Jehova Moses jeef?

¹³ Jehova velangd besonda väl von Moses un Aaron, wäajen dee de Leidasch von sien Volkj wieren (Luk. 12:48). Un hee haud je ea aul een deel Israeliten nich loten en daut Launt Kanaan nengonen, wiels dee sikj jäajen am stalden (4. Mo. 14:26-30, 34). Doawäajen wia daut jerajcht, daut Jehova Moses deeselwje Strof jeef, aus hee jäajenaun wia. Krakjt soo aus de aundre Ieejenkopje nich en daut vesproakne Launt nenkunnen, kunn hee uk nich.

14-15. Woo kjeem daut, daut Moses jäajenaun wia?

¹⁴ Woo kjeem daut, daut Moses jäajenaun wia? Well wie noch eemol seenen, waut Psalm 106:32-33 sajcht: “See vezoajden am uk bie daut Wota von Meriba, un Moses kjeem äat haulwen en Trubbel, wiels see muaken een Opprua jäajen sienen Jeist, un Moses jlepten kjrasche Wieed äwa de Leppen.” De Israeliten vezoajden, ooda veoajaden Jehova, oba Moses sien Jeist wort oppjeräacht. Hee wort doll un wäajen hee sikj nich beoabeid, räd hee, onen äwa de Foljen to denkjen.

¹⁵ Moses leet sikj auflenkjen von daut, waut aundre deeden, un hilt nich mea Jehova em Uag. Aus daut Volkj toom ieeschte Mol wäajen daut Wota grunzt, deed Moses daut rajchte (2. Mo. 7:6). Oba nodäm daut Moses sikj joarenlank met de ieejenkopje Israeliten jebaudat haud, wia hee woomäajlich koppmeed. Veleicht docht hee bloos noch doaraun, woo hee sikj feeld un nich doaraun, woo hee Jehova ieren kunn.

16. Wuarom sull wie äwa Moses sienen Fäla nodenkjen?

¹⁶ Wan soon trua Profeet aus Moses sikj auflenkjen leet un tofaul kjeem, dan kunn ons daut krakjt soo goot passieren. Moses wia meist bat doa, en daut vesproakne Launt nentogonen un wie sent meist bat de niee Welt, waut Jehova vesproaken haft (2. Pet. 3:13). Secha well wie ons dit scheene nich derchgonen loten. Oba daut wie en de niee Welt nenkomen, mott wie Jehova em Uag hoolen un emma sienen Wellen doonen (1. Joh. 2:17). Waut lia wie von Moses sienen Fäla?

17. Waut woat ons halpen, daut wie ons nich loten enoajren?

¹⁷ Ons nich loten enoajren. Mau rajcht wan emma wada deeselwja Trubbel oppkjemt, “well wie nich meed woaren goodet to doonen, wiels wan wie nich mootloos woaren, woa wie arnten, wan daut ieescht Tiet doatoo es” (Gal. 6:9; 2. Tess. 3:13). Wan irjentwaut ooda irjentwäa ons emma wada baudat, beharsch wie ons dan un denkj wie no, ea wie waut sajen? (Spr. 10:19; 17:27; Mat. 5:22). Wan aundre ons stieren, dan sell wie lieren, “Gott sienen Oaja Rum [to jäwen]” (läs Reema 12:17-21). Waut bediet daut? Enne Städ doll to woaren, wudd wie sellen jeduldich wachten, bat Jehova doa waut met deit, wan daut fält. Wan wie ons wudden aufrajchnen enne Städ ons opp Jehova to veloten, dan wudd wie am nich Respakjt wiesen.

18. Aun waut mott wie denkjen, wan daut doarom jeit Aunwiesungen notokomen?

 ¹⁸ Ons gaunz aun de nieste Aunwiesungen hoolen. Kom wie de nieste Aunwiesungen tru no, waut Jehova ons jeft? Wan wie daut doonen, dan woa wie nich bloos aules krakjt soo wiedamoaken, aus wie daut bat nu jewant wieren. Enne Städ daut woa wie fuaz reed sennen, de niee Aunwiesungen von Jehova siene Organisazion notokomen (Heb. 13:17). Un wie woaren uk oppaussen, daut wie nich “wieda gonen . . . aus jeschräwen steit” (1. Kor. 4:6). Wan wie daut doonen, dan hool wie Jehova em Uag.

19. Waut kjenn wie doonen, daut aundre äare Fäla ons nich von Jehova wajchbrinjen?

¹⁹ Lot nich, daut aundre äare Fäla die von Jehova wajchbrinjen. Wan wie Jehova em Uag hoolen, dan woa wie daut nich tooloten, daut daut, waut aundre doonen, ons vebettat ooda von Jehova wajchbrinjt. Daut es besonda needich, wan wie en Gott sien Volkj eene Veauntwuatunk haben, soo aus Moses. Wie aula motten “met ferchten un zetren [schaufen], daut . . . [wie] seelich woaren”, oba Jehova velangt nich von aulem dautselwje (Filip. 2:12). Je mea Veauntwuatunk wie haben, je mea velangt Jehova von ons (Luk. 12:48). Oba wan wie Jehova opp iernst leewen, dan woat ons nuscht tofaul brinjen ooda ons von siene Leew scheeden (Psa. 119:165; Reem. 8:37-39).

20. To waut sell wie ons eenich sennen?

²⁰ Well wie en dise schwoare Tieden emma no dän kjikjen, waut sienen “Troon em Himmel [haft]”, soo daut wie enwoaren, waut hee von ons haben well. Lot wie kjeenmol too, daut daut, waut aundre doonen, ons von Jehova wajchbrinjt. Moses siene Jeschicht lieet ons, woo wichtich daut es, daut wie doafäa oppaussen. Enne Städ daut wie ons too sea äwa aundre äare Fäla oppräajen, well wie ons leewa eenich sennen, daut “onse Uagen no dän HARN onsen Gott [kjikjen], bat hee ons woat Jnod seenen loten” (Psa. 123:1-2).