1, 2. Ia wehwehn en kilangwohng Siohwa?

KITAIL mi ni “ahnsou apwal oh keper” ehu. (2 Tim. 3:1) Oh mouren aramas pahn pil apwalla sang met mwohn Siohwa pahn ketin kasohrehla koasoandi suwed wet oh ketikihdo popohl mehlel nin sampah. Pwehki met, kitail en pein idek rehtail, ‘Ihs me I kin kilangwohng pwehn ale sawas oh kaweid?’ Ele kitail kin mwadangete nda, “Ong Siohwa,” oh pasapeng wet me keieu mwahu.

² Ia wehwehn en kilangwohng Siohwa? Oh ia duwen atail kak tehk mwahu me kitail kin kilikilangwohngete ih ni ahnsou me mie atail kahpwal? Mahsie, emen sounnting en Paipel kawehwehda ia uwen atail anahne kilangwohng Siohwa ni ahnsou me kitail kin anahne sawas. (Wadek Melkahka 123:1-4.) E nda me ni atail kin saradahng de kilangwohng Siohwa, kitail rasehng ladu men me kin kilangwohng eh kaun. Ia duwen? Ladu men kin kilangwohng, de koapworopworki, me eh kauno pahn kamwenge oh pil pere ih. Ahpw e pil anahne tetehk eh kauno ahnsou koaros pwehn wehwehki dahme eh kauno mwahuki ih en wia, oh eri kapwaiada. Duwehte  met, kitail anahne onopki mwahu Mahsen en Koht rahn koaros pwehn wehwehki dahme Siohwa ketin kupwurki kitail en wia, oh eri kapwaiada. Ihte ahl wet me kitail kak kamehlele me Siohwa pahn ketin sewese kitail ahnsou me kitail anahne sawas.​—Ep. 5:17.

3. Dahme kak kerempwa kitail sang atail en kilangwohng Siohwa?

³ Mendahki atail ese me kitail anahne kilangwohng Siohwa ahnsou koaros, ekei pak mie soahng kan me kak kedirepweikitailla. Ih met me wiawihong kompoakepahn Siseso Marda. Marda “kedirepwkihla wia doadoahk tohto.” (Luk 10:40-42) Ma Marda, me wia lih lelepek men, kak kedirepwkihla soahng kan mendahki Sises eh ketikette reh, kitail en dehr pwuriamweikihla atail pil kakete kedirepwla. Eri dahme kak kedirepweikitailla sang atail en kilangwohngete Siohwa? Nan iren onop wet, kitail pahn koasoiapene ia duwen wiewiahn meteikan eh kakete kedirepweikitailla. Oh kitail pahn sukuhlki ia duwen atail en kilangwohngete Siohwa.

4. Dahme kahrehda kitail ele pahn pwuriamweikihla Moses eh katihasang eh pai kaselel en pedolong nan Sapwen Inowo?

⁴ Moses kin uhdahn kilangwohng Siohwa pwehn ale kaweid. Paipel mahsanihong kitail me “e kin dadaurete ni kanengamah likamwete e kilang Meno me soh sansal.” (Wadek Ipru 11:24-27.) Paipel pil mahsanih me “sohte soukohp emen nan Israel me duwehte Moses, ih me KAUN-O kin ketin mahseniong pak tohto.” (Deud. 34:10) Ahpw mendahki Moses wia kompoakepahn Siohwa keren men, e katihasang eh pai kaselel en pedolong nan Sapwen Inowo. (Nemp. 20:12) Dahme Moses dipekelekelkihda?

5-7. Dahme wiawi mwurinte mehn Israel ko mweselsang Isip, oh dahme Moses wia?

⁵ Sohte lel sounpwong riau mwurin mehn Israel ko mweselsang Isip, pil mwohn re lel Nahna Sanai, mehkot laud wiawi. Aramas ako tepida kaulimki eh sohte pihl. Irail tepida kaulimki Moses oh uhdahn lingeringerda me kahrehda Moses en ngidingid patohwanohng Siohwa: “Maing, dahme I pahn wiahiong aramas pwukat? Re nektehn kostakai ie.” (Eks. 17:4) Siohwa eri ketikihong Moses kaweid kan ni sansal. Siohwa mahsanihong ih en ale nah sokono oh wokihki paipalapo nan Orep. Paipel mahsanih: “Moses eri wiahda mepwukat mwohn kaunen mehn Israel ko.” Pihl eri kusieisang paipalapo, mehn Israel ko kakehr nimpil, oh sohla kahpwal.​—Eks. 17:5, 6.

⁶ Paipel padahkihong kitail me Moses kahdanekihla wasao Massa, me wehwehki “Kasongosong,” oh Meripa, me wehwehki “Kaulim.” Dahme kahrehda? “Pwehki mehn Israel ko ar kaulim, oh kasongosonge KAUN-O ni ar nda, ‘KAUN-O ketin ieiang kitail, de soh?’”​—Eks. 17:7.

⁷ Ia sapwellimen Siohwa pepehm ong dahme wiawi Meripa? Mwohn silangi, wiewiahn mehn Israel ko kin duwehte uhwong ehu ong ih oh sapwellime pwuhng en kaunda, kaidehn ihte ong Moses. (Wadek Melkahka 95:8, 9.) Dahme mehn Israel ko wiahda uhdahn sapwung. Ahpw Moses wiahda dahme pwung. E kilangwohng Siohwa oh eri idawehn ni keneinei sapwellime kaweid kan.

8. Dahme wiawi ni mehn Israel ko ar kereniong lel ni imwiseklahn arail seiseiloak nan sapwtehn?

⁸ Ahpw dahme wiawi nan soangen irairohte mpen sounpar 40 mwuri? Mehn Israel ko kereniongehr lel imwiseklahn arail seiseiloak nan sapwtehn. Re lelehr wasa ehu me karanih  Kades, me kerenlahng Sapwen Inowo. Wasao pil adanekihla Meripa. * Dahme kahrehda? Pwehki mehn Israel ko pil pwurehng kaulimki eh sohte pihl. (Nemp. 20:1-5) Ahpw ahnsowo, Moses wiahda sapwung laud ehu.

9. Kaweid dahieu me Siohwa ketikihong Moses, ahpw dahme Moses wia? (Menlau kilang tepin kilel.)

⁹ Dahme Moses wia ahnsou me aramas ako uhwongada ih? E pil pwurehng kilangwohng Siohwa pwehn ale kaweid. Ahpw ahnsowo Siohwa sohte ketin mahsanihong Moses en wokih paipalapo. E ketin mahsanihong Moses en ale nah sokono, kapokonepene aramas ako limwahn paipalapo, oh eri koasoiong paipo. (Nemp. 20:6-8) Ia duwe, Moses kapwaiada met? Soh. E uhdahn lingeringerda pahn aramas ako oh wer nda: “Kumwail rong, kumwail me nan kapehd keptakailahr kan. Ia duwe, se pahn kakusieisang pihl nan paipalap wet, pwe kumwail en nim?” Ih eri wokih paipo, kaidehn pak ehute, ahpw pak riau.​—Nemp. 20:10, 11.

10. Ia duwen Siohwa eh ketin mwekidki dahme Moses wiahdao?

¹⁰ Siohwa uhdahn ketin engiengda pahn Moses. (Deud. 1:37; 3:26) Dahme kahrehda Siohwa ketin engiengda? Ehu kahrepe iei me Moses sohte peikiong kaweid kapw me Siohwa ketikihong ih.

11. Sang ni eh wokih paipalapo, dahme kahrehda Moses kakete kahrehiong mehn Israel ko en medewe me Siohwa sohte ketin wiahda manaman ehu?

¹¹ Ele pil mie ehu kahrepe me Siohwa ketin engiengda pahn Moses. Paipalap kan me mi ni keieu en Meripao uhdahn kekeluwak (granite). Sohte lipilipil uwen uk me emen pahn wokih soangen takai wet, sohte emen kak kasik me pihl pahn kusieisang. Ahpw paipalap kan me mi ni keriau en Meripao uhdahn weksang. Pali laud en paipalap ko iei soangen takai me adaneki takai pweht (limestone). Pwehki takai pweht sohte kekeluwak, pihl kin kalapw ekisekis kohlong loale oh audauda pahn pwehlo. Eri, aramas kak ale pihl sang eh pahn kapwoarehda takaio. Eri ni Moses eh wokih paipo ahpw sohte koasoiong, ia duwe, mehn Israel ko seu pahn medewe me pihlo pein kusiei, ahpw kaidehn pwehki Siohwa me ketin wiahda manamano? * Kitail sohte kak uhdahn ese ni mehlel.

12. Ia pil ehu kahrepen Siohwa eh ketin engiengda pahn Moses oh Aaron?

¹² Pil miehte ehu kahrepe me Siohwa ketin engiengda pahn Moses oh Aaron. Moses ndaiong aramas ako: “Ia duwe, se pahn kakusieisang pihl nan paipalap wet, pwe kumwail en nim?” Ni Moses eh nda “se,” ele e ndinda duwen pein ih oh Aaron. Dahme Moses nda uhdahn sohte kasalehda wahu ong Siohwa me ketin warohng ale kaping koaros pwehki manamano. Melkahka 106:32, 33 mahsanih: “Ni pwarer en Meripa aramas ako ahpw kahngiangihada KAUN-O, Moses eri pwukoahkihdi arail kahpwal ko. Re inenen kansensuwedihada kowahlap me kahrehiong eh koasoakoasoi oh sohte uhdi oh medewe dahme eh koasoia.” * (Nemp. 27:14) Moses sohte patohwanohng Siohwa wahu me E ketin warohng sapwellimanki. Siohwa ketin mahsanihong Moses oh Aaron: ‘Kumwa uhwong ei mahsen kan nan  Meripa.’ (Nemp. 20:24) Met uhdahn wia dihp laud ehu!

13. Dahme kahrehda Siohwa eh ketin kaloke Moses wia mehkot pwung oh pahrek?

¹³ Nin duwen sounkaweid kei nanpwungen sapwellimen Siohwa aramas akan, Moses oh Aaron pwukoahki soahng tohto. (Luk 12:48) Mwoweo, Siohwa sohte ketin mweidada mehn Israel ko koaros en pedolong nan Sapwen Inowo pwehki re uhwongada ih. (Nemp. 14:26-30, 34) Eri e pwung oh pahrek me ni Moses eh sapeik, Siohwa ketin kaloke ih ni ahlohte. Duwehte irail teiko me sapeik, Moses sohte mweimweida en iang pedolong nan Sapwen Inowo.

14, 15. Dahme kahrehda Moses sapeikiong Siohwa?

¹⁴ Dahme kahrehiong Moses en sapeikiong Siohwa? Pwurehng kilang dahme Melkahka 106:32, 33 mahsanih: “Ni pwarer en Meripa aramas ako ahpw kahngiangihada KAUN-O, Moses eri pwukoahkihdi arail kahpwal ko. Re inenen kansensuwedihada kowahlap me kahrehiong eh koasoakoasoi oh sohte uhdi oh medewe dahme eh koasoia.” Eri mendahki mehn Israel ko uhwongada Siohwa, pein Moses me inenen nsensuwedla de lingeringerda. E sohte kaunda eh pepehm kan ahpw e koasoi ni eh sohte medewe duwen imwilahn eh koasoi ko.

¹⁵ Moses uhdihsang eh kilangwohng Siohwa pwehki e mweidohng wiewiahn meteikan en kedirepwehla ih. Ni keieun ahnsou me aramas ako kaulimki eh sohte pihl, Moses wiahda dahme pwung. (Eks. 7:6) Ahpw mwein e pwangada oh lingeringerda pwehki mehn Israel ko uhwongada erein sounpar tohto. Moses pil kakete medemedewehte duwen eh pepehm kan ahnsowo ahpw kaidehn ia duwen eh pahn kak kawauwihala Koht.

16. Dahme kahrehda kitail anahne medewe duwen dahme Moses wiahdao?

¹⁶ Ma mehkot kak kedirepwehla soukohp lelepek men duwehte Moses oh kahrehda en dipada, met pil kak wiawihong kitail. Moses kereniong pedolong nan Sapwen Inowo, oh kitail pil kereniongehr en pedolong nan sampah kapwo. (2 Pit. 3:13) Uhdahn kitail sohte men katihasang pai kaselel tohrohr wet. Ahpw pwehn pedolong nan sampah kapwo, kitail anahne pousehlahte kilangwohng Siohwa oh ahnsou koaros peikiong ih. (1 Sohn 2:17) Dahme kitail kak sukuhlkihsang sapwung me Moses wiahdao?

17. Dahme pahn sewese kitail en dehr dukula pahn atail lingeringer?

¹⁷ Dehr dukula pahn omw lingeringer. Ekei pak mie soangen kahpwal kei me kin pwurupwurehng lelohng kitail. Ahpw Paipel mahsanih: “Kitail en dehr uhdihsang wia dahme mwahu, pwe ma kitail sohte pahn pwangahkihda, kitail pahn dolung ni ahnsou me kileldiong.” (Kal. 6:9; 2 Des. 3:13) Ni mehkot de emen eh pwurupwurehng kalingeringerihada kitail, ia duwe, kitail kin medewe mahs mwohn atail koasoi? Kitail kin kaunda atail lingeringer? (Lep. Pad. 10:19; 17:27; Mad. 5:22) Ni meteikan ar kasonge kitail, kitail anahne sukuhlki en “mweidohng engieng en Koht,” de mweidohng Siohwa en ketin kasalehda sapwellime engieng. (Wadek Rom 12:17-21.) Ia wehwehn met? Kitail en dehr lingeringerda, ahpw kitail en kanengamah oh awih Siohwa en ketin apwalihala atail kahpwalo ni ahnsou me e ketin medewe me anahn. Ma kitail song en dupukohng emen suwed ahpw sohte kilangwohng Siohwa, kitail sohte pahn wauneki ih.

18. Dahme kitail anahne tamataman duwen en idawehn kaweid kan?

 ¹⁸ Idawehn kanahieng kaweid kapw kan. Ia duwe, kitail kin idawehn ni lelepek kaweid kapw kan me Siohwa ketikihong kitail? Kitail en dehr wiewiahte soahng kan ni soangen ahlohte me kitail kin wia mahs. Ahpw kitail en mwadang idawehn kaweid kapw koaros me Siohwa kin ketikihda ni eh ketin doadoahngki sapwellime pwihn. (Ipru 13:17) Pil ehu, kitail anahne kanahieng en dehr “daulihala soahng kan me ntingdier.” (1 Kor. 4:6) Ni atail kin idawehn kanahieng sapwellimen Siohwa kaweid kan, kitail kin kilikilangwohngete ih.

19. Ia duwen atail kak dehr mweidohng sapwung en meteikan en kauwehla atail nanpwungmwahu rehn Siohwa?

¹⁹ Dehr mweidohng sapwung en meteikan en kauwehla omw nanpwungmwahu rehn Siohwa. Ma kitail kin pousehlahte kilangwohng Siohwa, kitail sohte pahn kauwehla atail nanpwungmwahu reh de lingeringerda pwehki dahme meteikan wiahda. Met uhdahn mehlel ma, duwehte Moses, kitail ahneki ekei pwukoa nan sapwellimen Koht pwihn. Mehlel, emenemen kitail anahne doadoahk laud oh peikiong Siohwa pwe kitail en komourla. (Pil. 2:12) Ahpw, ma kitail pwukoahki soahng tohto, Siohwa pahn ketin kasik kitail en wia mehn kahlemeng mwahu. (Luk 12:48) Ahpw ma kitail uhdahn poakohng Siohwa, sohte mehkot kak kadipikelekelih kitail de katohre kitail sang sapwellime limpoak.​—Mel. 119:165; Rom 8:37-39.

20. Dahme kitail en koasoanehdi teng en wia?

²⁰ Kitail mi ni ahnsou apwal oh keper ehu. Eri e inenen kesempwal kitail en kilangwohngete Siohwa, me kin ketin kakaun nanleng, pwe kitail en wehwehki dahme e ketin kupwurki kitail en wia. Kitail en dehr mweidohng wiewiahn meteikan en kauwehla atail nanpwungmwahu rehn Siohwa. Dahme wiawihong Moses kin padahkihong kitail mehn kasukuhl kesempwal ehu. Kitail en dehr mwadang lingeringerda ni meteikan ar wiahda sapwung, ahpw kitail en koasoanehdi teng en ‘patohwan saradahng Siohwa, e lao pahn ketin kupwurei kitail.’​—Mel. 123:1, 2.