1, 2. San a wani taki fu luku Yehovah?

WI E libi na ini ’muilek ten di tranga fu pasa’ (2 Tim. 3:1). Ma fosi a nyun grontapu doro pe freide o de na ala sei, a libi o kon moro muilek srefi. Dati meki wi musu aksi wisrefi: ’Pe mi e go suku yepi nanga rai?’ Kande yu ben o taki wantewante „na Yehovah”, èn dati bun.

² San a wani taki fu luku Yehovah? Fa wi kan sorgu taki wi e tan luku en te wi abi problema? Hondrohondro yari pasa, wan psalm skrifiman ben skrifi fu san ede a prenspari fu luku Yehovah te wi abi yepi fanowdu. (Leisi Psalm 123:1-4.) A ben taki dati wi de neleki futuboi di e luku san en masra o du. Fu san ede a taki dati? We, wan futuboi e frutrow tapu en masra taki a o gi en nyanyan èn taki a o kibri en. Ma boiti dati, a e luku fu si san en masra wani taki a musu du èn a e du dati tu. Na so a de tu taki wi musu studeri Gado Wortu ibri dei fu kon sabi san Yehovah wani taki wi musu du èn wi musu du dati. Te wi e du den sani disi, dan wi kan de seiker taki Yehovah o yepi wi te wi de na nowtu.​—Ef. 5:17.

3. San kan tapu wi fu luku Yehovah?

 ³ Aladi wi sabi taki wi musu luku Yehovah, toku son leisi sani e tapu wi fu du dati. Na dati ben pasa tu nanga Marta, wan bun mati fu Yesus. Di Yesus kon na en oso a ben e „prakseri tra sani, fu di a ben abi wan lo wroko fu du” (Luk. 10:40-42). Efu so wan sani ben kan pasa nanga Marta aladi Yesus ben de leti drape, dan a no de fu taki dati a kan pasa nanga wi tu. San kan tapu wi fu luku Yehovah? Na ini na artikel disi wi o si fa den sani di trawan e du kan tapu wi fu du dati. Wi o leri tu fa wi kan tan luku Yehovah.

4. Fu san ede wi no ben o fruwakti en taki Moses lasi a grani fu go na ini a Pramisi Kondre?

⁴ Moses ben de wan man di ben gwenti suku rai na Yehovah. Dati meki Bijbel e taki dati „a ben e si a sma di wi no man si nanga wi ai”. (Leisi Hebrewsma 11:24-27.) Wi e leisi tu taki „noiti so wan profeiti leki Moses ben de na ini Israel. Yehovah ben sabi en heri bun” (Deut. 34:10). Ma aladi Moses ben de so wan bun mati fu Yehovah, toku a lasi a grani fu go na ini a Pramisi Kondre (Num. 20:12). Sortu fowtu Moses meki?

5-7. Sortu problema ben de syatu baka di den Israelsma komoto na Egepte èn san Moses du?

⁵ Syatu baka di den Israelsma komoto na Egepte, wan seryusu problema ben de. A no ben doro tu mun srefi èn den Israelsma no ben doro Sinai-bergi ete di den bigin krutukrutu taki watra no ben de. Den ben e tan krutu gi Moses taki te fu kaba Moses bari kari Yehovah. A taki: „San mi musu du nanga a pipel disi? Den de fu trowe ston na mi tapu fu kiri mi!” (Eks. 17:4) Yehovah taigi Moses san a musu du. A ben musu teki en tiki èn naki tu leisi na tapu a ston di de na Horeb, dan watra ben o komoto na ini a ston. Bijbel e taki: „Moses du dati na fesi den owru man fu Israel.” Den Israelsma dringi watra teleki a sari den èn na so a problema ben lusu.​—Eks. 17:5, 6.

⁶ Wi e leisi moro fara taki Moses „kari a presi Masa nanga Meriba, fu di den Israelsma ben krutukrutu, èn fu di den ben tesi Yehovah di den taki: ’Yehovah de na wi mindri trutru?’” (Eks. 17:7) Den nen disi fiti fu di den wani taki „Tesi” nanga „Krutukrutu”.

⁷ Fa Yehovah ben denki fu a sani di pasa na Meriba? A ben taki dati a no teige Moses den Israelsma ben opo densrefi, ma na teige en. (Leisi Psalm 95:8, 9.) A sani di den Israelsma du no ben bun srefisrefi. A leisi disi Moses du a yoisti sani. A luku Yehovah èn a du san Yehovah taigi en.

8. San pasa syatu fosi den Israelsma go na ini a Pramisi Kondre?

⁸ Ma sowan 40 yari baka dati, wan srefi sortu sani pasa. Den Israelsma ben de fu go na ini a Pramisi Kondre. Den ben de na a presi di kisi a nen Meriba bakaten. Ma disi na wan tra Meriba. A ben de na Kades di ben de krosibei fu a Pramisi Kondre. *  Den Israelsma bigin krutu baka taki watra no ben de (Num. 20:1-5). Ma a leisi disi Moses meki wan bigi fowtu.

9. San Yehovah taigi Moses fu du, ma san Moses du? (Luku a prenki na a bigin fu na artikel.)

⁹ San Moses du di den Israelsma bigin krutu a leisi disi? A suku rai na Yehovah baka. Ma disi leisi Yehovah no ben taigi en fu naki a ston. A taigi en fu teki en tiki, fu tyari a pipel kon na wán na a bergi èn fu taki nanga a stonbergi (Num. 20:6-8). Ma Moses no taki nanga a stonbergi. A ben atibron èn a bari gi a pipel: „Un tranga-ede sma, arki mi! Unu wani taki wi puru watra fu a ston disi fu meki unu dringi?” Baka dati a naki a stonbergi. A no naki en wán leisi nomo, ma tu leisi.​—Num. 20:10, 11.

10. San Yehovah du di Moses naki a stonbergi?

¹⁰ Yehovah kisi bigi atibron (Deut. 1:37; 3:26). Fu san ede a ben atibron so tapu Moses? Wan tu reide de. A fosiwan na taki Moses no ben du san Yehovah ben taigi en.

11. Di Moses naki a stonbergi, dan fa dati ben kan meki den Israelsma denki taki a no Yehovah ben du wan wondru?

¹¹ Luku san kan de wan tra reide. Den stonbergi na ini a kontren fu a fosi Meriba meki fu tranga graniet-ston. Awinsi o tranga yu naki a ston disi, nowan sma e fruwakti taki watra o komoto na ini. Ma den bergi fu a tra Meriba no ben de fu tranga ston. Fu di den ben safu, meki watra ben man boro go na ini den èn den ben hori watra. Te sma ben boro wan olo na ini den ston disi, den ben man feni watra. Sobun, san den Israelsma ben kan bigin denki di Moses naki a stonbergi na presi fu taki nanga en? Den ben kan feni taki a watra ben de kaba na ini a ston èn taki Yehovah no ben du wan wondru. * Wi no sabi seiker fa den ben e denki.

12. San kan de wan tra reide fu san ede Yehovah ben atibron tapu Moses nanga Aron?

¹² Ma ete wan reide kan de fu san ede Yehovah ben atibron tapu Moses nanga Aron. Luku san Moses taigi a pipel: „Unu wani taki wi puru watra fu a ston disi fu meki unu dringi?” Di Moses taki „wi”, dan kande a ben taki fu en nanga Aron. Disi e sori taki Moses no sori lespeki gi Yehovah fu di a no gi Yehovah ala a grani gi a wondru di a du. Psalm 106:32, 33 e taki: „Den meki Moses ati kon bron nanga den na Meriba pe watra de, so taki fu den ede sani no waka bun gi Moses. Den meki Moses ati kon bron srefisrefi, so taki a bigin taki dondon sani nanga en mofo” (Num. 27:14). * Moses no gi Yehovah a grani di a ben musu kisi. Yehovah taigi Moses nanga Aron: „Unu ben trangayesi mi” (Num. 20:24). Dati ben de wan seryusu sondu!

13. Fu san ede a strafu di Yehovah ben gi Moses ben fiti?

 ¹³ Fu di Yehovah ben poti Moses nanga Aron leki fesiman fu en pipel, meki a ben fruwakti furu fu den (Luk. 12:48). Sowan 40 yari na fesi wan bigi grupu Israelsma no ben kisi na okasi fu go na ini a Pramisi Kondre fu di den ben opo densrefi teige Yehovah (Num. 14:26-30, 34). Sobun, a ben fiti taki Moses ben kisi a srefi strafu di en opo ensrefi teige Yehovah. Neleki den tra sma di ben opo densrefi teige Yehovah, a no ben mag go na ini a Pramisi Kondre.

14, 15. San meki taki Moses trangayesi Yehovah?

¹⁴ San meki taki Moses trangayesi Yehovah? Luku baka san Psalm 106:32, 33 e taki: „Den meki Moses ati kon bron nanga den na Meriba pe watra de, so taki fu den ede sani no waka bun gi Moses. Den meki Moses ati kon bron srefisrefi, so taki a bigin taki dondon sani nanga en mofo.” Sobun, aladi den Israelsma krutukrutu teige Yehovah, na Moses na a sma di kisi bigi atibron. A lasi ensrefi èn a bigin taki sani sondro fu prakseri den bakapisi.

¹⁵ Moses gi pasi taki den sani di trawan du, puru en prakseri na san prenspari. A no ben luku Yehovah moro. A fosi leisi di a pipel ben krutu fu watra, Moses du a yoisti sani (Eks. 7:6). Ma kande Moses ben atibron fu di a ben kon weri nanga den Israelsma di ben opo densrefi teige Yehovah omeni yari kaba. A kan taki Moses ben denki den firi fu en nomo na presi taki a ben luku fa a ben kan gi Yehovah grani.

16. Fu san ede wi musu prakseri a sani di Moses du?

¹⁶ Efu wan reti-ati profeiti leki Moses ben kan meki so wan fowtu, dan makelek a kan pasa nanga wi tu. Neleki fa Moses ben de fu go na ini a Pramisi Kondre, na so wisrefi de fu go na ini a nyun grontapu (2 Petr. 3:13). Wi no wani lasi a moi grani dati. Ma efu wi wani go na ini a nyun grontapu, dan wi musu tan luku Yehovah èn wi musu tan du a wani fu en (1 Yoh. 2:17). San wi e leri fu a fowtu di Moses meki?

17. San o yepi wi fu no lasi wisrefi te wi atibron?

¹⁷ No lasi yusrefi. Son leisi wi e kisi fu du nanga a srefi problema ibri tron baka. Ma Bijbel e taki: „Wi no musu tapu fu du san bun, bika na a reti ten wi sa koti den froktu efu wi no kon weri” (Gal. 6:9; 2 Tes. 3:13). Efu ibri tron baka wan sma e du wan sani di wi no lobi, dan san wi e du? Wi e taki sondro fu denki? Wi e hori wisrefi? (Odo 10:19; 17:27; Mat. 5:22) Te wan sma e du wan sani di kan meki wi lasi wisrefi, dan wi musu „libi en meki Gado puru atibron na en tapu”. (Leisi Romesma 12:17-21.) San dati wani taki? We, na presi taki wi atibron, wi o wakti nanga pasensi tapu Yehovah fu du wan sani. Efu wi ben o pai ogri fu ogri na presi fu luku Yehovah, dan wi no ben o sori lespeki gi en.

18. Fa wi kan sorgu taki wi e du sani soleki fa Yehovah wani?

 ¹⁸ Du sani soleki fa na organisâsi e sori. Wi e luku bun taki wi e du sani soleki fa Yehovah wani? Wi no musu du sani soleki fa wi gwenti èn wi no musu draidrai fu du sani soleki fa Yehovah en organisâsi e sori wi (Hebr. 13:17). Boiti dati, wi musu luku bun taki wi „no du sani di no skrifi na ini den Santa Buku” (1 Kor. 4:6). Efu wi e du sani soleki fa Yehovah wani, dan wi e sori taki wi e luku en.

19. Fa wi kan sorgu taki den fowtu fu trawan no e pori wi matifasi nanga Yehovah?

¹⁹ No meki den fowtu fu trawan pori yu matifasi nanga Yehovah. Efu wi e luku Yehovah, dan wi no o meki taki den sani di trawan du, pori wi matifasi nanga Yehovah noso meki wi kisi bigi atibron. A sani disi prenspari, spesrutu efu wi abi frantwortu na ini na organisâsi, neleki Moses. A no de fu taki dati wi alamala musu wroko tranga èn wi alamala musu gi yesi na Yehovah efu wi wani kisi frulusu (Fil. 2:12). Toku a de so taki o moro frantwortu wi abi, o moro Yehovah e fruwakti fu wi (Luk. 12:48). Ma efu wi lobi Yehovah trutru, dan noti o meki wi naki futu èn noti o prati wi fu a lobi fu en.​—Ps. 119:165; Rom. 8:37-39.

20. San wi musu du ala ten?

²⁰ Na ini den muilek ten disi, wi musu opo wi ede luku Yehovah „di e libi na ini hemel”, so taki wi kan kon sabi san a wani taki wi du. Noiti wi musu gi pasi taki den sani di trawan du e pori wi matifasi nanga Yehovah. A sani di pasa nanga Moses e sori wi o prenspari disi de. Na presi taki wi e lasi wisrefi te trawan e meki fowtu, meki wi „luku Yehovah wi Gado, teleki a du bun gi wi”.​—Ps. 123:1, 2.